Abazali bami basuka e-Estonia ngesikhathi seMpi Yomhlaba Yesibili bathuthela eGermany, lapho engazalelwa khona. Ngathi sengizelwe baqalisa ukulungiselela ukuthuthela eCanada. Saqalisa sihlala eduze kwedolobho le-Ottawa, eCanada. Sasihlala endlini encane endaweni eyayilezilugu zenkukhu. Sasingabayanga sibili kodwa sasingawasweli amaqanda okudla ekuseni.

Ngelinye ilanga kwafika oFakazi bakaJehova babalela umama iSambulo 21:3, 4. Akufundayo kwamthinta kakhulu waqalisa ukukhala. Umama lobaba baqhubeka befunda iBhayibhili njalo ngemva kwesikhatshana nje basebekulungele ukubhabhathizwa.

Abazali bami babengasazi kangako isiNgisi kodwa babeliqakathekisa kakhulu iqiniso. Ubaba wayesebenza ubusuku bonke lapho okwakutshiswa khona insimbi okuthiwa yi-nickel eSudbury, e-Ontario. Lanxa kunjalo iMigqibelo yonke wayengayekeli ukuhamba lami lomnawami okuthiwa nguSylvia ekutshumayeleni. Kanti njalo iviki ngayinye sasitaditsha iNqabayokulinda siyimuli. Umama lobaba bangincedisa ukuthi ngithande uNkulunkulu. Lokho kwangenza ngazinikela kuJehova ngileminyaka engu-10 ngo-1956. Nxa ngicabanga ngendlela ababemthanda ngayo uJehova kuyangenza ngifune ukuqhubeka ngimkhonza okwempilo yami yonke.

Ngathi ngiqeda isikolo kwaba lezinto ezangiphambanisayo ekukhonzeni kwami uJehova. Ngangicabanga ukuthi nxa ngingaba liphayona angisoze ngithole imali eyeneleyo yokwenza lokho engangikufisa, ukugada indizamtshina ngibhode wonke umhlaba. Ngathola umsebenzi wokuba nguDJ komunye umsakazo werediyo futhi ngangiwuthanda kakhulu. Kodwa ngangisebenza ntambama, okwakusenza ukuthi ngihlale ngilova emihlanganweni yebandla futhi ngasengilabangane ababengamthandi uNkulunkulu. Kodwa ekucineni umzwangedwa wami owawuqeqetshwe liBhayibhili wangenza ngatshintsha.

Ngathuthela e-Oshawa, e-Ontario. Sengilapho ngahlangana loRay Norman lomnawakhe oyinkazana okuthiwa nguLesli lamanye amaphayona njalo bangamukela kuhle kakhulu. Babethokoza sibili futhi lokho kwangenza ngacabangisisa ngengangifuna ukukwenza empilweni. Bangikhuthaza ukuthi ngiphayone, ngasengiqalisa ngoSeptember 1966. Ngangithokoza futhi konke kwakuhamba kuhle kodwa kwasekuzakwenzakala izinto engangingazikhangelelanga ezazizatshintsha impilo yami.

Ngathi ngisesesikolo ngafila ifomu lokuyasebenza eBhetheli eToronto, eCanada. Sengiqalisile ukuphayona  ngacelwa ukuthi ngizosebenza eBhetheli okweminyaka emine. Kodwa ngangisesaba ukuhamba eBhetheli ngoba ngasengimthanda kakhulu uLesli. Ngangicabanga ukuthi ngingahamba angisoze ngiphinde ngimbone. Ngathandaza ngisathandaza ngendaba le ngasengicina ngikhetha ukuyasebenza eBhetheli kodwa ngadana kakhulu ngesikhathi ngivalelisa uLesli.

Ngaqala ngisenza umsebenzi wokuwatsha eBhetheli, ngokuya kwesikhathi ngaba ngunobhala. ULesli yena waba liphayona eliqakathekileyo eGatineau, eQuebec. Ngangihlala ngizibuza ukuthi unjani khonale lokuthi ngangikhethe ukwenza okuyikho yini. Ngemva kwalokho kwenzakala into engangingayikhangelelanga empilweni yami. URay umnewabo kaLesli wabizwa eBhetheli futhi wafika wahlala lami. Lokhu kwenza ubungane bami loLesli baqalisa futhi. Satshada ngelanga lami lokucina lokusebenza eBhetheli mhlaka 27 February, 1971.

Mina loLesli sacelwa ukuthi siyengena lebandla lolimi lwesiFrench eQuebec. Ngemva kweminyaka emilutshwana ngacelwa ukuthi ngiyekuba ngumbonisi wesiqinti futhi lokho kwangimangalisa kakhulu njengoba ngangileminyaka engu-28. Ngangicabanga ukuthi ngisesemncane lokuthi ngeke ngenelise ukwenza umsebenzi lo kodwa amazwi akuJeremiya 1:7, 8 angikhuthaza. Lanxa kunjalo uLesli wayeke waba sengozini zemota futhi wayelohlupho lokungalali kuhle yikho sasicabanga ukuthi sasingeke senelise ukuhambela. Kodwa uLesli wathi, “Akumelanga sizame yini njengoba kunguye uJehova osinike umsebenzi lo?” Saqalisa ukuhambela futhi sakholisa ukwenza umsebenzi lo okweminyaka engu-17.

Ngesikhathi ngingumhambeli ngangilemisebenzi eminengi. Ngangisiswela lesikhathi eseneleyo sokuba loLesli. Kodwa kulesifundo okwakusamele ngisifunde. Ngelinye ilanga ekuseni kungoMvulo ibhera yomnyango yakhala. Ngathi ngifika emnyango ngabona kungelamuntu kodwa kwakulebhasikithi eyayilelembu, lezithelo, letshizi, lamabhanzi, lewayini, lamaglasi, lephepha elalibhalwe ukuthi, “Hamba uyetshaywa ngumoya lomkakho.” Mhlalokho kwakutshaya umoya nje lelanga lalikhona. Kodwa ngachasisela uLesli ukuthi ngangilezinkulumo okwakumele ngizilungiselele, ngakho ngangingeke ngenelise ukuhamba. Wazwisisa lanxa wayengathi udanile. Kodwa ngathi sengihlezi etafuleni yami umzwangedwa waqalisa ukungihlupha. Ngacabanga ngamazwi aku-Efesu 5:25, 28. Kwakungathi uJehova uyangikhumbuza ukuthi kumele ngibe lendaba lomkami. Ngathandaza ngasengisithi kuLesli, “Asihambe” futhi lokho kwamthabisa. Sangena emoteni saya kwenye indawo enhle eseceleni komfula safika sendlala ilembu khonapho. Lelo kwaba ngelinye lamalanga esawakholisa kakhulu empilweni yethu. Kanti njalo ngasithola lesikhathi sokulungiselela inkulumo zami.

Sakholisa ukuhambela iziqinti ezinengi kusukela eBritish Columbia kuze kuyefika eNewfoundland. Isifiso sami engangilaso ngisasemncane esokubona izindawo ezinengi sasesigcwaliseka. Ngangike  ngicabange ngokuya esikolo seGiliyadi kodwa ngangingakufisi ukuyakuba ngumnali kwamanye amazwe. Ngangibona angani ukuba ngumnali kulabantu bakho mina ngangingeke ngikwenelise. Okunye engangikwesaba yikuthi sasingahanjiswa elizweni elise-Africa elalingabe lilemikhuhlane kumbe impi. Ngangibona angani lapho engangikhona yikho okwakungifanele.

Ngo-1992 oFakazi bakaJehova baqalisa ukutshumayela bekhululekile emazweni ayeke abuswa yiSoviet Union. Ngakho sabuzwa ukuthi singafuna yini ukuya e-Estonia siyekuba ngamamishinari. Samangala kakhulu kodwa sathandaza ngendaba le. Saphinda sacabanga sathi, ‘Akumelanga sizame yini nxa kunguJehova osinika umsebenzi?’ Savuma ukuhamba ngaziduduza ngokuthi, ‘Kungcono asiyi e-Africa.’

Sahle saqalisa ukufundela ulimi lwe-Estonia. Ngemva kwezinyanga ezilutshwana siselizweni lelo sacelwa ukuthi siyehambela. Sasizabe sihambela amabandla lamaqembu angu-46 asemazweni amathathu eBaltic kanye laseKaliningrad, eRussia. Lokho kwasekusitsho ukuthi kwasekumele sifundele ulimi lwesiLatvia lolweLithuania lesiRussia. Kwakunzima sibili. Lanxa kunjalo abafowethu labodadewethu kwakubathabisa ukusibona sifundela ulimi lwabo futhi babesincedisa. Ngo-1999 kwaba lewofisi yegatsha e-Estonia futhi ngacelwa ukuthi ngibe kukhomithi yegatsha lomfowethu uToomas Edur, loLembit Reile loTommi Kauko.

Sazana laboFakazi abanengi ababeke bahanjiswa eSiberia. Lanxa babephathwa kubi ngesikhathi bebotshiwe futhi bekhatshana kakhulu lezimuli zabo kabazange bazonde. Baqhubeka bethokoza njalo bekhuthele ekutshumayeleni. Lokho kwasinceda sabona ukuthi singenelisa ukuqinisela ezimeni ezinzima futhi siqhubeke sithokoza.

Sasebenza nzima okweminyaka eminengi futhi sasingasitholi kangako isikhathi sokuphumula, yikho uLesli waqalisa ukuhlala ezizwa ediniwe. Saphuza ukunanzelela ukuthi ukudinwa kwakhe lokhu kwakubangelwa ngumkhuhlane okuthiwa yi-fibromyalgia. Sasesihlala sicabanga ukubuyela eCanada. Sathi sicelwa ukuthi siyengena isikolo samakhomithi amagatsha ePatterson, eNew York, e-U.S.A. ngangibona angani sasingeke senelise ukuya khona. Sathandaza ngenhliziyo yonke kanengi sasesivuma ukuhamba. UJehova wasibusisa ngoba uLesli welatshwa ngesikhathi sisesikolo lesi. Lokho kwenza saqalisa futhi ukuzisebenzela kuhle.

Ngelinye ilanga ntambama kungo-2008 sise-Estonia ngafonelwa ngabasemawofisini ethu amakhulu becela ukuthi nxa kuvuma siye eCongo. Ngaphelelwa ngoba kwakumele ngibanike impendulo ngelanga elilandelayo. ULesli angimtshelanga ngalelolanga ngoba ngangisazi ukuthi wayengasoze abuquthe. Kodwa yimi engingalalanga, ngithandaza ngitshela uJehova ngezinto ezazingikhathaza nge-Africa.

Ngelanga elilandelayo ngamtshela uLesli, sasesisithi: “UJehova usicela ukuthi siye e-Africa. Sikwazi njani ukuthi asisoze senelise ukusebenza khonale  sikholise thina singazange sike sizame?” Yikho ngemva kweminyaka engu-16 sise-Estonia sangena endizamtshineni saya eKinshasa, eCongo. Iwofisi yegatsha yayinhle, kulezihlahla lamaluba amahle futhi endaweni yakhona kwakuthule cwaka. Eyinye into yakuqala uLesli ayifaka endlini yethu kwakulikhadi ayeligcine kusukela sisuka eCanada. Ikhadi lelo lalibhalwe ukuthi, “Kholisa loba ngaphi lapho ofakwe khona.” Saqalisa ukuthokoza sesihlangane labazalwane, sesiqhuba izifundo zeBhayibhili futhi sesibubona ubunandi bokuba ngamamishinari endaweni le. Ngokuya kwesikhathi sathola isibusiso sokuvakatshela amagatsha angaba ngu-13 ase-Africa. Lokho kwenza sabona imihlobo yabantu etshiyatshiyeneyo. Ngasengingasakwesabi ukuba se-Africa futhi sambonga uJehova ngokusiletha khona.

ECongo saqalisa ukudla ezinye izinto esasicabanga ukuthi asingeke safa sazidla, ngokwesibonelo izibungu. Kodwa sathi sibona abazalwane bekholisa ukudla izinto lezi sazama ukuzidla njalo sazithanda.

Sahamba empumalanga kwelizwe, lapho okwakulamaqembu ayehlamukela uhulumende ehlasela abantu, elimaza abesifazana labantwana. Sasikhuthaza abafowethu labodadewethu futhi sibaphathela izinto ababeziswela. Abazalwane abanengi babeswela sibili kodwa kwasithinta ukuthi babengathandabuzi ukuthi abafileyo bazavuka. Okunye okwasithintayo yikuthi babemthanda uJehova njalo beqotho enhlanganisweni yakhe. Ababekwenza kwasikhuthaza ukuthi sicabangisise ngokuthi kungani sikhonza uJehova futhi siqinise ukholo lwethu. Abanye abafowethu basala bengasela imizi yabo futhi lezilimo zabo zasezitshabalalisiwe. Lokhu kwangenza ngabona ukuthi izinto esilazo zinganyamalala ngesikhatshana nje kodwa okuqakatheke kakhulu yikuhlala sizibekele inotho ezulwini. Lanxa abazalwane labo babethwele amagabha avuzayo kwakukalutshwana ukubezwa bekhalakhala. Lokho kwasinceda ukuthi silwisane lenhlupho zethu ngesibindi futhi singadani kakhulu nxa singezwa kuhle.

Sisalibele kwenzakala okunye esasingakukhangelelanga. Sacelwa ukuthi siye egatsheni leHong Kong. Sasingakaze siziphuphe sise-Asia. Kodwa savuma ukuhamba ngoba sasesibonile ukuthi uJehova uNkulunkulu wethu olothando uyasincedisa kuyo yonke  imisebenzi asipha yona. Ngo-2013 zehla ezimathonsi sesivalelisa abangane bethu esasibathanda kanye le-Africa enhle, singazi ukuthi elakusasa lisiphatheleni.

IHong Kong yayitshiyene kakhulu lalapho esasivela khona ngoba kwakulidolobho elilabantu abanengi kakhulu abavela ezindaweni ezitshiyeneyo zomhlaba. Ulimi lwesiTshayina lwalunzima kakhulu. Abazalwane basemukela ngazo zombili futhi sasikuthanda lokudla kwaleyondawo. Umsebenzi wawulokhu usiba mnengi yikho kwasekufuneka ezinye izakhiwo kodwa zasezidula okwamagama. IQula Elikhokhelayo laselikubona kungcono ukuthi lithengise izakhiwo zegatsha ezinengi, umsebenzi ubususenziwa kwenye indawo. Kungakayi ngaphi sahanjiswa eSouth Korea ngo-2015 futhi yikho lapho esilokhu sikhona. Kunzima ukuthi sifundele ulimi lwesiKorea kodwa kuyasiduduza ukuthi lanxa sisaselomango, abafowethu labodadewethu bathi siyazama.

Akulula ngaso sonke isikhathi ukuba labangane kodwa sananzelela ukuthi nxa singanxusa abanye ukuthi bazosivakatshela siyaphangisa ukubazi ngcono. Sesibone ukuthi silezinto ezinengi esihambelana ngazo labazalwane njalo uJehova wasidala ngendlela emangalisayo. Siyenelisa ukuvula izinhliziyo zethu sithande abangane abanengi kakhulu.—2 Khor. 6:11.

Sifunde ukuthi kumele sibone abanye abantu ngendlela uJehova ababona ngayo lokuthi sidinge okutshengisa ukuthi uJehova uyasithanda lokuthi uyasikhokhela. Nxa sasizizwa sidanile kumbe sesizibuza ukuthi abanye bayasithanda yini, sasiphinda ukubala amakhadi kanye lezincwadi esasizithunyelwa ngabangane bethu. Sizibonele ngawethu indlela uJehova abephendula ngayo imithandazo yethu, esiqinisa futhi esiduduza.

Eminyakeni yonke le, mina loLesli sifunde ukuthi kuqakathekile ukuthi sizinike isikhathi sokuba ndawonye kungelani lokuthi silemisebenzi eminengi okumele siyenze. Okunye esesikufundile yikuthi kwezinye izikhathi ungazihleka nxa uphambanisile ufundela olunye ulimi. Kanti njalo nsuku zonke ebusuku siyazama ukudinga eyinye into esiyikholisileyo esingabonga ngayo uJehova.

Iqiniso elikhona yikuthi ngangibona angani ngeke ngibe limishinari kumbe ngihlale kwamanye amazwe. Kodwa kungithokozisile ukufunda ukuthi nxa uJehova ekuncedisa, akulalutho ongehluleka ukulwenza. Ngikhumbula amazwi omphrofethi uJeremiya athi: “Wangiyenga Jehova, ngayengeka.” (Jer. 20:7; amabala angaphansi.) Usiphe izinto ezinengi kakhulu ezinhle ebesingazikhangelelanga, lezibusiso ezinengi ebesingazicabangeli waze wagcwalisa lesifiso sami sokuvakatsha ngendizamtshina. Sesigade indizamtshina sisiya ezindaweni ezinengi engangingakaze ngiziphuphe ngisiya kuzo ngisesemncane, sivakatshela amagatsha amanengi emazweni atshiyeneyo. Kuyo yonke imisebenzi ebengiyiphiwa ngiyambonga kakhulu uLesli ngoba ubengisekela ngenhliziyo yonke.

Sihlala sizikhumbuza ukuthi imisebenzi esiyenzayo siyenzela bani lokuthi kungani siyenza. Izibusiso esizikholisayo khathesi ziyinzwisa yalokho esizakukholisa sesiphila phakade, lapho uJehova ‘azavula isandla sakhe asuthise izifiso zakho konke okuphilayo.’—Hubo. 145:16.