1-2. Yibuphi ubunzima esibubonayo obuhambelana lobukaLothi?

 EMHLABENI lo abantu abanengi abaziphathanga. Nxa sibona lokho abakwenzayo sizwa ngendlela uLothi ayezizwa ngayo. ‘Wayekhathazeke kakhulu ngokuxhwala kwabantu ababengelamthetho’ ngoba wayekwazi ukuthi uyise osezulwini uyabazonda kakhulu abantu abaziphatha kubi. (2 Phet. 2:7, 8) ULothi kazange alingisele abantu ababeziphatha kubi ayephila labo ngenxa yokuthi wayemthanda uNkulunkulu futhi emesaba. Lathi lamuhla siphila labantu abangelandaba lokuthi uJehova uthi siziphathe njani. Kodwa singaqhubeka simsulwa nxa singahlala simthanda uNkulunkulu futhi simesaba.—Zaga. 14:2.

² UJehova uyasincedisa ukuthi senze njalo futhi asikhuthaze esebenzisa ibhuku leZaga. Wonke amaKhristu, amadoda labesifazana, abadala labatsha, bangancedakala kakhulu nxa bangahlola iseluleko esisebhukwini leli.

3. UZaga 17:3 uthi kungani kumele silinde inhliziyo zethu? (Khangela lomfanekiso.)

³ Isizatho esiqakathekileyo esenza sivikele izinhliziyo zethu ngesokuthi uJehova uyayihlola inhliziyo. Nxa abantu besikhangele bangasibona simsulwa, kodwa uJehova nguye okwaziyo ukuthi sinjani sibili ngaphakathi. (Bala iZaga 17:3.) Uzasithanda nxa singagcwalisa izingqondo zethu ngokuhlakanipha kwakhe okuzasinceda ukuthi siphile kuze kube nini lanini. (Joh. 4:14) Lokhu kuzasinceda ukuthi singaphanjaniswa nguSathane lomhlaba wakhe sicine sesiziphatha kubi. (1 Joh. 5:18, 19) Nxa singasondela eduze loJehova sizamthanda futhi simhloniphe kakhulu. Sizazonda loba yiwuphi umcabango wokuthi senze isono ngoba siyabe singafuni ukuzwisa ubaba wethu ubuhlungu. Nxa sesilingeka ukuthi senze okubi singazibuza umbuzo lo: ‘Kambe ngingafunelani ukona ngabomo besengizwisa uNkulunkulu  wami ongithanda kangaka ubuhlungu?’—1 Joh. 4:9, 10.

4. Ukwesaba uJehova kwamnceda njani omunye udade ukuthi angaziphathi kubi?

⁴ Omunye udade waseCroatia okuthiwa nguMarta wayeselingeka ukuthi aziphathe kubi. Wabhala wathi: “Kwakunzima ukuthi ngicabange kuhle kumbe ukuthi ngilwisane lesifiso sokwenza isono ngikholise okwesikhatshana. Kodwa ukwesaba uJehova kwangivikela.” b Kwamvikela njani? UMarta uthi wacabangisisa ngokuthi nxa wayengaziphatha kubi wayezazithela emanyaleni. Lathi singenza njengaye. Okubi kakhulu yikuthi nxa singaziphatha kubi siyadanisa uJehova sicine sikhutha ithuba lokuthi simkhonze kuze kube nini lanini.—Gen. 6:5, 6.

5. Ufundani kuLeo?

⁵ Nxa sisesaba uJehova kumele sinanzelele ukuthi asibi ngabangane babantu abenza okubi. ULeo ohlala eCongo wayifunda ivaliwe endabeni le. Wathi eseleminyaka emine ebhabhathiziwe waqalisa ukuba labangane ababesenza okubi. Wayezitshela ukuthi nxa yena wayengenzi izinto ezimbi ababezenza akulasono ayesenza kuJehova. Kungakayi ngaphi abangane bakhe bamyenga ukuthi aqalise ukudakwa lokuziphatha kubi. Waqalisa ukucabanga ngalokho abazali bakhe ababengamaKhristu ababemfundise khona. Wacabanga lokuthi wayethokoza njani ngesikhathi esakhonza uJehova. Kwamnceda njani lokhu? Kwasuka kwathi dlwe kuye futhi abadala bamncedisa ukuthi aphenduke kuJehova. Lamuhla uyathokoza kakhulu. Usengumdala njalo uliphayona eliqakathekileyo.

6. Yibaphi abesifazana ababili esizaxoxa ngabo?

⁶ Ake sixoxe ngoZaga isahluko 9 okhuluma ngabesifazana ababili. Omunye umela ukuhlakanipha, omunye umela ubuthutha. (Khangela uRoma 5:14 loGalathiya 4:24.) Nxa sihlola isahluko lesi khumbula ukuthi umhlaba kaSathane uhlanyiswa yikuziphatha okubi lephonogirafi.  (Efe. 4:19) Yikho kuqakathekile ukuthi siqhubeke simesaba uNkulunkulu futhi sifulathele okubi. (Zaga. 16:6) Sonke nje kungelani lokuthi singamadoda kumbe singabesifazana singancedwa yilokhu okukhulunywa ngakho esahlukweni lesi. Owesifazana ngamunye unxusa ongelalwazi kumbe ‘ongelangqondo.’ Ngamunye wabo kungani uthi: ‘Buya endlini yami uzokudla.’ (Zaga. 9:1, 5, 6, 13, 16, 17) Kodwa okwenzakala emuntwini oya kowesifazana oyisithutha kutshiyene kakhulu lalokho okwenzakala kulowo oya kowesifazana ohlakaniphileyo.

7. UZaga 9:13-18 uthi kwenzakalani kulabo abavuma ukuya endlini yowesifazana oyisiwula? (Khangela lomfanekiso.)

⁷ Ake sikhangele amazwi akhulunywa ‘ngowesifazana oyisiwula.’ (Bala iZaga 9:13-18.) Umemeza abangelangqondo athi: ‘Buyani ngapha’ sidle izibiliboco. Kwenzakalani kulabo abahambayo? “Indlu yakhe igcwele abafileyo.” Mhlawumbe uyakhumbula ukuthi kwezinye izahluko zebhuku leli kulamazwi ahambelana lalawa. Siyaxwayiswa ‘ngowesifazana oxhwalileyo langowesifazana ongaziphathanga.’ Siphinde sitshelwe amazwi athi: “Indlu yakhe ikhokhelela ekufeni.” (Zaga. 2:11-19) KuZaga 5:3-10 siphinda sitshelwe ngomunye ‘owesifazana oxhwalileyo olenyawo ezehlela ekufeni.’

8. Kuyini okumele sikhethe phakathi kwakho?

⁸ Labo abanxuswa ‘ngowesifazana oyisiwula’ kumele bakhethe ukuthi bazahamba yini endlini yakhe kumbe abasoze bahambe. Lathi singazithola sekumele sikhethe phakathi kwezinto lezi ezimbili. Nxa ungalingeka ukuthi uziphathe kubi kumbe ukuthi ubone iphonogirafi ku-inthanethi, kumbe kokunye okwezempucuko uzakhetha ukwenzani?

9-10. Yiziphi ezinye izizatho ezenza sibalekele ukuziphatha okubi?

⁹ Kulezizatho eziqakathekileyo ezisenza sibalekele ukuziphatha okubi. IBhayibhili lithi “owesifazana oyisiwula” uthi: “Amanzi atshontshiweyo amnandi.” Ayini ‘lawomanzi atshontshiweyo?’ IBhayibhili lifanisa ukuya emacansini kwendoda lomkayo abatshadileyo lamanzi amnandi. (Zaga. 5:15-18) Indoda lowesifazana bayavunyelwa ukuthi bakholise ukuya emacansini nxa betshade ngokusemthethweni. Lokhu kutshiyene kakhulu ‘lamanzi atshontshiweyo.’ Amanzi la atshontshiweyo angabe esitsho ukuziphatha okubi kumbe ukuya emacansini okungekho emthethweni. Abantu abenza lokho bakwenza becatshile njengoba nje lamasela ejayele ukutshontsha ecatshile. ‘Amanzi la atshontshiweyo’ angakhanya emnandi kakhulu, ikakhulu nxa kuyikuthi labo abawatshontshayo babona angani abasoze babanjwe. Lokhu yikuziqila sibili ngoba uJehova ubona  konke okwenzakalayo. Akulanto embi kumbe ebaba ukwedlula ukulahlekelwa yibungane bethu loJehova. Ngakho ngeke sithi into le embi kangaka ‘imnandi.’ (1 Khor. 6:9, 10) Kodwa kulokunye futhi okwenzakalayo nxa singaziphatha kubi.

¹⁰ Umuntu oziphatha kubi angazizwa eyangeka, azibone engasimuntu walutho kumbe azithwale engakafuni loba adilize imuli yakhe. Kuyacaca-ke ukuthi umuntu uyabe ehlakaniphile nxa ebalekela indlu yowesifazana oyisiwula kanye lokudla kwakhe. Abantu abaziphatha kubi baphambanisa ubungane babo loJehova futhi baphinda bathole lemikhuhlane engenza ukuthi bafe masinyane. (Zaga. 7:23, 26) UZaga 9:18 uphetha esithi: “Izethekeli zakhe zisengcwabeni elitshonayo.” Manje kungani abantu abanengi beqileka baye endlini yowesifazana lo obangela ukuhlupheka?—Zaga. 9:13-18.

11. Kungani ukubukela iphonogirafi kukubi kakhulu?

¹¹ Okunye okulinga abantu abanengi yiphonogirafi. Abanye bacabanga ukuthi akulalutho olubi ngokuyibukela. Kodwa iphonogirafi iyabaphambanisa abantu futhi yenza ukuthi oyibukelayo angazihloniphi njalo angabahloniphi abanye. Kanti njalo nxa ungavele uqalise ukuyibukela kunzima ukuyiyekela. Imifanekiso yokuziphatha okubi ilamandla kakhulu. Kunzima ukuthi umuntu ayikhiphe engqondweni. Kanti njalo okubi kakhulu yikuthi iphonogirafi kayibulali izifiso ezimbi kodwa iyazikhwezela. (Kol. 3:5; Jak. 1:14, 15) Izikhathi ezinengi umuntu obukela iphonogirafi ucina eseziphathe kubi.

12. Singatshengisa njani ukuthi asifuni kuphanjaniswa yimifanekiso eyenza umuntu afune ukuya emacansini?

¹² Thina amaKhristu kumele senzeni nxa singaqabuka sesibone imifanekiso yephonogirafi? Kumele sihle sikhangele eceleni kumbe siyicitshe. Okungasinceda ukuthi senze njalo yikukhumbula ukuthi into eqakathekileyo kakhulu kithi yikuhlala singabangane bakaJehova. Leminye imifanekiso eyabe ikhanya angathi ayisiyo yephonogirafi ingenza umuntu afune ukuya emacansini. Kungani kungamelanga siyibuke? Ngenxa yokuthi asifuni ukwenza ngitsho lento encane engenza ukuthi sicine sifeba ezinhliziyweni zethu. (Mat. 5:28, 29) Omunye umdala ohlala eThailand okuthiwa nguDavid uthi: “Ngiyazibuza ngithi, ‘Lanxa imifanekiso le ingayisiyo yephonogirafi uJehova angathaba yini nxa angangibona ngiyibuka?’ Lokhu kuyanginceda ukuthi ngenze into eqondileyo.”

13. Kuyini okungasinceda ukuthi sibe ngabahlakaniphileyo?

¹³ Okungasinceda ukuthi sibe ngabantu abahlakaniphileyo yikwesaba ukwenza izinto ezingadanisa uJehova. Ukwesaba uNkulunkulu “yikuqala” kumbe isisekelo ‘sokuhlakanipha.’ (Zaga. 9:10) Lokhu kucaca kuhle emavesini okuqala eZaga isahluko 9 lapho esibala khona ngowesifazana obizwa ngokuthi ‘yikuhlakanipha kweqiniso.’

14. KuZaga 9:1-6 kukhulunywa ngakuphi ukunxuswa?

¹⁴ Bala iZaga 9:1-6. Emavesini la sinxuswa nguJehova onguye isisekelo sokuhlakanipha kweqiniso futhi konke ukuhlakanipha kuvela kuye uMdali wethu. (Zaga. 2:6; Rom. 16:27) Umzekeliso osetshenziswe lapha ukhuluma ngendlu enkulu elensika eziyisikhombisa. Lokhu kutshengisa ukuthi uJehova nguNkulunkulu ophanayo futhi uyamukela bonke abafuna ukusebenzisa ukuhlakanipha kwakhe ezimpilweni zabo.

15. UNkulunkulu usinxusa ukuthi senzeni?

¹⁵ UJehova uNkulunkulu ophanayo usipha izinto ezinengi. Lokho kukhanya ngalokho esikwenzelwa ngowesifazana okukhulunywa ngaye kuZaga 9 omela “ukuhlakanipha  kweqiniso.” IBhayibhili lisitshela ukuthi owesifazana lo useqedile ukulungisa inyama, uselihlanganisile iwayini njalo usebeke ukudla etafuleni yakhe endlini yakhe. (Zaga. 9:2) Kuvesi 4 lo-5 “ukuhlakanipha kutshela lowo ongelangqondo ukuthi: ‘Woza uzokudla isinkwa sami.’” Kungani kumele siye endlini yokuhlakanipha kweqiniso besesisidla ukudla okusipha khona? UJehova ufuna abantwabakhe bahlakaniphe futhi bavikeleke. Kafuni ukuthi siyifunde ivaliwe ngokwenza ezinto ezizasilimaza futhi ezizasenza sizisole, yikho ‘egcinela abathembekileyo ukuhlakanipha okuncedayo.’ (Zaga. 2:7) Nxa singamesaba uJehova sizakwenza izinto ezimthokozisayo. Sizalalela izeluleko zakhe ezilokuhlakanipha futhi nxa singazisebenzisa ekuphileni kwethu sizathokoza.—Jak. 1:25.

16. Ukwesaba uNkulunkulu kwamnceda njani u-Alain futhi kwabanceda njani labanye?

¹⁶ Omunye umfowethu okuthiwa ngu-Alain wenza isinqumo esihle ngenxa yokwesaba uNkulunkulu. U-Alain ungumdala webandla futhi ungumbalisi kwesinye isikolo. Uthi: “Abanye ababalisi engangifundisa labo babebukela amafilimu ephonogirafi besithi afundisa ngezemacansini.” Kodwa u-Alain kazange avume ukuyengwa ukuthi akwenze lokhu. Uthi: “Angizange ngike ngiqale ukuvuma ukubukela amafilimu lawo ngenxa yokuthi ngiyamesaba uNkulunkulu. Ngaphinda ngachasisela engifundisa labo ukuthi kungani ngingeke ngiwabukele.” U-Alain walalela iseluleko ‘sokuhlakanipha kweqiniso’ esithi: “Hamba uye phambili endleleni yokuzwisisa.” (Zaga. 9:6) Ababalisi ababefundisa lo-Alain bamangaliswa yilokhu akwenzayo njalo abanye babo sebefunda iBhayibhili futhi bayangena lemihlangano yebandla.

17-18. Abavuma ukuya endlini ‘yokuhlakanipha kweqiniso’ bakholisani futhi kuyini abangakhangelela ukukuthola esikhathini esizayo? (Khangela lomfanekiso.)

¹⁷ UJehova usebenzise imizekeliso yabesifazana ababili ukuze asincede sibone ukuthi kumele senzeni ukuze sithokoze empilweni. Labo abavuma ukuya endlini yowesifazana oliphakaphaka futhi oyisiwula bacabanga ngokukholisa ukuziphatha okubi becatshile, baphilela elalamuhla bengelandaba lokuthi kuzakwenzakalani ngesikhathi esizayo. Isiphetho sabo yikuya ‘engcwabeni elitshonayo.’—Zaga. 9:13, 17, 18.

¹⁸ Kodwa labo abavuma ukuya endlini ‘yokuhlakanipha kweqiniso’ bazathola ikusasa elihle. Abaya endlini leyo bathola ukudla okumnandi, okulungiswe kuhle futhi okwakha umzimba. Kuyabathokozisa ukuthi kabasweli lutho olubanceda ukuthi basondele kuJehova. (Isaya. 65:13) UJehova wathuma umphrofethi wakhe u-Isaya ukuthi athi: “Ngilalelisisani lidle okuhle, likholise kakhulu ukudla izibiliboco.”  (Isaya. 55:1, 2) Siyafundiswa ukuthanda izinto ezithandwa nguJehova lokuzonda izinto azizondayo. (Hubo. 97:10) Kanti njalo kuyasithokozisa lokunxusa abanye ukuthi baye endlini ‘yokuhlakanipha kweqiniso’ besebencedakala. Kuyabe kungathi ‘simemeza sisezindaweni eziphezulu zedolobho sisithi: “Loba ngubani ongelalwazi kabuye ngapha.”’ Izibusiso ezitholwa yithi lezitholwa yilabo abavuma ukuthi sibanxuse azipheleli esikhathini lesi esiphila kuso. Zihlala kuze kube nini lanini ngoba zenza ‘siphile’ phakade njengoba ‘sihamba sisiya phambili endleleni yokuzwisisa.’—Zaga. 9:3, 4, 6.

19. UmTshumayeli 12:13, 14 uthi kuyini okumele sizimisele ukukwenza? (Khangela ibhokisi elithi “ Ukwesaba UNkulunkulu Kuyasinceda.”)

¹⁹ Bala umTshumayeli 12:13, 14. Kwangathi singahlala simesaba uNkulunkulu. Lokhu kuzasinceda ukuthi silinde izinhliziyo zethu futhi siqhubeke siziphatha kuhle njalo siseduze loNkulunkulu kulezinsuku zokucina ezimbi. Kanti njalo nxa simesaba uNkulunkulu sizaqhubeka sinxusa abanengi ukuthi labo badinge “ukuhlakanipha kweqiniso” besebencedakala.