Kumele sibe lokholo ukuze sithokozise uJehova. Kodwa iBhayibhili lithi “ukholo kayisilo lwabantu bonke.” (2 Thes. 3:2) Lapha umphostoli uPhawuli wayekhuluma ‘ngabantu ababi labayingozi’ ababemthwalise nzima. Kodwa akutshoyo mayelana lokholo kungasebenza lakwabanye abantu. Abanye abantu abalandaba lobufakazi obucacileyo obutshengisa ukuthi kuloMdali, uNkulunkulu. (Rom. 1:20) Abanye bangathi bayakholwa kuNkulunkulu. Kodwa lokho ayisikho kodwa okudingekayo ukuze umuntu amthokozise.

Kumele siqiniseke ukuthi uJehova ukhona sibili lokuthi uyabapha umvuzo labo abalokholo oluqinileyo. (Heb. 11:6) Ukholo yisithelo somoya ongcwele kaNkulunkulu. Ukuthandaza kuJehova kunganceda umuntu ukuthi athole umoya ongcwele. (Luk. 11:​9, 10, 13) Okunye okuqakathekileyo okungasinceda ukuthi sithole umoya ongcwele yikubala iLizwi likaNkulunkulu eliphefumulelweyo. Kumele sicabangisise ngalokho esikubalayo besesisenza lokho esiyabe sikufundile. Singenza njalo sizakhokhelwa ngumoya ongcwele ubususinceda ukuthi sibe lokholo oluthokozisa uJehova.