Imibuzo Ebuzwa Ngabafundi
Kungani singathi amazwi athi “uzabavikela” atholakala kuHubo 12:7 atsho “abahluphekayo” okukhulunywa ngabo kuvesi 5?
Amanye amavesi asesahlukweni lesi atshengisa ukuthi ivesi le ikhuluma ngabantu abahluphekayo.
KuHubo 12:1-4 kulamazwi athi “abathembekileyo abasekho.” KuHubo 12:5-7 abesesithi:
“‘Ngenxa yokuthi abahluphekayo bayacindezelwa,
Labayanga bayakhala,
Ngizaphakama ngibasindise,’ kutsho uJehova.
‘Ngizabakhulula kulabo ababahlukuluzayo.’
Amazwi kaJehova ahlambulukile,
Anjengesiliva esicengwe esithandweni somlilo, sahlanjululwa kasikhombisa.
Uzabavikela awu Jehova,
Uzavikela ngamunye wabo ebantwini laba kuze kube nini lanini.”
Uvesi 5 utshengisa ukuthi uNkulunkulu uzabasindisa “abahluphekayo.”
IHubo 12:7 beselisithi: “Uzabavikela awu Jehova, uzavikela ngamunye wabo ebantwini laba kuze kube nini lanini.”
Lalamuhla uJehova uzaqhubeka ebancedisa futhi ebasindisa “abahluphekayo” kanye ‘labacindezelwayo’—Jobe. 36:15; Hubo. 6:4; 31:1, 2; 54:7; 145:20.
IHubo 12:1 likhuluma ‘ngabathembekileyo’ okungenzeka ukuthi babeqanjelwa amanga. Kuvesi 3 kulamazwi atshengisa ukuthi uJehova uzabajezisa labo abasebenzisa kubi ulimi lwabo. IHubo leli lisiqinisekisa ukuthi uJehova uzahlala ebancedisa abantu bakhe ngoba amazwi akhe ahlambulukile.
Yikho uvesi 7 utshengisa ukuthi uzabalinda futhi abavikele abantu abahluphekayo ngenxa yabantu abenza okubi.
Ivesi le inika abantu “abathembekileyo” ithemba lokuthi uNkulunkulu uzabasindisa.
