1. UmTshumayeli 3:1, 7 usifundisani?

ABANYE bethu siyakuthanda ukukhuluma ikanti abanye sithule. Umbhalo okusekelwe kuwo isihloko sethu utshengisa ukuthi kulesikhathi sokukhuluma lesokuthula. (Bala umTshumayeli 3:1, 7.) Kodwa singafisa ukuthi abanye abafowethu labodadewethu abathuleyo bakhulume kakhudlwana besekusithi labo abakhulumayo bangakhulumi kakhulu.

2. Ngubani okumele asitshele indlela okumele sikhulume ngayo lesikhathi okumele sikhulume ngaso?

² Ukukhuluma yisipho esivela kuJehova. (Eks. 4:10, 11; Isam. 4:11) Usebenzisa iLizwi lakhe ukuze asitshengise indlela eqondileyo yokusebenzisa isipho lesi. Esihlokweni lesi sizaxoxa ngezibonelo eziseBhayibhilini ezizasinceda sibone ukuthi sikhulume nini futhi sithule nini. Sizabona lokuthi uJehova uzwa njani ngalokho esikutshoyo kwabanye. Asiqaleni ngokuxoxa ngokuthi kunini lapho okumele sikhulume khona.

3. Ngokwalokho okutshiwo kuRoma 10:14, kunini lapho okumele sikhulume khona?

³ Kumele sihlale sikulungele ukukhuluma ngoJehova langoMbuso wakhe. (Mat. 24:14; bala uRoma 10:14.) Nxa sisenza njalo siyabe silingisela uJesu. Esinye isizatho esiqakathekileyo esenza uJesu wabuya emhlabeni yikuzotshela abantu iqiniso ngoYise. (Joh. 18:37) Kodwa kumele sikhumbule lokuthi indlela esikhuluma ngayo iqakathekile. Yikho nxa sitshela abanye ngoJehova kumele sikhulume ‘ngobumnene langenhlonipho enkulu’ njalo sitshengise ukuthi silendaba lendlela abazizwa ngayo lalokho abakukholwayo. (1 Phet. 3:15) Nxa singenza njalo, asisoze siphongukhuluma nje kodwa sizafundisa, mhlawumbe size sithinte inhliziyo yomuntu.

4. Ngokwalokho okutshiwo kuZaga 9:9, okukhulunywa ngabadala kungabanceda njani abanye?

 ⁴ Abadala bebandla akumelanga besabe ukukhuluma nxa bebona ukuthi kulomfowethu loba udadewethu okumele aphiwe iseluleko. Lanxa kunjalo bayadinga isikhathi esifaneleyo sokukhuluma ukuze bangamyangisi umuntu lowo. Bayalinda baze baxoxe laye endaweni engelabantu. Abadala bahlala bezama ukukhuluma lomuntu ngendlela etshengisa ukuthi bayamhlonipha. Lanxa kunjalo kabayekeli ukumtshela izimiso zeBhayibhili ezizamnceda ukuthi ahlakaniphe. (Bala iZaga 9:9.) Kungani kuqakathekile ukuthi sibe lesibindi sokukhuluma nxa kumele senze njalo? Ake sixoxe ngezibonelo ezimbili ezitshiyeneyo. Kwesokuqala, ubaba kwakumele akhuze amadodana akhe. Kwesesibili, owesifazana othile kwakumele alande indoda eyayizakuba yinkosi ayitshele ukuthi yayenze isinqumo esibi.

5. UMphristi Omkhulu u-Eli wehluleka nini ukukhuluma?

⁵ UMphristi Omkhulu u-Eli wayelamadodana amabili ayewathanda kakhulu. Kodwa amadodana lawo ayengamhloniphi ngitsho uJehova. Ayelomsebenzi oqakathekileyo wokuba ngabaphristi ethabanikeli. Kodwa ayesebenzisa amandla awo ngendlela engaqondanga, eyidelela kakhulu iminikelo eyayinikwa uJehova njalo engafihli nxa eziphatha kubi kwezemacansini. (1 Sam. 2:12-17, 22) Ngokwalokho okwakutshiwo nguMthetho kaMosi, amadodana ka-Eli kwakumele abulawe, kodwa uyise wayewayekelela. Wayewakhuza ezipholele nje futhi wawavumela ukuthi aqhubeke esebenza ethabanikeli. (Dute. 21:18-21) UJehova wezwa njani ngalokho okwakusenziwa ngu-Eli? Wambuza ukuthi kungani ehlonipha amadodana akhe ukwedlula yena. Wayezimisele ukuwabulala womabili amadoda lawo amabi.—1 Sam. 2:29, 34.

6. Sifundani kulokho okwenziwa ngu-Eli?

⁶ Kulesifundo esiqakathekileyo esisithola kulokho okwenziwa ngu-Eli. Nxa singabakwazi ukuthi umngane kumbe isihlobo sephule umthetho kaNkulunkulu, kumele sikhulume laso sisikhumbuza izimiso zikaJehova. Ngemva kwalokho kufanele sibe leqiniso lokuthi umuntu lo uthola uncedo kulabo abakhethwe nguJehova. (Jak. 5:14) Kasifuni ngitsho ukulingisela u-Eli ngokuqakathekisa umngane kumbe isihlobo ukwedlula uJehova. Khona kudinga isibindi ukulanda umuntu odinga ukukhuzwa, kodwa singenza njalo kuzaba lempumela emihle. Khathesi nanzelela umehluko phakathi kuka-Eli lowesifazana ongum-Israyeli okuthiwa ngu-Abhigeli.

7. Kungani u-Abhigeli wakhuluma loDavida?

 ⁷ U-Abhigeli wayeyinkosikazi yendoda enothileyo okuthiwa nguNabhali. Ngesikhathi uDavida lamadoda ayelawo bebalekela iNkosi uSawuli baqeda isikhathi esithile belabelusi bakaNabhali futhi bavikela imihlambi yakhe ezigebengeni. UNabhali wababonga yini? Hatshi. Lapho uDavida emcela ukuthi anike amadoda ayelaye ukudla lamanzi, uNabhali wazonda waqalisa ukuwathethisa. (1 Sam. 25:5-8, 10-12, 14) Lokhu kwabangela ukuthi uDavida afune ukuyabulala wonke amadoda endlu kaNabhali. (1 Sam. 25:13, 22) Pho inkemenkeme le yayizavinjwa njani? U-Abhigeli wananzelela ukuthi kwasekuyisikhathi sokukhuluma, yikho waba lesibindi walanda uDavida lamadoda angu-400 ayelambile, ezondile njalo ehlomile.

8. Sifundani kulokho okwenziwa ngu-Abhigeli?

⁸ U-Abhigeli wathi elanda uDavida wakhuluma laye ngesibindi, ngenhlonipho langendlela eyayizakwenza uDavida azimisele ukwenza lokho ayemtshela khona. Waxolisa kuDavida lanxa kwakungayisuye owayedale uhlupho. Wamtshela ukuthi wayekwazi ukuthi ungumuntu omuhle lokuthi uzakwenza okuqondileyo. U-Abhigeli wathembela kuJehova ukuthi amncedise. (1 Sam. 25:24, 26, 28, 33, 34) Lathi kumele simlingisele ngokuba lesibindi sokukhuluma nxa sibona umuntu esenza ulutho oluzabangela ukuthi enze iphutha elikhulu kakhulu. (Hubo. 141:5) Kumele sikhulume laye ngenhlonipho kodwa singambhodi. Nxa sinika umuntu iseluleko asidingayo, siyabe sitshengisa ukuthi singabangane beqiniso.—Zaga. 27:17.

9-10. Kuyini abadala okumele bakukhumbule nxa benika abanye iseluleko?

⁹ Abadala yibo abalomlandu omkhulu wokukhuluma lamalunga ebandla asephambuka. (Gal. 6:1) Bayananzelela ukuthi labo balesono  lokuthi ngelinye ilanga kungadingeka ukuthi baphiwe iseluleko. Kodwa lokhu akubavimbi ukuthi bakhuze labo abadinga ukukhuzwa. (2 Tim. 4:2; Tit. 1:9) Nxa benika umuntu iseluleko bayazama ukusebenzisa isipho sabo sokukhuluma ukuthi bamfundise kuhle langesineke. Bayamthanda umfowabo futhi lokhu yikho okwenza bamncede. (Zaga. 13:24) Kodwa abakuqakathekisa kakhulu yikudumisa uJehova ngokusekela lokho akutshoyo langokuvikela ibandla ukuthi lingaphambaniseki.—ImiSeb. 20:28.

¹⁰ Besilokhu sixoxa ngokuthi kunini lapho okumele sikhulume khona. Kodwa kulezikhathi lapho okuyabe kungcono ukuthi sithule. Kuyini okungenza kube nzima ukuthi sithule ngalezozikhathi?

11. UJakhobe wasebenzisa wuphi umzekeliso njalo usebenza njani endabeni yokukhuluma?

¹¹ Ngezinye izikhathi kunzima ukukhuluma izinto ezifaneleyo. Umlobi weBhayibhili uJakhobe wasebenzisa umzekeliso otshengisa ubunzima bokwenza lokho. Wathi: “Nxa umuntu engaphambanisi ngelizwi, uyabe ephelele njalo esenelisa ukuwufaka amatomu wonke umzimba wakhe.” (Jak. 3:2, 3) Itomu lifakwa ekhanda lasemlonyeni webhiza. Umuntu ogade ibhiza angaliqondisa lapho afuna liye khona loba alimise nxa edonsa intambo ezikulo. Nxa engayekela ukuzibamba aziqinise intambo lezo, ibhiza lingaphaphatheka beselizilimaza liphinde limlimaze laye. Lathi singadala umonakalo omkhulu nxa singayekela ukunanzelela izinto esizikhulumayo. Asixoxeni ngokuthi kunini lapho okungadingeka khona ukuthi sithule.

12. Kunini lapho okumele sithule khona?

¹² Kumele wenzeni nxa umfowethu kumbe udadewethu esazi indaba okumele ihlale iyimfihlo? Ngokwesibonelo, nxa ungahlangana  lomuntu ohlala elizweni lapho umsebenzi wethu ongavunyelwa khona uyalingeka yini ukumbuza ukuthi umsebenzi wethu wenziwa njani kulelolizwe? Akuthandabuzwa ukuthi uyabe ulenhloso ezinhle. Phela siyabathanda abafowethu labodadewethu futhi silendaba lokuthi kwenzakalani kubo. Kanti njalo nxa sibathandazela siyabe sifuna ukuqamba khona kanye okubehlelayo. Lanxa kunjalo, lesi kuyabe kuyisikhathi sokuthi sithule. Nxa singambamba ngamandla umuntu olendaba eyimfihlo ukuthi asitshele yona, siyabe singamthandi lowomuntu labazalwane abathembe yena ukuthi angatsheli muntu ngomsebenzi wabo. Akuthandabuzwa ukuthi akula phakathi kwethu ongafuna ukwengeza ubunzima babafowethu labodadewethu abahlala emazweni umsebenzi wethu ongavunyelwa khona. Akula futhi phakathi kwabazalwane abahlala emazweni anjalo ongafuna ukukhuluma ngendlela inkonzo yabo kumbe imisebenzi yobuKhristu eyenziwa ngayo.

13. Ngokwalokho okutshiwo kuZaga 11:13, abadala kumele benzeni futhi kungani?

¹³ Kuqakatheke kakhulu ukuthi abadala basebenzise isimiso esikuZaga 11:13. (Bala.) Kabatsheli muntu indaba okungamelanga abeyazi. Lokhu kungaba nzima, ikakhulu nxa umdala etshadile. Abantu abatshadileyo bagcina umtshado wabo uqinile ngokuhlala bexoxa futhi betshelana imfihlo zabo, indlela abazizwa ngayo lokubakhathazayo. Kodwa umdala uyakwazi ukuthi akumelanga atshele umkakhe indaba ‘eziyimfihlo’ ezimayelana labanye ebandleni. Nxa angenza njalo, abantu bangakhuluma kubi ngaye futhi bangamthembi. Amadoda akhethwa ukuba ngabadala ebandleni akumelanga abe ngamaqili kulokho akukhulumayo. (1 Tim. 3:8) Lokhu kutsho ukuthi akumelanga aqile abanye kumbe athande ukunyeya. Nxa umdala emthanda umkakhe kasoze amtshele izinto okungamelanga abezazi.

14. Inkosikazi ingamnceda njani umkayo ukuthi ahlonitshwe ngabantu?

¹⁴ Inkosikazi inganceda umkayo ukuthi ahlonitshwe ngabantu ngokungambambi ngamandla ukuthi akhulume indaba okumele ihlale iyimfihlo. Nxa isenza njalo, iyabe imsekela njalo itshengisa ukuthi iyabahlonipha labo abamtshele imfihlo. Kodwa okuqakatheke kakhulu yikuthi iyabe ithokozisa uJehova ngoba isenza ukuthi kube lokuthula lokumanyana ebandleni.—Rom. 14:19.

15. UJehova wezwa njani ngamadoda amathathu alanda uJobe futhi kungani?

¹⁵ Kunengi esikufunda ebhukwini likaJobe mayelana lokuthi sikhulume njani futhi nini. UJobe wehlelwa zinhlungu ezeza zelekene. Ngemva kwalokho walandwa ngamadoda amane ayezomduduza njalo ezomnika iseluleko. Amadoda lawo afika athula okwesikhathi eside. Kodwa lokho okwatshiwo ngamathathu awo, u-Elifazi, uBhilidadi loZofari kuveza ukuthi kawazange asebenzise isikhathi leso ecabanga ngokuthi azamnceda njani uJobe. Ayecabanga ngokuthi azathini ukuze atshengise ukuthi wenze into ezimbi. Zikhona sibili izinto eziliqiniso azikhulumayo kodwa okunengi kwalokho akutshoyo ngoJobe langoJehova kwakungamanga futhi kubuhlungu. Amahlulela ngokhahlo uJobe. (Jobe. 32:1-3) Manje uJehova wezwa njani ngalokho? Wawazondela kakhulu amadoda lawo amathathu. Wathi ayizithutha njalo wawatshela ukuthi acele uJobe awathandazele.—Jobe. 42:7-9.

16. Sifundani kulokho okwenziwa ngu-Elifazi, uBhilidadi loZofari?

¹⁶ Kulezifundo esizitholayo kulokho okwenziwa ngu-Elifazi, uBhilidadi loZofari.  Esokuqala, akumelanga sahlulele abafowethu labodadewethu. (Mat. 7:1-5) Kumele sibalalelisise singakakhulumi. Nxa singenza njalo, sizabuzwisisa ubunzima abaphakathi kwabo. (1 Phet. 3:8) Esesibili, nxa sesikhuluma kufanele sinanzelele ukuthi sikwenza ngendlela elomusa lokuthi esikutshoyo kuliqiniso. (Efe. 4:25) Esesithathu, uJehova ulendaba lendlela esikhuluma ngayo labanye.

17. Sifundani ku-Elihu?

¹⁷ Indoda yesine eyavakatshela uJobe yisihlobo sika-Abrahama esithiwa ngu-Elihu. Indoda le yayilalele ngesikhathi uJobe lamadoda amathathu bekhuluma. Akuthandabuzwa ukuthi yalalelisisa ngoba yenelisa ukunika uJobe iseluleko ngesihawu kodwa ingambhodi. Iseluleko leso samnceda wantshintsha indlela ayecabanga ngayo. (Jobe. 33:1, 6, 17) Okwakuqakatheke kakhulu ku-Elihu yikuphakamisa uJehova hatshi yena kumbe omunye umuntu. (Jobe. 32:21, 22; 37:23, 24) Okwenziwa ngu-Elihu kusifundisa ukuthi kulesikhathi sokuthula lesokulalela. (Jak. 1:19) Sifunda lokuthi nxa sinika umuntu iseluleko okumele sikuqakathekise kakhulu yikudumisa uJehova hatshi thina.

18. Singatshengisa njani ukuthi siyasiqakathekisa isipho sokukhuluma?

¹⁸ Nxa silandela okutshiwo liBhayibhili endabeni yokuthi sikhuluma njani futhi nini siyabe sitshengisa ukuthi siyasiqakathekisa isipho sokukhuluma. Inkosi ehlakaniphileyo uSolomoni yaphefumulelwa ukuthi ibhale amazwi la: “Ilizwi elikhulunywe ngokufaneleyo linjengama-apula egolide ezitsheni zesiliva ezibaziweyo.” (Zaga. 25:11, TBS) Nxa singalalelisisa abanye bekhuluma futhi sicabange singakakhulumi, amazwi ethu azakuba njengama-apula egolide okutsho ukuthi azabe emahle njalo eligugu. Lokho kuzakwenza ukuthi esikutshoyo kubakhe njalo kuthokozise uJehova kungelani lokuthi singabantu abathanda ukukhuluma kumbe abathuleyo. (Zaga. 23:15; Efe. 4:29) Le yiyo indlela engcono kulazo zonke yokutshengisa ukuthi siyasiqakathekisa isipho sokukhuluma esisiphiwe nguNkulunkulu.