1. Yibuphi ubunzima obungehlela abantu bakaJehova?

UPHAKATHI kobunzima yini? Engxenye omunye ebandleni ukuzwise ubuhlungu. (Jak. 3:2) Mhlawumbe osebenza labo loba ofunda labo bakhuluma kubi ngawe ngenxa yokuthi unguFakazi kaJehova. (1 Phet. 4:3, 4) Kumbe abangakini bazama ukukuvimba ukuthi uye emihlanganweni yebandla loba ukuthi utshumayele. (Mat. 10:35, 36) Nxa uphakathi kobunzima obunje ungabona kungcono ukuthi utshiye ukukhonza uJehova. Kodwa akumelanga uthandabuze ukuthi uzakunika ukuhlakanipha ukuze wenze izinqumo ezinhle lamandla owadingayo ukuze uqinisele kungelani lobunzima ophakathi kwabo.

2. Ngokwalokho okutshiwo kuRoma 15:4, ukubala iLizwi likaNkulunkulu kusinceda njani?

² ELizwini likaNkulunkulu sifunda ngendlela abantu abalesono abaqinisela ngayo ngesikhathi bephakathi kobunzima. Kungani uJehova waba leqiniso lokuthi izindaba ezinjalo ziyabhalwa? Ukuze sifunde kuzo. Lokhu yikho aphefumulela umphostoli uPhawuli ukuthi akubhale. (Bala uRoma 15:4.) Ukuzibala kungasiduduza futhi kusenze sibe lethemba. Kodwa kakumelanga siphonguzibala. Kumele sivumele iMibhalo ukuthi itshintshe indlela esicabanga ngayo lesizizwa ngayo. Ngokwesibonelo, singenzani ukuze sithole amacebo angasinceda nxa siphakathi kohlupho? Singasebenzisa indlela lezi ezine: (1) Thandaza, (2) Kubone ngelihlo lengqondo okubalayo, (3) Cabangisisa, (4) Kusebenzise okubalayo. Kasixoxeni ngokuthi singakwenza njani lokho. * Ngemva kwalokho sizasebenzisa indlela le yokutaditsha ukuze sifunde kulokho okwenzakala  eNkosini uDavida lakumphostoli uPhawuli.

3. Kumele wenzeni ungakabali iBhayibhili njalo kungani?

³ (1) Thandaza. Ungakaqalisi ukubala iBhayibhili, cela uJehova akusize ubone ukuthi okubalayo kungakunceda njani. Ngokwesibonelo, nxa ufuna amacebo angakusiza ukuthi ulwisane lohlupho ophakathi kwalo, ungamcela akuncede uthole izimiso eziseLizwini lakhe ezingakunceda ukwazi okumele ukwenze.—Flp. 4:6, 7; Jak. 1:5.

4. Kuyini okungakunceda nxa ubala iBhayibhili?

⁴ (2) Kubone ngelihlo lengqondo okubalayo. UJehova usiphe isipho esimangalisayo sokwenelisa ukubona izinto ngelihlo lengqondo. Yikho nxa ubala iBhayibhili, zama ukukubona lokho obala ngakho futhi uzibone ungulowo obala ngaye. Zama ukucabanga ukuthi wayengabe ezizwa njani, ubone lezinto ayezibona. Nxa ungenza njalo, uzathola okunengi endabeni oyibalayo.

5. Kutshoni ukucabangisisa futhi ungakwenza njani?

⁵ (3) Cabangisisa. Ukucabangisisa kutsho ukuzikisa ingqondo kulokho obala ngakho lokuzama ukubona ukuthi kusebenza njani kuwe. Kuyakunceda ukuthi uhlanganise lokho okubalayo lalokho ovele ukwazi lokuthi uyizwisise ngendlela ejulileyo indaba. Ukubala iBhayibhili ungacabangisisi kufanana lokuthatha izinto ozazisebenzisa ukupheka uzifake etafuleni. Nxa ungasazihlanganisanga lezozinto wazipheka, kawungeke ukukholise ukudla. Ukucabangisisa kunjengokuzihlanganisa ukuze uyizwisise ngcono indaba oyibalayo. Nansi eminye imibuzo ongazibuza yona futhi uyiphendule nxa ucabangisisa: ‘Umuntu engibala ngaye wenzani ukuze alwisane lohlupho ayephakathi kwalo? UJehova wamncedisa njani? Engikubalayo kunganginceda njani ukuthi ngiqinisele ebunzimeni?’

6. Kungani kumele sikusebenzise esikubalayo?

⁶ (4) Kusebenzise okubalayo. UJesu wathi nxa singakusebenzisi lokho esikubalayo sifanana lendoda eyakha indlu yayo etshebetshebeni. Isebenza ilume owangaphansi kodwa isebenzela ize ngoba kungaba lesiphepho lesikhukhula, kuyayitshaya indlu yayo ithi wohlo phansi yonke ibhidlike. (Mat. 7:24-27) Nxa singathandaza, sikubone ngelihlo lengqondo esikubalayo futhi sicabangisise kodwa singakusebenzisi, siyabe sisebenzele idonki efileyo. Nxa singaba phakathi kwenhlupho kumbe sihlukuluzwe, ukholo lwethu luzaxega. Kodwa singataditsha njalo sikusebenzise lokho esikubalayo, sizakwenza izinqumo ezinhle, sibe lokuthula futhi ukholo lwethu luqine. (Isaya. 48:17, 18) Kasisebenziseni izinto lezi ezine esixoxe ngazo ukuze sibone ukuthi sifundani kulokho okwenzakala eNkosini uDavida.

7. Yiphi indaba esizayihlola khathesi?

⁷ Kulomngane kumbe umuntu wangakini okuzwise ubuhlungu obubangele ukuthi ucine ungasamthembi? Nxa kunjalo, kuzakunceda ukuhlola indaba ka-Abhsalomu indodana yeNkosi uDavida eyazwisa uyise ubuhlungu futhi yazama ukumhluthunela ubukhosi.—2 Sam. 15:5-14, 31; 18:6-14.

8. Kuyini ongakwenza ukuze uJehova akuncedise?

⁸ (1) Thandaza. Ungakabali indaba le, tshela uJehova ngobuhlungu obuzwiswe ngumngane kumbe ngumuntu wangakini. (Hubo. 6:6-9) Mtshele khona kanye okuzwayo ubusumcela ukuthi akuncedise uthole izimiso ezingakusiza ukuthi ulwisane lohlupho ophakathi kwalo.

9. Finqa okwenzakala phakathi kukaDavida loAbhsalomu.

⁹ (2) Kubone ngelihlo lengqondo okubalayo.  Cabanga ngezinto ezenzakala endabeni le lendlela iNkosi uDavida engabe yazizwa ngayo. Indodana yayo u-Abhsalomu isebenza okweminyaka ukuze abantu bayithande. (2 Sam. 15:7) Ithi isibona izinto sezimi ngomumo, ithume izinhloli kulo lonke elako-Israyeli ukuze zenze abantu bayamukele njengenkosi yabo. U-Abhsalomu uze ayenge loAhithofeli umngane kaDavida osekhwapheni futhi ongumeluleki wakhe ukuthi laye ahlamukele uDavida. Umemezela ukuthi useyinkosi njalo uzama ukubamba abulale uDavida okungenzakala ukuthi ugula kakhulu. (Hubo. 41:1-9) UDavida uthi esibakwazi ngecebo leli abaleke eJerusalema. Ibutho lika-Abhsalomu lidibana lelikaDavida futhi litshaywa libhuqwe, njalo u-Abhsalomu uyabulawa.

10. Kuyini iNkosi uDavida eyayingakwenza?

¹⁰ Khathesi cabanga ngokuthi uDavida angabe wazizwa njani ngesikhathi kusenzakala konke lokho. Wayemthanda u-Abhsalomu futhi emthemba u-Ahithofeli. Kodwa bobabili bamzwisa ubuhlungu obukhulu, baze bazama lokumbulala. UDavida wayengacabanga ukuthi labanye abangane bakhe sebenatha mthombo munye lo-Abhsalomu acine engasabathembi. Wayengabona angani umhlaba wonke usumhlanekele, abesezama ukubaleka eyedwa, kumbe athwale imikhono ekhanda. Kodwa kakwenzanga lokho, walwisana lobunzima ayephakathi kwabo. Kuyini okwamncedayo?

11. UDavida wenzani ephakathi kobunzima?

¹¹ (3) Cabangisisa. Ufundani endabeni le? Phendula umbuzo lo, “UDavida wenzani ukuze alwisane lohlupho ayephakathi kwalo?” Kazange atatazele enze izinqumo engacabanganga. Kanti njalo kazange akhathazeke kakhulu aze aswele lokuthi enzeni. Kodwa wathandaza kuJehova emcela ukuthi amncedise. Wacela labangane bakhe ukuthi bamsize futhi waphanga wenza lokho ayekunqumile. Lanxa inhliziyo kaDavida yayidabukile ngalokho okwakwenzakele, kazange ayekele ukuthemba abanye njalo kazange ahlale ebuhlungu. Wayelokhu emthemba uJehova futhi ebathemba labangane bakhe.

12. UJehova wamncedisa njani uDavida?

¹² UJehova wamncedisa njani uDavida? Nxa ungachwayisisa uzabona ukuthi uJehova wamnika amandla okuthi aqinisele. (Hubo. 3:1-8; isihloko sendaba) Wazibusisa izinqumo azenzayo waphinda wasekela abangane bakaDavida ababethembekile, ngesikhathi besilwa ukuze bavikele inkosi yabo.

13. Ungamlingisela njani uDavida nxa othile ekuzwise ubuhlungu obukhulu? (UMathewu 18:15-17)

¹³ (4) Kusebenzise okubalayo. Zibuze, ‘Ngingamlingisela njani uDavida?’ Phanga ulungise uhlupho olukhona, ungapholisi amaseko. Kusiya ngokuthi kuyini okwenzakeleyo, ungenza khona kanye uJesu akutshoyo kuMathewu isahluko 18 kumbe usebenzise isimiso esilapho. (Bala uMathewu 18:15-17.) Kodwa akumelanga ugijimele ukwenza izinqumo usazondile. Kumele ukhuleke kuJehova, umcela ukuthi akuncedise uhlaliseke futhi akunike ukuhlakanipha ukuze ukwazi okumele ukwenze. Qhubeka ubathemba abangane bakho njalo uvume nxa befuna ukukuncedisa. (Zaga. 17:17) Okuqakatheke kakhulu okumele ukwenze yikulalela lokho uJehova akutshela khona eLizwini lakhe.—Zaga. 3:5, 6.

14. Kunini lapho u-2 Thimothi 1:12-16 lo-4:6-11, 17-22 angakunceda khona?

¹⁴ Abangakini bayakuphikisa yini ngenxa yokuthi ukhonza uJehova? Uhlala elizweni lapho umsebenzi wethu ongavunyelwa khona ngokupheleleyo yini kumbe lapho eminye imisebenzi yethu engavunyelwa khona? Nxa kunjalo  kungakunceda ukubala u-2 Thimothi 1:12-16 lo-4:6-11, 17-22. * UPhawuli wabhala amavesi la ngesikhathi esejele.

15. Ungamcelani uJehova?

¹⁵ (1) Thandaza. Ungakabali amavesi la, tshela uJehova ngohlupho lwakho lokuthi lukwenza uzizwe njani. Mtshele khona kanye okuzwayo ubusumcela ukuthi akuncedise uthole izifundo kulokho okwenzakala kuPhawuli ezizakusiza ukwazi okumele ukwenze.

16. Finqa okwenzakala kuPhawuli.

¹⁶ (2) Kubone ngelihlo lengqondo okubalayo. Cabanga okwenzakala kuPhawuli. Ubotshwe ngamaketane ejele eseRoma. Kaqalisi ukubotshwa, kodwa khathesi uyakwazi ukuthi usezabulawa. Abanye abangane bakhe sebemlahlele iganga futhi kaselamandla.—2 Tim. 1:15.

17. Kuyini uPhawuli ayengakwenza?

¹⁷ UPhawuli wayengacabanga kudala, abone angani aluba kazange abe ngumKhristu wayengasoze abotshwe. Wayengazondela amadoda ayemtshiye esabelweni se-Asiya futhi acine engasabathembi abanye abangane bakhe. Kodwa kazange akwenze lokho. Kuyini okwamnceda wangathandabuzi ukuthi abangane bakhe bazahlala beqotho kuye lokuthi uJehova uzamnika umvuzo?

18. UPhawuli wenzani ngesikhathi ephakathi kobunzima?

¹⁸ (3) Cabangisisa. Phendula umbuzo lo, “Kuyini uPhawuli akwenzayo ukuze alwisane lohlupho ayephakathi kwalo?” Lanxa wayezulelwa ngamanqe, kazange akhohlwe ukuthi okuqakatheke kakhulu yikukhazimulisa uJehova futhi wayedinga izindlela zokuthi akhuthaze abanye. Kazange ayekele ukuthandaza. (2 Tim. 1:3) Kazange ahlale ecabanga ngokuthi kulabazalwane ababemtshiyile, kodwa wayebonga ukuthi bakhona abangane ababelokhu bemsekela futhi bemncedisa. Kanti njalo waqhubeka etaditsha iLizwi likaNkulunkulu. (2 Tim. 3:16, 17; 4:13) Kodwa okuqakatheke kakhulu yikuthi wayengathandabuzi ukuthi uJehova loJesu balokhu bemthanda, kabamlahlelanga iganga lokuthi bazamnika umvuzo ngenxa yokuba qotho kwakhe.

19. UJehova wamncedisa njani uPhawuli?

¹⁹ UJehova wayevele emtshelile uPhawuli ukuthi uzahlukuluzwa ngenxa yokuba ngumKhristu. (ImiSeb. 21:11-13) Manje wamncedisa njani? Waphendula imithandazo yakhe futhi wayemnika amandla. (2 Tim. 4:17) UJehova wamtshela ukuthi uzawuthola umvuzo ayewusebenzele nzima kangaka. Waphinda wasebenzisa abangane bakhe abaqotho ukuthi bamncedise.

20. Ngokwalokho okutshiwo kuRoma 8:38, 39, kuyini okwanceda uPhawuli ukuthi aqinisele? Ungamlingisela njani?

²⁰ (4) Kusebenzise okubalayo. Zibuze, ‘Ngingamlingisela njani uPhawuli?’ Lathi kumele sikhangelele ukuthi sizahlukuluzwa ngenxa yokuthi sikhonza uJehova. (Mak. 10:29, 30) Kufanele sihlale sithandaza futhi sitaditsha iLizwi likaNkulunkulu ukuze sihlale siqotho kuye nxa siphakathi kobunzima. Kumele sikhumbule lokuthi okuqakatheke kakhulu esingakwenza yikukhazimulisa uJehova. Nxa singakwenza konke lokhu sizaqiniseka njengoPhawuli ukuthi uJehova kasoze asitshiye lokuthi kakulalutho umuntu angalwenza olungasehlukanisa lothando lwakhe.—Bala uRoma 8:38, 39; Heb. 13:5, 6.

21. Kuyini okwanceda u-Aya loHector?

²¹ Okwenziwa ngabantu esifunda ngabo eBhayibhilini kungasinceda ukuthi sibe lamandla  okuqinisela kuloba yibuphi ubunzima esiphakathi kwabo. Ngokwesibonelo, udadewethu okuthiwa ngu-Aya oliphayona eJapan uthi indaba kaJona yamnceda ukuthi angesabi ukutshumayela obala. Osakhulayo okuthiwa nguHector ohlala e-Indonesia futhi olabazali abangasiboFakazi uthi okwenziwa nguRuthe kumnceda ukuthi afune ukufunda ngoJehova njalo amkhonze.

22. Ungenzani ukuze uncedwe ngamavidiyo lezihloko ezitholakala kungxenye ethi “Lingisela Ukholo Lwabo”?

²² Ungakuthola ngaphi okunengi okumayelana labantu okukhulunywa ngabo eBhayibhilini okungakuqinisa? Amavidiyo, ukubalwa kweBhayibhili okusamdlalo lezihloko ezitholakala ngaphansi kwengxenye ethi “Lingisela Ukholo Lwabo” kungakunceda ukuthi uzizwisise ngendlela ejulileyo izinto okukhulunywa ngazo eBhayibhilini. * Ungakabukeli kumbe ulalele loba ubale indaba lezi ezichwayisiswe kuhle, cela uJehova akuncedise uthole izifundo eziqakathekileyo ongazisebenzisa. Zibone ungumuntu obala ngaye. Cabangisisa ngokuthi izinceku zikaJehova okukhulunywa ngazo zenzani lokuthi uJehova wazincedisa njani ukuthi zilwisane lobunzima ezaziphakathi kwabo. Kusebenzise okufundileyo. Bonga uJehova ngendlela aqhubeka ekuncedisa ngayo. Kanti njalo tshengisa ukuthi uyakuqakathekisa lokho akwenzela khona ngokuthi lawe ukhuthaze futhi usekele abanye.

23. Ngokwalokho okutshiwo ku-Isaya 41:10, 13, uJehova usithembisani?

²³ Impilo emhlabeni lo obuswa nguSathane ilukhuni futhi ngezinye izikhathi singaswela lokuthi senzeni. (2 Tim. 3:1) Kodwa akumelanga sikhathazeke kumbe sesabe ngoba uJehova uyabazi ubunzima esiphakathi kwabo. Usithembisa ukuthi uzasibamba ngesandla sakhe sokudla esilamandla nxa sidinga uncedo. (Bala u-Isaya 41:10, 13.) Siyaqiniseka ukuthi uzasincedisa lokuthi iMibhalo izasinika amandla okuthi siqinisele nxa sisebunzimeni.