1. Kungani uJesu wacela uJehova ukuthi akhangele abafundi bakhe?

NGOBUSUKU bokucina uJesu engakabulawa, wayecabanga ngobunzima obuzakwehlela abafundi bakhe. Wayebathanda, yikho wacela uYise ukuthi ‘abakhangele ngenxa yomubi.’ (Joh. 17:14, 15) Wayekwazi ukuthi esebuyele ezulwini, uSathane uDeveli wayezaqhubeka esilwa laloba ngubani ofuna ukukhonza uJehova. Lokhu kuhle kuveze ukuthi abantu bakaJehova babezadinga ukuvikelwa.

2. Kuyini okwenza singathandabuzi ukuthi uJehova uzayiphendula imithandazo yethu?

² UJehova wawuphendula umthandazo kaJesu ngoba uyayithanda iNdodana yakhe. Nxa singazimisela ukwenza okumthokozisayo uzasithanda lathi, futhi uzayiphendula imithandazo yethu nxa simcela ukuthi asincedise njalo asivikele. UJehova nguBaba olothando, yikho uzahlala ebanakekela abantwabakhe. Nxa angayekela ukukwenza lokho, ibizo lakhe lingangcoliswa kumbe abantu bakhulume kubi ngaye.

3. Kungani sidinga ukuvikelwa nguJehova khathesi?

³ Sidinga ukuvikelwa nguJehova khathesi ukwedlula loba yisiphi isikhathi. Phela uSathane sowaxotshwa ezulwini futhi ‘uthukuthele kakhulu.’ (Isam. 12:12) Sebangele ukuthi abanye abantu bacabange ukuthi bayabe besenza “inkonzo engcwele kuNkulunkulu” nxa besihlukuluza. (Joh. 16:2) Abanye abangakholwayo kuNkulunkulu bayasihlukuluza ngenxa yokuthi kasenzi njengabantu bomhlaba lo. Kungelani lokuthi kuyini okwenza basihlukuluze, kasesabi ngoba iLizwi likaNkulunkulu lithi: “INkosi ithembekile njalo izaliqinisa,  ilivikele komubi.” (2 Thes. 3:3) UJehova usivikela njani? Kasixoxeni ngendlela ezimbili akwenza ngazo lokhu.

4. Ngokwalokho okutshiwo ku-Efesu 6:13-17, kuyini uJehova asinike khona ukuze asivikele?

⁴ UJehova usinike izigqoko zokuzivikela empini njengoba sisilwa loSathane. (Bala u-Efesu 6:13-17.) Izigqoko lezi ziqinile futhi ziyasebenza sibili, kodwa zizasivikela kuphela nxa singazigqoka zonke futhi singazikhiphi. Zimelani izigqoko lezi? Kasizihlolisiseni.

5. Liyini ibhanti leqiniso futhi kungani kumele siligqoke?

⁵ Ibhanti leqiniso limela iqiniso eliseLizwini likaNkulunkulu. Kungani kumele siligqoke? Ngenxa yokuthi iqiniso eliseLizwini likaNkulunkulu liyasivikela ukuze singakhohliswa nguSathane ‘onguyise wamanga.’ (Joh. 8:44) Sekuleminyaka leminyaka eqamba amanga, futhi usedukise “umhlaba wonke.” (Isam. 12:9) Siligqoka njani ibhanti leli? Siligqoka ngokufunda iqiniso mayelana loJehova, ngokumkhonza “ngomoya langeqiniso” langokuthembeka kukho konke esikwenzayo.—Joh. 4:24; Efe. 4:25; Heb. 13:18.

6. Siyini isivikelo sesifuba esiyikulunga njalo kungani kumele sisigqoke?

⁶ Isivikelo sesifuba esiyikulunga simela izimiso zikaJehova ezilungileyo. Kungani kumele sisigqoke isivikelo lesi? Isivikelo sesifuba sasivikela inhliziyo yesotsha ukuthi ingagwazwa. Yikho lesivikelo sesifuba esiyikulunga sivikela izinhliziyo zethu ukuthi zingaphanjaniswa yizinto eziyingozi ezisemhlabeni lo. (Zaga. 4:23) UJehova ufuna simthande futhi simkhonze ngenhliziyo yonke. (Mat. 22:36, 37) Kodwa uSathane kafuni senze njalo, yikho uzama ukwenza ukuthi sithande izinto ezisemhlabeni wakhe ezizondwa nguJehova. (Jak. 4:4; 1 Joh. 2:15, 16) Nxa iqhinga lakhe leli lingehluleka ukusebenza, uyasihlukuluza efuna sephule izimiso zikaJehova ezilungileyo.

7. Sisigqoka njani isivikelo sesifuba esiyikulunga?

⁷ Sigqoka isivikelo sesifuba esiyikulunga ngokulandela izimiso zikaJehova ezimayelana lokuthi kuyini okulungileyo lokungalunganga. (Hubo. 97:10) Abanye bangacabanga ukuthi izimiso lezi zisincitsha inkululeko. Kodwa nxa besingayekela ukulandela okutshiwo liBhayibhili, besizafanana lesotsha elikhipha isivikelo sesifuba ngapha impi isidla ubhedu ngenxa yokuthi lisizwa sisinda. Lobo yibuphukuphuku obumangalisayo! Kodwa nxa simthanda uJehova kasisoze sibone angani imithetho yakhe ‘inzima,’ sizananzelela ukuthi iyasivikela.—1 Joh. 5:3.

8. Kutshoni ukugqoka amanyathela silungiselele ukutshumayela izindaba ezinhle?

⁸ UPhawuli usikhuthaza lokuthi sigqoke amanyathela silungiselele ukutshumayela izindaba ezinhle zokuthula. Lokhu kutsho ukuthi kumele sihlale silungele ukutshumayela izindaba ezinhle zoMbuso. Ukholo lwethu luyaqina nxa sihlala sitshumayela. Kuyakhuthaza sibili ukubona indlela abantu bakaJehova abasebenzisa ngayo amathuba abawatholayo ukuthi batshumayele izindaba ezinhle kungelani lokuthi bangaphi. Ngokwesibonelo, batshumayela emisebenzini, ezikolo, endlini ngendlu, endaweni zamabhizimusi, nxa bethenga izinto ezitolo, nxa bevakatshele izihlobo ezingayisiboFakazi, nxa bekhuluma labantu ababajayeleyo kumbe nxa bengenelisi ukuphuma endlini okwesikhathi esithile. Nxa besingakhulelwa  yikwesaba siyekele ukutshumayela, besizafanana lesotsha elikhipha amanyathela alo empini. Kubalula ukuthi lilimale enyaweni futhi kuba nzima ukuthi lizivikele nxa lihlaselwa lokuthi lilalele lokho elikutshelwa ngumkhokheli walo.

9. Kungani kumele sithwale ihawu elikhulu lokholo?

⁹ Ihawu elikhulu lokholo limela ukholo lwethu. Siyakholwa ukuthi uJehova uzazigcwalisa zonke izithembiso zakhe. Ukholo luzasinceda ukuthi ‘sicitshe yonke imitshoko yomubi evuthayo.’ Kungani kumele silithwale ihawu leli? Ngenxa yokuthi liyasivikela ukuthi singathatheki ngemfundiso zabahlamuki lokuthi singapheli amandla nxa abantu besichothoza ngalokho esikukholwayo. Nxa singelakholo, ngeke senelise ukulalela uJehova nxa abanye besiyenga ukuthi singalandeli izimiso zakhe. Kodwa nxa sisala ukwenza izinto uJehova angazifuniyo emsebenzini kumbe esikolo, siyabe sithwele ihawu lethu. (1 Phet. 3:15) Nxa sisala ukwenza umsebenzi ozasinika imali ethe xaxa kodwa usiphambanisa ekukhonzeni, siyabe sithwele ihawu lethu. (Heb. 13:5, 6) Kanti njalo nxa siqhubeka sikhonza uJehova lanxa siphikiswa, ihawu lethu liyabe lisivikela.—1 Thes. 2:2.

10. Iyini ingwane yensindiso futhi kungani kumele siyigqoke?

 ¹⁰ Ingwane yensindiso lithemba uJehova asinika lona. Lithemba lokuthi uJehova uzabanika umvuzo bonke abenza intando yakhe, lelokuthi lanxa singafa, uzasivusa. (1 Thes. 5:8; 1 Tim. 4:10; Tit. 1:1, 2) Njengoba nje ingwane eyayigqokwa lisotsha yayivikela ikhanda lalo, ithemba lensindiso livikela indlela esicabanga ngayo. Njani? Ithemba leli lisinceda ukuthi sihlale sicabanga ngezithembiso zikaNkulunkulu kulokuthi sikhathazeke kakhulu ngenhlupho esilazo. Siyigqoka njani ingwane yensindiso? Ngokuba leqiniso lokuthi indlela esicabanga ngayo ihambelana lekaNkulunkulu. Ngokwesibonelo, kasithembi inotho etshabalalayo, kodwa sithemba uNkulunkulu.—Hubo. 26:2; 104:34; 1 Tim. 6:17.

11. Iyini inkemba yomoya njalo kungani kumele siyisebenzise?

¹¹ Inkemba yomoya yiLizwi likaNkulunkulu iBhayibhili. Inkemba le ilamandla okuveza egcekeni loba yiwaphi amanga lokukhulula abantu emfundisweni zamanga lasemikhubeni elimazayo. (2 Khor. 10:4, 5; 2 Tim. 3:16, 17; Heb. 4:12) Ukutaditsha lokuqeqetshwa yinhlanganiso kaJehova kuyasinceda ukuthi siyisebenzise kuhle inkemba le. (2 Tim. 2:15) UJehova kasivikeli esebenzisa izigqoko zokuzivikela empini kuphela. Kuyini okunye akusebenzisayo?

12. Kuyini okunye esikudingayo futhi kungani?

¹² Isotsha eliyingcitshi liyakwazi ukuthi ngeke linqobe ibutho elikhulu lilodwa, lidinga ukuncediswa ngamanye amasotsha. Lathi ngeke senelise ukumnqoba uSathane labalandeli bakhe sisodwa. Yikho uJehova esinike amamiliyoni amasotsha ukuthi asincedise, abafowethu labodadewethu abasemhlabeni wonke.—1 Phet. 2:17.

13. Ngokwalokho okutshiwo kuHebheru 10:24, 25, kunceda ngani ukungena imihlangano yebandla?

¹³ Abafowethu labodadewethu bayasincedisa nxa sisemihlanganweni yebandla. (Bala uHebheru 10:24, 25.) Sonke siyake siphele amandla, kodwa imihlangano iyasikhuthaza. Izimpendulo zabafowethu labodadewethu ziyasivuselela. Izinkulumo leziboniso abazenzayo zenza sizimisele ukuqhubeka sikhonza uJehova. Lengxoxo esiba lazo labo imihlangano ingakaqalisi lalapho isiphelile ziyasikhuthaza. (1 Thes. 5:14) Imihlangano yethu iphinda isinike ithuba lokupha, futhi lokho kwenza sithokoze. (ImiSeb. 20:35; Rom. 1:11, 12) Isinceda lokuthi sithuthukise indlela esitshumayela lesifundisa ngayo. Ngokwesibonelo, sifundiswa ukusebenzisa kuhle amathuluzi aseBhokisini Elilamathuluzi Okufundisa. Yikho yilungiselele kuhle imihlangano yebandla. Lalelisisa nxa ukuyo futhi ukusebenzise okufundileyo. Ungenza njalo, uzakuba ‘lisotsha elihle likaKhristu uJesu.’—2 Tim. 2:3.

14. Ngobani abanye abasincedisayo?

¹⁴ Siphinda sincediswe ngamamiliyoni ezingilosi ezilamandla. Ingilosi eyodwa ingenza izimanga ezesabekayo! (Isaya. 37:36) Khathesi cabanga ngokungenziwa libutho lezingilosi ezilamandla. Kakulabantu kumbe amadimoni angalinqoba ibutho leli. UJehova unguSomandla, yikho nxa elathi, kakula baphikisi abangasinqoba kungelani lokuthi bangaki. (Abahlu. 6:16) Kukhumbule lokhu nxa udaniswe ngokukhulunywe kumbe ngokwenziwe ngomunye osebenza laye loba isihlobo esingasiFakazi. Kawuwedwa empini  oyilwayo. UJehova uyakusekela ngoba wenza lokho akutshela khona.

15. Ngokwalokho okutshiwo ku-Isaya 54:15, 17, kungani abantu bakaJehova bezaqhubeka betshumayela?

¹⁵ Umhlaba lo obuswa nguSathane ulezizatho ezinengi zokusizonda. Phela kakula qembu lezombusazwe esilisekelayo futhi kasiyi empini. Simemezela ibizo likaNkulunkulu, sitshumayela ukuthi uMbuso wakhe yiwo wodwa ozaletha ukuthula futhi silandela izimiso zakhe ezilungileyo. Siveza egcekeni ukuthi umbusi womhlaba lo ungusomangase lokuthi ungumbulali ololunya. (Joh. 8:44) Kanti njalo simemezela ukuthi sekuseduze ukuthi umhlaba lo utshabalaliswe. Kakulalutho uSathane labalandeli bakhe abangalwenza olungamisa umsebenzi wethu wokutshumayela. Sizaqhubeka sidumisa uJehova ngazo zonke izindlela esilazo. Lanxa uSathane elamandla amakhulu, kenelisi ukuvimba umsebenzi wokutshumayela ukuthi wenziwe emhlabeni wonke. Lokhu kungenxa yokuthi uJehova uyasivikela.—Bala u-Isaya 54:15, 17.

16. UJehova uzabasindisa njani abantu bakhe ngesikhathi sokuhlupheka okukhulu?

¹⁶ Ikusasa lisiphatheleni? Ngesikhathi sokuhlupheka okukhulu, uJehova uzasisindisa ngendlela ezimbili ezimangalisayo. Eyokuqala, uzavikela izinceku zakhe eziqotho lapho ebangela amakhosi omhlaba ukuthi abhubhise iBhabhiloni Enkulu, okutsho inkolo yamanga. (Isam. 17:16-18; 18:2, 4) Eyesibili, uzavikela abantu bakhe lapho esetshabalalisa okuyabe kusele emhlabeni kaSathane empini ye-Amagedoni.—Isam. 7:9, 10; 16:14, 16.

17. Ukuhlala siseduze loJehova kuzasinceda njani?

¹⁷ Nxa singahlala siseduze loJehova, kakulalutho uSathane angalwenza ukuthi asitshabalalise.Yena nguye ozatshabalaliswa, angaphindi abe khona! (Rom. 16:20) Yikho gqoka zonke izigqoko zokuzivikela futhi ungazikhiphi. Ungazami ukulwa loSathane lomhlaba wakhe uwedwa. Ncedisa abafowenu labodadewenu futhi ulalele lokho okutshelwa nguJehova. Ungenza njalo, uYihlo okuthandayo uzakuqinisa njalo akuvikele.—Isaya. 41:10.