1. Ngokwalokho okutshiwo kuMathewu 24:9, kungani kungamelanga simangale nxa abantu bomhlaba lo besizonda?

UJEHOVA wasidala ngendlela yokuthi siyenelisa ukuthanda abanye futhi siyafuna labo basithande. Yikho sizwa ubuhlungu mhlawumbe size sesabe nxa singathandwa. Ngokwesibonelo, udade okuthiwa nguGeorgina ohlala e-Europe uthi: “Ngileminyaka engu-14 umama wayengizonda ngenxa yokuthi ngikhonza uJehova. Ngazizwa ngilahliwe futhi ngasengizibona ngingumuntu omubi.” * Umfowethu okuthiwa nguDanylo wabhala wathi: “Ngesikhathi amasotsha engitshaya, engithethisa futhi engethusela ngenxa yokuthi nginguFakazi kaJehova ngezwa ngisesaba futhi ngiyangeka.” Ukuzondwa ngale indlela kubuhlungu kodwa akusimangalisi ngoba uJesu watsho ukuthi sizazondwa.—Bala uMathewu 24:9.

2-3. Kungani abalandeli bakaJesu bezondwa?

² Abantu bomhlaba lo bayabazonda abalandeli bakaJesu ngenxa yokuthi labo ‘kabasibo bomhlaba’ njengoJesu. (Joh. 15:17-19) Yikho lanxa sibahlonipha ohulumende, kasibakhonzi kumbe sikhonze izinto ezimela isizwe. Sikhonza uJehova kuphela. Siyakwazi ukuthi uNkulunkulu nguye olelungelo lokubusa abantu lanxa uSathane ‘lenzalo’ yakhe bekuphika lokho. (Gen. 3:1-5, 15) Sitshumayela ukuthi uMbuso kaNkulunkulu yiwo kuphela ozaqeda inhlupho zabantu lokuthi sekuseduze ukuthi uchoboze bonke abawuphikisayo. (Dan. 2:44; Isam. 19:19-21) Lezi zindaba ezinhle kwabathobekileyo kodwa zindaba ezimbi kwababi.—Hubo. 37:10, 11.

 ³ Okunye okwenza abantu bomhlaba lo basizonde yikuthi silalela uNkulunkulu endleleni esiziphatha ngayo. Lokho uJehova athi kuhle kumbe kubi kuyimpumalanga lentshonalanga lalokho abantu bomhlaba lo abathi kuhle kumbe kubi. Ngokwesibonelo, lamuhla abantu kababoni lutho olubi ngokuziphatha okwenyanyekayo kwezemacansini okuhambelana lalokho okwakusenziwa ngabantu beSodoma leGomora ababhujiswa nguNkulunkulu. (Juda. 7) Abantu abanengi basenza inhlekisa futhi bathi sibona angani imibono yethu ingcono kuleyabo ngoba silandela okutshiwo liBhayibhili endabeni le.—1 Phet. 4:3, 4.

4. Kuyini okungasinceda siqinisele nxa abantu besizonda?

⁴ Kuyini okungasinceda siqinisele nxa abantu besizonda futhi besithethisa? Yikuba lokholo lokuthi uJehova uzasincedisa. Ukholo lwethu lunjengehawu, lungenelisa ‘ukucitsha yonke imitshoko yomubi evuthayo.’ (Efe. 6:16) Kodwa kasidingi ukholo kuphela, sidinga lothando. Lokhu kungenxa yokuthi uthando “kalucaphuki.” Lubekezelela zonke izinto futhi luqinisela ezintweni zonke. (1 Khor. 13:4-7, 13) Khathesi kasixoxeni ngokuthi ukuthanda uJehova, abafowethu labodadewethu ngitsho lezitha zethu kusinceda njani ukuthi siqinisele nxa sizondwa.

5. Ukuthanda uYise kwamnceda njani uJesu?

⁵ Ngobusuku bokucina uJesu engakabulawa, watshela abalandeli bakhe abathembekileyo wathi: ‘Ngenza njengoba nje uBaba engilayile ngoba ngiyamthanda uBaba.’ (Joh. 14:31) UJesu wenelisa ukuqinisela ebunzimeni ngenxa yokuthi wayemthanda uJehova. Lathi sizenelisa ukuqinisela nxa simthanda uJehova.

6. Ngokwalokho okutshiwo kuRoma 5:3-5, izinceku zikaJehova zizwa njani nxa abantu bomhlaba lo bezizonda?

⁶ Ukuthanda uJehova yikho okuhlala kunceda izinceku zakhe ukuthi ziqinisele nxa zihlukuluzwa. Ngokwesibonelo, ngesikhathi abaphostoli belaywa ngumthethwandaba omkhulu wamaJuda ukuthi bayekele ukutshumayela, ukuthanda uNkulunkulu kwabafuqa ukuthi ‘balalele uNkulunkulu umbusi kulokulalela abantu.’ (ImiSeb. 5:29; 1 Joh. 5:3) Uthando olunje lunceda labafowethu ukuthi baqinisele nxa behlukuluzwa ngohulumende abalamandla futhi abalolunya. Kasipheli mandla nxa abantu bomhlaba lo besizonda kodwa siyathokoza.—ImiSeb. 5:41; bala uRoma 5:3-5.

7. Kumele senzeni nxa abangakithi besiphikisa?

⁷ Kungaba nzima kakhulu ukuthi siqinisele nxa sihlukuluzwa ngabangakithi. Nxa amanye amalunga emuli angananzelela ukuthi sesikuthanda lokho esikufunda ngoJehova angacabanga ukuthi sesidukisiwe. Amanye wona angacabanga ukuthi sesiphambene. (Khangela uMakho 3:21.) Angenza lezinto ezisizwisa ubuhlungu. Lokhu akumelanga kusimangalise ngoba uJesu wathi: “Izitha zomuntu zizakuba yilabo ahlala labo.” (Mat. 10:36) Kungelani lokuthi abangakithi basiphatha njani, akumelanga sibabone beyizitha zethu. Ukuqhubeka simthanda kakhulu uJehova kuzasinceda ukuthi sibathande kakhulu labo. (Mat. 22:37-39) Kodwa kasisoze siyekele ukulalela lokho okutshiwo liBhayibhili ngenxa nje yokuthi sifuna ukuthokozisa omunye umuntu.

8-9. Kuyini okwanceda omunye udade ukuthi aqinisele?

⁸ UGeorgina esike sakhuluma ngaye wenelisa ukuqinisela lanxa unina wayemthwalise amagabha avuzayo. Uthi: “Mina lomama saqalisa ukufunda iBhayibhili laboFakazi, kodwa ngemva kwenyanga eziyisithupha sengifuna ukungena imihlangano  yebandla, waqalisa ukungiphikisa. Ngathola ukuthi wayesethintana labahlamuki futhi wayengitshela izinto ezingamanga ababezitsho. Wayengithethisa, angidonse ngenwele, angikhame futhi alahle amabhuku ami. Ngathi sengileminyaka engu-15 ngabhabhathizwa. Umama wazama ukungivimba ukuthi ngikhonze uJehova ngokungihambisa endaweni lapho okugcinwa khona abantwana abangamahlongandlebe futhi abanye bakhona babesebenzisa izidakamizwa besenza lobunye ubungezwa. Kunzima sibili ukuqinisela nxa uphikiswa ngumuntu okumele ukuthi ngabe uyakuthanda njalo uyakunakekela.”

⁹ Kuyini okwanceda uGeorgina ukuthi aqinisele? Uthi: “Ngelanga umama aqalisa ngalo ukungiphikisa, ngangisanda ukuqeda ukubala lonke iBhayibhili. Ngangingasakuthandabuzi ukuthi sengilitholile iqiniso futhi ngangizizwa ngiseduze loJehova. Ngangihlala ngithandaza kuye futhi wayeyizwa imithandazo yami. Ngesikhathi ngisendaweni leyana umama ayengihambise kuyo, ngangike ngivakatshele omunye udade futhi sasitaditsha iBhayibhili ndawonye. Ngalesosikhathi abafowethu labodadewethu babengiqinisa kakhulu. Babengiphatha njengelunga lemuli zabo. Ngazibonela ngawami ukuthi uJehova ulamandla kulabaphikisi bethu kungelani lokuthi bangobani.”

10. Kuyini esingathandabuziyo ukuthi uJehova uzakwenza?

¹⁰ Umphostoli uPhawuli wabhala wathi akulalutho ‘olungasehlukanisa lothando lukaNkulunkulu esilutshengiswa ngoKhristu uJesu iNkosi yethu.’ (Rom. 8:38, 39) Lanxa singathwala nzima okwesikhathi esithile, uJehova uzahlala esiduduza futhi esiqinisa. Kanti njalo uzasincedisa esebenzisa abafowethu labodadewethu njengoba wenza kuGeorgina.

11. Ngokwalokho okutshiwo kuJohane 15:12, 13, ukuthandana kwakuzabanceda njani abafundi bakaJesu? Nika isibonelo.

¹¹ Ngobusuku bokucina uJesu engakabulawa, wakhumbuza abafundi bakhe ukuthi bathandane. (Bala uJohane 15:12, 13.) Ukwenza njalo kwakuzabanceda ukuthi bahlale bemanyene futhi baqinisele nxa umhlaba ubazonda. Ake sixoxe ngokwenziwa ngamaKhristu ayesebandleni leThesalonika. AmaKhristu la aqalisa ukuhlukuluzwa ibandla lawo lisanda nje ukubunjwa. Kodwa aqhubeka eqotho futhi ethandana. (1 Thes. 1:3, 6, 7) UPhawuli  wawakhuthaza ukuthi aqhubeke etshengisana uthando futhi ‘akwenze kakhulu lokho.’ (1 Thes. 4:9, 10) Uthando lwaluzawenza aduduze abahlulukelweyo futhi asekele ababuthakathaka. (1 Thes. 5:14) Enza khona kanye uPhawuli awakhuthaza ukuthi akwenze ngoba kwathi sekudlule phose umnyaka, uPhawuli esebhala incwadi yakhe yesibili, wathi: “Uthando elilalo komunye lomunye luqhubeka lusanda.” (2 Thes. 1:3-5) Indlela ayethandana ngayo yawanceda ukuthi aqinisele ngesikhathi ehlukuluzwa.

12. Abafowethu labodadewethu batshengisa njani ukuthi bayathandana ngesikhathi kulempi kwelinye ilizwe?

¹² Ake sixoxe ngalokho okwenzakala kumfowethu uDanylo lomkakhe. Kwathi impi eyayiselizweni labo ifika edolobheni ababehlala kulo, baqhubeka bengena imihlangano yebandla, besenza konke abangakwenza ekutshumayeleni futhi besabelana labazalwane ukudla ababelakho. Ngelinye ilanga kwatheleka amasotsha ayehlomile emzini wabo. UDanylo uthi: “Angitshela athi ngitshiye ukuba nguFakazi. Ngala, yikho aqalisa ukungitshaya futhi enza angani azangidubula wona edubula phezu kwekhanda lami. Athi engakasuki angethusela athi azaphenduka ezobamba umkami iganyavu. Kodwa abafowethu labodadewethu bahle basigadisa isitimela saya kwelinye idolobho. Kangisoze ngalukhohlwa uthando esalutshengiswa ngabazalwane labo. Sathi sifika abazalwane bedolobho lelo basinika ukudla futhi bangincedisa ukuthi ngithole umsebenzi lendawo yokuhlala. Ngokuhamba kwesikhathi, senelisa ukwamukela emzini wethu abazalwane ababebalekela impi.” Okwenzakala kumfowethu lo lomkakhe kwenza sibone ukuthi uthando abafowethu labodadewethu abasitshengisa lona lungasinceda siqinisele nxa sizondwa.

13. Umoya ongcwele usinceda njani ukuthi siqinisele nxa abantu besizonda?

¹³ UJesu watshela abalandeli bakhe ukuthi bathande izitha zabo. (Mat. 5:44, 45) Kulula yini ukukwenza lokho? Ngitsho lakancane! Kodwa umoya ongcwele uyasincedisa ukuthi sikwenze. Izithelo zomoya zigoqela uthando, ukubekezela, umusa, ubumnene lokuzibamba. (Gal. 5:22, 23) Ziyasinceda ukuthi siqinisele nxa sizondwa. Abantu abanengi abasasiphikisi ngenxa yokuthi omkabo,  abantwababo kumbe omakhelwane babatshengisa ubuntu lobo. Abanengi babo sebeze bengabafowethu labodadewethu. Yikho thandaza ucele umoya ongcwele nxa kukuthwalisa nzima ukuthanda labo abakuzondela ukuthi ukhonza uJehova. (Luk. 11:13) Kanti njalo ungathandabuzi ukuthi ukulalela lokho esikutshelwa nguNkulunkulu kungcono ukwedlula loba yini.—Zaga. 3:5-7.

14-15. URoma 12:17-21 wamnceda njani uYasmeen ukuthi atshengise umkakhe ukuthi uyamthanda lanxa wayemphikisa kabuhlungu?

¹⁴ Khathesi kasixoxeni ngodadewethu okuthiwa nguYasmeen. Wathi esiba nguFakazi kaJehova umkakhe wacabanga ukuthi useqiliwe njalo wazama ukumyekelisa ukukhonza uJehova. Wamthethisa futhi watshela izihlobo, lomfundisi lenyanga ukuthi bamethusele njalo bamsole ngokuthi udala ukwahlukana emulini. Waze wathethisa labazalwane besemhlanganweni webandla. UYasmeen wayehlala ekhala ezimathonsi ngenxa yokuphathwa ngendlela elesihluku kangaka.

¹⁵ EWolu yoMbuso abazalwane babemduduza futhi bemqinisa. Abadala bamkhuthaza ukuthi asebenzise okutshiwo kuRoma 12:17-21. (Bala.) UYasmeen uthi: “Kwakungalula, kodwa ngacela uJehova ukuthi angincedise futhi ngenza konke engangingakwenza ukuthi ngilandele okutshiwo liBhayibhili. Umkami wayesithi nxa angahaza inhlabathi ekhitshini ezama ukungikhawulisa, ngiyibuthe. Nxa wayengithethisa, ngangimphendula kuhle njalo ngangimnakekela nxa wayegula.”

16-17. Ufundani kuYasmeen?

¹⁶ Okwenziwa nguYasmeen kwanceda sibili. Uthi: “Umkami waqalisa ukungithemba ngoba wayekwazi ukuthi ngihlala ngikhuluma iqiniso. Wayesengilalela nxa sikhuluma ngendaba zokukhonza futhi wathi uzatshintsha ukuze kube lokuthula emulini. Khathesi nxa ngisiya emihlanganweni yebandla, usengitshela ukuthi ngifike ngikholise. Sesizwanana kulakuqala njalo sekulokuthula emzini wethu. Isifiso sami ngesokuthi umkami amukele iqiniso futhi laye abe nguFakazi.”

¹⁷ Okwenzakala kuYasmeen kutshengisa ukuthi uthando ‘lubekezelela zonke izinto, luthemba zonke izinto, luqinisela ezintweni zonke.’ (1 Khor. 13:4, 7) Nxa singatshengisa abanye ukuthi siyabathanda, bangayekela ukusiphikisa, futhi uJehova uzathokoza. Kodwa singenelisa ukuthokoza lanxa abasiphikisayo beqhubeka besizonda. Singakwenza njani?

18. Kungani sithokoza nxa sizondwa?

¹⁸ UJesu wathi: “Liyathokoza nxa abantu belizonda.” (Luk. 6:22) Kasifuni ukuzondwa futhi kasikholisi nxa sihlukuluzwa ngenxa yalokho esikukholwayo. Manje kungani sithokoza? Nanzi izizatho ezintathu. Esokuqala, nxa siqinisela, uNkulunkulu uyathokoza ngathi. (1 Phet. 4:13, 14) Esesibili, ukholo lwethu luba ligugu kakhulu futhi luyaqina. (1 Phet. 1:7) Esesithathu, sizathola ukuphila okungapheliyo.—Rom. 2:6, 7.

19. Kungani abaphostoli babethokoza ngemva kokubhaxabulwa?

¹⁹ UJesu wathi esevusiwe, abaphostoli bayithola intokozo ayekhulume ngayo. Bathokoza lanxa babeqeda ukubhaxabulwa futhi belaywe ukuthi bayekele ukutshumayela. Kungani babethokoza? “Ngenxa yokuthi kwakubonakale kufanele ukuthi baphathwe kubi ngenxa yebizo [likaJesu].” (ImiSeb. 5:40-42) Babeyithanda kakhulu iNkosi yabo yikho babengazesabi izitha zabo futhi batshengisa uthando lolo ‘ngokungayekeli’ ukutshumayela izindaba ezinhle. Abafowethu labodadewethu abanengi lamuhla baqhubeka bekhonza uJehova bethembekile lanxa besebunzimeni. Bayakwazi ukuthi kasoze awukhohlwe umsebenzi wabo lothando abalutshengisa ebizweni lakhe.—Heb. 6:10.

20. Sizaxoxa ngani esihlokweni esilandelayo?

²⁰ Abantu bomhlaba lo bazaqhubeka besizonda ingqe nje umumo lo usakhona. (Joh. 15:19) Kodwa kakumelanga sesabe ngoba uJehova ‘uzaqinisa njalo avikele’ abaqotho bakhe njengoba sizabona esihlokweni esilandelayo. (2 Thes. 3:3) Ngakho kasiqhubekeni sithanda uJehova, abafowethu labodadewethu ngitsho lezitha zethu. Nxa singakwenza lokho, sizahlala simanyene futhi siqinile ekukhonzeni. Sizadumisa uJehova njalo sizatshengisa ukuthi uthando lulamandla ukwedlula inzondo.