1-2. Kuyini okuzakwenza uNkulunkulu akwamukele ukukhonza kwethu?

 KUFIKANI engqondweni yakho nxa usizwa ibala elithi “ukukhonza”? Engxenye ucabanga ngomzalwane oguqileyo othandaza kuJehova ngenhliziyo yonke engakayilala, kumbe ucabanga ngemuli ethokozayo ehlezi ndawonye ifunda ngoJehova.

² Ezibonelweni lezi zombili bonke bayabe bekhonza uJehova. UJehova uzakwamukela yini ukukhonza kwabo? Uzakwamukela nxa bemlalela njalo bekwenza ngoba bemthanda futhi bemhlonipha. Siyamthanda kakhulu uJehova njalo siyakwazi ukuthi ufanele ukukhonzwa futhi sifuna ukwenza konke okusemandleni ethu ukuthi simkhonze.

3. Sizaxoxa ngani esihlokweni lesi?

³ Esihlokweni lesi sizahlola indlela zokukhonza uJehova ayezamukela kudala besesihlola eziyisitshiyagalombili azamukelayo lamuhla. Ngesikhathi sixoxa ngayinye yazo cabanga ngokuthi wena ungathuthuka njani ekumkhonzeni. Sizahlola lokuthi kungani ukukhonza kweqiniso kusenza sithokoze.

4. Izinceku zikaJehova ezaphila kudala zatshengisa njani ukuthi ziyamhlonipha futhi ziyamthanda?

⁴ Kungakabi yisikhathi samaKhristu amadoda athembekileyo anjengo-Abela loNowa lo-Abhrahama loJobe atshengisa ukuthi ayamhlonipha futhi ayamthanda uJehova. Akwenza njani lokhu? Ayemlalela, elokholo kuye njalo esenza imihlatshelo. IBhayibhili alisitsheli konke mayelana lokuthi kwakumele amkhonze  njani. Kodwa kusegcekeni ukuthi enza konke okusemandleni awo ukuthi amdumise uJehova njalo wakwamukela ukukhonza kwawo. Ngokuhamba kwesikhathi uJehova wanika izizukulwane zika-Abhrahama uMthetho esebenzisa uMosi. UMthetho kaMosi wawucacisa konke okwakumele bakwenze ukuze amukele ukukhonza kwabo.

5. Yiluphi utshintsho olwabakhona ekukhonzeni kweqiniso ngemva kokufa lokuvuswa kukaJesu?

⁵ Ngemva kokufa lokuvuswa kukaJesu, uJehova wayengasakhangelelanga ukuthi abantu balandele uMthetho kaMosi. (Rom. 10:4) AmaKhristu kwasekumele alandele umthetho omutsha okuthiwa ‘ngumthetho kaKhristu.’ (Gal. 6:2) Kulokuthi atshone elandela imithetho eminenginengi ayeyibambe ngekhanda, ayengalandela “umthetho” lo ngokulalela lokho okwafundiswa nguJesu langokumlingisela. Lalamuhla amaKhristu enza konke okusemandleni awo ukuthi alandele uKhristu ukuze athokozise uJehova njalo ‘athole ukuphumula.’—Mat. 11:29.

6. Kuyini okumele sikwenze ukuze isihloko lesi sisincede?

⁶ Ngesikhathi sixoxa ngendlela yokukhonza ngayinye zibuze, ‘Sengithuthuke kangakanani endabeni le?’ Ungaphinda uzibuze, ‘Kungaphi engingathuthukisa khona?’ Thokoza ngalokho okwenza khathesi kodwa ungekeli ukucela uJehova ukuthi akuncedise ubone lapho ongathuthuka khona.

7. UJehova uyibona njani imithandazo yethu esuka enhliziyweni?

⁷ Siyabe sikhonza uJehova nxa sikhuleka kuye. IMibhalo ifanisa imithandazo yethu lempepha elungiswe kuhle eyayitshiswa ethabanikeli futhi ngokuhamba kwesikhathi eyayisitshiswa ethempelini. (Hubo. 141:2) Nxa impepha le yayitshiswa kwakusiba loqhatshi olwaluthokozisa uNkulunkulu. Lemithandazo yethu esuka enhliziyweni ‘iyamthokozisa’ uNkulunkulu lanxa siyabe sisebenzisa amazwi alula. (Zaga. 15:8; Dute. 33:10) Silezizatho ezenza siqiniseke ukuthi uJehova uyakuthanda ukuzwa siveza indlela esimthanda ngayo futhi simbonga emithandazweni yethu. Ufuna simtshele okusikhathazayo kanye lezifiso zethu. Ungakakhuleki, kuhle ukuthi uqale ucabangisise ngalokho ozakutsho. Nxa ungenza njalo uzanikela impepha emthokozisayo uYihlo osezulwini.

8. Yiliphi ithuba elihle esilalo lokudumisa uNkulunkulu?

⁸ Siyabe sikhonza uJehova nxa simdumisa. (Hubo. 34:1) Sidumisa uJehova nxa sitshela abanye ngobuntu bakhe kanye lemisebenzi yakhe. Nxa sikuqakathekisa lokho esikwenzelwa nguJehova sizakuba lezinto ezinengi ezinhle esingazitsho ngaye. Yikho zinike isikhathi sokucabangisisa ngakwenzele khona ukuze ube lezizatho zokumdumisa. Umsebenzi wokutshumayela usinika ithuba elihle ‘lokunikela kuNkulunkulu umhlatshelo wokudumisa, okutsho isithelo sezindebe zethu.’ (Heb. 13:15) Njengoba nje kuqakathekile ukuthi sicabangisise ngalokho esizakutsho nxa sesizakhuleka kuJehova, kuqakathekile lokuthi sicabangisise ngalokho esizakutsho ebantwini esizahlangana labo ekutshumayeleni. Sifuna ukwenza konke okusemandleni ethu nxa sinikela “umhlatshelo wokudumisa.” Lokhu  yikho okwenza sitshiseke nxa sitshela abanye iqiniso eliseBhayibhilini.

9. Ukungena imihlangano yebandla kusinceda njani? Wena kukuncede njani?

⁹ Siyabe sikhonza uJehova nxa singena imihlangano yebandla. UJehova walaya ama-Israyeli wathi: “Kathathu ngomnyaka, wonke amadoda kumele aziveze phambi kukaJehova uNkulunkulu wenu endaweni azayikhetha.” (Dute. 16:16) Kwakumele atshiye imizi yawo kanye lamasimu awo kungelamuntu owalindileyo. Kodwa uJehova wawathembisa wathi: “Kakho ozahawukela ilizwe lenu ngesikhathi lisiyabonakala phambi kukaJehova uNkulunkulu wenu.” (Eks. 34:24) Ama-Israyeli ayehamba emikhosini yaminyaka yonke ngoba ayemthemba uJehova. Lokhu kwenza athola izibusiso ezinengi ezigoqela ukuzwisisa ngcono uMthetho kaNkulunkulu, ithuba lokucabangisisa ngobuhle bakhe kanye lokukholisa ubudlelwano labanye ababesemikhosini le. (Dute. 16:15) Lathi nxa singatshiya ezinye izinto ukuze singene imihlangano yebandla, uJehova uzasibusisa ngendlela efananayo. Kanti njalo kumele ukuthi uyathokoza kakhulu nxa singahamba emihlanganweni yebandla silungiselele izimpendulo ezimfitshane futhi ezizanceda abanye.

10. Kungani ukuhlabela kuqakathekile ekukhonzeni kwethu?

¹⁰ Siyabe sikhonza uJehova nxa sihlabela labanye. (Hubo. 28:7) Ama-Israyeli ayebona ukuhlabela kuyingxenye eqakathekileyo yokukhonza kwawo. INkosi uDavida yakhetha amaLevi angu-288 ukuthi abe ngabahlabeleli ethempelini. (1 ImiLan. 25:1, 6-8) Lamuhla sitshengisa ukuthi siyamthanda uNkulunkulu nxa sihlabela izingoma zokudumisa. Akudingi ukuthi sibe zingcitshi ekuhlabeleni ukuze sikwenze lokhu. Phela nxa sikhuluma, “sonke siyaphambanisa izikhathi ezinengi” kodwa lokhu akusivimbi ukuthi sikhulume emihlanganweni yebandla lasekutshumayeleni. (Jak. 3:2) Yikho-ke kumele sihlabele izingoma zokudumisa uJehova lanxa sicabanga ukuthi asikwazi ukuhlabela.

11. Ngokwalokho okutshiwo kuHubo 48:13, kungani kumele sibe lesikhathi sokutaditsha iBhayibhili siyimuli?

¹¹ Siyabe sikhonza uJehova nxa sitaditsha iLizwi lakhe futhi sifundisa abantwabethu ngaye. Ngelanga leSabatha ama-Israyeli ayetshiya imisebenzi yawo yansuku zonke ukuze aqinise ubungane bawo loJehova. (Eks. 31:16, 17) Lawo ayethembekile ayefundisa abantwabawo ngoJehova langobuhle bakhe. Lathi kumele sibe lesikhathi sokubala lokutaditsha iLizwi likaNkulunkulu. Nxa sikwenza lokhu siyabe simkhonza futhi kuyasinceda ukuthi sisondele kuye. (Hubo. 73:28) Kanti njalo nxa sitaditsha siyimuli siyabe sinceda abantwabethu ukuthi babe ngabangane abaseduze bakaBaba wethu osezulwini osithandayo.—Bala iHubo 48:13.

12. Sifundani endleleni uJehova ayebona ngayo umsebenzi walabo ababesenza impahla yethabanikeli?

¹² Siyabe sikhonza uJehova nxa sisakha futhi sigcina izindawo esikhonzela kuzo zisesimeni esihle. UJehova wayebona umsebenzi wokwakha ithabanikeli lowokwenza impahla yalo ungcwele. (Eks. 36:1, 4) Lalamuhla uJehova ubona umsebenzi wokwakha izakhiwo zenhlanganiso kanye lokuzinakekela uyinkonzo  engcwele. Abanye abafowethu labodadewethu baqeda isikhathi esinengi besenza umsebenzi lo. Siyawuqakathekisa sibili umsebenzi lo abawenzayo besekela uMbuso. Kodwa bayawenza lomsebenzi wokutshumayela futhi abanye babo bangabe befuna ukuba ngamaphayona. Abadala bebandla batshengisa ukuthi bayawusekela umsebenzi wokwakha ngokuvumela abafowethu labodadewethu laba abakhutheleyo ukuthi babe ngamaphayona nxa befanela. Sonke singancedisa ukugcina izakhiwo zethu zihlanzekile futhi zisesimeni esihle kungelani lokuthi sizingcitshi emsebenzini wokwakha loba hatshi.

13. Kungani iminikelo esiyenza sisekela umsebenzi woMbuso iqakathekile?

¹³ Siyabe sikhonza uJehova nxa sinikela ukuze sisekele umsebenzi woMbuso. Ama-Israyeli kwakungamelanga aziveze phambi kukaJehova engaphathanga lutho. (Dute. 16:16) Kwakumele abuye lesipho kusiya ngalokho akwenelisayo. Nxa ayesenza njalo ayetshengisa ukuthi ayambonga uJehova ngakho konke ayewenzele khona. Singatshengisa njani ukuthi siyamthanda uJehova lokuthi siyambonga ngakho konke asenzele khona ukuze sihlale silokholo oluqinileyo? Enye indlela yikunikela ngalokho esikwenelisayo ukuze kubhadalwe izindleko zebandla futhi sisekele umsebenzi womhlaba wonke. Umphostoli uPhawuli wathi: “Nxa umuntu elesifiso sokupha, siyamukeleka kakhulu kusiya ngalokho alakho hatshi ngalokho angelakho.” (2 Khor. 8:4, 12) UJehova uyayiqakathekisa yonke iminikelo esiyenzayo kungelani lokuthi ingakanani.—Mak. 12:42-44; 2 Khor. 9:7.

14. Ngokwalokho okutshiwo kuZaga 19:17, uJehova uzibona njani izinto esizenzela abanye?

¹⁴ Siyabe sikhonza uJehova nxa sisiza amaKhristu adinga uncedo. UJehova wathembisa ukuthi uzawabusisa ama-Israyeli ayenceda abayanga. (Dute. 15:7, 10) Sonke isikhathi nxa sincedisa omunye esikhonza laye uJehova ukubona njengesipho esiphiwa yena. (Bala iZaga 19:17.) Ngokwesibonelo, amaKhristu eFiliphi athumela uPhawuli isipho ngesikhathi ebotshiwe futhi uPhawuli wathi ‘singumhlatshelo owamukelekayo, omthokozisa kakhulu uNkulunkulu.’ (Flp. 4:18) Cabanga ngabantu abasebandleni okulo ubusuzibuza ukuthi ukhona yini ongamncedisa. UJehova uyathokoza nxa esibona sisebenzisa isikhathi sethu lamandla esilawo leziphiwo zethu kanye lempahla esilayo ukuze sincede abanye. Lokhu ukubona kuyindlela yokumkhonza.—Jak. 1:27.

15. Lanxa ukukhonza kweqiniso kudinga ukuthi sisebenzise isikhathi lamandla ethu kungani sisithi akunzima?

¹⁵ Ukukhonza kweqiniso kudinga ukuthi sisebenzise isikhathi sethu lamandla ethu, kodwa akunzima. (1 Joh. 5:3) Okwenza kungabi nzima yikuthi sikhonza uJehova ngenxa yokuthi siyamthanda. Cabanga ngomntwana ofuna ukunika uyise isipho. Angaqeda amahora amanengi emdwebela umfanekiso. Kazisoli ngesikhathi asiqede edweba. Uyamthanda uyise njalo uyathokoza ukumnika isipho lesi. Lathi siyamthanda uJehova yikho siyathokoza ukusebenzisa isikhathi sethu lamandla ethu ukuze simkhonze.

16. Ngokwalokho okutshiwo kuHebheru 6:10, uJehova uzwa njani ngalokho esimenzela khona?

 ¹⁶ Abazali abathanda abantwababo abakhangelelanga ukuthi babanike izipho ezifananayo. Bayakwazi ukuthi abantwana ngeke benze izinto ezifananayo ngenxa yokuthi batshiyene. LoBaba wethu osezulwini kakhangelelanga ukuthi senze izinto ezifananayo. Mhlawumbe wena uyenelisa ukwenza okunengi ukwedlula abanye ebandleni. Kumbe ungabe ungenelisi ukwenza okunengi njengabanye ngenxa yokuguga, ukugula loba lokho okhangelelwe ukuthi ukwenze emulini. Nxa ungenelisi ukwenza okunengi ungadani. (Gal. 6:4) UJehova kasoze awukhohlwe umsebenzi wakho. Nxa usenza konke okusemandleni akho futhi ukwenza ngesizatho esiyiso uJehova uyathokoza. (Bala uHebheru 6:10.) UJehova uyazazi lezifiso zakho. Ufuna uthokoze futhi usuthiseke ngalokho owenelisa ukumenzela khona.

17. (a) Singenzani nxa sikubona kunzima ukwenza okunye kwalokho okumele sikwenze ekukhonzeni? (b) Kukuncede njani okunye okusebhokisini elithi “ Okungenza Uthokoze Kakhulu”?

¹⁷ Singenzani nxa sikubona kunzima ukwenza ezinye izinto esixoxe ngazo, njengokutaditsha iBhayibhili loba ukutshumayela? Nxa singahlala sizenza izinto lezi singacina sizikholisa futhi zizasinceda. Singafanisa ukukhonza kwethu lokuqeqetsha umzimba kumbe ukufundela ukutshaya ikatari. Nxa singakwenza lokhu lapha lalaphana ngeke sithuthuke kangako, kodwa kuthiwani nxa singakwenza nsuku zonke? Singaqalisa sikwenza okwesikhatshana sibe silokhu singezelela ngokuhamba kwesikhathi. Nxa singabona intuthuko esiyenzayo asisoze sikubone kungumthwalo esikwenzayo kodwa sizakukholisa. Lokhu kungenzakala lasekukhonzeni kwethu.

18. Kuyini okuqakatheke kulakho konke esingakwenza futhi kuzasinceda njani?

¹⁸ Ukukhonza uJehova ngenhliziyo yonke yinto eqakatheke kulazo zonke. Nxa singakwenza lokho sizathokoza, sisuthiseke empilweni njalo sibe lethemba lokukhonza uJehova kuze kube nini lanini. (Zaga. 10:22) Sihlalisekile ngoba siyakwazi ukuthi uJehova uyabancedisa labo abamkhonzayo nxa besebunzimeni. (Isaya. 41:9, 10) Silezizatho zokuthokoza sibili njengoba sikhonza uBaba wethu olothando ofanele “ukwamukela inkazimulo lodumo” oluvela kukho konke akudalileyo.—Isam. 4:11.