Abanye ababala indaba le basala bezibuza umbuzo lo. Kodwa amavesi la akhuluma ngamadoda amabili atshiyeneyo ayethiwa ngoMefibhoshethi futhi kukhona esingakufunda emavesini la.

INkosi uSawuli yayilamadodana ayisikhombisa lamadodakazi amabili. Izibulo layo kwakunguJonathani. Ngokuya kwesikhathi yaba lenye indodana okuthiwa nguMefibhoshethi eyayizalelwa ngumfazi wayo oseceleni okuthiwa nguRizipha. UJonathani laye wayelendodana okuthiwa nguMefibhoshethi. Yikho iNkosi uSawuli yayilendodana lomzukulu abalebizo elifananayo.

INkosi uSawuli yaqalisa ukuzonda amaGibheyoni ayehlala ko-Israyeli yasizama ukuwathanyela wonke. Kukhanya manengi abulawayo. Lokhu kwakungaqondanga ngoba kudala ngesikhathi sikaJoshuwa abadala bako-Israyeli babenze isivumelwano sokuthula lamaGibheyoni.—Josh. 9:3-27.

Isivumelwano leso sasilokhu sisebenza ngesikhathi seNkosi uSawuli. Kodwa inkosi yakhetha ukungasilandeli. Lokho kwakusitsho ukuthi yona kanye labendlu yayo basebelecala legazi. (2 Sam. 21:1) Ngemva kwesikhathi uDavida waba yinkosi. AmaGibheyoni ayengazange abulawe nguSawuli amtshela lokho okwakwenzakele. UDavida wawabuza ukuthi ayefuna ukuhlawulwa ngani ukuze uJehova aphinde abusise ilizwe lako-Israyeli. AmaGibheyoni ayengacela imali kodwa athi kungcono aphiwe amadodana ayisikhombisa endoda ‘eyaceba okubi ngawo aze atshabalala’ ukuze awabulale. (Nani. 35:30, 31) UDavida wakwenza lokho ayekucela.—2 Sam. 21:2-6.

Ngalesosikhathi uSawuli loJonathani basebebulewe empini. Kodwa uMefibhoshethi indodana kaJonathani wayesaphila. Wakhubazeka esesengumntwana njalo kazange asekele icebo likayisemkhulu lokubulala amaGibheyoni. UDavida wayenze isivumelwano sokuba ngumngane kaJonathani esasizanceda isizukulwane sikaJonathani, kuhlanganise lendodana yakhe uMefibhoshethi. (1 Sam. 18:1; 20:42) IBhayibhili lithi: ‘Kodwa uMefibhoshethi indodana kaJonathani, indodana kaSawuli, inkosi yamtshiya ngenxa yesifungo phambi kukaJehova phakathi kukaDavida loJonathani indodana kaSawuli.’—2 Sam. 21:7.

UDavida wanikela amadodana kaSawuli amabili kanye labazukulu abahlanu kumaGibheyoni njengokucela kwawo. Enye yamadodana la yayithiwa nguMefibhoshethi. (2 Sam. 21:8, 9) Okwenziwa nguDavida kwahle kwasusa icala legazi elizweni.

Kukhona esingakufunda endabeni le. Umthetho kaNkulunkulu wawucacile. Wawusithi: ‘Abantwana abafanelanga ukufela oyise.’ (Dute. 24:16) UJehova wayengeke avumelane lalokho okwehlela amadodana kaSawuli amabili labazukulu bakhe abahlanu aluba babengelacala. Umthetho wawuphinda uthi: “Ngulowo lalowo kumele afele isono sakhe.” Kukhanya amadodana kaSawuli la labazukulu bahlanganyela ekubulaweni kwamaGibheyoni yikho bacina besuselwe amanqe.

Lapha sifunda ukuthi asingeke senze into obekungamelanga siyenze besesizigeza sisithi besilandela lokho esikutsheliweyo. Esinye isaga sithi: “Lungisa izindlela ukuze izinyawo zakho zinyathele kuhle, uhambe ngezindlela eziqinileyo kuphela.”—Zaga. 4:24-27; Efe. 5:15.