1. Kuyini okunye okwanceda uJobe ukuthi amazi ngcono uJehova?

 LANXA uJobe waxoxa labantu abanengi empilweni yakhe kumele ukuthi kazange ayikhohlwe ingxoxo aba layo loJehova uNkulunkulu. UJehova watshela uJobe ukuthi akhangele izinto ezimangalisayo azidalayo. Lokhu kwakuzakwenza uJobe azwisise ukuthi uJehova ulenhlakanipho lokuthi uyenelisa ukunakekela izinceku zakhe. Ngokwesibonelo, wathi esebone indlela uNkulunkulu anakekela ngayo izinyamazana wakhumbula ukuthi wayengeke ehluleke ukumnakekela. (Jobe. 38:39-41; 39:1, 5, 13-16) UJobe wafunda okunengi ngoNkulunkulu ngokukhangela izinto ezidaliweyo.

2. Kuyini okungenza kube nzima ukuthi sibuke izinto ezidalwe nguJehova?

² Lathi singafunda okunengi ngoNkulunkulu wethu nxa sikhangelisisa izinto azidalayo. Kodwa akulula ngaso sonke isikhathi ukukwenza lokhu. Nxa sihlala edolobheni mhlawumbe asiziboni nsuku zonke izinto ezidaliweyo. Lanxa sihlala emaphandleni lapho okungabalula khona ukuthi sibone izinto lezi, singazitshela ukuthi asilasikhathi sokuthi sizihlolisise. Ngakho asixoxeni ngokuthi kungani kukuhle ukuthi sizinike isikhathi sokubuka izinto ezidaliweyo. Sizaxoxa langokuthi uJehova loJesu bazisebenzisa njani izinto ezidaliweyo ukuze bafundise abantu lokuthi singenzani ukuze sifunde okunengi ezintweni lezi.

3. Kuyini okutshengisa ukuthi uJehova wayefuna ukuthi u-Adamu akholise ukubuka izinto ezidaliweyo?

³ UJehova wayefuna umuntu wokuqala akholise ukubuka izinto ezidaliweyo. Wathi esedale u-Adamu wamhlalisa  epharadayisi elihle okwamagama wasemnika lomsebenzi wokuthi alilime futhi aliqhelise. (Gen. 2:8, 9, 15) Akucabange ukuthi u-Adamu wayesizwa njani ngesikhathi ebona izimila zihluma lamaluba eqhakaza. U-Adamu wayelesibusiso esikhulu sokugcina insimu yase-Edeni. UJehova waphinda wamupha umsebenzi wokunika izinyamazana amabizo. (Gen. 2:19, 20) UJehova wayengazenzela umsebenzi lo kodwa wakhetha ukuwunika u-Adamu. Kumele ukuthi u-Adamu wayekhangelisisa inyamazana ngayinye abeseyinika ibizo eliyifaneleyo. Akuthandabuzwa ukuthi wayewukholisa kakhulu umsebenzi lo. Sileqiniso lokuthi lokhu kwamupha ithuba lokuthi azwisise ukuthi uJehova ulenhlakanipho engakanani lokuthi zinhle njani izinto azidalileyo.

4. (a) Yisiphi esinye isizatho esenza sibuke izinto ezidaliweyo? (b) Kuyini okuthandayo phakathi kwezinto ezidaliweyo?

⁴ Esinye isizatho esenza sihlolisise izinto ezidaliweyo yikuthi uJehova ufuna senze njalo. Uthi: “Phakamisani amehlo enu likhangele phezulu,” abesesibuza athi: “Ngubani odale izinto zonke lezi?” Impendulo isegcekeni. (Isaya. 40:26) UJehova nguye owadala izinto ezisezulwini lezisemhlabeni laselwandle njalo zonke zisifundisa okunengi ngaye. (Hubo. 104:24, 25) Akucabange ngendlela asidala ngayo. Siyenelisa ukubuka izinto ezinhle sikholise. Kanti njalo wasidala sisenelisa ukubona, ukuzwa, ukubamba, ukunambitha kanye lokuhogela. Konke lokhu kusenza sikholise izinto ezitshiyeneyo azidalayo.

5. URoma 1:20 uthi kusinceda ngani ukuhlola izinto ezidalwe nguJehova?

⁵ IBhayibhili lisitshela ngokunye okuqakathekileyo okwenza sihlolisise izinto ezidaliweyo. Zisifundisa ukuthi uJehova unguNkulunkulu onjani. (Bala uRoma 1:20.) Ngokwesibonelo, akucabange ngezinto ezadalwa nguJehova ubone indlela emangalisayo ezenziwe ngayo. Zisifundisa ukuthi uJehova unguNkulunkulu olenhlakanipho. Cabanga langokudla okutshiyeneyo esikukholisayo, konke nje kutshengisa ukuthi uJehova uyasithanda. Nxa singabona ubuntu bukaJehova ezintweni azidalayo kuyasinceda sibemazi ngcono kuphinde kusenze sisondele kuye. Ake sikhangele indlela uJehova asebenzise ngayo izinto ezidaliweyo ukuze afundise abantu izifundo eziqakathekileyo.

6. Sifundani nxa sibona inyoni eziphapha zisiya kwezinye indawo?

⁶ UJehova uhlele ukuthi izinto zenzakale ngesikhathi esibekiweyo. Minyaka yonke ekucineni kukaFebruary kusiya phakathi laphakathi  kukaMay abako-Israyeli babejayele ukubona amangabuzane ephapha esiya enyakatho. UNkulunkulu watshela ama-Israyeli wathi: “Ingabuzane elisemkhathini liyasazi isikhathi salo.” (Jer. 8:7) UJehova ulaso isikhathi sakhe esibekiweyo sokuthi ahlulele njengoba nje ebeke isikhathi sokuthi izinyoni lezi ziphaphe zisiya kwezinye izindawo. Ukubona inyoni lezi ziphapha zisiya kwezinye indawo kusikhumbuza ukuthi uJehova ‘ulesikhathi esibekiweyo’ lapho azabhubhisa khona umhlaba lo omubi.—Hab. 2:3.

7. Singafundani nxa sibona inyoni iphapha? (U-Isaya 40:31)

⁷ UJehova unika izinceku zakhe amandla. UJehova wathuma u-Isaya ukuthi atshele abantu bakhe ukuthi wayezabaqinisa abenze ‘baphaphe baqonge angathi balempiko njengezinkozi’ nxa kuyikuthi badanile kumbe abaselamandla. (Bala u-Isaya 40:31.) Ama-Israyeli ayejayele ukubona izinkozi zingathwali nzima ukuphapha ziqonga zisiya khonale emoyeni. Lokhu kuyasikhuthaza sibili ngoba kutshengisa ukuthi uJehova uyenelisa ukunika izinceku zakhe amandla njengoba nje enika izinyoni lezo amandla. Nxa ungabona inyoni enkulu iziphaphela iqonga isiya khonale emoyeni ingathwalanga nzima, khumbula ukuthi lawe uJehova angakunika amandla okuthi ulwisane laloba yiluphi uhlupho ongabe uphakathi kwalo.

8. UJobe wafundani ezintweni ezadalwa nguNkulunkulu njalo lathi singafundani?

⁸ Kumele simthembe uJehova. UJehova wanceda uJobe ukuthi amthembe ngenhliziyo yonke. (Jobe. 32:2; 40:6-8) Wathi ekhuluma loJobe wamtshela ngezinto azidalayo ezigoqela izinkanyezi, amayezi kanye lombane. UJehova waphinda wamtshela langezinyamazana ezigoqela inkunzi yeganga kanye lebhiza. (Jobe. 38:32-35; 39:9, 19, 20) Zonke izinto lezi zitshengisa ukuthi uNkulunkulu ulamandla amakhulu lothando kanye lenhlakanipho emangalisayo. Ingxoxo le yanceda uJobe ukuthi amthembe kakhulu uJehova. (Jobe. 42:1-6) Lathi nxa sihlolisisa izinto ezidaliweyo siyakubona ukuthi uJehova ulenhlakanipho lamandla ukwedlula thina. Uzakuqeda konke okusihluphayo ngoba ulamandla okuthi enze njalo. Lokhu kwenza simthembe kakhulu.

9-10. Ilanga lezulu kusifundisani ngoJehova?

⁹ UJesu wayezazi kuhle izinto ezidaliweyo. Waba lesibusiso sokuncedisa uYise ekudalweni kwezinto zonke ngenxa yokuthi ‘wayeyisisebenzi esiyingcitshi.’ (Zaga. 8:30) Wathi esesemhlabeni wasebenzisa izinto ezidaliweyo ukuze afundise abafundi bakhe ngoYise. Nanku okunye abafundisa khona.

¹⁰ UJehova uthanda wonke umuntu. Entshumayelweni yakhe yasentabeni uJesu watshela abafundi bakhe ngezinto ezimbili ezidaliweyo abantu abanengi abangazihluphi kangako ngokucabangisisa ngazo. Izinto lezi lilanga lezulu futhi ziqakathekile ngoba zinceda abantu ukuthi baqhubeke bephila. UJehova wayengenza ukuthi abantu abangamkhonziyo bangalitholi ilanga lezulu kodwa izinto lezi uzinika wonke umuntu ngenxa yothando lwakhe. (Mat. 5:43-45) UJesu wasebenzisa ilanga lezulu ukuze afundise abafundi bakhe ukuthi uJehova ufuna sithande bonke abantu. Loba nini lapho esibona khona ubuhle belanga litshona kumbe sikholisa ukubona izulu lisina singacabangisisa ngokuthi uJehova uthanda bonke abantu. Lathi singamlingisela ngokuba lothando olunjengolwakhe, sitshumayeze bonke abantu.

11. Kuyini esingakufunda ngokukhangela inyoni?

¹¹ UJehova uyasinika izinto esizidingayo empilweni. Entshumayelweni yakhe yasentabeni  uJesu waphinda wathi: “Khangelisisani inyoni. Kazihlanyeli, kazivuni futhi kazibutheleli ukudla eziphaleni, kodwa uYihlo osezulwini uyazinika ukudla.” Kungenzeka ababelalele uJesu babezibona inyoni ziphapha ngesikhathi ebabuza esithi: “Kanti lina aliqakathekanga kakhulu kulazo yini?” (Mat. 6:26) UJesu wasebenzisa umzekeliso lo omuhle ukuze asincede sibone ukuthi uJehova uzahlala esinakekela. (Mat. 6:31, 32) Lalamuhla okwafundiswa nguJesu kuyazikhuthaza izinceku zikaNkulunkulu ezithembekileyo. Udadewethu osakhulayo waseSpain oliphayona wayedanile ngenxa yokuthi wayengayitholi indawo yokuhlala. Kodwa ukubona inyoni zidobha intanga kwamenza wahlaliseka. Wathi: “Ukubona inyoni lezi kwangikhumbuza ukuthi uJehova uyazinakekela lokuthi lami uzanginakekela.” Lakanye kungakayi ngaphi udade lo wayithola indawo yokuhlala.

12. Intaka okukhulunywa ngazo kuMathewu 10:29-31 zisifundisani ngoJehova?

¹² UJehova uyakuqakathekisa. UJesu wathi esethuma abaphostoli bakhe ukuthi bayetshumayela wabanceda ukuthi bangabesabi abantu ababezabathwalisa nzima. (Bala uMathewu 10:29-31.) Lokhu wakwenza ngokubatshela ngentaka, inyoni eyayijayeleke kakhulu ko-Israyeli. Ngesikhathi sikaJesu inyoni lezo zazitshiphe kakhulu kodwa watshela abafundi bakhe wathi: “Ayikho leyodwa ewela phansi uYihlo engakwazi.” Waphinda wathi: “Liqakatheke kakhulu kulentaka ezinengi.” UJesu waqinisekisa abafundi bakhe ukuthi uJehova wayeqakathekisa munye ngamunye wabo yikho kwakungelasizatho sokuthi besabe ukuhlukuluzwa. Asithandabuzi ukuthi abafundi bakaJesu babewakhumbula amazwi akhe nxa babebona intaka ngesikhathi betshumayela emadolobheni lasemizini. Nxa lawe ubona inyoni encane khumbula ukuthi uJehova uyakuqakathekisa ngenxa yokuthi ‘uqakatheke kakhulu kulentaka ezinengi.’ Ngakho asikho isizatho sokuthi wesabe nxa abantu bekuhlukuluza ngoba uJehova uzakusekela.—Hubo. 118:6.

13. Kuyini okuzasinceda ukuthi sifunde ezintweni ezidaliweyo?

¹³ Singafunda okunengi ngoJehova ezintweni azidalileyo. Njani? Okokuqala okumele sikwenze yikuzinika isikhathi sokubuka izinto azidalayo. Ngemva kwalokho kumele sicabangisise ngokuthi zisifundisani ngoJehova. Kwezinye izikhathi kungabanzima ukukwenza lokhu. Udadewethu okuthiwa nguGéraldine oweCameroon uthi: “Kuyanginzimela kakhulu ukuzinika isikhathi sokubuka izinto ezidaliweyo ngoba ngakhulela edolobheni.” Umdala webandla okuthiwa ngu-Alfonso uthi: “Sengafunda ukuthi kumele ngizinike isikhathi sokuba ngedwa ngibuka izinto ezidalwe nguJehova besengicabangisisa ngokuthi zingifundisani ngaye.”

14. UDavida wafundani lapho ecabangisisa ngezinto ezadalwa nguNkulunkulu?

 ¹⁴ UDavida wayecabangisisa ngezinto ezadalwa nguNkulunkulu. Wathi kuJehova: “Nxa ngibona amazulu, imisebenzi yezandla zakho, inyanga lezinkanyezi ozidalileyo, kambe umuntu uyini ukuthi usungaze umkhumbule?” (Hubo. 8:3, 4) UDavida kazange aphongubuka nje izinkanyezi ayezibona ebusuku kodwa wayecabangisisa ngokuthi zimfundisani ngoNkulunkulu. Wafunda ukuthi uJehova nguNkulunkulu omkhulu. Kwezinye izikhathi wayecabangisisa ngokuthi wakhula njani esiswini sikanina. Nxa wayecabangisisa ngazo zonke izinto lezi ezimangalisayo wayembonga kakhulu uJehova ngenxa yenhlakanipho yakhe.—Hubo. 139:14-17.

15. Yiziphi izinto ezidaliweyo ezikufundise ngobuntu bukaJehova? (IHubo 148:7-10)

¹⁵ Lawe njengoDavida ngeke uswele into edaliweyo ongayibuka ucabangisise ngayo. Zinengi izinto ongazibuka ufunde okunengi ngoJehova. Ngokwesibonelo nxa usizwa ukukhudumala kwelanga cabangisisa ngamandla kaJehova. (Jer. 31:35) Nxa ungabona inyoni isakha isidleke sayo cabangisisa ngokuhlakanipha kukaNkulunkulu. Nxa ungabona umdlwane udlala ugijimisa umsila wawo cabangisisa ngokuthi uJehova nguNkulunkulu othokozayo. Kanti njalo bonga uJehova ngenxa yothando lwakhe nxa ubona umama edlala lomntanakhe. Kunengi esingakufunda ngoJehova ngoba izinto azidalileyo ziyamdumisa kungelani lokuthi ngezinkulu kumbe ngezincane, ngeziseduze kumbe ngezikhatshana.—Bala iHubo 148:7-10.

16. Kumele sizimisele ukwenzani?

¹⁶ UNkulunkulu wethu ulenhlakanipho emangalisayo, ulothando, ulamandla njalo konke akwenzileyo kuhle okwamagama. Nxa singazinika isikhathi sokubuka izinto ezidaliweyo sizakubona konke lokhu. Sonke kasihlaleni sizinika isikhathi sokukholisa ukubuka izinto ezidaliweyo lokucabanga ngokuthi zisifundisani ngoJehova. Singenza njalo sizasondela kakhulu kuMdali wethu. (Jak. 4:8) Esihlokweni esilandelayo sizaxoxa ngokuthi abazali bangasebenzisa njani izinto ezidaliweyo ukuze bancede abantwababo basondele kuJehova.