Kungani indoda eyayilelungelo lokuhlenga yathi ‘yayizaphambanisa’ ilifa layo ngokuthatha uRuthe? (Ruthe. 4:1, 6)

Ngezikhathi zeBhayibhili, nxa indoda eyayitshadile yayingafa ingelamntwana kwakungaba lemibuzo elandelayo: Kwakuzakwenzakalani empahleni yayo kumbe emhlabathini eyayilawo? Ibizo layo lalizahle litshabalale yini? UMthetho kaMosi wawuyiphendula imibuzo le.

Nxa indoda yayingafa kumbe ibe ngumyanga ibisithengisa umhlabathi wayo, kwakusenzakalani emhlabathini lo? Umfowabo kumbe isihlobo esiseduze kwakumele siwuhlenge. Lokhu kwakuzenza umhlabathi lo uqhubeke ungowemuli leyo.—Levi. 25:23-28; Nani. 27:8-11.

Kwakusenziwani ukuze ibizo lendoda esifile lingatshabalali? Kwakumele umfowabo kamufi angene umkamfowabo futhi lokhu yikho okwenzakala kuRuthe. Indoda le yayizathatha umkamfowabo ukuze kuzalwe umntwana owayezakuba yindlalifa besekusenza ukuthi ibizo lomufi lingatshabalali. Lokhu kwakutshengisa uthando sibili njengoba lomfelokazi wayenakekelwa.—Dute. 25:5-7; Mat. 22:23-28.

Ake sixoxe ngoNawomi owayetshade lendoda okwakuthiwa ngu-Elimeleki. Kwathi u-Elimeleki lamadodana akhe amabili sebefile, uNawomi wasala engaselamuntu ongamnakekela. (Ruthe. 1:1-5) Bathi sebebuyele koJuda, uNawomi watshela umalukazana wakhe uRuthe ukuthi acele uBhowazi ukuthi ahlenge umhlabathi wabo. UBhowazi wayeyisihlobo esiseduze sika-Elimeleki. (Ruthe. 2:1, 19, 20; 3:1-4) Kodwa wayekwazi ukuthi kwakulesinye isihlobo esasiseduze kakhulu lo-Elimeleki ukwedlula yena. Isihlobo lesi yiso esasilelungelo lokukhetha kuqala ukuthi sasizakuba ngumhlengi yini.—Ruthe. 3:9, 12, 13.

Ekuqaliseni indoda le eyayiyisihlobo yayifuna ukuba ngumhlengi. (Ruthe. 4:1-4) Yayikwazi ukuthi kwakumele ikhiphe imali ukuze ithenge umhlabathi owawungoka-Elimeleki njalo yayikwazi lokuthi uNawomi wayesemdala kakhulu ukuthi wayengaba lomntwana owayezathatha ilifa lika-Elimeleki. Indoda le yayizibona itshaye ibambile ngoba umhlabathi ka-Elimeleki wawusuzakuba ngowayo ungezelelwe elifeni layo.

Kodwa kayisavumanga ukuba ngumhlengi isisizwa ukuthi kwakuzamele ithathe loRuthe. Yathi: “Angisoze ngiyithenge ngoba ngingacina ngiphambanisa ilifa lami.” (Ruthe. 4:5, 6) Kungani indoda le yatshintsha ingqondo?

Aluba indoda le loba omunye nje wayezathatha uRuthe besebesiba lomntwana ongumfana, umntwana lo nguye owayezakuba yindlalifa yomhlabathi ka-Elimeleki. Lokhu kwakungaliphambanisa njani ilifa lendoda le? IBhayibhili kalisitsheli, kodwa nanku okunye okwakungaphambanisa ilifa lendoda le.

• Okokuqala, imali yendoda le kwakukhanya angani ingahamba ikhala ngoba umhlabathi ka-Elimeleki okwakumele iwuthenge wawungasoze ube ngowayo kodwa wawuzakuba ngowendodana kaRuthe.

• Okwesibili, nguye okwakuzamele ondle futhi anakekele uNawomi loRuthe.

• Okwesithathu, nxa indoda le loRuthe babezakuba labanye abantwana kwakuzamele babelane ilifa layo labanye abantwana bayo.

• Okwesine, nxa kuyikuthi indoda le okwakumele ibe ngumhlengi yayingela abayo abantwana, indodana eyayizazalwa nguRuthe yayizakuba yindlalifa yomhlabathi ka-Elimeleki lowendoda le. Kutsho ukuthi umhlabathi wayo wawuzathathwa ngumntaka-Elimeleki hatshi owayo. Indoda le yayingazimiselanga ukulahlekelwa yizinto lezi ukuze incede uNawomi. Yikho yabona kungcono ukuthi uBhowazi kube nguye umhlengi. UBhowazi wavuma ukuba ngumhlengi ngoba wayefuna ukuthi ‘ilifa lendoda efileyo libuyele ebizweni lakhe.’—Ruthe. 4:10.

Kukhanya indoda le okwakumele ibe ngumhlengi yayiqakathekisa ibizo layo lelifa layo nje kuphela. Yayingazihluphi ngabanye abantu. Ibizo lendoda le latshabalala lanxa yayifuna ukulilondoloza. Ayisitholanga isibusiso esiligugu esacina sitholwe nguBhowazi esokuba ngomunye walabo abaphakathi kosendo lukaMesiya, okutsho uJesu Khristu. Kuyadanisa ukuthi indoda le ayisitholanga isibusiso esikhulu kangaka ngenxa nje yokungafuni ukuncedisa abanye.—Mat. 1:5; Luk. 3:23, 32.