1-2. Kwenzakalani nxa abantu bebhabhathizwa futhi sizaxoxa ngani esihlokweni lesi?

 SEWAKE wananzelela yini okwenzakalayo ngelanga abantu bebhabhathizwa? Uyake ubezwe yini abantu abazabhabhathizwa bephendula imibuzo leyana emibili ngelizwi elizwakalayo? Ngalelolanga izihlobo labangane bayaswela ukuthi babambe ngaphi ngenxa yentokozo. Ngesikhathi ababhabhathizwayo bephuma emanzini uyazibonela ukuthi bayathokoza uzwe lomsindo wabantu beqakeza izandla. Iviki ngayinye kulezinkulungwane zabantu abazinikela kuJehova besebebhabhathizwa babe ngoFakazi bakhe.

² Wena uyafuna yini ukubhabhathizwa? Nxa ufuna ukubhabhathizwa uligugu ngoba utshengisa ukuthi ‘uyamdinga uJehova’ lanxa uphila emhlabeni lo omubi. (Hubo. 14:1, 2) Isihloko lesi sibhalelwe wena kungelani lokuthi umncane kumbe umdala. Lanxa kunjalo sizanceda lalabo asebebhabhathiziwe ukuthi baqhubeke bezimisele ukukhonza uJehova kuze kube nini lanini. Asixoxeni ngezizatho ezintathu ezenza sikhonze uJehova.

3. Kuyini okwenza abantu bakaJehova bathande iqiniso kanye lokulunga? (IHubo 119:128, 163)

³ UJehova watshela abantu bakhe ukuthi ‘bathande iqiniso.’ (Zak. 8:19) UJesu wakhuthaza abalandeli bakhe ukuthi bathande ukulunga. (Mat. 5:6) Lokhu kutsho ukuthi umuntu kumele azimisele ukwenza izinto uJehova athi ziqondile, zilungile njalo zimsulwa. Asithandabuzi ukuthi lawe uyalithanda iqiniso kanye lokwenza okulungileyo. Uyawazonda amanga lazo zonke izinto ezimbi lezingaqondanga. (Bala iHubo 119:128, 163.) Umuntu othanda ukuqamba amanga ulingisela uSathane umbusi womhlaba lo. (Joh. 8:44; 12:31) Eyinye into uSathane  azimisele ukuyenza yikungcolisa ibizo likaNkulunkulu elingcwele. Ubelokhu ehutshuza amanga ngoNkulunkulu wethu kusukela u-Adamu lo-Eva behlamuka ensimini ye-Edeni. USathane ufuna sicabange ukuthi uNkulunkulu kalandaba labantu lokuthi nguMbusi ongathembekanga ongafuni sithokoze empilweni. (Gen. 3:1, 4, 5) Amanga kaSathane asephambanise izingqondo lezinhliziyo zabantu. Nxa abantu bengasalithandi iqiniso kuba lula ukuthi uSathane abayenge ukuthi benze konke okungalunganga lokubi.—Rom. 1:25-31.

4. UJehova utshengise njani ukuthi ‘unguNkulunkulu weqiniso’? (Khangela lomfanekiso.)

⁴ UJehova ‘nguNkulunkulu weqiniso’ futhi ufundisa abantu abamthandayo iqiniso. (Hubo. 31:5) Iqiniso leli abafundisa lona libakhulula emangeni kaSathane. UJehova uphinda afundise abantu bakhe ukuthi bathembeke lokuthi bathande ukulunga. Lokhu kwenza bazizwe belesithunzi futhi behlalisekile. (Zaga. 13:5, 6) Ukubonile yini lokhu ngesikhathi ufunda iBhayibhili? Kumele ukuthi usukubonile ukuthi ukulandela izindlela zikaJehova kunceda wonke umuntu njalo uyabona ukuthi lawe kukuncedile. (Hubo. 77:13) Yikho usuzimisele ukwenza izinto ezilungileyo ezifunwa nguNkulunkulu. (Mat. 6:33) Uzimisele ukutshela abantu iqiniso ngoNkulunkulu wethu uJehova ukuze kukhanye ukuthi okukhulunywa nguSathane kungamanga. Kodwa ungakwenza njani lokho?

5. Ungatshengisa njani ukuthi uyalithanda iqiniso lokwenza okulungileyo?

⁵ Indlela ophila ngayo ingatshengisa ukuthi ukhethani. Kuyabe kungani uthi: “Angivumelani lamanga kaSathane, mina ngilwela iqiniso. Ngifuna ukubuswa nguJehova njalo ngenze khona kanye athi kulungile.” Manje ungakwenza njani lokhu? Thandaza kuJehova umthembisa ukuthi usuzinikele kuye lokuthi usuzimisele ukwenza intando yakhe. Ngemva kwalokho kumele ubhabhathizwe ukuze utshengise abanye ukuthi usuzinikele kuNkulunkulu. Ukuthanda iqiniso lokuthanda ukwenza okulungileyo kuzakwenza ukuthi uzimisele ukubhabhathizwa.

6. Yiziphi izizatho ezikuHubo 45:4 ezenza uthande uJesu Khristu?

⁶ Umthandelani uJesu Khristu? Ezinye izizatho ezingenza umthande zitholakala kuHubo 45:4. (Bala.) UJesu uthanda iqiniso lokuthobeka lokulunga. Nxa lawe uthanda iqiniso  kanye lokulunga, kumele ukuthi uyamthanda uJesu Khristu. Phela uJesu watshengisa ukuthi ulesibindi ngokulwela iqiniso kanye lokulungileyo. (Joh. 18:37) Kodwa uJesu usincedisa njani ukuthi sithobeke?

7. Kuyini okuthanda kakhulu ngokuthobeka kukaJesu?

⁷ Okwenziwa nguJesu kusinceda ukuthi sithobeke. Ngokwesibonelo, wayengafuni ukuthi abantu badumise yena kodwa wayefuna ukuthi badumise uYise. (Mak. 10:17, 18; Joh. 5:19) Uzwa njani nxa ucabanga ngokuthobeka kukaJesu? Kumele ukuthi lokhu kwenza umthande futhi uzimisele ukumlingisela. Kodwa kuyini okwenza uJesu athobeke? Yikuthi uYise nguNkulunkulu othobekileyo njalo uyamthanda futhi uzimisele ukumlingisela. (Hubo. 18:35; Heb. 1:3) Kumele ukuthi lokhu kwenza umthande kakhulu uJesu ngoba yena ulingisela uJehova kukho konke.

8. Kungani sithanda iNkosi yethu uJesu?

⁸ Okwenza sithande uJesu iNkosi yethu yikuthi akulaMbusi ongcono kulaye. Phela uJehova ngokwakhe nguye owafundisa uJesu wasembeka lokuthi abe yiNkosi. (Isaya. 50:4, 5) Okunye okwenza simthande kakhulu uJesu yikuthi yena wasithanda kakhulu waze wasifela. (Joh. 13:1) Kumele simthande sibili uJesu ngoba uyiNkosi yethu. UJesu wathi labo abamthanda ngeqiniso ngabangane bakhe futhi batshengisa ukuthi bayamthanda ngokulalela imilayo yakhe. (Joh. 14:15; 15:14, 15) Kuyisibusiso sibili ukuba ngumngane kaJesu!

9. Ukubhabhathizwa kwamaKhristu kufanana njani lokukaKhristu?

⁹ Omunye umlayo uJesu awunika abalandeli bakhe ngowokuthi babhabhathizwe. (Mat. 28:19, 20) Phela laye uJesu wabhabhathizwa. Ukubhabhathizwa kukaJesu lokubhabhathizwa kwabalandeli bakhe kulalapho okufanana khona lalapho okutshiyene khona. (Khangela ibhokisi elithi “ Umehluko Okhona Phakathi Kokubhabhathizwa KukaJesu Lokwabalandeli Bakhe.”) Ngesikhathi uJesu ebhabhathizwa wayetshengisa ukuthi uzimisele ukwenza intando kaYise. (Heb. 10:7) Lomuntu okhetha ukubhabhathizwa uyabe etshengisa abanye ukuthi usezinikele kuNkulunkulu. Lokhu kutsho ukuthi usezimisele ukwenza intando kaNkulunkulu hatshi eyakhe. Umuntu owenza njalo uyabe elingisela iNkosi yakhe uJesu.

10. Kuyini okwenza uthande uJesu futhi ukumthanda kuzakunceda ukuthi wenzeni?

¹⁰ Awuthandabuzi ukuthi uJesu yiNdodana kaJehova ezelwe yodwa lokuthi ukhethwe nguJehova ukuthi abe yiNkosi yethu. Ukwazi mhlophe ukuthi uJesu uthobekile lokuthi ulingisela uYise kukho konke akwenzayo. Sewafunda lokuthi uJesu wanika abalambileyo ukudla, waduduza ababedanile njalo welapha labagulayo. (Mat. 14:14-21) Uyazibonela lokuthi uJesu ubakhokhela njani abantu bakhe namuhla. (Mat. 23:10) Kodwa akupheleli lapho, esikhathini esizayo iNkosi yoMbuso kaNkulunkulu izasilethela izibusiso ezinengi. Manje ungatshengisa njani ukuthi uyamthanda uJesu? Lokhu ungakwenza ngokumlingisela. (Joh. 14:21) Kuyabe kumele uzinikele kuJehova ubusubhabhathizwa.

11. Ubona angani yisiphi isizatho esiqakatheke kakhulu esingenza umuntu abhabhathizwe?

¹¹ Yisiphi isizatho esiqakatheke kakhulu esenza umuntu abhabhathizwe? UJesu wasitshela umlayo kaNkulunkulu omkhulu kulayo yonke. Wathi: “Kumele uthande uJehova uNkulunkulu wakho ngenhliziyo yakho yonke, langomphefumulo wonke, langengqondo yonke, langamandla akho wonke.” (Mak. 12:30) Yiyo yini indlela omthanda ngayo uNkulunkulu?

12. Umthandelani uJehova? (Khangela lomfanekiso.)

¹² Silezizatho ezinengi kakhulu ezenza sithande  uJehova. Ngokwesibonelo, iBhayibhili lisitshela ukuthi uNkulunkulu ‘nguye osinika ukuphila’ lokuthi nguye osipha “zonke izipho ezinhle lazo zonke izipho ezipheleleyo.” (Hubo. 36:9; Jak. 1:17) Loba yikuphi esilakho kumbe esikukholisayo kuvela kuNkulunkulu wethu olothando lophanayo.

13. Kungani inhlawulo iyisipho esiligugu?

¹³ Inhlawulo yisipho esiligugu kakhulu esisiphiwe nguJehova. Kungani sisitsho njalo? Akucabange ngobungane obukhona phakathi kukaJehova leNdodana yakhe. UJesu wathi: “UBaba uyangithanda” waphinda wathi: “Ngiyamthanda uBaba.” (Joh. 10:17; 14:31) Ubungane babo babulokhu buqhubeka buqina njengoba babebonke okwamabhiliyoni eminyaka. (Zaga. 8:22, 23, 30) Ucabanga ukuthi uJehova wezwa njani ngesikhathi ebona iNdodana yakhe ayithandayo ihlupheka futhi ibulawa? Kumele ukuthi wezwa ubuhlungu obukhulu kakhulu. UJehova uyabathanda abantu futhi lawe uyakuthanda kakhulu. Kungani sisitsho njalo? Ngenxa yokuthi kazange athikaze ukunikela ngeNdodana yakhe ezelwe yodwa ukuthi izokufela futhi ifele labanye ukuze sonke senelise ukuphila kuze kube nini lanini. (Joh. 3:16; Gal. 2:20) Lesi yisizatho esikhulu esenza simthande uNkulunkulu.

14. Kuyini okumele uzimisele ukukwenza?

¹⁴ Usumthanda uJehova ngoba usufunde  okunengi ngaye. Akulambuzo ukuthi uyafuna ukuba ngumngane wakhe lokuthi ufuna ukuthi ubungane lobu buqhubeke kuze kube nini lanini. Kungenzakala sibili ukuthi ube ngumngane wakhe. UJehova uze akucele ukuthi wenze inhliziyo yakhe ithokoze. (Zaga. 23:15, 16) Okukhulumayo lokwenzayo kungenza uJehova athokoze. Nxa umthanda ngenhliziyo yonke uJehova kuzakhanya ngendlela ophila ngayo. (1 Joh. 5:3) Le yinto enhle kakhulu okumele uzimisele ukuyenza.

15. Ungatshengisa njani ukuthi uyamthanda uJehova?

¹⁵ Ungatshengisa njani ukuthi uyamthanda uJehova? Okokuqala, kulomthandazo oqakathekileyo okumele uwenze. Emthandazweni lo uyabe utshela uNkulunkulu weqiniso ukuthi usuzinikele kuye. (Hubo. 40:8) Okwesibili okumele ukwenze yikubhabhathizwa, lapha uyabe usutshengisa abanye ukuthi usuzinikele kuNkulunkulu. Njengoba sike satsho, ukubhabhathizwa yinto enhle kakhulu ongayenza ngoba kuzayitshintsha sibili impilo yakho. Phela uyabe ungasaziphileli wena kodwa usuphilela ukwenza intando kaJehova. (Rom. 14:8; 1 Phet. 4:1, 2) Ukukhetha ukubhabhathizwa yisinqumo esiqakatheke kakhulu ongasenza kodwa ungesabeli khatshana ngoba uyabe ukhethe impilo engcono kulazo zonke. Kungani sisitsho njalo?

16. IHubo 41:12 litshengisa ukuthi uJehova uzabenzelani labo abakhethe ukumkhonza okwempilo yabo yonke?

¹⁶ Akulamuntu ophanayo njengoNkulunkulu wethu uJehova. Kungelani lokuthi wena umnikeni, yena uzahlala ekunika okunengi kakhulu ukwedlula lokho omnike khona. (Mak. 10:29, 30) UJehova uzakwenza ukuthi uyikholise impilo, usuthiseke njalo uthokoze lanxa siphila emhlabeni lo omubi. Kodwa akupheleli lapho. Ukubhabhathizwa kuzakuvulela ithuba lokuthi ukhonze uNkulunkulu wethu esimthandayo kuze kube nini lanini. Uzaqhubeka usondela kakhulu kuBaba wethu osezulwini. Kanti njalo uzaphila kuze kube nini lanini njengaye.—Bala iHubo 41:12.

17. Kuyini uJehova angelakho ongamnika khona?

¹⁷ Kulesinye isibusiso ositholayo nxa ungazinikela kuNkulunkulu ubusubhabhathizwa. Nxa ungakhonza uMdali wezulu lomhlaba futhi  uhlale uqotho kuye, uyabe umnika into eligugu kakhulu angelayo. (Jobe. 1:8; 41:11; Zaga. 27:11) Akula eyinye into ongayenza engcono empilweni ngaphandle kokukhonza uJehova. Phela zonke izipho ezinhle lezikwenza uthokoze zivela kuye. Yikho-ke ukuthanda uJehova yisizatho esikhulu esizakwenza ubhabhathizwe.

18. Yiphi imibuzo okumele uzibuze yona?

¹⁸ Uzabhabhathizwa yini? Nguwe ongaziphendulela umbuzo lo. Kodwa kuhle ukuthi uzibuze umbuzo othi, ‘Kanti vele ngibanjwe yini ukuthi ngibhabhathizwe?’ (Imiseb. 8:36) Ungazikhohlwa izizatho ezintathu esixoxe ngazo ezingakwenza ubhabhathizwe. Esokuqala, yikuthanda iqiniso kanye lokulunga. Zibuze, ‘Ngiyafuna yini ukuphila emhlabeni olabantu abakhuluma iqiniso labenza okulungileyo?’ Esesibili, yikuthanda uJesu Khristu. Zibuze, ‘Ngiyafuna yini ukubuswa nguJesu njalo ngizimisele yini ukumlingisela?’ Esesithathu futhi esiqakatheke kulazo zonke yikuthanda uJehova. Zibuze, ‘Ngiyafuna yini ukuthokozisa uJehova njalo ngimkhonze?’ Nxa uphendule imibuzo le ngo-Ye, pho uyabe usumiswa yini ukuthi ubhabhathizwe? Usalindeni?—Imiseb. 16:33.

19. Kungani kungamelanga ukudondele ukubhabhathizwa? Nika umzekeliso. (Joh. 4:34)

¹⁹ Nxa ukudondela ukubhabhathizwa, kungakunceda ukucabanga ngomzekeliso kaJesu. (Bala uJohane 4:34.) Emzekelisweni lo uJesu wathi ukwenza intando kaYise kunjengokudla. Kungani watsho njalo? Ngoba ukudla kuyasinceda. UJesu wayekwazi ukuthi konke uJehova asitshela ukuthi sikwenze kuyasinceda. Akula ngitsho lokukodwa uJehova asitshela ukuthi sikwenze okuzasilimaza. UJehova uyafuna yini ukuthi wena ubhabhathizwe? Ye. (Imiseb. 2:38) Lawe kuzakunceda kakhulu ukulalela umlayo lo ovela kuJehova owokuthi ubhabhathizwe. Nxa ungakudondeli ukudla izibiliboco kuyini okwenza udondele ukubhabhathizwa?

20. Sizaxoxa ngani esihlokweni esilandelayo?

²⁰ Nxa abanye bebuzwa ukuthi kungani bengakabhabhathizwa bangathi kabakakulungeli. Njengoba sike satsho ukukhetha ukuzinikela kuNkulunkulu lokubhabhathizwa yisinqumo esiqakatheke kulazo zonke ongasenza empilweni. Yikho kumele uzinike isikhathi esaneleyo, ucabangisise okuzwayo ngendaba le futhi wenze konke okusemandleni akho ukuze ukulungele ukubhabhathizwa. Nxa ulaso sibili isifiso sokubhabhathizwa ungenzani khathesi ukuze ukulungele? Sizaxoxa ngalokho esihlokweni esilandelayo.