1-2. Nxa ungakakulungeli ukubhabhathizwa kungani kungamelanga ukhalale? (Khangela umfanekiso ongaphandle.)

 NXA ufuna ukubhabhathizwa uyabe ungalahlekanga. Kodwa usukulungele yini? Nxa ubona angani usukulungele futhi labadala bebandla lakho bevumelana lawe, ungakudondeli ukubhabhathizwa emhlanganweni omkhulu olandelayo. Uzathola izibusiso ezinengi enkonzweni kaJehova nxa ungabhabhathizwa.

² Kodwa mhlawumbe kulomuntu okutshele ukuthi kulalapho okumele uqale ulungisise khona ungakabhabhathizwa. Kumbe engxenye lawe uyakunanzelela ukuthi kulalapho okumele uthuthuke khona. Nxa kunjalo ungakhalali kungelani ukuthi ungosakhulayo kumbe usumdala. Ungenelisa ukusebenza nzima uze ucine ubhabhathizwa.

3. Isiphathamandla esingumTopiya sambuzani uFiliphu futhi yiwuphi umbuzo ongaba khona? (ImiSebenzi 8:36, 38)

³ Bala imiSebenzi 8:36, 38. Isiphathamandla esingumTopiya sabuza uFiliphu umvangeli sathi: “Kuyini okungivimbela ukuthi ngibhabhathizwe?” Indoda engumTopiya yayikufuna sibili ukubhabhathizwa, kodwa yayisikulungele yini?

4. UmTopiya watshengisa njani ukuthi wayezimisele ukufunda okunengi?

⁴ Indoda engumTopiya “yayihambe yayakhonza eJerusalema.” (Imiseb. 8:27) Kutsho ukuthi indoda le yayisitshintshile yemukela ukholo lwesiJuda. Akuthandabuzwa ukuthi yayisifunde ngoJehova eMibhalweni yesiHebheru engcwele. Lanxa kunjalo yayizimisele ukufunda okunengi. Usakhumbula yini ukuthi uFiliphu wafica indoda le isenzani? Wayithola ibala  umbhalo womphrofethi u-Isaya. (Imiseb. 8:28) Yayingakhi phezulu kodwa yayizimisele ukuqhubeka ifunda okunengi, ngitsho lezinto ezijulileyo eziseLizwini likaNkulunkulu.

5. Indoda engumTopiya yakwenza yini eyayikufundile? Chasisa.

⁵ Akuthandabuzwa ukuthi indoda le engumTopiya yayilemisebenzi eminengi yokwenza. Phela iBhayibhili lisitshela ukuthi yayiyisiphathamandla ngaphansi kukaKhendisi iNdlovukazi yamaTopiya, futhi yayiphethe yonke inotho yeNdlovukazi. (Imiseb. 8:27) Lanxa kunjalo indoda le yayizinika isikhathi sokukhonza uJehova. Ayiphelelanga ekufundeni iqiniso kodwa yakwenza lokho eyayikufundile. Yayizimisele ukwenza loba yini ukuze ikhonze uJehova. Yayisebenzisa imali yayo lesikhathi sayo ukuze ithathe uhambo olude isuka eTopiya isiyakhonza uJehova khonale ethempelini eliseJerusalema.

6-7. Kuyini okwenziwa ngumTopiya ukuze aqhubeke ethanda uJehova?

⁶ UFiliphu wafundisa indoda engumTopiya izinto eziqakathekileyo eyayingazazi. Ngokwesibonelo, wayichasisela ukuthi uJesu nguye owayenguMesiya. (Imiseb. 8:34, 35) Kumele ukuthi indoda le yathokoza kakhulu isifunde ngalokho eyakwenzelwa nguJesu. Yayizakwenzani? Yayingagoqa izandla isuthiseke ngokuba yisiphathamandla esesitshintshile semukela ukholo lwesiJuda. Kodwa kayenzanga njalo, yaqhubeka imthanda uJehova leNdodana yakhe uJesu futhi uthando lolo lwaqhubeka lukhula. Yahle yenza isinqumo esiqakathekileyo kakhulu esokubhabhathizwa ibe ngumlandeli kaJesu Khristu. UFiliphu wakubona ukuthi indoda le yayisikulungele ukubhabhathizwa yikho wahle wayibhabhathiza.

⁷ Lawe ungalungiselela ukubhabhathizwa ngokulingisela okwenziwa ngumTopiya. Uyabe usukhululekile ukubuza umbuzo owabuzwa ngumTopiya othi: “Kuyini okungivimbela ukuthi ngibhabhathizwe?” UmTopiya waqhubeka efunda okunengi, wenza lokho ayekufundile njalo waqhubeka emthanda uNkulunkulu. Ake sixoxe ngokuthi ungamlingisela njani.   

8. UJohane 17:3 uthi kumele wenzeni?

⁸ Bala uJohane 17:3 Amazwi kaJesu la yiwo akwenza waqalisa ukufunda iBhayibhili yini? Abanengi bethu sancedwa yiwo. Kodwa unanzelele yini ukuthi ivesi le isitshela ukuthi kumele siqhubeke sifunda? Phela asisoze siyekele ukuqhubeka ‘sisibamazi uNkulunkulu weqiniso.’ (Umtshu. 3:11) Sizaqhubeka sifunda kuze kube nini lanini. Nxa sizimisele ukuqhubeka sifunda okunengi ngoJehova siyabe silokhu sisondela kuye.—Hubo. 73:28.

9. Kuyini okumele ukwenze nxa usuzazi izimfundiso zakuqala eziseBhayibhilini?

 ⁹ Nxa umuntu eqalisa ukufunda ngoJehova uqalisa ngezinto ezilula ukuzwisisa. Ngesikhathi umphostoli uPhawuli ebhalela amaKhristu angamaHebheru wathi ‘yikuqala phansi ukufunda.’ Lokhu akutsho ukuthi wayesithi imfundiso yakuqala ayiqakathekanga ngoba wayifanisa lochago olwenza umntwana akhule. (Heb. 5:12; 6:1) Wakhuthaza wonke amaKhristu ukuthi angapheleli emfundisweni yokuqala kodwa afunde lezinto ezijulileyo eziseLizwini likaNkulunkulu. Wena uzilambele yini izimfundiso ezijulileyo eziseBhayibhilini? Uzimisele yini ukuqhubeka uthuthuka ufunda okunengi ngoJehova langalokho akuhlosileyo?

10. Kuyini okungenza kube nzima ukuthi abanye abantu bataditshe?

¹⁰ Kubathwalisa nzima abanengi bethu ukuthi bataditshe. Wena uyakukholisa yini ukutaditsha? Ngesikhathi usesikolo wawukukholisa yini ukutaditsha? Wawukubona kukunceda yini? Kumbe wahle wazitshela ukuthi okwamabhuku ayisikho kwakho? Abantu abanengi bazitshela njalo. Kodwa uJehova angakuncedisa. Phela akulamuntu ofundisa njengaye.

11. UJehova utshengisa njani ukuthi ‘unguMfundisi omkhulu’?

¹¹ UJehova uthi ‘unguMfundisi wakho omkhulu.’ (Isaya. 30:20, 21) UnguMfundisi obekezelayo, olomusa futhi ozwisisayo njalo ukhangela okuhle okwenziwa yilabo abafundisayo. (Hubo. 130:3) Kakhangelelanga ukuthi senze okungaphezu kwamandla ethu. Khumbula ukuthi nguye owenza ingqondo olayo eyisipho esimangalisayo. (Hubo. 139:14) Sadalwa silesifiso sokufunda izinto ezinengi. UMdali wethu ufuna sikholise ukufunda njalo siqhubeke sifunda kuze kube nini lanini. Yikho kumele siqalise khathesi ukuba “lesifiso esikhulu” sokufunda iqiniso eliseBhayibhilini. (1 Phet. 2:2) Hlela ukwenza izinto ezisemandleni akho njalo ube lohlelo lokubala lokutaditsha iLizwi likaNkulunkulu zikhathi zonke. (Josh. 1:8) UJehova uzakuncedisa ukuthi ukukholise ukubala lokuqhubeka ufunda okunengi ngaye.

12. Kuzakunceda ngani ukufunda ngoJesu?

¹² Zinike isikhathi esinengi sokucabangisisa ngempilo kaJesu langenkonzo yakhe. Okuqakatheke kakhulu ukuze siqhubeke sikhonza uJehova ngezikhathi lezi ezinzima yikuqhubeka silandela amanyathelo kaJesu eduze. (1 Phet. 2:21) UJesu kazange abafihlele abafundi bakhe inhlupho ababezahlangana lazo. (Luk. 14:27, 28) Kodwa wayengathandabuzi ukuthi abalandeli bakhe beqiniso babengaphumelela njengaye. (Joh 16:33) Taditsha ngempilo kaJesu ubusuhlela khona kanye ofuna ukukwenza ukuze umlingisele nsuku zonke.

13. Kuyini okumele uqhubeke ukucela kuJehova futhi kungani kumele wenze njalo?

¹³ Ulwazi luyakunceda ukuthi ufunde okunengi ngoJehova, umthande futhi ube lokholo kuye. (1 Khor. 8:1-3) Kodwa ukuthola ulwazi ayisikho kodwa okumele ukwenze. Nxa uqhubeka ufunda ungayekeli ukucela uJehova ukuthi akuncede ube lokholo oluqinileyo. (Luk. 17:5) Ungenza njalo uzayiphendula imithandazo yakho. Ukholo oluqinileyo olutholwa ngokuba lolwazi ngoNkulunkulu luzakunceda ukuthi uqhubeke uthuthuka.—Jak. 2:26.

14. Umphostoli uPhetro watshengisa njani ukuthi kuqakathekile ukuthi sisebenzise lokho esikufundayo? (Khangela lomfanekiso.)

¹⁴ Umphostoli uPhetro wacacisela abalandeli bakaKhristu ukuthi kuqakathekile ukuthi  baqhubeke besebenzisa lokho abakufundayo. Wathi ecacisa umcijo lo wakhuluma ngendaba kaNowa eseBhayibhilini. UJehova watshela uNowa ukuthi wayezabhubhisa abantu abenza okubi esebenzisa uzamcolo. Lanxa kunjalo, ukwazi ukuthi uzamcolo wayezabuya ayisikho kodwa okwakuzasindisa uNowa lemuli yakhe. Khumbula ukuthi uPhetro wayekhuluma ngesikhathi “kusakhiwa umkhumbi,” uzamcolo engakabi khona. (1 Phet. 3:20) Kodwa uNowa lemuli yakhe bathi sebezwile ukuthi uzamcolo uzabuya, abazange bagoqe izandla kodwa bakha inkalakatha yomkhumbi. (Heb. 11:7) UPhetro wafananisa lokho okwenziwa nguNowa lobhabhathizo. Wabhala wathi: ‘Lokhu kumela ubhabhathizo olulisindisayo.’ (1 Phet. 3:21) Okwenzayo khathesi ukuze ulungiselele ukubhabhathizwa singakufananisa lomsebenzi owenziwa nguNowa lemuli yakhe okweminyaka leminyaka besakha umkhumbi. Kumele wenzeni ukuze ulungiselele ukubhabhathizwa?    

15. Kutshoni ukuphenduka ngenhliziyo yonke?

¹⁵ Okunye okuqakathekileyo okumele sikwenze yikuphenduka ezonweni zethu ngenhliziyo yonke. (Imiseb. 2:37, 38) Nxa singaphenduka ngenhliziyo yonke sizatshintsha ngenhliziyo yonke. Usuyilahlile yini imikhuba yonke engamthokozisiyo uJehova, njengokungaziphathi, ukubhema lokukhuluma inhlamba kumbe izinto ezingcolileyo? (1 Khor. 6:9, 10; 2 Khor. 7:1; Efe. 4:29) Nxa ungakakwenzi lokhu qhubeka uzama ngamandla ukuthi utshintshe. Khuluma lomuntu ofunda lawe kumbe ucele abadala bebandla bakuncedise. Nxa usasemncane futhi uhlala ngekhaya cela abazali bakho bakuncedise ukuthi utshiye loba yiphi imikhuba emibi ekuvimbela ukuthi ubhabhathizwe.

16. Yiziphi izinto eziphathelane lokukhonza okumele sihlale sizenza?

¹⁶ Okunye okuqakathekileyo yikuhlala usenza izinto eziphathelane lokukhonza. Lokhu kugoqela ukuya emihlanganweni yobuKhristu lokuphendula kuyo. (Heb. 10:24, 25) Woba lomkhuba wokuhlala utshumayela nxa usuvunyelwa ukuthi wenze njalo. Nxa ungahlala utshumayela ucina usuwukholisa umsebenzi lo. (2 Tim. 4:5) Nxa usesemncane futhi  usahlala ngekhaya zibuze umbuzo lo: ‘Ngilindela ukutshelwa ngabazali bami ukuthi ngiye ekutshumayeleni yini kumbe ngiyazihambela ngingatshelwanga?’ Nxa usenza izinto lezi ungatshelwanga uyabe utshengisa ukuthi ulokholo lokuthi uyamthanda uJehova futhi uyambonga ngakho konke akwenzele khona. ‘Imisebenzi le yokuzinikela kuNkulunkulu’ yizipho oyabe umnika zona. (2 Phet. 3:11; Heb. 13:15) UNkulunkulu wethu uyathokoza ngezipho esimnika zona ngokuzithandela. (Khangela u-2 Khorinte 9:7.) Kanti njalo konke esikwenzela uJehova kuyamthokozisa ngoba siyabe simnika okusemandleni ethu.

17-18. Kuyini okuqakathekileyo okuzakunceda ukuthi uthuthuke uze ubhabhathizwe futhi kungani kuqakathekile? (IZaga 3:3-6)

¹⁷ Lanxa uyabe usebenza nzima ukuze ubhabhathizwe izinto azisoze zihlale zitshelela. Abanye abantu bangakuhleka ngenxa yalokho osukukholwa futhi bangakuthwalisa nzima. (2 Thim. 3:12) Lanxa kulomkhuba olwisa ukuthi uwutshiye, kwezinye izikhathi ungazithola usubuyele kuwo. Ungacina usukhalala loba ucaphuka nxa ubona ukuthi kuseselomango ukuthi ubhabhathizwe. Manje kuyini okuzakunceda ukuthi ubekezele? Yikuthanda uJehova.

¹⁸ Into enhle ukwedlula zonke engakunceda yikuthanda uJehova. (Bala uZaga 3:3-6.) Ukuthanda uJehova ngenhliziyo yakho yonke yikho okuzakunceda ukuthi uqhubeke umkhonza lanxa sekunzima. Kulamavesi amanengi asitshela ukuthi uJehova ulothando oluqotho ezincekwini zakhe. Uthando olunjalo alupheli loba sekutheni njalo alukhalali lanxa sekunzima. (Hubo. 100:5) Wena wenziwa ngomfanekiso kaNkulunkulu. (Gen. 1:26) Pho ungenzani ukuze lawe ube lothando oluqotho?

19. Kuyini ongakwenza ukuze uhlale ubonga ngakho konke uJehova akwenzele khona? (UGalathiya 2:20)

¹⁹ Into yokuqala ongayenza yikubonga. (1 Thes. 5:18) Nsuku zonke zibuze ukuthi uJehova ukutshengise njani ukuthi uyakuthanda. Ungenza njalo ubusuthandaza umbonga, uqamba zona kanye izinto akwenzele zona. Nanzelela ukuthi zonke izinto akwenzela zona zitshengisa ukuthi uyakuthanda njengoba nje lomphostoli uPhawuli wakunanzelela lokhu. (Bala uGalathiya 2:20.) Zibuze, ‘Lami ngiyafuna yini ukumtshengisa ukuthi ngiyamthanda?’ Ukuthanda uJehova  kuzakunceda ukuthi uqhubeke ulwisana lezilingo lobunzima ongahlangana labo. Kuzakunceda ukuthi uhlale usenza izinto eziphathelane lokukhonza, utshengisa nsuku zonke ukuthi uyamthanda uBaba wethu osezulwini.

20. Kumele wenzeni ukuze uzinikele kuJehova njalo kuqakatheke ngani ukwenza njalo?

²⁰ Ngokuhamba kwesikhathi ukuthanda uJehova kuzakufuqa ukuthi uthandaze uzinikela kuye. Khumbula ukuthi nxa usuzinikele kuJehova usulethemba elihle lokuthi ube ngowakhe kuze kube nini lanini. Nxa ungazinikela kuJehova uyabe umthembisa ukuthi uzamkhonza kumnyama kubomvu. Uzinikela kuye kanye kuphela empilweni yakho. Ukuzinikela kuJehova kuqakathekile sibili. Kodwa cabanga ngalokhu: Lanxa uzakwenza izinqumo ezinengi empilweni yakho akula esinye ozasenza esiqakatheke ukwedlula lesi. (Hubo. 50:14) USathane uzazama ukukulinga ukuze ucine ungasamthandi kakhulu uNkulunkulu efuna ungasabi qotho kuye. Ungaqali ukumvumela! (Jobe 27:5) Nxa ungamthanda kakhulu uJehova, uYihlo osezulwini, uzakunceda ukuthi ugcine isithembiso sakho sokuzinikela kuye njalo uqhubeke usondela kakhulu kuye.

21. Kungani sisithi ukubhabhathizwa yikuqala kwendaba hatshi ukuphela kwayo?

²¹ Nxa usuzinikele kuJehova tshela abadala ukuthi usufuna ukubhabhathizwa. Ukubhabhathizwa kuqakathekile sibili, kodwa khumbula ukuthi yikuqala kwendaba. Uyabe ukhona uqala uhambo lwakho lokukhonza uJehova. Ngakho qhubeka usenza izinto ezizakwenza umthande uYihlo osezulwini. Hlela ukwenza izinto ezizakwenza ukuthi uthando lolu luqhubeke lukhula nsuku zonke. Lokhu kuzakunceda ukuthi ucine usubhabhathiziwe. Uyabe ungasoze ulikhohlwe lelolanga, kodwa kuyabe kuyisiqalo nje. Sengathi ungaqhubeka umthanda uJehova leNdodana yakhe kuze kube nini lanini.