1-2. Yiziphi izibusiso umuntu azitholayo nxa angabhabhathizwa?

 UKUBHABHATHIZWA lokuba ngamalunga emuli kaJehova kuyasithokozisa kakhulu. Labo abathola isibusiso sokuba semulini yakhe bangavumelana lamazwi omhubi uDavida athi: “Uyathokoza umuntu omkhethayo umsondeze eduze kwakho, ukuze ahlale emagumeni akho.”—Hubo. 65:4.

² UJehova kaphonguletha loba ngubani emagumeni akhe. Njengoba sibonile esihlokweni esidlulileyo, usondela eduze kwalabo abatshengisa ukuthi bafisa ukuba ngabangane bakhe. (Jak. 4:8) Nxa ungazinikela kuJehova futhi ubhabhathizwe, uyasondela kuye njalo ube ngumngane wakhe. Qiniseka ukuthi nxa usubhabhathizwe, uJehova ‘uzakuthululela izibusiso ezinengi uze uswele lokuthi uzifake ngaphi.’—Mal. 3:10; Jer. 17:​7, 8.

3. AmaKhristu azinikeleyo njalo abhabhathizwa alawuphi umlando? (UmTshumayeli 5:​4, 5)

³ Nxa ubhabhathizwa uyabe uqala impilo yokukhonza uJehova. Ngemva kokubhabhathizwa kuyabe kumele wenze konke okusemandleni akho ukuthi ugcine isifungo sakho sokuzinikela kuJehova lanxa ulingwa kumbe uhlangana lobunzima. (Bala umTshumayeli 5:​4, 5.) Njengoba uyabe usungumfundi kaJesu, kuyabe kumele usebenze nzima ukuthi ulingisele lokho ayekwenza njalo ulandele yonke imithetho yakhe. (Mat 28:​19, 20; 1 Phet. 2:21) Isihloko lesi sizakunceda ukuthi ukwenze lokho.

 ‘QHUBEKA ULANDELA’ UJESU NXA ULINGWA KUMBE UHLANGANA LOBUNZIMA

4. Kutshoni ukuthi abafundi bakaJesu kumele bathwale ‘isigodo sokuhlutshwa’? (ULukha 9:23)

⁴ Nxa ungabhabhathizwa, akutsho ukuthi izinto zonke sezizatshelela empilweni yakho. Phela uJesu wakwenza kwacaca ukuthi abafundi bakhe babezathwala ‘isigodo sokuhlutshwa’ lokuthi babezasithwala “nsuku zonke.” (Bala uLukha 9:23.) UJesu wayesitsho ukuthi abalandeli bakhe babezahlala behlupheka yini? Hatshi. Wayegcizelela ukuthi babezahlangana lobunzima lanxa babezathola izibusiso ezinengi. Ezinye zalezonhlupho zazizakuba buhlungu kakhulu.—2 Thim. 3:12.

5. UJesu wathi yiziphi izibusiso ezizatholwa yilabo abazidelayo?

⁵ Mhlawumbe uthwaliswe nzima ngabemuli yakho kumbe watshiya ezinye izinto ukuze wenze imisebenzi yoMbuso. (Mat. 6:33) Nxa kunjalo, qiniseka ukuthi uJehova uyakubona konke omenzele khona. (Heb. 6:10) Kumele ukuthi okwakhulunywa nguJesu usuke wakubona kusenzakala empilweni yakho. Wathi: “Kakho otshiye indlu kumbe abafowabo kumbe odadewabo kumbe unina kumbe uyise kumbe abantwana kumbe amasimu ngenxa yami langenxa yezindaba ezinhle, ongasoze athole sekuphindwe ka-100 ngalesisikhathi—izindlu, abafowabo, odadewabo, onina, abantwana lamasimu kanye lokuhlukuluzwa, aphinde athole lokuphila okungapheliyo esikhathini esizayo.” (Mak. 10:​29, 30) Izibusiso osuzitholile zingcono kakhulu ukwedlula loba yini ongabe wayitshiya.—Hubo. 37:4.

6. Kungani kuzamele uqhubeke ulwisana ‘lesifiso senyama’ ngemva kokubhabhathizwa?

⁶ Ngemva kokubhabhathizwa kuzamele uqhubeke ulwisana ‘lesifiso senyama.’ (1 Joh. 2:16) Phela uyabe ulokhu ulesono esasithatha ku-Adamu. Ngezinye izikhathi ungazizwa njengomphostoli uPhawuli owathi: “Enhliziyweni yami ngiyathokoza sibili ngomthetho kaNkulunkulu kodwa nginanzelela ukuthi emzimbeni wami kulomunye umthetho olwisana lomthetho wengqondo yami, ongenza ngithunjwe ngumthetho wesono osemzimbeni wami.” (Rom. 7:​22, 23) Ukuhlala ulwisana lezifiso ezimbi lakho kungakudanisa. Lanxa kunjalo, ukucabanga ngesithembiso owasenza ngesikhathi uzinikela kuJehova kuzakunceda ukuthi uzimisele ukuqhubeka ulwisana lezilingo ohlangana lazo. Isifungo owasenza ngesikhathi uzinikela kuJehova sizakwenza kube lula ukuthi ulwisane lezilingo. Njani?

7. Ukuzinikela kuJehova kuzakunceda njani ukuthi uhlale uthembekile kuye?

⁷ Nxa uzinikela kuJehova uyabe uzidela. Lokhu kutsho ukuthi kawuqali ukulandela izifiso ezimbi kumbe ukwenza izinto ezingamthokozisiyo uJehova. (Mat. 16:24) Yikho nxa uhlangana lezilingo kawusoze utshone uzibuza ukuthi kumele wenzeni ngoba uyabe usuvele wazitshela ukuthi uzahlala uthembekile kuJehova. Uzazimisela ukumthokozisa kumnyama kubomvu njengoJobe. Lanxa wayephakathi kobunzima obukhulu, wazimisela ukuhlala ethembekile kuJehova waze wathi: “Ngizaze ngizifele ngilokhu ngiqotho!”—Jobe. 27:5.

8. Ukucabangisisa ngomthandazo owawenzayo ngesikhathi uzinikela kuNkulunkulu kuzakunceda njani ukuthi ulwisane lezilingo?

⁸ Nxa ungacabangisisa ngomthandazo wokuzinikela kuJehova owawenzayo, uzathola amandla okumelana laloba yisiphi isilingo ongahlangana laso. Ngokwesibonelo, ungazidlisa satshanyana yini emuntwini otshadileyo? Ngeke, ngoba uyabe usuvele wazimisela ukuthi kawusoze wenze into enjalo. Nxa ungaphangisa ukulahla imicabango emibi, uzabalekela ubunzima obuhlangana lalabo abayekela imicabango emibi igxila ezingqondweni zabo. Lokhu kuzakunceda ukuthi ‘ungalugxobi endleleni yababi.’—Zaga. 4:​14, 15.

9. Ukucabangisisa ngomthandazo wakho wokuzinikela kungakunceda njani ukuthi uqakathekise ukukhonza uJehova ukwedlula loba yini?

 ⁹ Ungenzani nxa ungathola umsebenzi owenza kube nzima ukuthi ungene imihlangano zikhathi zonke? Uyabe ungasoze utshone uzibuza ukuthi uzakwenzani ngoba ungakawutholi uyabe usuvele wazimisela ukuthi awusoze uwuvume umsebenzi onjalo. Kawusoze ucabange ukuthi ungawamukela ubusudinga ezinye izindlela zokungena imihlangano. Ukucabangisisa ngalokho uJesu ayekwenza kungakunceda. Wayezimisele ukuhlala ethokozisa uYise. Ngakho lawe zimisele ukwala masinyane loba yini engasoze ithokozise uNkulunkulu wakho ozinikele kuye.—Mat. 4:10; Joh. 8:29.

10. UJehova uzakuncedisa njani ukuthi ‘uqhubeke ulandela’ uJesu ngemva kokubhabhathizwa kwakho?

¹⁰ Izilingo kanye lenhlupho ohlangana lazo zikunika ithuba lokutshengisa ukuthi uzimisele ‘ukuqhubeka ulandela’ uJesu. Qiniseka ukuthi uJehova uzakuncedisa nxa ungazimisela ukuqhubeka ulandela uJesu. IBhayibhili lithi: “UNkulunkulu uthembekile futhi kasoze avume ukuthi lilingwe ngalokho elingeke lenelise ukukubekezelela. Kodwa nxa selilingwa uzakwenza ukuthi kube lendlela yokuphunyuka ukuze lenelise ukuqinisela.”—1 Khor. 10:13.

ONGAKWENZA UKUZE UQHUBEKE ULANDELA UJESU

11. Yiphi enye indlela enhle kakhulu yokuqhubeka ulandela uJesu? (Khangela lomfanekiso.)

¹¹ UJesu wayekutshisekela ukukhonza uJehova futhi wayehlala ethandaza kuye. (Luk. 6:12) Enye indlela enhle kakhulu yokuqhubeka ulandela uJesu ngemva kokubhabhathizwa yikuhlala usenza izinto ezizakwenza usondele eduze loJehova. IBhayibhili lithi: “Njengoba sesithuthukile safika kulelibanga, asiqhubekeni sihamba ngokuhleleka endleleni yonale.” (Flp. 3:16) Uzahlala usizwa ngabanye abafowethu  labodadewethu abakhetha ukwenza okunengi enkonzweni kaJehova. Abanye babo kungenzeka ukuthi bangena iSikolo Sabavangeli BoMbuso kumbe ukuthi bathuthela lapho okulabamemezeli abalutshwana khona. Nxa kuvuma ukuthi lawe wenze izinto lezi kungaba kuhle ukuthi uzenze. Abantu bakaJehova bahlala bedinga indlela abangangezelela ngazo inkonzo yabo. (Imiseb. 16:9) Kodwa ungenzani nxa izimo zakho zingakuvumeli ukuthi ungezelele inkonzo yakho khathesi? Ungazikhangeleli phansi usucabanga ukuthi awuqakathekanga njengabanye. Okuqakathekileyo yikuthi uqhubeke uqinisela emncintiswaneni wokuphila. (Mat. 10:22) Hlala ukhumbula ukuthi okuqakathekiswa nguJehova yikuthi wenze owenelisa ukukwenza kusiya ngezimo zakho. Le kuyabe kuyindlela eqakathekileyo yokuqhubeka ulandela uJesu ngemva kokubhabhathizwa kwakho.—Hubo. 26:1.

12-13. Ungenzani nxa ungananzelela ukuthi awusatshiseki kangako? (U-1 Khorinte 9:​16, 17) (Khangela lebhokisi elithi “ Qhubeka Usemncintiswaneni.”)

¹² Ungenzani nxa ungananzelela ukuthi awusathandazi ngenhliziyo yonke loba ukuthi ukutshumayela awusakukholisi kakhulu njengakuqala? Ungenzani nxa ungasakukholisi ukubala iBhayibhili? Nxa izinto lezi zingenzakala usubhabhathiziwe, ungacabangi ukuthi awuselawo umoya kaJehova. Njengoba ungumuntu olesono indlela ozizwa ngayo ingatshintshatshintsha. Nxa ungabona ukuthi awusakutshisekeli ukwenza izinto eziphathelane lokukhonza cabanga ngomphostoli uPhawuli. Lanxa wayezama ukulingisela uJesu, wayekwazi ukuthi ngezinye izikhathi wayezakuzwa kungatsho ukuthi enze lokho okwakumele akwenze. (Bala u-1 Khorinte 9:​16, 17.) Wathi: “Lanxa ngikwenza ngingafuni, ngiyabe ngilokhu ngilawo umsebenzi engiwunikiweyo.” Ngamanye amazwi uPhawuli wayezimisele ukwenza inkonzo yakhe kungelani lokuthi wayesizwa njani.

 ¹³ NjengoPhawuli, lawe nxa usenza izinqumo ungalandeli lokho okufunwa yinhliziyo yakho kodwa zimisele ukwenza okulungileyo lanxa usizwa kungatsho. Nxa ungaqhubeka usenza okuhle ungacina usukuthanda okwenzayo. Ukuhlala utaditsha, ukhuleka, utshumayela njalo ungena yonke imihlangano yebandla kuzakunceda ukuthi uqhubeke ulandela uJesu nxa usubhabhathiziwe. Kuzabakhuthaza abafowethu labodadewethu ukukubona usenza izinto lezi.—1 Thes. 5:11.

‘QHUBEKA UZIHLOLA’

14. Kuyini okumele uhlale ukuhlola futhi kungani? (U-2 Khorinte 13:5)

¹⁴ Ngemva kokubhabhathizwa kuqakathekile ukuthi uqhubeke uzihlola. (Bala u-2 Khorinte 13:5.) Hlala uhlola impilo yakho lezinto ozenzayo ukuze ubone ukuthi lokhu ukukhuthalele yini ukukhuleka nsuku zonke, ukubala lokutaditsha iBhayibhili, lokungena imihlangano kanye lokutshumayela. Dinga izindlela ezizakwenza ukuthi uhlale uzikholisa izinto lezi futhi ziqhubeke zikunceda. Ngokwesibonelo, ungazibuza imibuzo le: ‘Ngiyenelisa yini ukuchasisela abanye imfundiso eziqakathekileyo eziseBhayibhilini? Ngingenzani ukuze ngikukholise ukutshumayela? Ngitshela uJehova konke okwenzakala empilweni yami yini nxa ngithandaza kuye? Imithandazo yami iyatshengisa yini ukuthi ngithembele kuJehova kukho konke? Angilovi yini emihlanganweni yebandla? Ngingenzani ukuze ngilalelisise futhi ngiphendule nxa ngisemihlanganweni yebandla?’

15-16. Indaba kaRobert ikufundisani mayelana lokulwisana lezilingo?

¹⁵ Okunye okuqakathekileyo yikuthi uzihlole ukuze ubone lapho ongabe usilela khona. Umfowethu okuthiwa nguRobert wakhuluma okwenzakala kuye okwenza sibone ukuqakatheka kokuthi sizihlole. Wathi: “Ngesikhathi ngileminyaka engaba ngu-20 ngangisebenza amalanga athile ngeviki. Ngelinye ilanga sesitshayisile emsebenzini omunye unkazana engangisebenza laye wathi sihambe sonke endlini yakhe. Wathi siyabe sibabili kuphela sizenzela esikufunayo. Ekuqaliseni ngangingamcaceli ukuthi angifuni. Ngangimtshela ezinye nje izizatho kodwa ngacina ngimtshela ukuthi ngangingasoze ngihambe laye ngamchasisela lokuthi kungani.” URobert wacina esinqobile isilingo futhi akwenzayo kwakukuhle. Kodwa ngokuhamba kwesikhathi wacabangisisa ngendaba le wabona ukuthi kwakumele ahle ayale masinya. Uthi: “Angizange ngiphumele egcekeni ukuthi ngangingafuni njalo angizange ngale masinya ukwenza okubi njengalokho okwenziwa nguJosefa ngesikhathi  esala ukulala lomkaPhothifa. (Gen. 39:​7-9) Ngamangala ukuthi kanti yindaba kwakunzima kangaka ukuthi ngiyale. Isilingo lesi sangenza ngabona ukuthi kwakumele ngiqinise ubungane bami loJehova.”

¹⁶ Lawe kungakunceda ukuthi uzihlole njengalokho okwenziwa nguRobert. Lanxa ungaze uphumelele ukunqoba isilingo zibuze, ‘Kungithethe isikhathi esinganani ukwala?’ Nxa ungananzelela ukuthi kumele ubophe ziqine, ungaboni angani ungumuntu omubi. Kumele kukuthokozise ukuthi usukwazi lapho osilela khona. Thandaza kuJehova umtshela ngendaba le ubususenza yonke imizamo engakunceda ukuthi uzimisele ukulandela imithetho kaJehova emayelana lokuziphatha.—Hubo. 139:​23, 24.

17. Okwenziwa nguRobert kwalidumisa njani ibizo likaJehova?

¹⁷ Kukhona okunye esikufundayo endabeni kaRobert. Uthi: “Ngathi sengiyalile ukuya endlini kankazana owayenginxusile wathi kimi, ‘Usinqobile isilingo.’ Ngambuza ukuthi utshoni. Wathi omunye umngane wakhe owayeke waba nguFakazi wayethe bonke oFakazi abasakhulayo bazitshaya angathi bayakhonza kodwa nxa bangathola ithuba lokwenza okubi abayekeli ukukwenza. Yikho wayetshele umngane wakhe ukuthi uzangilinga abone ukuthi ngizakwenzani. Wathi engitshela lokhu ngathokoza ngibona ukuthi ngangingazange ngingcolise ibizo likaJehova.”

18. Uzimisele ukwenzani ngemva kokubhabhathizwa kwakho? (Khangela ibhokisi elithi “ Izihloko Ezingakunceda.”)

¹⁸ Nxa ungazinikela kuJehova futhi ubhabhathizwe uyabe utshengisa ukuthi ufuna ukungcwelisa ibizo lakhe kungelani lokuthi kwenzakalani. Qiniseka ukuthi uJehova uyazazi inhlupho ezikwehlelayo kanye lezilingo olwisana lazo. Uzakubusisa nxa ungenza konke okusemandleni akho ukuthi uqhubeke uthembekile. Ungathandabuzi ukuthi uzakunika amandla okuthi uqhubeke uthembekile esebenzisa umoya wakhe ongcwele. (Luk. 11:​11-13) Ngemva kokubhabhathizwa kwakho uJehova uzakuncedisa ukuthi wenelise ukuqhubeka ulandela uJesu.