1. Yiziphi ezinye izibusiso esizitholayo ngokuba senhlanganisweni kaJehova?

 SIBUSISIWE ngokuba yingxenye yenhlanganiso kaJehova kulezinsuku zokucina ezinzima. Impilo iqhubeka isiba nzima emhlabeni lo esiphila kuwo kodwa uJehova usinike abafowethu labodadewethu esikhonza labo simanyene. (Hubo. 133:1) Unceda lezimuli ukuthi zihlalisane kuhle futhi zithokoze. (Efe. 5:33–6:1) Uphinda asinike ukuhlakanipha kanye lokuqedisisa okusinceda ukuthi sihlale sithokoza njalo singakhathazeki kakhulu.

2. Kuyini okumele sikwenze futhi kungani?

² Lanxa kunjalo kumele sisebenze nzima ukuze siqhubeke sikhonza uJehova sithembekile. Ngenxa yani? Ngenxa yokuthi ngezinye izikhathi abanye abantu bangasizwisa ubuhlungu. Kanti njalo singadaniswa ngamaphutha ethu ikakhulu nxa silokhu siphindaphinda into efananayo. Akumelanga sikhalale ukukhonza uJehova nxa omunye esikhonza laye engasidanisa. Kanti njalo kumele uqhubeke ukhonza uJehova nxa ungadaniswa ngumuntu otshade laye kumbe ungadaniswa yizinto oziphambanisayo. Esihlokweni lesi sizaxoxa ngakho konke lokhu njalo sizabona lokuthi sifundani kwabanye okukhulunywa ngabo eBhayibhilini.

UNGAKHALALI NXA UNGADANISWA NGOMUNYE ESIKHONZA LAYE

3. Yibuphi ubunzima obehlela abantu bakaJehova?

³ Ubunzima. Abanye abafowethu labodadewethu balobuntu obusicaphulayo. Abanye bangenza izinto ezisidanisayo kumbe basiphathe kubi. Abakhokhelayo ebandleni labo bangaphambanisa. Izinto lezi zingenza abanye bathandabuze ukuthi le yinhlanganiso kaNkulunkulu besebeyekela ukukhonza uNkulunkulu “bemanyene” labafowethu labodadewethu. (Zef. 3:9) Bangayekela lokukhulumisana lalabo ababadanisileyo baze bayekele lokuya emihlanganweni yebandla. Bayabe behlakaniphile  yini nxa besenza njalo? Asixoxeni ngomunye okukhulunywa ngaye eBhayibhilini owaba lenhlupho ezinjengalezi sibone ukuthi sifundani kulokho akwenzayo.

4. Umphostoli uPhawuli wahlangana labuphi ubunzima?

⁴ Isibonelo esiseBhayibhilini. Umphostoli uPhawuli wayekwazi ukuthi abafowabo labodadewabo abangamaKhristu bazelwe belesono. Ngokwesibonelo, wathi esanda kuba ngumKhristu abanye ebandleni leJerusalema babengakholwa ukuthi usengumfundi. (Imiseb. 9:26) Ngokuhamba kwesikhathi kwaba labanye ababekhuluma kubi ngaye besenzela ukungcolisa ibizo lakhe. (2 Khor. 10:10) UPhawuli wake wabona omunye umzalwane owayekhokhela esenza into engalunganga eyayingakhuba abanye. (Gal. 2:​11, 12) Kanti njalo omunye umngane wakhe okuthiwa nguMakho wenza into eyamdanisayo. (Imiseb. 15:​37, 38) UPhawuli wayengabaninela khatshana abantu bonke laba ababesenza izinto ezazimdanisa. Kodwa kazange abazondele abafowabo labodadewabo futhi kazange akhalale ukukhonza uJehova. Kuyini okwamnceda ukuthi angakhalali?

5. Kuyini okwanceda uPhawuli ukuthi angabakhalali abafowabo labodadewabo? (UKholose 3:​13, 14) (Khangela lomfanekiso.)

⁵ UPhawuli wayebathanda abafowabo labodadewabo. Lokhu kwamnceda ukuthi angakhangeli amaphutha ababewenza kodwa akhangele ubuntu obuhle ababelabo. Uthando uPhawuli ayelalo lwamnceda ukuthi enze lokho akubhalayo okutholakala kuKholose 3:​13, 14. (Bala.) Ngokwesibonelo uPhawuli wamthethelela uMakho. Lanxa uMakho wamtshiya ngesikhathi ephakathi kohambo lwakhe lokuqala lokuba ngumnali, kazange aqhubeke emzondele. Ngokuhamba kwesikhathi uPhawuli wathi ebhala incwadi eyayisiya ebandleni leKholose, wambuka uMakho esithi wasebenza laye kuhle waze wathi ‘wayemduduza kakhulu.’ (Kol. 4:​10, 11) Ngesikhathi uPhawuli ebotshiwe eRoma wacela uMakho ukuthi abuye azomncedisa. (2 Thim. 4:11) Kuyacaca ukuthi uPhawuli kazange abakhalale abafowabo. Sifundani kuye?

6-7. Kuyini okuzasinceda ukuthi siqhubeke sibathanda abafowethu labodadewethu lanxa beyake basiphambanisele? (U-1 Johane 4:7)

⁶ Isifundo. UJehova ufuna singakhalali ukubathanda abafowethu labodadewethu. (Bala u-1 Johane 4:7.) Nxa omunye angehluleka ukutshengisa obunye ubuntu obuhle obunjengobukaKhristu singakuthatha ngokuthi ubefuna sibili ukulandela izimiso eziseBhayibhilini kodwa wasuka wakhutha ugatsha. (Zaga. 12:18) UNkulunkulu uyazithanda izinceku zakhe ezithembekileyo lanxa ziphambanisa kwezinye  izikhathi. Uyaqhubeka engumngane wethu futhi kahlali esizondele lanxa siphambanisa. (Hubo. 103:9) Kuqakatheke kakhulu ukuthi lathi simlingisele uBaba wethu osezulwini othethelelayo.—Efe. 4:32–5:1.

⁷ Khumbula lokuthi kuzamele sihlale siseduze labafowethu labodadewethu njengoba ukuphela sekusondele. Sikhangelele ukuthi sizahlukuluzwa kakhulu. Singazithola sesisejele sibotshelwe ukukhonza uJehova. Nxa lokhu kungenzakala siyabe sesikudinga kakhulu ukuncediswa ngabafowethu labodadewethu. (Zaga. 17:17) Ake sixoxe ngalokho okwenzakala kuJosep a umdala webandla ohlala eSpain. Yena labanye abafowethu babotshwa ngoba bayala ukungena kwezombusazwe. Uthi: “Ejele kwakulula kakhulu ukuthi sicaphulane ngoba sasihlala esitokisini sinye. Kwakumele sibekezelelane futhi sithethelelane ngenhliziyo yonke. Lokhu kwasinceda ukuthi sihlale simanyene njalo sivikelane. Sasivalelwe lezinye izibotshwa ezazingakhonzi uJehova. Ngake ngalimala ingalo ngafakwa iplasta yikho ngangingenelisi ukuzenzela ezinye izinto. Kodwa omunye umfowethu wayengiwatshela izigqoko futhi engenzela lezinye izinto. Ngathi ngisebunzimeni ngakubona sibili ukuthi abazalwane bayangithanda kakhulu.” Lokhu kwenza sibone ukuthi kuqakathekile ukuthi konke okungahambi kuhle phakathi kwethu labafowethu sihle sikulungise khathesi.

UNGAKHALALI NXA UNGADANISWA NGUMKAKHO

8. Abatshadileyo bahlangana labuphi ubunzima?

⁸ Ubunzima. Akulamuzi ongathunqi intuthu. IBhayibhili likubeka kucace ukuthi abantu abatshadileyo “bazakuba lenhlupho.” (1 Khor. 7:28) Kungani besiba lenhlupho? Umtshado uhlanganisa abantu ababili abazelwe belesono, abalobuntu obutshiyeneyo njalo abathanda izinto ezitshiyeneyo. Indlela abayabe bekhuliswe ngayo iyabe itshiyene futhi bangabe belamasiko ehlukeneyo. Ngokuhamba kwesikhathi omunye angananzelela ezinye izinto angazange azibone besathandana. Konke lokhu kungenza bangazwanani. Bangaqalisa ukukhombana ngeminwe ngenxa yenhlupho abayabe sebelazo kulokuthi ngamunye wabo azame ukubona lokho yena akuphambanisayo abesekulungisisa. Bangakubona sekungcono ukuthi behlukane kumbe badivose. Kodwa bazathokoza yini nxa bangenza njalo? b Khathesi asixoxeni ngomunye owesifazana okukhulunywa ngaye eBhayibhilini owaqhubeka ethembekile kuJehova lanxa umkakhe wayemthwalise nzima.

9. Yibuphi ubunzima u-Abhigeli ayekubo?

⁹ Isibonelo esiseBhayibhilini. U-Abhigeli wayetshade loNabhali futhi iBhayibhili lithi uNabhali wayelesihluku futhi elemikhuba emibi. (1 Sam. 25:3) Kumele ukuthi kwakunzima ukuthi u-Abhigeli ahlale lendoda enjalo. U-Abhigeli wake walithola yini ithuba lokuthi atshiye umendo wakhe? Ye walithola ngesikhathi uDavida owayezakuba yinkosi yako-Israyeli efuna ukubulala umkakhe uNabhali ngenxa yokuthi wayemthethisile yena kanye lamadoda ayehamba lawo. (1 Sam. 25:​9-13) U-Abhigeli wayengabaleka ayekele uDavida ayenze ayekucabanga kodwa yena wahamba wayamncenga ukuthi angambulali uNabhali. (1 Sam. 25:​23-27) Kungani wenza njalo?

10. Kuyini okungabe kwenza u-Abhigeli wangamtshiyi umkakhe lanxa kwakunzima?

¹⁰ U-Abhigeli wayemthanda uJehova futhi  wayeyilandela imithetho yakhe okumele ilandelwe ngabatshadileyo. Kufanele ukuthi wayekwazi lokho uNkulunkulu akukhulumayo ngesikhathi etshadisa u-Adamu lo-Eva. (Gen. 2:24) U-Abhigeli wayekwazi ukuthi umtshado ungcwele emehlweni kaJehova. Akuthandabuzwa ukuthi wenza konke okusemandleni akhe ukuthi asindise imuli yakhe kanye lomkakhe ngenxa yokuthi wayefuna ukuthokozisa uJehova. Kazange apholise amaseko kodwa wahle waphangisa ukuvimbela uDavida ukuthi angambulali uNabhali. Wazimisela ukuxolisa lanxa kwakungayisuye owayephambanisile. Akuthandabuzwa ukuthi uJehova wayemthanda owesifazana lo owayelesibindi futhi elomusa. Amadoda lamakhosikazi bangafundani kulokho okwenziwa ngu-Abhigeli?

11. (a) UJehova ukhangeleleni ebantwini abatshadileyo? (U-Efesu 5:33) (b) Ufundeni kulokho okwenziwa nguCarmen ukuze agcine umtshado wakhe? (Khangela lomfanekiso.)

¹¹ Isifundo. UJehova ufuna ukuthi umuntu otshadileyo aqhubeke ehlala lomkakhe lanxa kunzima ukuphila laye. Kumele ukuthi kuyamthokozisa kakhulu uNkulunkulu ukubona abatshadileyo besebenza nzima ukuze balungise inhlupho zabo futhi batshengisane ukuthi bayathandana lokuthi bayahloniphana. (Bala u-Efesu 5:33.) Asixoxeni ngokwenzakala kuCarmen. Ngemva kweminyaka engaba ngu-6 etshadile, waqalisa ukufunda iBhayibhili laboFakazi bakaJehova njalo wabhabhathizwa. Uthi: “Lokho akumphathanga umkami, waba lesikhwele ngoJehova. Wayengithethisa angitshele ukuthi uzangitshiya.” Lanxa kunjalo uCarmen waqinisela. Wasebenza nzima okweminyaka engu-50 ukuthi aqhubeke emthanda futhi emhlonipha umkakhe. Uthi: “Njengoba iminyaka yayiqhubeka ihamba ngafunda ukuba ngumuntu ozwisisayo kanye lokukhuluma kuhle lomkami. Ngenza konke okusemandleni ukuthi ngigcine umtshado wami njengoba ungcwele emehlweni kaJehova. Angizange ngimtshiye umkami ngenxa yokuthi ngangimthanda uJehova.” c Nxa wena lomkakho lingaba lohlupho ungathandabuzi ukuthi uJehova uzakusekela, akuncedise ukuthi uqinisele.

UNGAKHALALI NXA UNGENZA ISONO ESIKHULU

12. Singazizwa njani nxa singenza isono esikhulu?

¹² Ubunzima. Ungadana kakhulu nxa ungenza isono esikhulu. IBhayibhili lithi nxa singenza isono singaba lenhliziyo “edabukileyo futhi esebuhlungwini.” (Hubo. 51:17) Omunye umzalwane okuthiwa nguRobert wasebenza nzima okweminyaka eminengi ukuze abe yinceku ekhonzayo. Kodwa wenza isono esikhulu wasenanzelela ukuthi wayedanise uJehova. Uthi: “Ngathi nginanzelela engasengikwenzile,  umzwangedwa wami wangihlupha kakhulu. Ngemva kwalokho ngezwa ubuhlungu, ngakhala ngithandaza kuJehova. Ngasengicabanga lokuthi uNkulunkulu kasoze azihluphe ngokungilalela. Kambe wayengangilalelelani mina ngimdanise kangaka?” Nxa singenza isono esikhulu singadana kakhulu sifune ukukhalala ngenxa yokuthi siyabe sesicabanga ukuthi uJehova usesilahlile. (Hubo. 38:4) Nxa lawe wake wezwa njalo ungancedwa yindaba yomunye okukhulunywa ngaye eBhayibhilini ongazange akhalale ukukhonza uJehova lanxa wayeyenze isono esikhulu.

13. Yisiphi isono esikhulu umphostoli uPhetro asenzayo njalo yiwaphi amanye amaphutha ayewenzile?

¹³ Isibonelo esiseBhayibhilini. Ebusuku uJesu ezavuka ebulawa, umphostoli uPhetro wenza amaphutha amanengi acina ebangela ukuthi enze isono esikhulu. Okokuqala, uPhetro wazithemba kakhulu wazitshaya isifuba esithi yena wayezaqhubeka ethembekile lanxa abanye abaphostoli babengamlahla uJesu. (Mak. 14:​27-29) Ngemva kwalokho bathi sebesensimini yeGetsemane uPhetro wehluleka ukuhlala elindile. (Mak. 14:​32, 37-41) Ixuku labantu lathi selizobopha uJesu, uPhetro wacela ezinyaweni. (Mak. 14:50) Ekucineni waphika kathathu ukuthi uyamazi uJesu waze wafunga esenzela ukuthi bamkholwe. (Mak. 14:​66-71) UPhetro wenzani ngesikhathi enanzelela ukuthi wayeyenze isono esikhulu? Wehluleka ukuzibamba wakhala kabuhlungu mhlawumbe esezithonisisa ngayekwenzile. (Mak. 14:72) Akucabange ukuthi ngemva kwamahora amalutshwana nje uPhetro wezwa ubuhlungu obukhulu kangakanani ngesikhathi umngane wakhe uJesu esebulawa. Kumele ukuthi wayesezibona angathi kalancedo.

14. Kuyini okwenza uPhetro wangakhalali ukukhonza uJehova? (Khangela umfanekiso.)

¹⁴ Zinengi izizatho ezenza umphostoli uPhetro wangakhalali ukuqhubeka ekhonza uJehova. Kazange azehlukanise labanye. Waya kwabanye abafundi njalo kufanele ukuthi bamduduza. (Luk. 24:33) UJesu wathi esevusiwe wabonakala kuPhetro njalo kumele ukuthi wayefuna ukumkhuthaza. (Luk. 24:34; 1 Khor. 15:5) Kazange amsole ngamaphutha ayewenzile kodwa ngokuhamba kwesikhathi wamtshela ukuthi wayezaphiwa imisebenzi eqakathekileyo. (Joh. 21:​15-17) Lanxa uPhetro wayekwazi ukuthi wayeyenze isono esikhulu kazange akhalale, waqhubeka ezama ukwenza okuhle. Ngenxa yani? Kungenxa yokuthi wayeqiniseka ukuthi iNkosi yakhe uJesu kayizange imkhalale. Kanti njalo abanye abafundi babelokhu bemkhuthaza. Sifundani endabeni kaPhetro?

15. UJehova ufuna siqiniseke ngani? (IHubo 86:5; URoma 8:​38, 39) (Khangela lomfanekiso.)

 ¹⁵ Isifundo. UJehova ufuna singakuthandabuzi ukuthi uyasithanda lokuthi uyasixolela nxa singaphambanisa. (Bala iHubo 86:5; uRoma 8:​38, 39.) Nxa singawona siyadliwa yisazela. Akulanto embi ngokuthi sizizwe njalo. Lanxa kunjalo akumelanga sicabange ukuthi uJehova kasasithandi lokuthi kasoze asithethelele. Yikho kumele singaphuzi ukuyadinga uncedo. URobert okuke kwakhulunywa ngaye uthi: “Ngacina ngenze isono ngoba ngangizithemba ukuthi ngingalwisana lesilingo ngingedwa.” Wananzelela ukuthi kwakumele akhulume labadala. Uthi: “Ngathi sengikhuluma labadala bangincedisa ngakubona ukuthi uJehova uyangithanda. Abadala abazange bangikhalale, bangincedisa ngabona ukuthi uJehova wayengangilahlanga.” Nxa singaphenduka ezonweni zethu, sidinge uncedo futhi senze konke okusemandleni ethu ukuthi singawaphindi amaphutha esiyabe siwenzile, lathi singaqiniseka ukuthi uJehova uyasithanda kakhulu lokuthi uzasithethelela. (1 Joh. 1:​8, 9) Nxa singaqiniseka ngalokho asisoze sikhalale, sizaqhubeka simkhonza uJehova lanxa singaze sikhubeke kumbe siwe.

16. Kungani uzimisele ukuqhubeka ukhonza uJehova?

¹⁶ UJehova uyakuqakathekisa kakhulu konke esikwenzayo ukuze siqhubeke simkhonza ezinsukwini lezi zokucina ezinzima. Nxa kungenzakala izinto ezisidanisayo uJehova angasincedisa ukuthi siqhubeke simkhonza singakhalali. Singenelisa ukuqhubeka sibathanda abafowethu labodadewethu futhi sibathethelele nxa bangasiphambanisela. Nxa utshadile ungatshengisa ukuthi uyamthanda kakhulu uNkulunkulu lokuthi uyayilalela imithetho yakhe emayelana lomtshado ngokulungisisa inhlupho ezingabakhona phakathi kwakho lomkakho. Nxa singenza isono singacela ukuthi uJehova asincedise singathandabuzi ukuthi uyasithanda lokuthi uzasithethelela, besesiqhubeka simkhonza. Singaqiniseka ukuthi sizathola izibusiso ezinengi ‘nxa singayekeli ukwenza okuhle.’—Gal. 6:9.