1. Kuyini ezinye izinceku zikaJehova ezikuthandabuzayo ngezinye izikhathi?

 KUYASIKHUTHAZA kakhulu ukwazi ukuthi uJehova uyathokoza ngabo bonke abantu bakhe. Phela iBhayibhili lithi: “UJehova uyathokoza ngabantu bakhe.” (Hubo. 149:4) Kodwa ngezinye izikhathi nxa abanye bedanile bayathandabuza ukuthi uJehova uyathokoza ngabo. EBhayibhilini kukhulunywa ngabantu abanengi ababekhonza uJehova bethembekile ababeke bathandabuze ukuthi uJehova uyabathanda.—1 Sam. 1:​6-10; Jobe. 29:​2, 4; Hubo. 51:11.

2. Kumele senzeni ukuze uJehova asamukele?

² IBhayibhili likubeka kucace ukuthi abantu abalesono bangenelisa ukumthokozisa uJehova. Singakwenza njani lokho? Kumele sibe lokholo kuJesu uKhristu njalo sibhabhathizwe. (Joh. 3:16) Nxa sisenza njalo siyabe sitshengisa abanye ukuthi sesiphendukile ezonweni zethu lokuthi sesithembise uNkulunkulu ukuthi sizakwenza intando yakhe. (Imiseb. 2:38; 3:19) UJehova uyathokoza nxa sisenza lokhu ngoba kwenza sisondele kuye. Uzasamukela futhi asibone singabangane bakhe nxa singenza konke okusemandleni ethu ukuthi sigcine isifungo esasenzayo ngesikhathi sizinikela kuye.—Hubo. 25:14.

3. Sizaxoxa ngani?

³ Kuyini okwenza abanye bacabange ukuthi uJehova kabemukeli? UJehova utshengisa njani ukuthi uyasamukela lokuthi uyathokoza ngathi? Kuyini okunganceda umKhristu angathandabuzi ukuthi uNkulunkulu uyathokoza ngaye?

OKWENZA ABANYE BACABANGE UKUTHI UJEHOVA KATHOKOZI NGABO

4-5. Lanxa singazibona angani asilancedo kuyini okungamelanga sikuthandabuze?

⁴ Kusukela besesebancane abanye bethu babezikhangelela phansi bezitshela ukuthi abalancedo. (Hubo. 88:15) Umzalwane okuthiwa ngu-Adrián uthi: “Ngihlala ngizikhangelela phansi.  Ngisesemncane ngangihlala ngithandazela ukuthi abangakithi bayephila epharadayisi kodwa ngangicabanga ukuthi umuntu onjengami ngeke ayephila epharadayisi.” Omunye umzalwane owayelabazali abangayisibo boFakazi okuthiwa nguTony uthi: “Abazali bami babengakaze bangitshele ukuthi bayangithanda kumbe ukuthi bayazigqaja ngami. Lokhu kwangenza ngacabanga ukuthi akulanto engangiyenza eyayibathokozisa.”

⁵ Lathi nxa siyake sizizwe angani asilancedo kumele sikhumbule ukuthi uJehova nguye owasidonsela kuye. (Joh. 6:44) Uyabubona ubuntu obuhle esilabo lanxa thina siyabe singabunanzeleli njalo uyakwazi okusezinhliziyweni zethu. (1 Sam. 16:7; 2 Imilan. 6:30) Yikho kumele simkholwe nxa esitshela ukuthi siligugu.—1 Joh. 3:​19, 20.

6. Umphostoli uPhawuli wayesizwa njani ngezono ayezenzile?

⁶ Kungenzeka ukuthi abanye bethu bengakafundi iqiniso benza izinto abalokhu bezisola ngazo lakhathesi. (1 Phet. 4:3) Abanye asebelesikhathi bekhonza uJehova bethembekile lokhu belwisana lezifiso ezimbi. Wena kukhona yini obona angani uJehova ngeke akuthethelele khona? Kuzakududuza ukwazi ukuthi lezinye izinceku zikaNkulunkulu ezazithembekile zazike zizwe njalo. Ngokwesibonelo, umphostoli uPhawuli wayeke adane nxa ecabanga ngamaphutha akhe. (Rom. 7:24) UPhawuli wayesephendukile ezonweni zakhe njalo wabhabhathizwa kodwa wathi ‘wayengomncinyane kubaphostoli,’ waphinda wathi wayeyisoni ‘esibi kulazo zonke.’—1 Khor. 15:9; 1 Thim. 1:15.

7. Kuyini okumele sihlale sikukhumbula mayelana lezono esazenza kudala?

⁷ UBaba wethu osezulwini uthembisa ukuthi uzasithethelela nxa singaphenduka ezonweni zethu. (Hubo. 86:5) Yikho nxa sizisola ngenhliziyo yonke ngenxa yezono esazenzayo kumele singathandabuzi ukuthi uJehova uqinisile nxa esithi usesithethelele.—Kol. 2:13.

8-9. Singenzani ukuze senelise ukulahla umcabango wokuthi ngeke senelise ukuthokozisa uJehova?

⁸ Sonke sifuna ukwenza okusemandleni ethu ekukhonzeni uJehova. Kodwa abanye bacabanga ukuthi ngeke benelise ukumthokozisa. Omunye udadewethu okuthiwa ngu-Amanda uthi: “Izikhathi ezinengi ngiyake ngicabange ukuthi ukwenza konke okusemandleni ami ukuze ngithokozise uJehova kutsho ukuthi kumele ngihlale ngingezelela engimenzela khona. Yikho ngihlala ngizama ukwenza okunengi ukwedlula engikwenelisayo. Nxa ngingehluleka ukwenza konke engiyabe ngifisa ukukwenza ngiyadana ngizitshele ukuthi uJehova laye ngimdanisile.”

⁹ Singenzani ukuze senelise ukulahla umcabango wokuthi ngeke senelise ukuthokozisa uJehova? Khumbula ukuthi uJehova uyazwisisa. Kakhangelelanga ukuthi simenzele izinto ezingaphezu kwamandla ethu. Uyakuqakathekisa konke esimenzela khona nxa sikwenza ngenhliziyo yonke. Cabanga langabantu okukhulunywa ngabo eBhayibhilini ababekhonza uJehova ngenhliziyo yonke. Ngokwesibonelo, umphostoli uPhawuli wamsebenzela nzima uJehova okweminyaka eminengi. Wahamba izinkulungwane zamakhilomitha njalo wavula amabandla amanengi. Kodwa impilo yakhe yatshintsha njalo wayengasenelisi ukutshumayela njengakuqala. Lokhu kwakusitsho ukuthi uNkulunkulu kasathokozi ngaye yini? Hatshi. Waqhubeka esenza konke okusemandleni akhe futhi uJehova wambusisa. (Imiseb. 28:​30, 31) Ngendlela efananayo, lokho esenelisa ukukwenzela uJehova kungatshintsha ngezinye izikhathi. Okuqakathekileyo kuye yikuthi siyabe sihloseni nxa simenzela imisebenzi yenkonzo. Khathesi asixoxeni ngezindlela uJehova atshengisa ngazo ukuthi uyasamukela lokuthi uyathokoza ngathi.

 UJEHOVA UTSHENGISA NJANI UKUTHI UYASAMUKELA?

10. UJehova usitshela njani ukuthi uyasamukela? (UJohane 16:27)

¹⁰ Usebenzisa iBhayibhili. UJehova uyadinga izindlela zokutshengisa abantu abathandayo ukuthi uyathokoza ngabo. IMibhalo isitshela ngezikhathi ezimbili lapho uJehova atshela khona uJesu ukuthi uyiNdodana yakhe ayithandayo futhi ayamukelayo. (Mat. 3:17; 17:5) Wena uyafisa yini ukuzwa uJehova ekutshela ukuthi uyakwamukela? UJehova kakhulumi lathi esezulwini kodwa ukhuluma lathi esebenzisa amazwi aseBhayibhilini. Nxa sibala amazwi uJesu awatshela abafundi bakhe kuyabe kungani sizwa uJehova ekhuluma lathi. (Bala uJohane 16:27.) UJesu wayelingisela uYise kukho konke ayekwenza. Lanxa abafundi bakhe babephambanisa ngezinye izikhathi, wayengayekeli ukubatshela amazwi ayebenza bangathandabuzi ukuthi uyathokoza ngabo. Yikho nxa sibala amazwi lawo kumele sizwe angani uJehova uwatshela thina.—Joh. 15:​9, 15.

11. Kungani ukwehlelwa zinhlupho kungatshengisi ukuthi uJehova kasathokozi ngathi? (UJakhobe 1:12)

¹¹ Uyasipha esikudingayo. UJehova uzimisele ukusincedisa ngokusinika lokho esikudingayo empilweni. Kwezinye izikhathi uyavumela ukuthi sihlupheke njengalokho okwenzakala kuJobe indoda eyayilungile. (Jobe. 1:​8-11) Ukwehlelwa zinhlupho akutsho ukuthi uNkulunkulu kasathokozi ngathi kodwa kusinika ithuba lokutshengisa ukuthi siyamthanda kakhulu lokuthi siyamthemba. (Bala uJakhobe 1:12.) Nxa siphakathi kwenhlupho siyakubona ukuthi uJehova usithanda kangakanani lokuthi usincedisa njani ukuthi siqhubeke siqinisela.

12. Sifundani kulokho okwenzakala kuDmitrii?

¹² Cabanga ngalokho okwenzakala kumzalwane ohlala e-Asia okuthiwa nguDmitrii. Waphelelwa ngumsebenzi futhi kwadlula izinyanga ezinengi elokhu engakawutholi omunye. Watshengisa ukuthi uyamthemba uJehova ngokukhuthala emsebenzini wokutshumayela. Lanxa kunjalo kwadlula izinyanga elokhu engawutholi umsebenzi. Waqalisa ukugula futhi umkhuhlane wakhe waba mubi okokuthi wayesetshona elele. Wayesezibona angani useyehlulekile ukugcina imuli yakhe futhi esezibuza ukuthi uJehova usamamukela yini. Ngelinye ilanga ntambama indodakazi yakhe yabhala ephepheni amazwi atholakala ku-Isaya 30:15 athi: “Lizakuba lamandla nxa lingahlaliseka futhi lingithembe.” Indodakazi yakhe yabuya lephepha leli lapho ayelele khona yasisithi: “Baba nxa ungazizwa  udanile ukhumbule umbhalo lo.” UDmitrii wananzelela ukuthi kwakumele ambonge uJehova ngoba imuli yakhe yayingasweli ukudla lezigqoko njalo yayilokhu ilendawo yokuhlala. Uthi: “Okwakumele ngikwenze yikuhlaliseka ngiqhubeke ngithemba uNkulunkulu wami.” Nxa lawe ulohlupho olunjengolukaDmitrii qiniseka ukuthi uJehova ulendaba lawe lokuthi uzakuncedisa ukuthi uqinisele.

13. Ngobani uJehova angabasebenzisa ukuze asitshengise ukuthi uyasamukela futhi angakwenza njani lokho?

¹³ Usebenzisa abafowethu labodadewethu. UJehova usebenzisa abafowethu labodadewethu ukuze asitshengise ukuthi uyathokoza ngathi. Ngokwesibonelo, angasebenzisa abanye ukuthi bakhulume amazwi akhuthazayo ngaso kanye isikhathi esiyabe siwadinga ngaso. Omunye udade ohlala e-Asia wakubona lokhu ngesikhathi ephakathi kobunzima obukhulu. Waphelelwa ngumsebenzi futhi waqalisa ukugula kakhulu. Esathi ukubonile, umkakhe wenza isono esikhulu wasesima ukuba ngumdala. Uthi: “Ngangingazwisisi ukuthi kungani konke lokhu kwakusenzakala kimi. Ngasengicabanga ukuthi mhlawumbe kukhona okubi engangikwenzile lokuthi uJehova wayengasathokozi ngami.” Udadewethu lo wathandaza kuJehova emncenga ukuthi amqinisekise ukuthi wayelokhu emamukela. Pho uJehova wamncedisa njani? Uthi: “Abadala bebandla bakhuluma lami bangiqinisekisa ukuthi uJehova wayelokhu engithanda.” Ngemva kwesikhathi waphinda wacela uJehova ukuthi amqinisekise futhi. Uthi: “Ngalelolanga ngathola incwadi eyayivela kwabanye abafowethu labodadewethu ebandleni. Ngesikhathi ngibala amazwi aduduzayo ababengibhalele wona ngakubona sibili ukuthi uJehova wayewuzwile umthandazo wami.” Kuyacaca ukuthi uJehova utshengisa ukuthi uyasamukela lokuthi uyathokoza ngathi esebenzisa amazwi akhuthazayo esiwatshelwa ngabafowethu labodadewethu.—Hubo. 10:17.

14. Yiphi eyinye indlela uJehova ayisebenzisayo ukuze asitshengise ukuthi uyasamukela?

 ¹⁴ UJehova uphinda asitshengise ukuthi uyasamukela ngokusebenzisa abanye esikhonza labo ukuthi basinike iseluleko ngesikhathi esisidinga ngaso. Ngokwesibonelo, waphefumulela umphostoli uPhawuli ukuthi abhale incwadi ezingu-14 ezazisiya kubafowabo labodadewabo ayekhonza labo. Ezincwadini lezo wabeluleka engababhodi kodwa wayekhuluma labo ngendlela etshengisa ukuthi uyabathanda. Kungani uJehova waphefumulela uPhawuli ukuthi abhale izeluleko lezi? UJehova nguBaba olothando futhi uyabalaya abantwabakhe ‘abathandayo.’ (Zaga. 3:​11, 12) Yikho nxa omunye angasipha iseluleko esisekelwe eBhayibhilini akutsho ukuthi uJehova usesilahlile kodwa kutshengisa ukuthi ulokhu esithanda. (Heb. 12:6) Kuyini okunye okutshengisa ukuthi uJehova uyasamukela lokuthi uyathokoza ngathi?

OKUNYE OKUTSHENGISA UKUTHI UJEHOVA UYASAMUKELA

15. Ngobani uJehova abanika umoya ongcwele futhi lokho kwenza siqiniseke ngani?

¹⁵ UJehova uyabanika umoya ongcwele labo abamukelayo. (Mat. 12:18) Ungazibuza umbuzo lo, ‘Engikwenzayo kuyatshengisa yini ukuthi ngilezithelo zomoya kaNkulunkulu?’ Nxa uzihlola uyakubona yini ukuthi khathesi ususenelisa ukubekezelela abanye ukwedlula kuqala ungakafundi ngoJehova? Nxa ungaqhubeka utshengisa ngezenzo ukuthi ulezithelo zomoya kaNkulunkulu awusoze uthandabuze ukuthi uJehova uyathokoza ngawe lokuthi uyakwamukela.—Khangela ibhokisi elithi “ Izithelo Zomoya.”

16. Ngobani uJehova abanike umsebenzi wokutshumayela izindaba ezinhle futhi lokhu kukwenza uzwe njani? (U-1 Thesalonika 2:4)

¹⁶ UJehova uyathokoza ukunika labo abamukelayo umsebenzi wokutshumayela izindaba ezinhle. (Bala u-1 Thesalonika 2:4.) Omunye udade okuthiwa nguJocelyn wakubona lokhu ngesikhathi etshumayela. Ngelinye ilanga uJocelyn wavuka edanile. Uthi: “Ngangingathandi lutho futhi ngizizwa ngingelancedo kodwa ngangiphayona futhi kulilanga lokuthi ngiye ekutshumayeleni. Yikho ngathandaza ngasengihamba.” Ngalelolanga uJocelyn wahlangana lomunye owesifazana owayelomusa okuthiwa nguMary futhi wavuma ukufunda iBhayibhili. Ngemva kwezinyanga uMary wathi ngesikhathi uJocelyn eqoqoda emnyango yena wayethandaza ecela uNkulunkulu ukuthi amncede. UJocelyn uthi nxa ecabanga ngokwenzakalayo,  uzwa angani uJehova wayesithi kuye, ‘Ngiyathokoza ngawe.’ Kuliqiniso ukuthi asibo bonke abantu abazasilalela nxa sitshumayela kodwa singaqiniseka ukuthi uJehova uyathokoza ngathi nxa esibona sisenza konke okusemandleni ethu ukuthi sitshele abanye izindaba ezinhle.

17. Sifundani kuVicky mayelana lenhlawulo? (IHubo 5:12)

¹⁷ UJehova usebenzisa inhlawulo ukuze ancede labo abamukelayo. (1 Thim. 2:​5, 6) Manje singenzani nxa silokhu sicabanga ukuthi uJehova kasamukeli lanxa sibhabhathiziwe futhi sikholwa enhlawulweni? Kumele sikhumbule ukuthi ngeke sithembe imicabango yethu ngasosonke isikhathi kodwa singamthemba uJehova. UJehova uthi labo abakholwa enhlawulweni balungile futhi uthembisa ukubabusisa. (Bala iHubo 5:12; Rom. 3:26) Omunye udadewethu okuthiwa nguVicky kwamnceda ukucabangisisa ngenhlawulo. Ngelinye ilanga wathi esecabangisise ngayo wathi: “UJehova ubengibekezelela okwesikhathi eside. Kwakufana lokuthi mina ngithi kuye: ‘Angikuboni ukuthi uyangithanda, umhlatshelo weNdodana yakho kawungeke uhlawulele izono zami.’” Ukucabangisisa ngesipho senhlawulo kwamnceda wabona ukuthi uJehova uyamthanda kakhulu. Nxa lathi singacabangisisa ngenhlawulo sizakubona ukuthi uJehova uyasithanda njalo uyathokoza ngathi.

18. Kuyini esingaqiniseka ngakho nxa singaqhubeka simthanda uBaba wethu osezulwini?

¹⁸ Lanxa singazama ukwenza konke esikufunde esihlokweni lesi ngezinye izikhathi singadana size sizibuze ukuthi uJehova uyasamukela yini. Nxa lokhu kungenzakala kumele sikhumbule ukuthi uJehova uyathokoza ‘ngalabo abaqhubeka bemthanda.’ (Jak. 1:12) Ngakho qhubeka usondela kuJehova futhi unanzelele zonke indlela akutshengisa ngazo ukuthi uyakwamukela. Hlala ukhumbula ukuthi uJehova ‘kakhatshana komunye lomunye wethu.’—Imiseb. 17:27.