ISIFUNDO 19
Kakulalutho Olungakhubekisa Abantu Abalungileyo
“Kukhulu ukuthula abalakho labo abathanda umthetho wakho, kakulalutho olungabakhubekisa.”—HUBO. 119:165.
INGOMA 122 Manini Liqine
ESIZAKUFUNDA *
1-2. Wathini omunye umlobi futhi sizaxoxa ngani esihlokweni lesi?
LAMUHLA amamiliyoni abantu athi ayakholwa kuJesu. Kodwa kawazamukeli izinto azifundisayo. (2 Tim. 4:3, 4) Omunye umlobi wake wathi: ‘Nxa bekungaba lendoda lamuhla ebingakhuluma ngendlela uJesu akhuluma ngayo, besingasoze siyamukele yini ngendlela abantu abangazange bamukele ngayo uJesu eminyakeni engu-2 000 eyadlulayo? Indlela abantu abaphila ngayo iveza ukuthi impendulo ngu: Ye, besingasoze.’
2 Banengi abantu abezwa uJesu efundisa futhi bambona esenza izimangaliso, kodwa kabazange babe lokholo kuye. Ngenxa yani? Esihlokweni esidlulileyo sifunde ngezizatho ezine ezenza abantu bakhubeka ngalokho uJesu akutshoyo lakwenzayo. Khathesi kasixoxeni ngezinye ezine. Sizaphinda sixoxe ngokuthi kungani abantu bengabamukeli abalandeli bakaJesu lamuhla lokuthi singenzani ukuze singakhubeki.
(1) UJESU WAYENGABANDLULULI
Abanengi bakhubeka ngenxa yalabo uJesu ayezinika isikhathi sokuba labo. Into efananayo ingabakhuba njani abanye lamuhla? (Khangela indima 3) *
3. Kuyini okwakusenziwa nguJesu okwakukhuba abanye?
3 UJesu wayezinika isikhathi sokuba labantu abatshiyeneyo. Wadla lababenothile lababelamandla, kodwa isikhathi esinengi wayesiqeda elabayanga labacindezelweyo. Kanti njalo wayelesihawu kulabo abantu ababesithi ‘bayizoni.’ Abanye ababezigqaja kabazange bamamukele uJesu ngenxa yalokho ayekwenza. Babuza abafundi bakhe bathi: “Kungani lisidla futhi linatha labathelisi lezoni?” UJesu wabaphendula wathi: “Abaphilileyo kabamdingi udokotela, kodwa abagulayo yibo abamdingayo. Kangilandanga ukuzobiza abalungileyo, ngalanda ukuzobiza izoni ukuthi ziphenduke.”—Luk. 5:29-32.
4. Ngokwalokho okwatshiwo ngumphrofethi u-Isaya, kuyini okwakumele amaJuda akukhangelele ngoMesiya?
4 Ithini iMibhalo? Kusasele isikhathi eside ukuthi uMesiya afike, umphrofethi u-Isaya watsho ukuthi abantu babengasoze bamamukele. Wabhala wathi: ‘Weyiswa njalo waliwa ngabantu, lowo abantu abangafuniyo ukukhangelana laye. Weyiswa, asimhloniphanga.’ (Isaya. 53:3) UMesiya wayezakwaliwa “ngabantu.” Yikho amaJuda kwakumele akhangelele ukuthi uJesu angamukelwa.
5. Abanengi lamuhla bababona njani abalandeli bakaJesu?
5 Into efananayo iyenzakala yini lamuhla? Ye. Abafundisi abanengi bayathokoza nxa abantu abadumileyo, abanothileyo labahlakaniphileyo ngokubona kwabantu bomhlaba lo bebuya emasontweni abo. Bayabamukela lanxa beziphatha ngendlela ezondwa nguNkulunkulu. Kodwa babakhangelela phansi abantu bakaJehova abatshisekayo futhi abaziphatha kuhle ngenxa yokuthi kabadumanga ngokubona kwabantu bomhlaba lo. UNkulunkulu ukhetha labo ‘abakhangelelwa phansi’ njengoba nje uPhawuli watsho. (1 Khor. 1:26-29) Lanxa kunjalo, uJehova uyabaqakathekisa bonke abantu bakhe abathembekileyo.
6. UJesu wathini kuMathewu 11:25, 26 futhi thina singamlingisela njani?
6 Singenzani ukuze singakhubeki? (Bala uMathewu 11:25, 26.) Ungavumeli indlela abantu bomhlaba lo ababona ngayo abantu bakaNkulunkulu ikuphambanise. Khumbula ukuthi uJehova usebenzisa abantu abathobekileyo ukuthi benze intando yakhe. (Hubo. 138:6) Kanti njalo cabanga ngezinto asezenzile esebenzisa abantu umhlaba obabona bengahlakaniphanga kumbe bengafundanga.
(2) UJESU WACHAYA EGCEKENI IMFUNDISO EZINGAQONDANGA
7. Kungani uJesu wathi abaFarisi ngabazenzisi njalo bona bezwa njani?
7 UJesu watshengisa isibindi ngokusola abakhokheli benkolo ngoba babengafundisi abantu ukukhonza uNkulunkulu ngendlela eqondileyo. Ngokwesibonelo, waveza ukuthi abaFarisi bangabazenzisi ngoba babeqakathekisa indlela izandla ezigezwa ngayo kulokunakekela abazali. (Mat. 15:1-11) Kumele ukuthi amazwi kaJesu abamangalisa abafundi bakhe baze bambuza bathi: “Uyakwazi yini ukuthi abaFarisi bacaphukile besizwa okukhulumileyo?” UJesu wabaphendula wathi: “Loba yisiphi isilimo esingahlanyelwanga nguBaba osezulwini sizasitshulwa. Batshiyeni benjalo. Bangabakhokheli abayiziphofu. Manje nxa isiphofu sikhokhela isiphofu, zombili zizawela egodini.” (Mat. 15:12-14) UJesu kazange ayekele ukukhuluma iqiniso lanxa abakhokheli benkolo babemzondele ngezinto ayezikhulumile.
8. UJesu wathini ukuze atshengise ukuthi kayisizozonke imfundiso ezamukelwa nguNkulunkulu?
8 UJesu waphinda wachaya egcekeni imfundiso zamanga. Kazange athi zonke imfundiso ziyamukeleka kuNkulunkulu. Wathi abantu abanengi babezahamba endleleni ebanzi eyisa ekubhujisweni, besekusithi abalutshwana babe sendleleni encinyane eyisa ekuphileni. (Mat. 7:13, 14) Wakwenza kwacaca ukuthi abanye babezenza angani bayamkhonza uNkulunkulu kodwa bona bengamkhonzi. Waxwayisa wathi: “Qaphelani abaphrofethi bamanga abeza kini bezigqokise isikhumba semvu kodwa ngaphakathi bezimpisi ezifuna ukulidlithiza. Lizabazi ngezithelo zabo.”—Mat. 7:15-20.
Abanengi bakhubeka ngenxa yokuthi uJesu wayeveza egcekeni imfundiso ezingamanga. Into efananayo ingabakhuba njani abanye lamuhla? (Khangela indima 9) *
9. Yiziphi ezinye imfundiso zamanga uJesu aziveza egcekeni?
9 Ithini iMibhalo? Isiphrofetho sasitshilo ukuthi uMesiya wayezadliwa yikutshisekela indlu kaJehova. (Hubo. 69:9; Joh. 2:14-17) Ukutshiseka lokho kwamenza waveza egcekeni izimfundiso zamanga lemikhuba engaqondanga. Ngokwesibonelo, abaFarisi babekholwa ukuthi umphefumulo kawufi, kodwa uJesu wafundisa ukuthi abafileyo balele. (Joh. 11:11) AbaSadusi babesithi kakulakuvuka kwabafileyo, kodwa uJesu wavusa umngane wakhe uLazaro. (Joh. 11:43, 44; ImiSeb. 23:8) AbaFarisi babesithi uNkulunkulu kumbe amandla athile kuqondisa konke okuzakwenzakala kithi lesizakwenza, kodwa uJesu wafundisa ukuthi abantu bayazikhethela ukuthi bayafuna yini ukukhonza uNkulunkulu kumbe hatshi.—Mat. 11:28.
10. Kungani abantu abanengi bekhubeka ngezinto esizifundisayo?
10 Into efananayo iyenzakala yini lamuhla? Ye. Abanengi kabasamukeli ngenxa yokuthi sisebenzisa iBhayibhili ukutshengisa abantu ukuthi ezinye imfundiso zingamanga. Abakhokheli bamasonto bafundisa ukuthi uNkulunkulu ujezisa abantu abenza izinto ezimbi esihogweni. Basebenzisa imfundiso le ukuze abantu benze intando yabo. Kodwa thina izinceku zikaJehova, uNkulunkulu oluthando sincedisa abantu bazwisise ukuthi imfundiso le ingamanga. Abafundisi baphinda bathi umphefumulo kawufi. Aluba imfundiso le ibiliqiniso, bekungasoze kube lesidingo sokuthi abantu bavuswe njengoba bekuzabe kungelamuntu ofileyo. Siveza egcekeni ukuthi imfundiso le kayikho eBhayibhilini. Kanti njalo lanxa amatshetshi amanengi efundisa ukuthi konke esikwenzayo sekwahlelwa nguNkulunkulu kumbe ngamandla athile, thina sifundisa ukuthi umuntu ulenkululeko yokukhetha lokho afuna ukukwenza njalo angakhetha ukukhonza uNkulunkulu. Abafundisi bezwa njani nxa siveza egcekeni ukuthi bafundisa amanga? Izikhathi ezinengi bazonda bafe!
11. Ngokwalokho okutshiwo kuJohane 8:45-47, uNkulunkulu ufuna abantu bakhe benzeni?
11 Singenzani ukuze singakhubeki? Nxa silithanda iqiniso, kumele samukele amazwi kaNkulunkulu. (Bala uJohane 8:45-47.) Kasisoze silitshiye iqiniso njengoSathane uDeveli ongazange ame aqine kulo. Kasenzi loba yini engavumelani lalokho esikukholwayo. (Joh. 8:44) UNkulunkulu ufuna abantu bakhe balingisele uJesu ‘ngokwenyanya okubi langokubambelela kokuhle.’—Rom. 12:9; Heb. 1:9.
(3) UJESU WAHLUKULUZWA
Abanengi bakhubeka ngenxa yokuthi uJesu wafela esigodweni. Into efananayo ingabakhuba njani abanye lamuhla? (Khangela indima 12) *
12. Kungani indlela uJesu abulawa ngayo yakhuba amaJuda amanengi?
12 Kuyini okunye okwenza amaJuda angamamukeli uJesu? UPhawuli wathi: “Sitshumayela ngoKhristu owabulawa ngokubethelwa esigodweni, futhi lokhu kubangela ukuthi amaJuda akhubeke.” (1 Khor. 1:23) Kungani indlela uJesu abulawa ngayo yabangela ukuthi amaJuda akhubeke? Ayebona angani ukubethelwa esigodweni sokuhlutshwa kwakusitsho ukuthi uyisigebenga lesoni, hatshi uMesiya.—Dute. 21:22, 23.
13. Kuyini labo abakhubeka ngoJesu ababengafuni ukukukholwa?
13 AmaJuda akhubeka ngoJesu ayengafuni ukukholwa ukuthi kalacala lokuthi wayemangalelwe ngezinto angazenzanga kanye lokuthi wayengahlulelwanga kuhle. Labo abamthonisisayo kabazange balandele imithetho yokwahlulela. Umthethwandaba omkhulu wamaJuda wahlangana isiphangephange ukuze umthonisise, futhi kawuzange umahlulele kuhle. (Luk. 22:54; Joh. 18:24) Abahluleli kabazange bazihluphe ngokudinga ukuthi lokho uJesu ayemangalelwa ngakho lobufakazi babantu kwakuliqiniso yini. Baze badinga “ubufakazi bamanga ukuze babulale uJesu.” Bathi sebeyehlulekile, umphristi omkhulu wazama ukwenza ukuthi uJesu akhulume into eyayizamenza atholakale elecala. Konke lokhu abakwenzayo kwakungekho emthethweni. (Mat. 26:59; Mak. 14:55-64) Lalapho uJesu esevusiwe, abahluleli laba abangalunganga babhadala amasotsha angamaRoma ayelinde ithuna lakhe “inhlamvu zesiliva ezinengi” ukuze akhulume amanga ngokuthi kungani ithuna lalingaselalutho.—Mat. 28:11-15.
14. IMibhalo yayitheni ngokufa kukaMesiya?
14 Ithini iMibhalo? Lanxa amaJuda amanengi ayengakhangelelanga ukuthi uMesiya afe, nanku iMibhalo eyayikutshilo: “Wanikela ukuphila kwakhe ekufeni, wabalwa ndawonye lezoni; ngoba wathwala izono zabanengi, wancengela izoni.” (Isaya. 53:12) Yikho amaJuda kwakungamelanga akhubeke ngesikhathi uJesu ebulawa njengesoni.
15. Yiziphi izinto ezikhulunywa mayelana laboFakazi bakaJehova ezibangele ukuthi abanye bakhubeke?
15 Into efananayo iyenzakala yini lamuhla? Ye. UJesu wamangalelwa ngento ayengayenzanga futhi wadliwa licala. LaboFakazi bakaJehova lamuhla baphathwe ngendlela efananayo. Ake sixoxe ngezinye izibonelo. Phakathi kuka-1930 lo-1950 eMelika, sahamba kanengi emthethwandaba ukuze silwele inkululeko yethu yokukhonza uNkulunkulu. Kwakusegcekeni ukuthi abanye abahluleli bayasizonda. EQuebec eCanada isonto yamaKatolika lohulumende babambisana ukuze bamise umsebenzi wethu. Abamemezeli abanengi bavalelwa emajele ngenxa nje yokuthi babekhuluma labomakhelwane babo ngoMbuso kaNkulunkulu. EGermany umbuso wamaNazi wabulala abafowethu abasakhulayo abanengi. Eminyakeni esanda kwedlula, abafowethu labodadewethu abanengi eRussia batholakale belecala lokukhuluma labanye ngeBhayibhili basebegwetshwa. Uhulumende weRussia uthi lokho abakwenzayo kakukho emthethweni. Ngitsho le-Nguqulo Yomhlaba Omutsha YeMibhalo Engcwele yolimi lwesiRussia kayisavunyelwa, futhi kuthiwe ilibhuku eliyingozi ngenxa yokuthi ilebizo elithi Jehova.
16. Ngokwalokho okutshiwo ku-1 Johane 4:1, kungani kungamelanga siphambukiswe ngamanga akhulunywa mayelana labantu bakaJehova?
16 Singenzani ukuze singakhubeki? Woba lazi iqiniso. ENtshumayelweni yaseNtabeni uJesu waxwayisa ababemlalele ukuthi abantu babezakhuluma ngabo “yonke imihlobo yezinto ezimbi futhi ezingamanga.” (Mat. 5:11) Amanga la avela kuSathane. Usebenzisa abaphikisi ukuthi bafafaze amanga ayingozi ngalabo abathanda iqiniso. (Isam. 12:9, 10) Akumelanga siwalalele amanga la. Kanti njalo akumelanga siwavumele ukuthi asenze sesabe ukukhonza uNkulunkulu kumbe ukuthi axegise ukholo lwethu.—Bala u-1 Johane 4:1.
(4) UJESU WATHENGISWA FUTHI WATSHIYWA YEDWA
Abanengi bakhubeka ngenxa yokuthi uJesu wathengiswa nguJudasi. Into efananayo ingabakhuba njani abanye lamuhla? (Khangela indima 17 lo-18) *
17. Izinto ezenzakala uJesu engakabulawa zazingabakhuba njani abanye?
17 UJesu wathi esezakufa wathengiswa ngomunye wabaphostoli bakhe. Omunye umphostoli wamphika kathathu, ikanti bonke babaleka bamtshiya ngobusuku bokucina engakabulawa. (Mat. 26:14-16, 47, 56, 75) Lokho akuzange kummangalise uJesu, phela wayevele etshilo ukuthi kuzakwenzakala. (Joh. 6:64; 13:21, 26, 38; 16:32) Abanye babengakhubeka bebona lokhu. Babengathi, ‘Nxa abaphostoli bakaJesu besenza izinto ezinje, kangifuni ukuba ngomunye wabo.’
18. Yiziphi iziphrofetho ezagcwaliseka uJesu esezabulawa?
18 Ithini iMibhalo? Kusasele amakhulu eminyaka ukuthi uJesu abuye emhlabeni, uJehova watsho eLizwini lakhe ukuthi uMesiya wayezathengiswa ngenhlamvu zesiliva ezingu-30. (Zek. 11:12, 13) Lowo owayezamthengisa wayezabe engumngane wakhe osekhwapheni. (Hubo. 41:9) Umphrofethi uZekhariya laye wabhala wathi: “Tshaya umalusi, izimvu zizahlakazeka.” (Zek. 13:7) Abantu abaqotho babengasoze bakhubeke ngoJesu bebona izinto lezi zisenzakala. Ukholo lwabo lwaluzaqina nxa babebona iziphrofetho lezi zigcwaliseka.
19. Kuyini abantu abaqotho abakwaziyo?
19 Into efananayo iyenzakala yini lamuhla? Ye. Ngezinsuku zalamuhla, oFakazi abalutshwana abaziwayo batshiye iqiniso baba ngabahlamuki basebezama ukuphambula abanye. Basakaze izindaba ezimbi, ezidukisayo futhi ezingamanga mayelana laboFakazi bakaJehova kumaphephandaba, kurediyo, ku-TV laku-inthanethi. Kodwa labo abaqotho kabakhubeki. Bayakwazi ukuthi iBhayibhili latsho ukuthi izinto lezi zizakwenzakala.—Mat. 24:24; 2 Phet. 2:18-22.
20. Kumele senzeni ukuze singakhutshwa yilabo asebetshiye uJehova? (U-2 Thimothi 4:4, 5)
20 Singenzani ukuze singakhubeki? Kufanele sigcine ukholo lwethu luqinile ngokuhlala sitaditsha, sithandaza futhi sikhuthele emsebenzini uJehova asinike wona. (Bala u-2 Thimothi 4:4, 5.) Nxa ukholo lwethu luqinile kasisoze siphele amandla nxa sisizwa imibiko emibi mayelana laboFakazi bakaJehova. (Isaya. 28:16) Nxa simthanda uJehova leLizwi lakhe kanye labafowethu labodadewethu, kasisoze sikhutshwe yilabo asebetshiye uJehova.
21. Lanxa abantu abanengi bengasilaleli nxa sitshumayela, kuyini okungamelanga sikuthandabuze?
21 Ngesikhathi uJesu esemhlabeni, banengi abantu abangazange bamamukele. Kodwa banengi futhi abamamukelayo. Bagoqela lendoda eyayililunga leSanihedrini, kanye ‘lexuku elikhulu labaphristi.’ (ImiSeb. 6:7; Mat. 27:57-60; Mak. 15:43) Lalamuhla abantu abanengi kabazange bakhubeke. Lokhu kungenxa yokuthi bayalazi iqiniso eliseBhayibhilini futhi bayalithanda. ILizwi likaNkulunkulu lithi: “Kukhulu ukuthula abalakho labo abathanda umthetho wakho, kakulalutho olungabakhubekisa.”—Hubo. 119:165.
INGOMA 124 Kasibeni Qotho
^ Esihlokweni esidlulileyo sixoxe ngezizatho ezine ezenza abantu bangamamukeli uJesu lezenza bangabamukeli abalandeli bakhe lamuhla. Kulesi sizaxoxa ngezinye ezine. Sizabona lokuthi kungani labo abathanda uJehova bengavumeli lutho ukuthi lubakhubekise.
