ISIFUNDO 20
Qhubeka Utshumayela Lanxa Kunzima
‘Hlanyela inhlanyelo yakho, ungaphumuzi isandla sakho.’—UMTSHU. 11:6, TBS.
INGOMA 70 Ukudinga Abafaneleyo
ESIZAKUFUNDA *
UJesu esebuyele ezulwini, abafundi bakhe batshumayela ngentshiseko eJerusalema lakwezinye izindawo (Khangela indima 1)
1. Yisiphi isibonelo uJesu asitshiyela abalandeli bakhe futhi benzani? (Khangela umfanekiso ongaphandle.)
NGESIKHATHI uJesu esemhlabeni waqhubeka etshumayela futhi elethemba lokuthi abantu bazamlalela, njalo ufuna labalandeli bakhe benze njalo. (Joh. 4:35, 36) Ngesikhathi abafundi bakhe belaye babekhuthele emsebenzini wokutshumayela. (Luk. 10:1, 5-11, 17) Kodwa ngemva kokubotshwa lokubulawa kwakhe, kwadlula isikhatshana bengasakutshisekeli ukutshumayela. (Joh. 16:32) Esevusiwe, wabakhuthaza ukuthi baqakathekise umsebenzi wokutshumayela. Wathi esebuyele ezulwini, batshiseka okuzwayo okokuthi izitha zabo zakhonona zisithi: “Khangelani, seligcwalise iJerusalema ngemfundiso yenu.”—ImiSeb. 5:28.
2. UJehova uwubusise njani umsebenzi wokutshumayela?
2 UJesu wayeqondisa umsebenzi wokutshumayela owawusenziwa ngamaKhristu akuqala futhi uJehova wawabusisa ngoba banengi abalalelayo. Ngokwesibonelo, ngePhentekhosti ka-33 C.E., * kwabhabhathizwa abantu abangaba ngu-3 000. (ImiSeb. 2:41) Lenani labafundi laqhubeka lisanda kakhulu. (ImiSeb. 6:7) Kodwa uJesu wayethe ezinsukwini zokucina abantu abanengi okumangalisayo babezalalela izindaba ezinhle.—Joh. 14:12; ImiSeb. 1:8.
3-4. Kungani ukutshumayela kunzima kwezinye indawo futhi sizaxoxa ngani esihlokweni lesi?
3 Sonke siyazama ukuqhubeka sitshumayela silethemba lokuthi bakhona abazasilalela. Kwamanye amazwe kulula ukwenza njalo ngenxa yokuthi kulabantu abanengi kakhulu abafuna ukufunda iBhayibhili okokuthi abanye kumele balinde kuze kube loFakazi ozabafundisa. Kodwa kwamanye ukutshumayela kunzima ngoba abantu abatholakali emizini yabo futhi labo abayabe bekhona bangabe bengakuthandi kangako ukufunda.
4 Amacebo esizaxoxa ngawo esihlokweni lesi azakunceda nxa kuyikuthi uhlala endaweni lapho okunzima khona ukutshumayela. Sizaxoxa ngokuthi abanye benzeni ukuze batshumayeze abantu abanengi. Sizabona lokuthi kuyini okungasinceda ukuthi siqhubeke sitshumayela kungelani lokuthi abantu bayasilalela kumbe hatshi.
QHUBEKA UTSHUMAYELA LANXA KUNZIMA UKUTHOLA ABANTU
5. Yibuphi ubunzima oFakazi abanengi abahlangana labo?
5 Kulokhu kusiba nzima kakhulu ukuthi oFakazi abanengi bathole abantu ezindlini zabo. Abanye abamemezeli bahlala ezindaweni lapho okulezakhiwo ezinengi ezingangeneki lula. Kungabe kulomuntu olindayo ongavumeli ukuthi abantu bangene nxa kungelamuntu ohlala esakhiweni leso obabizileyo. Kwezinye indawo abamemezeli bangatshumayela endlini ngendlu kungelamuntu obathwalise nzima kodwa bathole abantu abalutshwana. Abanye abamemezeli batshumayela emakhaya kumbe endaweni ezikhatshana ezilabantu abalutshwana. Bangahamba umango omude besiyadinga umuntu oyedwa ongabe engekho lasemzini wakhe. Akumelanga sikhalale lanxa sihlangana lobunzima obunjalo. Kuyini okungasinceda ukuthi siqhubeke sitshumayela futhi sixoxa labantu abanengi?
6. Abantu abatshumayelayo bafanana njani labagoli benhlanzi?
6 UJesu wafanisa umsebenzi wokutshumayela lowokugola inhlanzi. (Mak. 1:17) Abanye abagoli benhlanzi bangaqeda amalanga bengabambanga ngitsho leyodwa. Lanxa kunjalo, abakhalali kodwa bayatshintsha indlela abagola ngayo. Kanti njalo bayatshintsha isikhathi lendawo. Lathi singatshintsha indlela esitshumayela ngayo. Ake sixoxe ngokunye esingakwenza.
Nxa utshumayela endaweni okunzima khona ukuthola abantu ezindlini zama ukutshintsha isikhathi otshumayela ngaso, indawo lendlela yokutshumayela (Khangela indima 7-10) *
7. Kungenzakalani nxa singatshintsha isikhathi esitshumayela ngaso?
7 Zama ukutshintsha isikhathi otshumayela ngaso. Singathola abantu abanengi nxa singatshumayela ngezikhathi abatholakala ngazo. Phela wonke umuntu uyabuyela endlini yakhe eseqede izinto azenzayo. Abafowethu labodadewethu abanengi bakubona kungcono ukutshumayela emini kumbe ntambama ngoba yizo izikhathi abathola ngazo abantu abanengi. Kanti njalo abantu bangabe bekhululekile futhi befuna ukuxoxa ngalezozikhathi. Mhlawumbe kungakunceda ukulingisela okwenziwa ngumdala webandla okuthiwa nguDavid. Uthi nxa yena lalowo ahamba laye sebetshumayele okwesikhathi esithile bayabuyela lapho abathole kungelabantu khona. Uthi: “Ngiyamangala ukuthi banengi njani abantu esibatholayo nxa sesibuyela.”
Nxa utshumayela endaweni okunzima khona ukuthola abantu ezindlini, zama ukutshintsha isikhathi otshumayela ngaso (Khangela indima 7 lo-8)
8. Singakusebenzisa njani okutshiwo kumTshumayeli 11:6 ekutshumayeleni?
8 Kufanele siqhubeke sizama ukudinga abantu ezindlini zabo. Lokhu yikho kanye esikukhuthazwa ngumbhalo okusekelwe kuwo isihloko sethu. (Bala umTshumayeli 11:6, TBS.) * UDavid esike sakhuluma ngaye kazange akhalale. Kwenye indlu wacina emtholile umuntu ohlala lapho esefike khona kanengi emswela. Indoda leyo yayifuna ukufunda iBhayibhili futhi yathi: “Sengileminyaka engaba ngu-8 ngihlala lapha kodwa kangikaze ngibone ngitsho loyedwa uFakazi kaJehova emzini wami.” UDavid uthi: “Senginanzelele ukuthi nxa ungaqhubeka udinga abantu ezindlini zabo uze ubathole, bajayele ukulalela.”
Nxa utshumayela endaweni okunzima khona ukuthola abantu ezindlini, zama ukutshintsha indawo otshumayela kuyo (Khangela indima 9)
9. Abanye oFakazi benzani ukuze batshumayeze abantu okunzima ukubathola ezindlini?
9 Zama ukutshintsha indawo otshumayela kuyo. Abanye abamemezeli batshintshe indawo abatshumayela kuzo ukuze baxoxe labantu okunzima ukubathola ezindlini zabo. Ngokwesibonelo, ukwenza umagazini lokutshumayela ngenqola kuyanceda kakhulu ekuxoxeni labantu abahlala ezakhiweni ezinkulu lapho esingavunyelwa khona ukutshumayela endlini ngendlu. Kanti njalo abamemezeli abanengi bananzelele ukuthi abantu bakhululekile ukuxoxa kumbe ukuthatha amabhuku ethu emaphakhi, emamakethe kumbe endaweni zamabhizimusi. Omunye umzalwane ongumbonisi wesiqinti eBolivia okuthiwa nguFloiran uthi: “Sijayele ukuya emamakethe lasendaweni zamabhizimusi ngo-1 kusiya ku-3 emini lapho abathengisayo abayabe bengekho bhizi khona kakhulu. Siba lengxoxo ezimnandi size siqalise lezifundo zeBhayibhili.”
Nxa utshumayela endaweni okunzima khona ukuthola abantu ezindlini, zama ukutshintsha indlela yokutshumayela (Khangela indima 10)
10. Kuyini okunye ongakwenza ukuze utshumayeze abantu?
10 Zama ukutshintsha indlela yokutshumayela. Mhlawumbe usuzame kanengi ukudinga umuntu othile, waze watshintsha lezikhathi ofika ngazo emzini wakhe kodwa ulokhu ungamtholi. Kukhona yini okunye ongakwenza ukuze umtshumayeze? UKatarína uthi: “Labo engingabatholiyo ezindlini ngiyababhalela incwadi ngibatshela lokho ebengizabatshela khona aluba bengibatholile.” Sifundani? Zama ukudinga indlela ezitshiyeneyo zokutshumayeza abantu abasensimini yenu.
QHUBEKA UTSHUMAYELA LANXA ABANTU BENGALALELI
11. Kungani abanye abantu bengasilaleli nxa sitshumayela?
11 Abanye abantu abalaleli nxa sibatshumayeza. Babona angani akulasidingo sokuthi babemazi uNkulunkulu kumbe ukuthi bafunde iLizwi lakhe. Kabakholwa kuNkulunkulu ngenxa yokuhlupheka okugcwele emhlabeni. Kabafuni ukulalela lokho okutshiwo liBhayibhili ngenxa yokuthi babona abafundisi abathi bayakulandela besenza izinto ezinengi ezimbi. Abanye baphathekile ngemisebenzi yabo futhi bakhathazekile ngezimuli zabo langenhlupho zabo okokuthi bacabanga ukuthi iBhayibhili ngeke libancede. Singenzani ukuze sihlale sithokoza nxa labo esibatshumayezayo bebona angani lokho esikutshumayelayo akuqakathekanga?
12. Ukusebenzisa amazwi akuFiliphi 2:4 kungasinceda njani nxa sisekutshumayeleni?
12 Woba lendaba labanye. Abanengi abayabe bengalaleli nxa sibatshumayeza bacina belalela nxa bengabona ukuthi silendaba labo sibili. (Bala uFiliphi 2:4.) Ngokwesibonelo, uDavid esike sakhuluma ngaye uthi: “Nxa umuntu engathi kazingeni ezeBhayibhili kumbe ezetshetshi siyabuyisela amaBhayibhili kumbe amabhuku ethu ezikhwameni sibe sesisithi: ‘Ngicela ukubuza, ubuzizwa ngalindlela kusukela kudala yini?’” Abantu bayananzelela nxa silendaba labo. Bangakhohlwa lokho esiyabe sibatshele khona kodwa bakhumbule ukuthi sibaphathe kuhle. Lanxa umninimuzi engasinikanga ithuba lokuthi simtshumayeze, singatshengisa ukuthi silendaba laye ngalokho esikwenzayo langesimo sobuso bethu.
13. Singenzani ukuze umninimuzi ngamunye alalele nxa simtshumayeza?
13 Sitshengisa ukuthi silendaba lomninimuzi nxa sitshintsha intshumayelo yethu ukuze ihambelane lalokho akuthandayo kumbe akudingayo. Ngokwesibonelo, kulezinto ezitshengisa ukuthi ulabantwana yini? Abazali bangabe befuna ukuzwa ukuthi iBhayibhili lithi bangabakhulisa njani abantwababo kumbe ukuthi bangenzani ukuze imuli yabo ithokoze. Kulamakhiye amanengi yini emnyango womninimuzi? Nxa kunjalo, singakhuluma ngobugebenga lokuthi benza abantu besabe. Umninimuzi angathokoza ukuzwa ukuthi ubugebenga buzaphela. Nxa ungathola abantu abafuna ukulalela, zama ukubancedisa babone ukuthi okutshiwo liBhayibhili kubanceda njani. UKatarína esike sakhuluma ngaye uthi: “Ngiyazikhumbuza ukuthi iBhayibhili lingincede njani.” Lokho kwenza aqiniseke ngalokho akutshoyo futhi akuthandabuzwa ukuthi abantu bayakubona.
14. Ngokwalokho okutshiwo kuZaga 27:17, abantu abatshumayela bonke bangancedisana njani?
14 Funda kwabanye. UPhawuli wafundisa uThimothi ukutshumayela lokufundisa futhi wamkhuthaza ukuthi laye enze njalo kwabanye. (1 Khor. 4:17) Lathi njengoThimothi singafunda kwabanye ebandleni asebelesikhathi betshumayela. (Bala iZaga 27:17.) Ake sixoxe ngomunye umzalwane okuthiwa nguShawn. Waphayona okwesikhathi esithile emakhaya lapho abantu abanengi ababeyithanda kakhulu isonto ababeyingena. Kuyini okwamnceda ukuthi aqhubeke ethokoza? Uthi: “Nxa kuvuma ngangihamba lomunye umuntu. Sasisithi nxa singasuka endlini ethile sincedisane ngokuthi singathuthukisa njani indlela esifundisa ngayo. Ngokwesibonelo, sasixoxa ngokuthi umninimuzi utheni lokuthi thina simphendule njani, besesibonisana ngokuthi singathini nxa singathola umninimuzi okhuluma into efanana laleyo ekhulunywe ngesisuke kuye.”
15. Kungani kuqakathekile ukuthi sithandaze nxa sisiya ekutshumayeleni?
15 Thandaza ucela uJehova ukuthi akuncedise. Cela uJehova akuncedise loba nini nxa usiya ekutshumayeleni. Phela akulalutho esingalwenza ekutshumayeleni nxa singancediswa ngumoya ongcwele. (Hubo. 127:1; Luk. 11:13) Nxa uthandaza kuJehova umcela ukuthi akuncedise, mtshele khona kanye okufunayo. Ngokwesibonelo, mcele ukuthi akuncedise uthole umuntu ofuna ukufunda ngaye futhi ozimisele ukulalela. Ngemva kwalokho yenza okuhambelana lomthandazo wakho ngokutshumayeza loba ngubani ohlangana laye.
16. Ukutaditsha kuzasinceda njani nxa sesisekutshumayeleni?
16 Zinike isikhathi sokutaditsha. ILizwi likaNkulunkulu lithi: ‘Hlolisisani intando kaNkulunkulu enhle, eyamukelekayo futhi epheleleyo.’ (Rom. 12:2) Nxa singataditsha, sizabamazi ngcono uNkulunkulu njalo lokhu kuzenza ukuthi nxa sesikhuluma labanye ngaye, babone ukuthi siyakukholwa sibili lokho esikutshoyo. UKatarína esike sakhuluma ngaye uthi: “Ngananzelela ukuthi kwakumele ngizame ukuzwisisa ngcono ezinye imfundiso zeBhayibhili eziyisisekelo. Yikho ngahlolisisa ubufakazi obutshengisa ukuthi kuloMdali, ukuthi iBhayibhili liLizwi likaNkulunkulu sibili lokuthi uNkulunkulu ulenhlanganiso emhlabeni.” UKatarína uthi ukutaditsha kwamnceda ukuthi aqinise ukholo lwakhe lokuthi engeze intokozo yakhe ekutshumayeleni.
KUYINI OKUNGASINCEDA UKUTHI SIQHUBEKE SITSHUMAYELA?
17. Kungani uJesu waqhubeka etshumayela?
17 UJesu waqhubeka etshumayela lanxa abanye abantu babengamlaleli. Kungani? Wayekwazi ukuthi abantu kumele bazwe iqiniso futhi wayefuna ukubanceda. Wayekwazi lokuthi abanye bangaqalisa bengafuni ukulalela kodwa bacine sebefuna. Lokhu yikho okwenzakala emulini yangakibo. Ngesikhathi esenza inkonzo yakhe eyathatha iminyaka emithathu lengxenye, akula phakathi kwabafowabo owaba ngumfundi wakhe. (Joh. 7:5) Kodwa wathi esevusiwe baba ngamaKhristu.—ImiSeb. 1:14.
18. Kungani siqhubeka sitshumayela?
18 Kasikwazi ukuthi ngobani abazacina bengoFakazi bakaJehova. Abanye kubathatha isikhathi eside ukuthi iqiniso lithophele ezinhliziyweni zabo. Lalabo abangafuni ukusilalela bangabona indlela esibaphatha ngayo njalo lokhu kungenza bacine ‘bekhazimulisa uNkulunkulu.’—1 Phet. 2:12.
19. Ngokwalokho okutshiwo ku-1 Khorinte 3:6, 7, kuyini okumele sikukhumbule?
19 Lanxa sihlanyela futhi sithelela, kumele sikhumbule ukuthi uNkulunkulu nguye okhulisayo. (Bala u-1 Khorinte 3:6, 7.) Umzalwane okuthiwa nguGetahun ohlala e-Ethiopia uthi: “Okweminyaka edlula engu-20 kwakuyimi ngedwa uFakazi endaweni engihlala kuyo. Kodwa khathesi sekulabamemezeli abangu-14. Abangu-13 sebabhabhathizwa, okugoqela umkami labantwabami abathathu. Emihlanganweni yebandla sijayele ukudlalela kubo-32.” UGetahun uyathokoza ukuthi waqhubeka etshumayela elindele uJehova ukuthi adonsele abantu abaqotho enhlanganisweni yakhe.—Joh. 6:44.
20. Umsebenzi wethu wokutshumayela ufanana njani lowokunceda abantu abasengozini?
20 Bonke abantu baligugu kuJehova. Usinika isibusiso sokusebenza leNdodana yakhe ekuqoqeni abantu bezizwe zonke umumo lo wezinto ungakapheli. (Hag. 2:7) Umsebenzi wethu wokutshumayela singawufanisa lomsebenzi wokunceda abantu abasengozini futhi thina sinjengabantu abenza umsebenzi lo, abathunywe ukuyakhipha abantu abadilikelwe yimayini. Lanxa kuyizisebenzi ezilutshwana ezingathola abantu besaphila njalo zibakhiphe, zonke ziyabe zenze umsebenzi oqakathekileyo. Umsebenzi wethu wokutshumayela lawo unjalo. Kasikwazi ukuthi bangaki abantu abazasindiswa emhlabeni lo kaSathane. Kodwa uJehova angasebenzisa loba ngubani wethu ukuthi abancedise. U-Andreas ohlala eBolivia uthi: “Ngiyakwazi ukuthi nxa umuntu efunda iqiniso aze abhabhathizwe banengi abayabe besebenze ndawonye ukuze bamncedise.” Lathi kasiyiboneni ngendlela efananayo inkonzo yethu. Nxa singenza njalo uJehova uzasibusisa futhi sizathokoza kakhulu ekutshumayeleni.
INGOMA 66 Tshumayela Izindaba Ezinhle
^ Kuyini okungasinceda ukuthi siqhubeke sitshumayela lanxa abantu bengatholakali ezindlini zabo kumbe bengasilaleli? Esihlokweni lesi sizaxoxa ngamacebo esingawasebenzisa lalokho esingakwenza ukuze siqhubeke sithokoza.
^ U-C.E., umela ukuthi “Common Era” okutsho isikhathi uJesu esebuyile emhlabeni.
^ “Hlanyela inhlanyelo yakho ekuseni, lantambama ungaphumuzi isandla sakho; ngoba kawazi ukuthi yiyiphi ezaphumelela, le kumbe leyana, loba zombili zizakuba zinhle ngokufananayo.”
^ OKUSEMFANEKISWENI: (kusukela phezulu kusiya phansi): Indoda lomkayo batshumayela lapho okunzima khona ukuthola abantu ezindlini. Umninimuzi wokuqala usemsebenzini, owesibili useklinika, owesithathu usesitolo. Umninimuzi wokuqala bamthola sebebuyele emzini wakhe ntambama. Owesibili baxoxa laye ngesikhathi betshumayela ngenqola duzane leklinika. Owesithathu bamtshumayeza ngefoni.
