1-2. Yibuphi ubunzima oFakazi abanengi abahlangana labo?

 UMPHOSTOLI uPhawuli wakhuthaza uThimothi ukuthi ayenze ngokupheleleyo inkonzo yakhe futhi lokho amtshela khona kuyasebenza lakithi. (2 Tim. 4:5) Yikho siyazama ukusilalela iseluleko lesi ngokukhuthala enkonzweni kaJehova. Kodwa ngezinye izikhathi akulula ukukwenza lokhu. Abafowethu labodadewethu abanengi badinga isibindi ukuze batshumayele. (2 Tim. 4:2) Ngokwesibonelo, abazalwane abahlala emazweni lapho eminye imisebenzi yethu engavunyelwa khona kumbe evinjelwe ngokupheleleyo bayatshumayela lanxa besazi ukuthi lokho kungenza babotshwe.

² Abantu bakaJehova balenhlupho ezinengi ezingabenza badane. Ngokwesibonelo, abanye basebenza amahola amanengi ukuze banakekele izimuli zabo ngalokho ezikudingayo. Bayafuna ukwenza okunengi ekutshumayeleni, kodwa ekupheleni kweviki bayabe bediniwe. Abanye abenelisi ukwenza okunengi ngenxa yemikhuhlane abaphila layo kumbe ukuguga. Abanye bangabe bengenelisi lokuphuma endlini. Abanye bona bazibona bengaqakathekanga kuJehova. Udadewethu okuthiwa nguMary * uthi: “Kumele ngisebenze nzima ukuze ngilwisane lokudana. Khonalokho kungiqedela isikhathi lamandla okumele ukuthi ngabe ngiwasebenzisa ekutshumayeleni besekubangela ukuthi ngizisole.”

3. Sizaxoxa ngani esihlokweni lesi?

³ UJehova angasinika amandla okuthi senze konke esingakwenza ekukhonzeni kungelani lenhlupho esihlangana lazo. Asixoxeni ngokuthi wancedisa njani uPhawuli loThimothi ukuthi benze inkonzo yabo lanxa babephakathi kobunzima. Ngemva kwalokho sizaxoxa ngokuthi usincedisa njani thina.

4. Yibuphi ubunzima obehlela uPhawuli?

⁴ UPhawuli wayelenhlupho ezinengi. Wayewadinga kakhulu amandla ngesikhathi etshaywa, ekhandwa ngamatshe lalapho ebotshwa. (2 Khor. 11:23-25) Wavuma ukuthi ngezinye izikhathi wayeke alwisane lokudana. (Rom. 7:18, 19, 24) Kanti njalo wayethwaliswe nzima yikugula ‘okwakunjengameva enyameni’ yakhe, ayefuna sibili ukuthi uNkulunkulu akuqede.—2 Khor. 12:7, 8.

5. Kuyini uPhawuli akwenzayo lanxa wayephakathi kobunzima?

⁵ UJehova wanika uPhawuli amandla okuthi aqhubeke etshumayela lanxa esehlelwa yibunzima. Ake sixoxe ngokunye uPhawuli akwenzayo. Ngesikhathi ebotshiwe endlini eRoma, wayetshiseka efakaza phambi kwabakhokheli benkolo abangamaJuda, mhlawumbe laphambi kwezikhulu zikahulumende. (ImiSeb. 28:17; Flp. 4:21,22) Watshumayeza labaLindi Benkosi abanengi kanye labo bonke ababemvakatshela. (ImiSeb. 28:30, 31; Flp. 1:13) Ngesikhathi leso wabhala izincwadi ezinengi ezilokhu zinceda amaKhristu eqiniso. Okwenziwa nguPhawuli kwaliqinisa ibandla leRoma, okokuthi abazalwane ‘basebelesibindi esikhulu sokukhuluma ilizwi likaNkulunkulu bengesabi.’ (Flp. 1:14) Lanxa uPhawuli wayengenelisi ukwenza konke ayefisa ukukwenza, wenza okusemandleni akhe futhi lokho kwenza ukuthi “izindaba ezinhle ziqhubekele phambili.”—Flp. 1:12.

6. Ngokwalokho okutshiwo ku-2 Khorinte 12:9, 10, kuyini okwanceda uPhawuli ukuthi enze inkonzo yakhe?

⁶ UPhawuli wayekwazi ukuthi konke ayekwenza enkonzweni kaJehova wayengakwenzi ngamandla akhe kodwa wayekwenza ngamandla kaJehova. Wayekwazi ukuthi nxa ‘ebuthakathaka, kulapho uNkulunkulu aveza khona amandla akhe ngokugcweleyo.’ (Bala u-2 Khorinte 12:9, 10.) UJehova wasebenzisa umoya ongcwele ukuze anike uPhawuli amandla okuthi ayenze ngokupheleleyo inkonzo yakhe kungelani lokuhlukuluzwa, ukubotshwa lobunye ubunzima obamehlelayo.

7. Yibuphi ubunzima obehlela uThimothi obabungenza kube nzima ukuthi enze inkonzo yakhe?

⁷ UThimothi laye kwakumele athembele kuNkulunkulu ukuthi amnike amandla okwenza inkonzo yakhe. Wayehamba loPhawuli enhambweni zakhe ezinde engumnali.  Kanti njalo uPhawuli wayemthuma ukuthi ayeqinisa amabandla. (1 Khor. 4:17) UThimothi wayengabe ezibona engafanelanga ukwenza imisebenzi le. Mhlawumbe lokhu yikho okwenza uPhawuli wamkhuthaza esithi: “Ungaqali ukuvumela loba ngubani ukuthi akhangelele phansi ubutsha bakho.” (1 Tim. 4:12) Kanti njalo ngesikhathi lesi uThimothi wayeselawakhe ameva enyameni, ‘ukuhlala egula.’ (1 Tim. 5:23) Kodwa wayekwazi ukuthi umoya ongcwele kaJehova uzamnika amandla okuthi aqhubeke etshumayela izindaba ezinhle futhi ancede abafowabo labodadewabo.—2 Tim. 1:7.

8. UJehova ubaqinisa njani abantu bakhe?

⁸ UJehova unika abantu bakhe “amandla amakhulu futhi angajayelekanga” ukuze baqhubeke bemkhonza bethembekile. (2 Khor. 4:7) Asixoxeni ngezinto ezine uJehova asinika zona ukuze asiqinise njalo asincedise ukuthi sihlale sithembekile. Izinto lezi ngumthandazo, liBhayibhili, ngabafowethu labodadewethu lomsebenzi wokutshumayela.

9. Umthandazo ungasinceda njani?

⁹ UJehova usiqinisa ngomthandazo. Ku-Efesu 6:18, uPhawuli usikhuthaza ukuthi sithandaze kuNkulunkulu “zikhathi zonke.” UNkulunkulu uzasiphendula futhi asiqinise. UJonnie ohlala eBolivia wabona indlela uNkulunkulu amsekela ngayo ngesikhathi ephakathi kwenhlupho. Inkosikazi yakhe labazali bakhe bagula kakhulu ngasikhathi sinye. Kwakumthwalisa nzima ukuthi enze konke okwakumele akwenze ukuze abanakekele. Unina wabhubha futhi kwathatha isikhathi ukuthi umkakhe kanye loyise basile. Nxa ekhumbula okwenzakala ngesikhathi leso esinzima uthi: “Okwakuhlala kunginceda nxa ngikhathazeke kakhulu yikuthandaza kuJehova ngimtshela indlela engizizwa ngayo.” UJehova wamnika amandla okuthi aqinisele. Umdala webandla okuthiwa nguRonald ohlala eBolivia wezwa ukuthi unina ulemvukuzane. Kwadlula inyanga eyodwa wasebhubha. Kuyini okwamnceda ukuthi aqinisele? Uthi: “Nxa ngithandaza kuJehova ngimtshela yona kanye indlela engizizwa ngayo. Ngiyakwazi ukuthi uyangizwisisa ukwedlula loba ngubani lokuthi ungazi ukwedlula indlela mina engizazi ngayo.” Ngezinye izikhathi singezwa angani asiselawo amandla okuqinisela futhi singabe singakwazi lokuthi sithandazeleni. Kodwa uJehova usicela ukuthi sithandaze lanxa kunzima ukuthi sichasise indlela esizizwa ngayo.—Rom. 8:26, 27.

10. Ngokwalokho okutshiwo kuHebheru 4:12, kungani kuqakatheke kakhulu ukuthi sibale iBhayibhili futhi sicabangisise ngalokho esikubalayo?

¹⁰ UJehova usiqinisa ngeBhayibhili. UPhawuli wabala iMibhalo ukuze imqinise futhi imduduze, lathi kumele simlingisele. (Rom. 15:4) Nxa singabala iLizwi likaNkulunkulu futhi sicabangisise ngalo, uJehova uzasebenzisa umoya wakhe ukuthi asincedise sibone ukuthi singakusebenzisa njani esikubalayo. (Bala uHebheru 4:12.) URonald esike sakhuluma ngaye uthi: “Kuyangithokozisa ukuthi ngazijayeza ukubala iBhayibhili nsuku zonke ebusuku. Ngicabangisisa kakhulu ngobuntu bukaJehova langendlela ayenakekela ngayo abantu bakhe. Lokhu kuyangiqinisa.”

11. Ukubala iBhayibhili kwamqinisa njani omunye udade owayesizwa ubuhlungu ngenxa yokufelwa?

¹¹ Nxa singabala iLizwi likaNkulunkulu asisoze sikhathazeke kakhulu ngenhlupho esiphakathi kwazo. Ake sibone ukuthi iBhayibhili lamnceda njani omunye umfelokazi. Umdala webandla othile wamkhuthaza  ukuthi abale ibhuku likaJobe ukuze athole izifundo ezizamnceda. Wathi eselibala wayesola uJobe ngendlela engaqondanga ayecabanga ngayo. Engqondweni yakhe wayesithi: “Jobe, ungacabangi ngenhlupho zakho kuphela.” Kodwa laye wananzelela ukuthi indlela ayecabanga ngayo yayinjengekaJobe. Lokhu kwamnceda ukuthi atshintshe futhi kwamnika amandla okuthi alwisane lobuhlungu bokufelwa ngumkakhe.

12. UJehova ubasebenzisa njani abafowethu labodadewethu ukuthi basiqinise?

¹² UJehova usiqinisa esebenzisa abafowethu labodadewethu. UPhawuli wathi wayefisa ukuba labafowabo labodadewabo ukuze ‘bakhuthazane.’ (Rom. 1:11, 12) UMary esike sakhuluma ngaye uyakuthanda ukuba labafowabo labodadewabo. Uthi: “UJehova wasebenzisa abafowethu labodadewethu ababengabazi lobunzima engangiphakathi kwabo. Babesitsho okuthile okukhuthazayo kumbe bangithumezele ikhadi, futhi lokho yikho kanye engangikudinga. Ukuxoxa labanye odade abake baba lenhlupho ezinjengezami lakho kuyanginceda. Abadala labo benza ngibone ukuthi abafowethu labodadewethu ebandleni bayangithanda.”

13. Singaqinisana njani emihlanganweni yebandla?

¹³ Imihlangano yebandla isinika ithuba elihle lokukhuthazana. Yikho nxa usemhlanganweni webandla, zama ukuqinisa abanye ngokubatshela ukuthi uyabathanda lokuthi uyakuqakathekisa lokho abakwenzayo. Ngokwesibonelo, kwathi umhlangano webandla ungakaqalisi, omunye umdala webandla okuthiwa nguPeter watshela udade olomkakhe ongayisuyeFakazi wathi: “Kuyasikhuthaza kakhulu ukukubona usemhlanganweni. Uhlala ubuya labantwabakho abangu-6 ubagqokise kuhle futhi liyabe lilungiselele ukuthi liphendule.” Waphendula esehlengezela inyembezi wathi: “Ngabe uyakwazi ukuthi bengifisa njani ukuzwa amazwi anje.”

14. Ukutshumayela kusinceda njani?

¹⁴ UJehova usiqinisa esebenzisa umsebenzi wokutshumayela. Siyathokoza nxa sitshumayela kungelani lokuthi abantu bayasilalela kumbe abasilaleli. (Zaga. 11:25) Udadewethu okuthiwa nguStacy wabona sibili ukuthi ukutshumayela kuyasiqinisa. Ngesikhathi omunye emulini yangakibo esuswa ebandleni, wadana kakhulu futhi wayelokhu ezibuza esithi: ‘Kukhona yini okunye ebengingakwenza ukuthi ngimncede?’ Wayesehlala ecabanga ngakhonalokho. Manje kuyini okwamncedayo? Yikutshumayela. Kwamsiza ukuthi acabange ngabantu ayebatshumayeza ababefuna ukuncediswa. Uthi: “Ngesikhathi leso uJehova wangincedisa ngathola isifundo esathuthuka masinyane. Lokhu kwangikhuthaza kakhulu. Ukutshumayela kungincedile okwamagama.”

15. Ufundani kulokho okwatshiwo nguMary?

¹⁵ Abanye bangabona angani abenelisi ukwenza okunengi ekutshumayeleni ngenxa yezimo abaphakathi kwazo. Nxa kuyikuthi lawe uzizwa njalo, khumbula ukuthi uJehova uyathokoza nxa usenza konke okusemandleni akho. Ake sixoxe futhi ngoMary. Wathi esethuthele endaweni elabantu abakhuluma olunye ulimi, wazibona engelancedo. Uthi: “Okwesikhathi esithile emihlanganweni yebandla ngangiphendula impendulo emfitshane kumbe ngibale ivesi. Ekutshumayeleni ngangihambisa amaphetshana.” Wayezibona engenzi lutho nxa wayeziqathanisa labanye ababelukhuluma kuhle ulimi. Kodwa watshintsha indlela ayecabanga ngayo. Wayesenanzelela ukuthi uJehova angamsebenzisa lanxa wayengalukhulumi kuhle ulimi.  Uthi: “Lokho okutshiwo liBhayibhili kulula futhi kungatshintsha impilo zabantu.”

16. Kuyini okunganceda labo abangenelisi ukuphuma endlini ukuthi baqinisele?

¹⁶ UJehova uyasibona futhi uyasiqakathekisa isifiso esilaso sokutshumayela lanxa singenelisi ukuphuma endlini. Yikho angasincedisa ukuthi sitshumayeze abantu abasinakekelayo kumbe odokotela labonesi. Nxa singaqathanisa lokho esikwenza khathesi lalokho esasikwenza singadana. Kodwa nxa singananzelela indlela uJehova asincedisa ngayo khathesi sizakwenelisa ukuqinisela sithokoza kungelani lobunzima esihlangana labo.

17. Ngokwalokho okutshiwo kumTshumayeli 11:6, kungani kumele siqhubeke sitshumayela lanxa kungelamuntu olalelayo?

¹⁷ Kasikwazi ukuthi yiphi inhlanyelo yeqiniso esiyihlanyelayo ezamila ikhule. (Bala umTshumayeli 11:6, TBS.) * Ngokwesibonelo, udadewethu okubo-80 okuthiwa nguBarbara uhlala etshumayela ngefoni langokubhala izincwadi. Wathi ethumela enye yezincwadi zakhe wahlanganisa le-Nqabayokulinda kaMarch 1 2014, elesihloko esithi “Esakwenzelwa NguNkulunkulu.” Incwadi le yafikela kweyinye indoda lomkayo ababesusiwe ebandleni lanxa yena wayengakwazi. Bayibala kanengi imagazini le. Indoda yezwa angani uJehova ukhuluma layo ngokwayo. Bobabili baqalisa ukungena imihlangano yebandla futhi babuyiselwa ngemva kweminyaka edlula engu-27 besusiwe. UBarbara kwamkhuthaza futhi kwamqinisa ukubona ukuthi incwadi ayibhalayo yabanceda njani abanye.

18. Kumele senzeni ukuze siqiniswe nguNkulunkulu?

¹⁸ Zinengi izinto uJehova asinika zona ukuze asiqinise. Zigoqela umthandazo, iBhayibhili, abafowethu labodadewethu kanye lomsebenzi wokutshumayela. Yikho nxa singathandaza, sibale iBhayibhili, sivumele abafowethu labodadewethu ukuthi basikhuthaze futhi sitshumayele siyabe sitshengisa ukuthi siyakholwa ukuthi uJehova angasincedisa lokuthi uyafuna ukwenza njalo. Kasihlaleni simthemba uBaba wethu osezulwini othokozayo ‘ngokuqinisa labo abanhliziyo zabo zizimisele kuye.’—2 ImiLan. 16:9.