1. Kuyini okungabe kwakumangalisa ngesikhathi uqalisa ukuxoxa labanye ngokutshiwo liBhayibhili?

 UYASIKHUMBULA yini isikhathi lapho owananzelela khona ukuthi usulitholile iqiniso? Owawukufunda eBhayibhilini kwakulula ukukuzwisisa. Wawucabanga ukuthi bonke abantu bazakwamukela lokho osukukholwa. Wawungathandabuzi ukuthi lokho okutshiwo liBhayibhili kuzabanceda bathokoze empilweni khathesi futhi babe lethemba lokuthola ukuphila okungapheliyo. (Hubo. 119:105) Yikho watshela bonke abangane bakho lezihlobo zakho ngezinto osuzifundile. Kodwa wamangala lapho abanengi bengakwamukeli lokho owawubatshela khona.

2-3. Abantu abanengi babembona njani uJesu?

² Kakumelanga kusimangalise ukuthi abanye kabasilaleli nxa sibatshumayeza. Ngesikhathi uJesu esemhlabeni, abanengi babengamamukeli lanxa wayesenza izimanga ezazitshengisa ukuthi usekelwa nguNkulunkulu. Ngokwesibonelo, wavusa uLazaro, futhi lesi kwakuyisimanga labo ababemphikisa ababengeke basiphike. Lanxa kunjalo, abakhokheli abangamaJuda babengakholwa ukuthi unguMesiya. Baze bafuna lokumbulala yena loLazaro.—Joh. 11:47, 48, 53; 12:9-11.

³ UJesu wayekwazi ukuthi abantu abanengi babengasoze bakholwe ukuthi unguMesiya. (Joh. 5:39-44) Watshela abafundi bakaJohane uMbhabhathizi wathi: “Uyathokoza lowo ongatholi isizatho sokukhubeka ngami.” (Mat. 11:2, 3, 6) Kanti kungani abantu abanengi babengamamukeli uJesu?

4. Sizaxoxa ngani esihlokweni lesi?

⁴ Esihlokweni lesi lakwesilandelayo sizaxoxa ngezizatho ezenza abanengi abaphila ngensuku zikaJesu bangamamukeli. Sizabona  lokuthi kungani abanengi lamuhla bengasilaleli nxa sitshumayela. Okuqakatheke kakhulu esizakufunda yikuthi ukuba lokholo oluqinileyo kuJesu kuzasinceda ukuthi singakhubeki ngaye.

5. Kuyini okungabe kwenza abanye baphetha ngokuthi uJesu wayengayisuye Mesiya?

⁵ Abantu abanengi babengamamukeli uJesu ngenxa yalapho akhulela khona. Babevuma sibili ukuthi ungumfundisi oyingcitshi lokuthi wenza izimanga. Kodwa nxa bemkhangele babezibonela indodana yombazi nje ozidubekelayo. Wakhulela eNazaretha, idolobho okungenzakala abanye babelibona lingamangalisi. LoNathaniyeli owaba ngumfundi kaJesu wake wathi: “Kambe kukhona okuhle okungaphuma eNazaretha?” (Joh. 1:46) Kungenzeka wayengalithandi idolobho uJesu ayehlala kulo, kumbe wayengabe ecabanga isiphrofetho esikuMikha 5:2 esithi uMesiya wayezazalelwa eBhethilehema hatshi eNazaretha.

6. Kuyini okwakuzanceda abantu bananzelele ukuthi uJesu unguMesiya?

⁶ Ithini iMibhalo? Umphrofethi u-Isaya wathi izitha zikaJesu zazingasoze zizihluphe ngezinto eziphathelane ‘lesizukulwane [sikaMesiya].’ (Isaya. 53:8) Ezinengi zazo kwakuphrofethwe ngazo. Aluba abantu labo bazinika isikhathi sokuzihlola izinto lezo, babezabona ukuthi uJesu wazalelwa eBhethilehema lokuthi wayeyisizukulwane seNkosi uDavida. (Luk. 2:4-7) Yikho uJesu wazalelwa endaweni okwakuthiwe uzazalelwa kuyo esiphrofethweni esikuMikha 5:2. Manje uhlupho lwalungaphi? Abantu baphanga bafika esiphethweni bengayazi yonke indaba. Lokhu yikho okwenza bakhubeka ngoJesu.

7. Kungani abantu abanengi bengafuni ukuba ngoFakazi bakaJehova?

⁷ Into efananayo iyenzakala yini lamuhla? Ye. Abantu bakaJehova abanengi kabanothanga njalo kabadumanga. Yikho abantu abanengi bacabanga ukuthi ‘kabafundanga futhi bangabantu makhaza.’ (ImiSeb. 4:13) Abanye babona angani abantu bakaJehova kakumelanga bafundise iBhayibhili ngenxa yokuthi kabayanga ezikolo zamasonto ezaziwayo. Abanye bona bathi oFakazi bakaJehova yinkolo yeMelika. Kodwa iqiniso elikhona yikuthi abanengi babo kabahlali eMelika. Abanye batshelwa ukuthi oFakazi kabakholwa kuJesu. Sekuleminyaka eminengi kuthiwa abantu bakaJehova bafundisa izinto ezingamanga futhi bangabantu abayingozi kakhulu. Yikho abanengi kabafuni ukuba ngoFakazi bakaJehova ngenxa yezinto lezi abazizwayo njalo abazihluphi ngokudinga ukuthi ziliqiniso yini.

8. Ngokwalokho okutshiwo kumiSebenzi 17:11, kuyini okumele abantu bakwenze ukuze bakwazi iqiniso ngabantu bakaJehova?

⁸ Ungenzani ukuze ungakhubeki? Kumele udinge iqiniso ngendaba. Lokhu yikho kanye umlobi weVangeli uLukha akwenzayo. Wahlolisisa zonke izinto ‘kusukela ekuqaliseni ukuze athole okuqondileyo.’ Wayefuna abazabala iVangeli lakhe ‘bakwazi mhlophe ukuthi ziliqiniso sibili izinto’ ababezizwe mayelana loJesu. (Luk. 1:1-4) AmaJuda ayehlala eBheriya enza njengoLukha. Athi eqalisa ukuzwa izindaba ezinhle mayelana loJesu ahlola iMibhalo YesiHebheru ukuze abone ukuthi izinto ayezifundiswa zaziliqiniso yini. (Bala imiSebenzi 17:11.) Labantu lamuhla kumele bawalingisele. Kufanele baqathanise lokho okufundiswa ngabantu bakaJehova lalokho okutshiwo yiMibhalo. Kanti njalo kumele bahlole okwenziwa ngabantu bakaJehova ezinsukwini zalamuhla. Nxa bangahlolisisa ukuze bakwazi iqiniso ngabantu bakaJehova, kabasoze bathatheke ngalokho abantu abakutshoyo ngabo.

9. Kwenzakalani uJesu eseyale ukutshengisa abantu isibonakaliso esivela ezulwini?

⁹ Abanye ngezinsuku zikaJesu babengasuthiseki ngendlela emangalisayo ayefundisa ngayo. Babefuna abatshengise “isibonakaliso esivela ezulwini” ukuze aveze ukuthi unguMesiya. (Mat. 16:1) Engxenye okwenza bafuna enze njalo yilokho ababekubale kuDanyeli 7:13, 14. Kodwa isikhathi sikaJehova sokuthi isiphrofetho leso sigcwaliseke sasingakafiki. Lokho uJesu ayekufundisa kwakumele kwenze bangathandabuzi ukuthi unguMesiya. Kodwa kabazange bamamukele eseyale ukubatshengisa isibonakaliso ababesifuna.—Mat. 16:4.

10. UJesu wakugcwalisa njani lokho okwabhalwa ngu-Isaya mayelana loMesiya?

¹⁰ Ithini iMibhalo? Umphrofethi u-Isaya wabhala ngoMesiya wathi: “Kayikumemeza kumbe aklabalale, loba aphakamise ilizwi lakhe emigwaqweni.” (Isaya. 42:1, 2) UJesu wayengafuni ukubukwa ngabantu ngesikhathi esenza inkonzo yakhe. Kazange akhe amathempeli futhi wayengagqoki izigqoko ezimangalisayo zabakhokheli benkolo kumbe afune ukubizwa ngamabizo okuhlonipha aphiwa abakhokheli benkolo. Ngesikhathi ethonisiswa wala ukwenza isimangaliso ukuze athabise iNkosi uHerodi lanxa ukuphila kwakhe kwakusengozini. (Luk. 23:8-11) UJesu wazenza sibili izimangaliso, kodwa ayekuqakathekisa kakhulu yikutshumayela izindaba ezinhle. Watshela abafundi bakhe wathi: “Yikho engikulandileyo.”—Mak. 1:38.

11. Yiphi imicabango engaqondanga abanye abalayo lamuhla?

¹¹ Into efananayo iyenzakala yini lamuhla? Ye. Abantu abanengi lamuhla bathanda izakhiwo zamatshetshi ezinkulu futhi eziceciswe ngezinto ezidulayo. Baqakathekisa abakhokheli benkolo abalamabizo okuhlonipha amangalisayo njalo bathanda imikhosi abangakwaziyo ukuthi yaqaliswa ngabahedeni kumbe ukuthi vele itshoni. Kodwa abantu abahamba emasontweni la kabafundi okunengi ngoNkulunkulu langenhloso zakhe. Labo  ababuya emihlanganweni yethu yebandla bona bafunda ngalokho uJehova akhangelele ukuthi sikwenze. AmaWolu ethu oMbuso ahlanzekile kodwa kawamangalisi njalo kawaceciswanga ngezinto ezidulayo. Abakhokhelayo ebandleni kabagqoki izigqoko ezitshiyene lezabanye kumbe babizwe ngamabizo aqakathekileyo. Umgogodla wakho konke esikufundiswayo lesikukholwayo liBhayibhili. Lanxa kunjalo, abanengi kabasilaleli ngoba bacabanga ukuthi indlela esikhonza ngayo kayimangalisi futhi lokho esikufundisayo kayisikho abafuna ukukuzwa.

12. Ngokwalokho okutshiwo kuHebheru 11:1, 6, ukholo lwethu kumele lusekelwe ngaphi?

¹² Singenzani ukuze singakhubeki? Umphostoli uPhawuli watshela amaKhristu ayehlala eRoma wathi: “Ukholo luba khona ngemva kokuzwa ilizwi, besekusithi ilizwi lizwakale nxa umuntu ekhuluma ngoKhristu.” (Rom. 10:17) Yikho siqinisa ukholo lwethu ngokutaditsha iBhayibhili hatshi ngokuhlanganyela emikhosini yamasonto iBhayibhili eliveza ukuthi kayiqondanga, kungelani lokuthi ikhanya imihle kanganani. Kumele sibe lokholo oluqinileyo olusekelwe elwazini oluqondileyo ngoba “nxa umuntu engelakholo, kakwenzakali ukuthi amthokozise uNkulunkulu.” (Bala uHebheru 11:1, 6.) Ngakho kasidingi isibonakaliso esimangalisayo esivela ezulwini ukuze kukhanye ukuthi sesilitholile iqiniso. Ukuhlolisisa izinto eziqinisa ukholo ezifundiswa liBhayibhili yikho okuzasinceda sibone ukuthi sesilitholile iqiniso futhi kuqede loba yikuphi ukuthandabuza esingabe silakho.

13. Kuyini okwenza ukuthi abanengi bangamamukeli uJesu?

¹³ Abafundi bakaJohane uMbhabhathizi bamangala ngoba abafundi bakaJesu babengazili ukudla. UJesu wabachasisela ukuthi kwakungelasizatho sokuthi benze njalo yena esaphila. (Mat. 9:14-17) Lanxa kunjalo, abaFarisi labanye ababemphikisa bamsola ngenxa yokuthi wayengalandeli amasiko abo. Babemzondela nxa eselapha abagulayo ngeSabatha. (Mak. 3:1-6; Joh. 9:16) Babekhuluma bezigqaja besithi bayaligcina iSabatha  ngapha bevumela abantu ukuthi benze ibhizimusi ethempelini. Bazonda bafa ngesikhathi uJesu ebasola ngalokho ababekwenza. (Mat. 21:12, 13, 15) Kanti njalo labo uJesu ayebafundisa esinagogeni eNazaretha bazonda badla amalahle ngesikhathi ekhuluma izibonelo zalokho okwenzakala kudala ko-Israyeli ezaziveza ukuthi kabalandaba labanye lokuthi kabalakholo. (Luk. 4:16, 25-30) Abanengi kabazange bamamukele uJesu ngenxa yokuthi lokho ayekwenza kayisikho ababekukhangelele.—Mat. 11:16-19.

14. Kungani uJesu wasola amasiko abantu ayengavumelani leMibhalo?

¹⁴ Ithini iMibhalo? UJehova waphefumulela umphrofethi u-Isaya ukuthi abhale amazwi la: “Abantu laba basondela kimi ngemilomo bangikhonze ngezindebe zabo, kodwa izinhliziyo zabo zikude lami; ukungikhonza kwabo kwenziwa kuphela nje ngemilayo abayifundiswa ngabantu.” (Isaya. 29:13) Kwakuqondile ukuthi uJesu asole amasiko abantu ayengavumelani lokutshiwo yiMibhalo. Labo ababeqakathekisa imithetho lamasiko abantu ukwedlula iMibhalo babengamamukeli uJehova lalowo ayemthume ukuthi abe nguMesiya.

15. Kungani abantu abanengi lamuhla bengabathandi oFakazi bakaJehova?

¹⁵ Into efananayo iyenzakala yini lamuhla? Ye. Abantu abanengi bayakhubeka nxa oFakazi bakaJehova bengahlanganyeli labo ekunanzeni imikhosi engavumelani lokutshiwo liBhayibhili, njengamalanga okuzalwa leKhisimusi. Abanye bona bayazonda nxa oFakazi bakaJehova bengananzi labo imikhosi yesizwe kumbe bengalandeli amasiko aphathelane lemingcwabo angavumelani lalokho okutshiwo liLizwi likaNkulunkulu. Labo abakhubekayo ngenxa yezizatho lezi bangabe becabanga ukuthi uNkulunkulu uyayamukela indlela bona abamkhonza ngayo. Kodwa ngeke bamthokozise nxa bekhetha ukulandela amasiko abantu kulezimfundiso ezicacileyo eziseBhayibhilini.—Mak. 7:7-9.

16. Ngokwalokho okutshiwo kuHubo 119:97, 113, 163-165, kuyini okumele sikwenze lokungamelanga sikwenze?

¹⁶ Singenzani ukuze singakhubeki? Kumele siyithande kakhulu imithetho kaJehova lezimiso zakhe. (Bala iHubo 119:97, 113, 163-165.) Nxa simthanda uJehova kasisoze silandele amasiko angamthokozisiyo. Kanti njalo kasisoze sithande loba yini ukwedlula yena.

17. Abanengi ngesikhathi sikaJesu babekhangelele ukuthi uMesiya enzeni?

¹⁷ Abanye ngensuku zikaJesu babefuna uhulumende owayebusa ngalesosikhathi atshintshwe. Babekhangelele ukuthi uMesiya abakhulule kumaRoma ayebabusa ebacindezela. Kodwa uJesu wala lapho befuna ukumenza inkosi. (Joh. 6:14, 15) Abaphristi labanye babesesaba ukuthi engxenye uJesu uzazama ukutshintsha uhulumende, okwakuzabangela ukuthi amaRoma azonde abesebathathela amandla ayebanike wona. Izizatho lezi zabangela ukuthi amaJuda amanengi angamamukeli uJesu.

18. Yiziphi iziphrofetho ezimayelana loMesiya abanengi abangazange bazihluphe ngazo?

¹⁸ Ithini iMibhalo? Lanxa iziphrofetho ezinengi zazithe uMesiya uzakuba yiNkosi ezanqoba, ezinye zaveza ukuthi kwakumele aqale afele izono zethu. (Isaya. 53:9, 12) Pho kuyini okwabangela ukuthi amaJuda akhangelele izinto ezingayisizo ngoMesiya? Amanengi ayengazihluphi ngeziphrofetho ezazingakhulumi ngokuqedwa kwenhlupho zawo ngalesosikhathi.—Joh. 6:26, 27.

19. Kuyini okubangela ukuthi abantu abanengi bangasilaleli?

¹⁹ Into efananayo iyenzakala yini lamuhla?  Ye. Abanengi lamuhla bayakhubeka ngathi ngenxa yokuthi kasingeni kwezombusazwe. Bakhangelele ukuthi sivote nxa kusiba lokhetho. Kodwa thina siyakwazi ukuthi nxa sikhetha ukubuswa ngumuntu siyabe sisala uJehova. (1 Sam. 8:4-7) Abantu bangabe bekhangelele lokuthi sakhe izikolo lezibhedlela futhi senze lezinye izinto ezinceda umphakathi. Yikho kabasilaleli ngoba sikhuthele ekutshumayeleni kulokuthi sizame ukulungisa inhlupho zabantu.

20. Ngokwalokho okutshiwo kuMathewu 7:21-23, kuyini okumele sikuqakathekise?

²⁰ Singenzani ukuze singakhubeki? (Bala uMathewu 7:21-23.) Okumele sikuqakathekise yikwenza umsebenzi uJesu asilaya ukuthi siwenze. (Mat. 28:19, 20) Akumelanga sithatheke ngokuzama ukulungisa inhlupho zomhlaba lo. Siyabathanda sibili abantu futhi siyabazwela, kodwa siyakwazi ukuthi indlela engcono kulazo zonke yokubanceda yikubafundisa ngoMbuso kaNkulunkulu lokubancedisa ukuthi babe ngabangane bakaJehova.

21. Kuyini okumele sizimisele ukukwenza?

²¹ Esihlokweni lesi sixoxe ngezinto ezine ezabangela ukuthi abanengi bangamamukeli uJesu futhi ezenza ukuthi abantu bangabamukeli abalandeli bakhe lamuhla. Kodwa lezi kayisizo zodwa izinto okumele sizinanzelele. Esihlokweni esilandelayo sizaxoxa ngezinye izinto ezine ezenza abantu bakhubeke. Kasizimiseleni ukungavumeli loba yini ukuthi isikhube ngoJesu njalo kasigcineni ukholo lwethu luqinile.