1. Abantu kumele bakhethe phakathi kwani?

 LAMUHLA bonke abantu kumele bakhethe ukuthi bazamukela uJehova uNkulunkulu njengoMbusi wendawo wonke yini kumbe bazasekela uSathane uDeveli oyisitha sakhe esilolunya. Lokho abazakukhetha yikho okuzatsho ukuthi bazathola ukuphila okungapheliyo yini kumbe bazabhujiswa. (Mat. 25:31-33, 46) Ngesikhathi ‘sokuhlupheka okukhulu’ izinceku zikaJehova ezithembekileyo zizafakwa uphawu lokusinda. (Isam. 7:14; Hez. 9:4, 6) Kodwa labo abayabe belophawu lwesilo bazabhujiswa.—Isam. 14:9-11.

2. (a) UHebheru 10:35-39 usikhuthaza ukuthi senzeni? (b) Ibhuku leSambulo lingasinceda njani?

² Bala uHebheru 10:35-39. Nxa ukhethe ukusekela ubukhosi bukaJehova ukhethe kuhle. Usuzimisele ukuncedisa abanye ukuthi labo bakhethe kuhle. Ungabancedisa usebenzisa okusebhukwini leSambulo. Ibhuku leli lisitshela ngalokho okuzakwenzakala kulabo abaphikisana loJehova liphinde lisitshele ngezibusiso ezizatholwa yilabo abasekela ubukhosi bakhe. Kumele sifunde ngazo izinto lezi eziqakathekileyo. Nxa singakwenza lokhu sizazimisela ukuqhubeka sikhonza uJehova. Kanti njalo sizenelisa ukuncedisa abanye ukuthi bakhethe ukumkhonza njalo baqhubeke bemkhonza.

3. Sizaxoxa ngani esihlokweni lesi?

³ Esihlokweni lesi sizaphendula imibuzo elandelayo: Yiziphi izibusiso ezizatholwa yilabo abasekela ubukhosi bukaNkulunkulu? Kuzakwenzakalani kulabo abakhetha ukusekela isilo esibomvu gebhu okukhulunywa ngaso ebhukwini leSambulo?

4. Yiliphi iqembu umphostoli uJohane alibona liloJesu ezulwini?

⁴ Umphostoli uJohane wabona amaqembu amabili asekela ubukhosi bukaJehova njalo athola ukuphila okungapheliyo. Iqembu lokuqala lalilabantu abangu-144 000. (Isam. 7:4) Abantu labo bathathwa emhlabeni ukuthi babumbe uhulumende kumbe uMbuso loJesu ezulwini. Bazabusa laye umhlaba. (Isam. 5:9, 10; 14:3, 4) UJohane ubabona bemi loJesu eNtabeni iZiyoni.—Isam. 14:1.

5. Kuzakwenzakalani kulabo abaseleyo abeqembu labangu-144 000?

⁵ Kusukela ngesikhathi sabaphostoli, kukhethwe abantu abanengi ukuthi babeseqenjini labangu-144 000. (Luk. 12:32; Rom. 8:17) Kodwa uJohane watshelwa ukuthi ngabalutshwana abeqembu leli abazabe belokhu besaphila emhlabeni ezinsukwini zokucina. Ukuhlupheka okukhulu kungakaqalisi ‘abaseleyo’ laba bazathola ‘uphawu’ lokucina olutshengisa ukuthi uJehova uyabemukela. (Isam. 7:2, 3; 12:17) Nxa ukuhlupheka okukhulu sekuqalisile bazathathwa baye ezulwini ukuze bayekuba labanye abaseqenjini labangu-144 000 abafa bethembekile. Sebesezulwini bazabusa ndawonye loJesu eMbusweni kaNkulunkulu.—Mat. 24:31; Isam. 5:9, 10.

6-7. (a) Yiliphi elinye iqembu uJohane alibonayo njalo sifundani ngalo? (b) Kungani kumele amaqembu womabili athokoziswe yilokho okukhulunywa ngakho kuSambulo isahluko 7?

⁶ UJohane wathi eqeda ukubona iqembu lezulwini wabona “ixuku elikhulu.” Iqembu leli lalingafanani lelabangu-144 000 ngoba lona kwakungelamuntu owayesenelisa ukulibala. (Isam. 7:9, 10) Sifundani ngalo? UJohane watshelwa amazwi la: “Laba yibo abaphuma ekuhluphekeni okukhulu njalo sebegezise izembatho zabo egazini leMvana, bazenza zaba mhlophe.” (Isam. 7:14) ‘Ixuku leli elikhulu’ lizasinda ekuhluphekeni okukhulu beselithola izibusiso lapha emhlabeni.—Hubo. 37:9-11, 27-29; Zaga. 2:21, 22; Isam. 7:16, 17.

⁷ Kungelani lokuthi silethemba lokuya ezulwini kumbe elokuphila lapha emhlabeni, kumele siwabone ngelihlo lengqondo amazwi akuSambulo isahluko 7 egcwaliseka. Amaqembu amabili ezinceku zikaNkulunkulu azakholisa sibili ngaleso sikhathi. Asisoze sizisole ngokuthi sakhetha ukusekela ubukhosi bukaJehova. Kuyini okunye esikutshelwayo kuSambulo mayelana lokuhlupheka okukhulu?—Mat. 24:21.

8. Ukuhlupheka okukhulu kuzaqala nini njalo abantu abanengi bazakwenzani?

⁸ Esihlokweni esidlulileyo sibonile ukuthi abezombusazwe bazayihlamukela iBhabhiloni Enkulu, emela umbuso womhlaba wonke wenkolo yamanga. (Isam. 17:16, 17) Lokhu kuzabe kuyikuqala kokuhlupheka okukhulu. Kambe abantu abanengi bazathi bebona lokhu baqalise ukukhonza uJehova? Hatshi. ISambulo isahluko 6 sithi ngalesosikhathi labo abangakhonzi uNkulunkulu bazakuyacatsha ezintabeni ezimela abezombusazwe labezamabhizimusi. UJehova uzababona beyizitha zakhe njengoba bayabe bengawusekeli uMbuso wakhe.—Luk. 11:23; Isam. 6:15-17.

9. Ngesikhathi sokuhlupheka okukhulu kuyini okuzatshengisa ukuthi abantu bakaJehova batshiyene labanye njalo lokhu kuzabangelani?

 ⁹ Ngesikhathi lesi esinzima, kuzazicacela ukuthi abantu bakaJehova abathembekileyo batshiyene labanye. Yibo bodwa abazabe bekhonza uJehova uNkulunkulu njalo besala ukusekela ‘isilo.’ (Isam. 13:14-17) Lokhu kuzakwenza ukuthi izitha zikaNkulunkulu zibazondele kakhulu, besekubangela ukuthi izizwe zimanyane zibahlasela. IBhayibhili lithi lokhu yikuhlasela kukaGogi waseMagogi.—Hez. 38:14-16.

10. USambulo 19:19-21 uthi uJehova uzakwenzani nxa abantu bakhe sebehlaselwa?

¹⁰ UJehova uzakwenzani nxa abantu bakhe sebehlaselwa? Uthi: “Ulaka lwami oluvuthayo luzavuka.” (Hez. 38:18, 21-23) ISambulo isahluko 19 siyasitshela okuzakwenzakala ngemva kwalokho. UJehova uzathumela iNdodana yakhe ukuthi ivikele abantu bakhe njalo inqobe izitha zakhe. UJesu uzabe ‘elamabutho asezulwini’ okutsho izingilosi ezithembekileyo kanye labangu-144 000. (Isam. 17:14; 19:11-15) Kuzahamba njani empini le? Bonke abantu abaphikisana loJehova bazatshabalaliswa. Lenhlanganiso zonke eziphikisana laye zizatshabalaliswa.—Bala iSambulo 19:19-21.

11. Yisiphi isenzakalo esiqakatheke kulazo zonke okukhulunywa ngaso ebhukwini leSambulo?

¹¹ Akucabange ukuthi abathembekileyo abasemhlabeni bazathokoza njani ngemva kokutshabalaliswa kwezitha zikaNkulunkulu! Lanxa kuzakuba lokuthokoza okukhulu ezulwini nxa iBhabhiloni Enkulu isitshabalalisiwe kukhona okunye okuthokozisayo okuzakwenzakala. (Isam. 19:1-3) ‘Ngumtshado weMvana’ oyisenzakalo esiqakatheke kulazo zonke okukhulunywa ngazo ebhukwini leSambulo.—Isam. 19:6-9.

12. Ngokwalokho okutshiwo kuSambulo 21:1, 2, umtshado weMvana uzabakhona nini?

¹² Unini umtshado lo? Bonke abangu-144 000 bazabe sebesezulwini impi ye-Amagedoni ingakaqalisi. Kodwa umtshado weMvana awusoze ubekhona ngalesosikhathi. (Bala iSambulo 21:1, 2.) Uzabakhona ngemva kwempi ye-Amagedoni izitha zikaNkulunkulu sezitshabalalisiwe.—Hubo. 45:3, 4, 13-17.

13. Utshoni umtshado weMvana?

¹³ Utshoni umtshado weMvana? Emtshadweni kuhlanganiswa indoda lomfazi yikho emtshadweni weMvana kuyabe kungani iNkosi uJesu Khristu itshada labangu-144 000 ‘abangumlobokazi’ wayo. Isenzakalo lesi esiqakathekileyo sitsho ukubekwa kukahulumende omutsha ozabusa umhlaba okweminyaka engu-1 000.—Isam. 20:6.

14-15. ISambulo isahluko 21 sithi abangu-144 000 bayini? (Khangela umfanekiso ongaphandle.)

¹⁴ USambulo isahluko 21 uthi ngemva komtshado weMvana, abangu-144 000 baba lidolobho elihle okwamagama okuthiwa ‘liJerusalema Elitsha.’ (Isam. 21:2, 9) Idolobho leli lilamatshe ayisisekelo angu-12 abhalwe ‘amabizo alitshumi lambili abaphostoli beMvana abalitshumi lambili.’ LoJohane wabona ibizo lakhe libhaliwe ematsheni lawo. Lesi kwakuyisibusiso sibili!—Isam. 21:10-14; Efe. 2:20.

¹⁵ Idolobho leli alifanani lamanye. Lilomgwaqo omkhulu owenziwe ngegolide  elicengekileyo lamagedi alitshumi lambili enziwe ngamaphareli lemiduli lezisekelo okuceciswe ngamatshe aligugu njalo ubude balo lobubanzi balo kanye lokuphakama kwalo kuyalingana konke. (Isam. 21:15-21) Kodwa uJohane uyananzelela ukuthi kukhona okungekhoyo. Uthi: “Kangizange ngibone ithempeli kulo ngoba uJehova uNkulunkulu uSomandla ulithempeli lalo, leMvana ilithempeli lalo. Idolobho leli kalidingi ilanga loba inyanga ukuthi kukhanyise kulo ngoba inkazimulo kaNkulunkulu yayikhanyisa kulo, futhi isibane sayo kwakuyiMvana.” (Isam. 21:22, 23) Labo ababumba iJerusalema Elitsha bazabe beloJehova. Yikho bayabe bengalidingi ithempeli. (Isam. 22:3, 4) Kanti njalo ngesikhathi besenzela uNkulunkulu inkonzo engcwele bayabe bekhokhelwa nguJesu uMphristi Omkhulu. (Heb. 7:27) Lokhu yikho okwenza kuthiwe uJehova loJesu balithempeli edolobheni lelo.

16. Yiziphi izibusiso ezizatholwa ngabantu ngesikhathi uMbuso kaNkulunkulu ubusa okweminyaka eyinkulungwane?

¹⁶ Abagcotshiweyo bayathokoza nxa becabanga ngedolobho lelo. Abalethemba lokuphila emhlabeni labo kumele bathokoze ngalo. Ngesikhathi uMbuso kaNkulunkulu usubusa okweminyaka eyinkulungwane, iJerusalema Elitsha lizaletha izibusiso ezinengi emhlabeni. UJohane ubona izibusiso lezi zigeleza ‘njengomfula wamanzi okuphila.’ Emaceleni womabili omfula ‘kulezihlahla zokuphila’ ezilamahlamvu ‘okusilisa izizwe.’ (Isam. 22:1, 2) Abantu bonke bazancedwa yizibusiso lezi. Kancane kancane isono sizakhitshwa ebantwini abalalelayo baze babe ngabapheleleyo. Ukugula lobuhlungu lokukhala kuyabe kungasekho.—Isam. 21:3-5.

17. USambulo 20:11-13 uthi kuyini okuzakwenzakala ngesikhathi sokubusa kweminyaka eyinkulungwane koMbuso kaNkulunkulu?

¹⁷ Ngobani abazathola izibusiso lezi? Abokuqala ngabexuku elikhulu abasinde e-Amagedoni kanye labantwana abazazalwa emhlabeni omutsha. Abesibili ngabazavuswa okukhulunywa ngabo kuSambulo isahluko 20. (Bala iSambulo 20:11-13.) “Abalungileyo” abafayo kanye “labangalunganga” abangazange bathole  ithuba lokufunda ngoJehova bazavuswa ukuthi baphile lapha emhlabeni. (ImiSeb. 24:15; Joh. 5:28, 29) Lokhu akutsho ukuthi bonke abafileyo bazavuswa ngesikhathi sokubusa kweminyaka eyinkulungwane. Labo abangazange bavume ukukhonza uJehova besaphila abasoze bavuswe. Balithola ithuba lokufunda ngaye kodwa batshengisa ukuthi abafanelanga ukuphila emhlabeni olipharadayisi.—Mat. 25:46; 2 Thes. 1:9; Isam. 17:8; 20:15.

18. Abantu bayabe sebenjani ekupheleni kweminyaka eyinkulungwane?

¹⁸ Ekupheleni kweminyaka eyinkulungwane bonke abantu emhlabeni bazabe sebephelele. Akulamuntu ozaphinda ahlutshwe yisono esavela ku-Adamu. (Rom. 5:12) Isono leso siyabe sesikhitshiwe. Yikho kuthiwa bonke abasemhlabeni ‘bazaphila’ ngoba bayabe sebephelele ngemva kweminyaka eyinkulungwane.—Isam. 20:5.

19. Kungani kumele abantu balingwe okokucina?

¹⁹ Siyakwazi ukuthi uJesu wahlala eqotho kuJehova lanxa wayelingwa nguSathane. Kodwa yibo bonke yini abantu abapheleleyo abazamlingisela nxa uSathane esebalinga? Ngamunye wabo uzathola ithuba lokutshengisa ukuthi uqotho yini kuNkulunkulu nxa uSathane esekhululiwe emgodini ongelamkhawulo ekupheleni kweminyaka eyinkulungwane. (Isam. 20:7) Labo abazahlala bethembekile ngesikhathi belingwa okokucina bazathola ukuphila okungapheliyo lenkululeko yeqiniso. (Rom. 8:21) Labo abazahlamuka bazatshabalaliswa ndawonye loDeveli lamadimoni akhe.—Isam. 20:8-10.

20. Uzwa njani ngeziphrofetho ezisebhukwini leSambulo?

²⁰ Uzwa njani ngemva kokuhlola iziphrofetho ezisebhukwini leSambulo? Akukuthokozisi yini ukuzibona usuphila ngesikhathi kugcwaliseka iziphrofetho lezi? Iziphrofetho lezi azikwenzi ufise ukuncedisa abanye ukuthi labo bakhonze uNkulunkulu wethu yini? (Isam. 22:17) Njengoba inhliziyo zethu zigubhazela ngalokho okuzakwenzakala esikhathini esizayo, sivumelana lomphostoli uJohane owathi: “Ameni! Woza Nkosi Jesu.”—Isam. 22:20.