1. Kungani kumele sonke sibe lenhlakanipho evela kuNkulunkulu? (IZaga 4:7)

 AKUTHANDABUZWA ukuthi ngesikhathi ufuna ukwenza isinqumo esiqakathekileyo waqala wathandaza ucela ukuhlakanipha. (Jak. 1:5) INkosi uSolomoni yathi: “Ukuhlakanipha kuyinqaba.” (Bala iZaga 4:7.) Lapha uSolomoni wayengakhulumi ngenhlakanipho nje. Wayekhuluma ngaleyo evela kuJehova uNkulunkulu. (Zaga. 2:6) Kodwa ukuhlakanipha okuvela kuNkulunkulu kungasinceda yini silwisane lenhlupho esihlangana lazo lamuhla? Ye kungasinceda, njengoba sizabona esihlokweni lesi.

2. Singenzani ukuze sihlakaniphe?

² Eyinye indlela esingathola ngayo ukuhlakanipha yikufunda lokusebenzisa lokho okwatshiwo ngamadoda amabili ayesaziwa ngokuhlakanipha kwawo. Owokuqala nguSolomoni. IBhayibhili lithi ‘uNkulunkulu wanika uSolomoni ukuhlakanipha lengqondo ejulileyo.’ (1 AmaKho. 4:29) Owesibili nguJesu, indoda eyayihlakaniphe kulabo bonke abantu abake babakhona. (Mat. 12:42) U-Isaya waphrofetha ngoJesu wathi: ‘Umoya kaJehova uzakuba phezu kwakhe, umoya wokuhlakanipha lowokuqedisisa.’—Isaya. 11:2.

3. Sizaxoxa ngani esihlokweni lesi?

³ UNkulunkulu wanika uSolomoni loJesu inhlakanipho emangalisayo yikho benelisa ukusinika amacebo ancedayo endabeni eziqakathekileyo. Esihlokweni lesi sizaxoxa ngamacebo abasinika wona asinceda endleleni okumele sibone ngayo imali lokusebenza lasendleleni okumele sizibone ngayo thina ngokwethu.

4. Yiwuphi umehluko owawukhona phakathi kukaSolomoni loJesu?

⁴ USolomoni wayekhomba ngophakathi njalo ephila impilo entofontofo. (1 AmaKho. 10:7, 14, 15) UJesu yena wayengelazinto ezinengi njalo wayengelandlu. (Mat. 8:20) Kodwa bobabili babeyibona ngendlela eqondileyo inotho ngenxa yokuthi ukuhlakanipha kwabo kwakuvela kuJehova uNkulunkulu.

5. USolomoni wayeyibona njani inotho?

⁵ USolomoni wavuma ukuthi imali “iyisiphephelo.” (UmTshu. 7:12) Imali iyasinceda sithole izinto esizidingayo ekuphileni mhlawumbe lezinye esizifunayo. Kodwa lanxa uSolomoni wayenothile sibili wananzelela ukuthi kulezinye izinto eziqakatheke kakhulu kulemali. Ngokwesibonelo wathi: “Ibizo elihle liyathandeka kulenotho enengi.” (Zaga. 22:1) USolomoni wananzelela lokuthi abantu abathanda imali abasuthiseki ngabalakho. (UmTshu. 5:10, 12) Waphinda wasixwayisa ukuthi singathembeli emalini njengoba ingavuka inyamalele.—Zaga. 23:4, 5.

6. UJesu wayezibona njani izinto umuntu angaba lazo empilweni? (UMathewu 6:31-33)

⁶ UJesu wayezibona ngendlela eqondileyo izinto umuntu angaba lazo empilweni. Wayekukholisa ukudla lokunatha iwayini. (Luk. 19:2, 6, 7) Ngelinye ilanga wenza iwayini elimnandi futhi lesi kwakuyisimanga sakhe sokuqala. (Joh. 2:10, 11) Ngosuku abulawa ngalo wayegqoke isembatho esidulayo. (Joh. 19:23, 24) Kodwa lokhu ayisikho okwakuqakatheke kakhulu kuye. Watshela abalandeli bakhe wathi: ‘Kakho ongaba yisigqili samakhosi amabili. Ngeke libe yizigqili zikaNkulunkulu lezeNotho.’ (Mat. 6:24) UJesu wasifundisa ukuthi nxa singafuna uMbuso kuqala uNkulunkulu uzasinika konke esikudingayo.—Bala uMathewu 6:31-33.

7. Ukubona imali ngendlela eqondileyo kwamnceda njani omunye umzalwane?

 ⁷ Ukusebenzisa inhlakanipho evela kuNkulunkulu endabeni zemali sekuncede abafowethu labodadewethu abanengi. Ake sixoxe ngomfowethu ongatshadanga okuthiwa nguDaniel. Uthi: “Ngesikhathi ngikhula ngakhetha ukuqakathekisa ukukhonza uJehova ukwedlula loba yini.” Ukungabi lezinto ezinengi empilweni kuncede uDaniel wenza okunengi enhlanganisweni. Uqhubeka esithi: “Angizisoli lakancane ngalokho engakhetha ukukwenza. Aluba ngakhetha ukugijimisa imali ngabe khathesi nginothile sibili. Kodwa ngangizabathatha ngaphi abangane engilabo khathesi? Aluba angikhethanga ukufaka uMbuso kuqala ngabe angithokozi ngendlela engithokoza ngayo khathesi. UJehova unginike izibusiso ezingeke zithengwe ngaloba yimalini.” Kuyazikhanyela ukuthi ukuqakathekisa ukukhonza kulemali kuyanceda sibili.

8. Sazi njani ukuthi uSolomoni wayewubona ngendlela eqondileyo umsebenzi? (UmTshumayeli 5:18, 19)

⁸ USolomoni wathi intokozo esiyithola ngokusebenza nzima “yisipho sikaNkulunkulu.” (Bala UmTshumayeli 5:18, 19.) Wathi: “Ukusebenza nzima konke kuletha inzuzo.” (Zaga. 14:23) USolomoni wayekwazi ayekhuluma ngakho. Phela wayekuthanda ukusebenza. Wakha izindlu, wahlanyela amavini, wasungula izivande, wenza iziziba zamanzi njalo wakha lamadolobho. (1 AmaKho. 9:19; UmTshu. 2:4-6) Le kwakuyimisebenzi enzima sibili futhi kumele ukuthi yamthokozisa. Kodwa imisebenzi le ayisiyo yodwa eyamthokozisayo. Wenza lemisebenzi eminengi ephathelane lokukhonza. Ngokwesibonelo, wakhokhela emsebenzini wokwakhiwa kwethempeli likaJehova elikhazimulayo njalo umsebenzi lo wathatha iminyaka eyisikhombisa. (1 AmaKho. 6:38; 9:1) Ngemva kokwenza imisebenzi yonke le wananzelela ukuthi eqakatheke kakhulu ngephathelane lokukhonza. Wathi: “Manje-ke konke sekuzwakele; Nansi isiphetho sendaba; Mesabe uNkulunkulu ugcine imilayo yakhe.”—UmTshu. 12:13.

9. UJesu watshengisa njani ukuthi umsebenzi wokuziphilisa awusiwo owawuqakatheke kakhulu empilweni yakhe?

⁹ UJesu wayekhuthele. Esakhula wayengumbazi. (Mak. 6:3) Akuthandabuzwa ukuthi abazali bakhe babekuqakathekisa lokho ayekwenza njengoba babelemuli enkulu okwakumele bayinakekele. UJesu wayephelele njalo wayebaza izinto ezinhle yikho kumele ukuthi abantu abanengi babefuna ukubazelwa nguye. Kumele ukuthi wayewukholisa umsebenzi wakhe. Kodwa lanxa wayekhuthele emsebenzini wakhe wayezinika isikhathi sokukhonza uJehova. (Joh. 7:15) Eseqalisile inkonzo yakhe watshela ababemlalele wathi: “Lingasebenzeli ukudla okubolayo kodwa sebenzelani ukudla okungaboliyo okunika impilo engapheliyo.” (Joh. 6:27) Kanti njalo eNtshumayelweni yaseNtabeni wathi: “Buthelelani inotho ezulwini.”—Mat. 6:20.

10. Umsebenzi ungabaphambanisa njani abanye?

¹⁰ Ukuhlakanipha okuvela kuNkulunkulu kuyasinceda ukuthi siwubone ngendlela eqondileyo umsebenzi wethu. Sifundiswa ukuthi ‘sisebenze nzima njalo  senze umsebenzi omuhle.’ (Efe. 4:28) Abaqhatshi bajayele ukunanzelela ukuthi sithembekile lokuthi sikhuthele njalo bangasincoma ngendlela esisebenza ngayo. Lokhu kungenza sisebenze isikhathi eside sisenzela ukuthi umqhatshi wethu abuke oFakazi. Kodwa nxa singakwenza lokho singacina sesingaselasikhathi sokuba lemuli zethu lesokwenza izinto eziphathelane lokukhonza. Kuyabe sokumele sitshintshe ukuze sibe lesikhathi sokwenza izinto lezi eziqakathekileyo.

11. Umfowethu okuthiwa nguWilliam wafundani?

¹¹ Umfowethu osesemutsha okuthiwa nguWilliam wafunda komunye umzalwane ayemsebenzela ukuthi kuqakatheke kangakanani ukuwubona ngendlela eqondileyo umsebenzi. Uthi: “[Umzalwane lo] uwubona ngendlela eqondileyo umsebenzi. Usebenza nzima njalo amakhastoma akhe ayamthanda ngenxa yokuthi uwenza kuhle umsebenzi wakhe. Kodwa nxa isikhathi sokutshayisa sesitshayile uyama ukusebenza ukuze abe lemuli yakhe njalo enze izinto eziphathelane lokukhonza. Umzalwane lo uyathokoza sibili.” *

12. USolomoni watshengisa njani ukuthi wayezibona ngendlela eqondileyo kodwa lokhu kwatshintsha njani?

¹² Ngesikhathi uSolomoni esathembekile kuJehova, wayezibona ngendlela eqondileyo. Eqalisa ukubusa wavuma ukuthi kulezinto ayengenelisi ukuzenza njalo wacela uJehova ukuthi amncedise. (1 AmaKho. 3:7-9) Wananzelela lokuthi ukuzigqaja kuyingozi. Wathi: “Ukuzigqaja kwandulela ukubhujiswa, umoya omubi ulandelwa yikuwa.” (Zaga. 16:18) Kodwa ngokuhamba kwesikhathi wehluleka ukulandela  iseluleko sakhe. Wazigqaja wekela ukulalela imithetho kaNkulunkulu. Ngokwesibonelo, omunye umthetho wawusithi inkosi engum-Israyeli kwakungamelanga ‘ithathe abafazi abanengi funa inhliziyo yayo idukiswe.’ (Dute. 17:17) USolomoni kawulalelanga umthetho lo njalo wazithathela abafazi abangu-700 labafazi beceleni abangu-300 futhi abanengi babo babekhonza onkulunkulu bamanga. (1 AmaKho. 11:1-3) Kungenzeka ukuthi uSolomoni wayecabanga ukuthi lokhu akusoze kumphambanise. Kodwa ngokuhamba kwesikhathi wazibonela ukuthi ukuhlamukela uJehova kubi.—1 AmaKho. 11:9-13.

13. Ukuthobeka kukaJesu kusifundisani?

¹³ UJesu wahlala ethobekile. Esasezulwini wenza izinto ezinengi ezimangalisayo loJehova. “Zonke ezinye izinto ezisezulwini lezisemhlabeni” zadalwa kusetshenziswa yena. (Kol. 1:16) Ngesikhathi ebhabhathizwa kungenzeka wakhumbula izinto ayezenze loYise ezulwini. (Mat. 3:16; Joh. 17:5) Kodwa lokho akuzange kumenze azigqaje. Kazange azibone engcono kulabanye. Watshela abafundi bakhe ukuthi wayebuye emhlabeni ‘engalandanga ukuzokhonzwa kodwa ukuzokhonza lokuzonikela ngokuphila kwakhe kube yinhlawulo yabanengi.’ (Mat. 20:28) Watshengisa ukuthi uthobekile ngokuvuma ukuthi wayengenzi loba yini ayezicabangela yona. (Joh. 5:19) Wayethobekile sibili. Wasitshiyela isibonelo okumele sisilandele.

14. Sifundani kulokho okwatshiwo nguJesu?

¹⁴ UJesu wafundisa abafundi bakhe ukuthi bazibone ngendlela eqondileyo. Ngelinye ilanga wathi kubo: “Lenwele ezisemakhanda enu zibaliwe zonke.” (Mat. 10:30) Amazwi la ayaduduza ikakhulu nxa sijayele ukuzikhangelela phansi. Atshengisa ukuthi uBaba wethu osezulwini ulendaba lathi lokuthi uyasiqakathekisa.  Akumelanga siyithandabuze indlela uJehova asibona ngayo ngokucabanga ukuthi asifanelanga ukuba ngabantu bakhe lokuthola ukuphila okungapheliyo emhlabeni omutsha.

15. (a) Eyinye iNqabayokulinda yasikhuthaza ukuthi senzeni? (b) Ngokwalokho okusemfanekisweni okukhasi 24, kungenzakalani nxa sizibona ngendlela engaqondanga?

¹⁵ Eyinye iNqabayokulinda ka-2005 yasikhuthaza ukuthi sizibone ngendlela eqondileyo. Yathi: “Asifuni ukucabanga ukuthi singcono kakhulu size sizigqaje futhi asifuni ukuzikhangelela phansi size sicabange ukuthi asilancedo. Kodwa kumele sizame ukubona lokho esiyikho khona sibili, sinanzelela ukuthi kulezinto esenelisa ukuzenza lesingenelisi ukuzenza. Omunye udade wathi: ‘Angisomuntu omubi njalo angisiyo ngilosi. Ngiyazenza izinto ezinhle njalo ngiyawenza amaphutha njengaye wonke umuntu.’” * Kuyacaca sibili ukuthi ukuzibona ngendlela eqondileyo kuyanceda sibili.

16. Kungani uJehova esinika inhlakanipho?

¹⁶ UJehova usinika inhlakanipho esebenzisa iLizwi lakhe. Uyasithanda njalo ufuna sithokoze. (Isaya. 48:17, 18) Ukuqakathekisa ukukhonza uJehova yisinqumo esingcono kulazo zonke esingazenza njalo esingenza sithokoze sibili. Nxa singenza njalo asisoze sibe lenhlupho ezibangelwa yikuthanda imali lokuqakathekisa kakhulu umsebenzi kumbe ukuzigqaja. Sengathi singazimisela ukuba ngabantu abahlakaniphileyo njalo senze inhliziyo kaJehova ithokoze!—Zaga. 23:15.