1. UJehova ufuna senzeni? (Khangela lomfanekiso.)

 NGUBANI esingamcela ukuthi asiduduze futhi asicebise? Siyazi mhlophe impendulo yombuzo lo. Siyenelisa ukuthandaza kuJehova uNkulunkulu ngoba usinxusa ukuthi senze njalo. Uze athi: “Thandazani kokuphela.” (1 Thes. 5:17) Sikhululekile ukuthandaza kuye simcela ukuthi asincedise kukho konke esikwenzayo. (Zaga. 3:5, 6) UJehova ufuna sithandaze kuye kanengi ngenxa yokuthi uhlala ekulungele ukusilalela.

2. Sizaxoxa ngani esihlokweni lesi?

² Siyasiqakathekisa kakhulu isibusiso sokuthandaza. Kodwa njengoba silezinto ezinengi zokwenza singacina siswela isikhathi sokuthandaza. Singabe sifisa lokuthi imithandazo yethu ibe lohlonzi. IBhayibhili lingasinceda kakhulu endabeni le. Esihlokweni lesi sizaxoxa ngalokho okwenziwa nguJesu ukuze athole isikhathi sokuthandaza lokuthi singamlingisela njani. Sizaxoxa langezinto ezinhlanu eziqakathekileyo esingazitsho emithandazweni yethu ukuze ibe lohlonzi.

3. Kuyini uJesu ayekwazi ngokuthandaza?

³ UJesu wayekwazi ukuthi uJehova uyayiqakathekisa kakhulu imithandazo yabantu bakhe. Engakabuyi emhlabeni wayebona indlela uyise ayephendula ngayo imithandazo yamadoda labesifazana ababethembekile. Ngokwesibonelo uJesu wambona uYise ephendula imithandazo kaHana, ekaDavida,  leka-Elija leyezinye izinceku zakhe. (1 Sam. 1:10, 11, 20; 1 Amakho. 19:4-6; Hubo. 32:5) Lokhu yikho okwenza uJesu wafundisa abafundi bakhe ukuthi bathandaze kanengi lokuthi bangathandabuzi ukuthi uJehova uyabalalela.—Mat. 7:7-11.

4. Sifundani kuJesu mayelana lokuthandaza?

⁴ Imithandazo kaJesu yafundisa abafundi bakhe okunengi mayelana lokuthandaza. UJesu wathandaza kanengi ngesikhathi esemhlabeni. Kwakumele adinge isikhathi sokuthandaza ngoba kwakukunengi okwakumele akwenze futhi wayehlala egcwalelwe ngabantu. (Mak. 6:31, 45, 46) Wayevuka ekuseni kakhulu ukuze athole isikhathi sokuthandaza eyedwa. (Mak. 1:35) Ngelinye ilanga wathandaza ubusuku bonke ngoba wayefuna ukwenza isinqumo esiqakathekileyo. (Luk. 6:12, 13) Ngobusuku bokucina uJesu engakabulawa wathandaza kanengi ecela uJehova ukuthi amncedise ukuthi aqhubeke ethembekile.—Mat. 26:39, 42, 44.

5. Singamlingisela njani uJesu?

⁵ Okwenziwa nguJesu kusifundisa ukuthi kumele sizinike isikhathi sokuthandaza lanxa silezinto ezinengi zokwenza. Lokhu kungatsho ukuthi lathi sizinike isikhathi sokuthandaza ekuseni kakhulu kumbe ntambama. Singenza njalo siyabe sitshengisa uJehova ukuthi siyasiqakathekisa isipho lesi esiligugu. Udadewethu okuthiwa nguLynne wathokoza kakhulu eqala ukuzwa ukuthi ulesibusiso sokuthandaza. Uthi: “Ngathi ngifunda ukuthi ngingakhuluma loJehova loba nini ngasengimbona engumngane wami oseduze futhi ngangifuna ukuthuthukisa imithandazo yami.” Akuthandabuzwa ukuthi lathi siwubona njalo umthandazo. Asixoxeni ngezinto ezinhlanu eziqakathekileyo okumele sizikhumbule nxa sithandaza.

6. USambulo 4:10, 11 uthi kuyini uJehova afanele ukukwamukela?

⁶ Dumisa uJehova. Umphostoli uJohane wabona umbono omangalisayo. Embonweni lo wabona abadala abangu-24 ababekhonza uJehova ezulwini. Babedumisa uNkulunkulu besithi ufanele ukwamukela “inkazimulo lodumo lamandla.” (Bala iSambulo 4:10, 11.) Kunengi okwenza izingilosi ezithembekileyo zimdumise uJehova. Zihlala laye  ezulwini futhi kunengi kakhulu ezikwaziyo ngaye. Ziyakubona akwenzayo besezifunda ukuthi unguNkulunkulu onjani futhi lokhu kwenza zimdumise.—Jobe. 38:4-7.

7. Kuyini okungenza simdumise uJehova?

⁷ Lathi kumele sidumise uJehova emithandazweni yethu. Lokhu singakwenza ngokumtshela ukuthi simthandelani futhi simbonge ngalokho asenzela khona. Ngesikhathi ubala futhi utaditsha iBhayibhili zama ukubona ukuthi okubalayo kukufundisani ngoJehova. (Jobe. 37:23; Rom. 11:33) Ngemva kwalokho tshela uJehova ukuthi kuyini okuthandayo ngaye. Okunye okungenza udumise uJehova yikukhangela indlela akuncedisa ngayo lendlela ancedisa ngayo abafowethu labodadewethu emhlabeni jikelele. Uhlala esinakekela futhi esivikela.—1 Sam. 1:27; 2:1, 2.

8. Yiziphi ezinye izinto esingambonga ngazo uJehova? (U-1 Thesalonika 5:18)

⁸ Bonga uJehova. Kunengi esingakubonga kuJehova nxa sithandaza. (Bala u-1 Thesalonika 5:18.) Singambonga ngazo zonke izinto ezinhle esilazo. Phela zonke izipho ezinhle zivela kuye. (Jak. 1:17) Ngokwesibonelo, singambonga ngokuthi wasinika umhlaba omuhle kanye lezinye izinto azidalayo ezinhle okwamagama. Kumele simbonge ngesipho sokuphila, izimuli zethu, abangane esilabo kanye lethemba esilalo. Kanti njalo okunye esimbonga ngakho yikuthi usivumele ukuthi sibe ngabangane bakhe.

9. Kuyini okungabangela ukuthi sikhohlwe ukubonga uJehova?

⁹ Kumele usebenze ngamandla ukuze unanzelele izinto uJehova akwenzela zona ubusumbonga. Umhlaba esiphila kuwo ugcwele abantu abangabongiyo. Abantu abanengi bagijimisa okwabo lalokho abangakuthola kulokuthi babonge ngalokho abalakho. Nxa lathi singananzeleli, imithandazo yethu ingacina isingeyokucela nje kuphela. Yikho nxa singafuni imithandazo yethu ibe njalo kumele siqhubeke simbonga uJehova ngakho konke asenzela khona.—Luk. 6:45.

10. Ukuba ngumuntu obongayo kwamnceda njani udadewethu? (Khangela lomfanekiso.)

¹⁰ Nxa singaba ngabantu ababongayo sizenelisa ukulwisana lobunzima esingabe siphakathi kwabo. Ake sixoxe ngalokho okwenzakala kuKyung-sook okukhulunywa ngaye ku-Nqabayokulinda kaJanuary 15, 2015. Wabanjwa umkhuhlane wemvukuzane yamaphaphu. Wathi: “Ukubanjwa umkhuhlane lo kwangiqeda amandla, ngezwa angathi sengilahlekelwe yikho konke engilakho njalo ngangisesaba kakhulu.” Kuyini okwamnceda ukuthi abekezele? Wathi nsuku zonke engakalali wayeqansa aye ephahleni lwangakibo abesethandaza ebonga uJehova ngezinto ezinhlanu eziyabe zenzakele ngalolosuku. Lokho kwamnceda ukuthi ahlaliseke lokuthi atshengise ukuthi uyamthanda uJehova. Wazibonela ngawakhe ukuthi uJehova uyabancedisa abantu bakhe abathembekileyo nxa besebunzimeni.  Wananzelela lokuthi izibusiso esilazo zinengi kakhulu ukwedlula inhlupho ezingasehlela. Lanxa lathi singaba phakathi kobunzima, kulezinto ezinengi uJehova asenzele zona esingambonga ngazo njengalokho okwenziwa nguKyung-sook. Ukuthandaza kuNkulunkulu simbonga kuyasinceda ukuthi siqinisele ebunzimeni kuphinde kusincede lokuthi sihlaliseke.

11. Kungani kwakumele abafundi bakaJesu babe lesibindi uJesu esebuyele ezulwini?

¹¹ Cela ukuthi uJehova akunike isibindi sokuthi utshumayele. UJesu wathi esezabuyela ezulwini wakhumbuza abafundi bakhe ngomsebenzi ayebaphe wona. Umsebenzi lo wawungowokufakaza ngaye “eJerusalema lakulo lonke elaseJudiya leSamariya kuze kuyefika emaphethelweni omhlaba.” (Imiseb. 1:8; Luk. 24:46-48) Kungakayi ngaphi abakhokheli bamaJuda babopha umphostoli uPhetro loJohane, basebebaletha phambi kweSanihedrini babatshela ukuthi bayekele ukutshumayela futhi babethusela. (Imiseb. 4:18, 21) UPhetro loJohane benzani?

12. Kuyini okwenziwa ngabafundi okubhalwe kumiSebenzi 4:29, 31?

¹² UPhetro loJohane baphendula abakhokheli laba bathi: “Yahlulelani lina ukuthi kuqondile yini phambi kukaNkulunkulu ukuthi silalele lina kulokuthi silalele uNkulunkulu. Kodwa thina kasisoze siyekele ukukhuluma ngezinto esizibonileyo lesizizwileyo.” (Imiseb. 4:19, 20) UPhetro loJohane bathi sebekhululiwe bathandaza kuJehova bembonga ngokuthi wayebancedisile ukuthi benze intando yakhe. Bathandaza bathi: “[Sicela] unike izinceku zakho amandla okuthi ziqhubeke zikhuluma ilizwi lakho ngesibindi esikhulu.” UJehova wawuphendula umthandazo wabo.—Bala imiSebenzi 4:29, 31.

13. Sifundani kuJin-hyuk?

¹³ Nxa iziphathamandla zingathi siyekele ukutshumayela, singalingisela abalandeli bakaJesu ngokuqhubeka sitshumayela. Ake sixoxe ngoJin-hyuk, umfowethu owake wabotshwa ngenxa yokungangeni kwezombusazwe. Ngesikhathi esejele waphiwa umsebenzi wokuthi aphe ezinye izibotshwa ezazivalelwe zodwa ukudla lezinye izinto. Kodwa kwakungamelanga axoxe lazo ngaloba yini engaphathelananga lomsebenzi, okutsho ukuthi kwakungamelanga axoxe lazo ngeBhayibhili. Wacela ukuthi uJehova amnike isibindi lokuthi akhethe kuhle amazwi nxa engathola ithuba lokuthi azitshumayeze. (Imiseb. 5:29) Uthi: “Lakanye uJehova wayiphendula imithandazo yami wangipha isibindi lokuhlakanipha, ngenelisa ukuba lezingxoxo zeBhayibhili ezazithatha imizuzu emihlanu lezibotshwa lezo. Ntambama ngangibhala izincwadi engangizabanika zona ngelanga elilandelayo.” Lathi asithandabuzi ukuthi uJehova uzasincedisa ukuthi siqhubeke sitshumayela. NjengoJin-hyuk singathandaza kuye sicela ukuthi asinike isibindi lokuhlakanipha

14. Kuyini okungasinceda nxa silenhlupho? (IHubo 37:3, 5)

¹⁴ Cela uJehova akuncedise nxa ulenhlupho. Ngobunengi bethu kulenhlupho esihlangana lazo. Abanye bayagula, abanye balezinto ezibakhathazayo, abanye bangabe bafelwe, abanye belenhlupho emulini futhi abanye bangabe behlukuluzwa. Kanti njalo okunye okwengezelela inhlupho zethu yizimpi kanye lemikhuhlane ememethekayo. Kuyini okungakunceda ukuthi ulwisane lenhlupho lezi? Tshela uJehova konke okusenhliziyweni yakho, mtshele konke okwenzakalayo ngendlela obungatshela ngayo umngane wakho  omthembileyo futhi ungathandabuzi ukuthi “uzakusiza.”—Bala iHubo 37:3, 5.

15. Nika isibonelo esitshengisa ukuthi ukuthandaza kungasinceda njani ukuthi ‘siqinisele ebunzimeni’?

¹⁵ Ukuhlala sithandaza kuzasinceda ukuthi ‘siqinisele ebunzimeni.’ (Rom. 12:12) UJehova uyakwazi konke okwenzakala ebantwini bakhe futhi “uyakuzwa ukukhala kwabo becela uncedo” kuye. (Hubo. 145:18, 19) Omunye udadewethu oliphayona futhi oleminyaka engu-29 okuthiwa nguKristie wakubona lokhu. Kulesikhathi lapho agula khona kakhulu futhi lokhu kwamenza wahlulukelwa. Ngemva kwesikhathi wezwa ukuthi unina laye wayebanjwe umkhuhlane owawungambulala. UKristie uthi: “Ngathandaza ngisathandaza ngicela ukuthi uJehova anginike amandla okuthi ngenelise ukuqinisela. Angizange ngiyekele ukwenza izinto ezaziqinisa ukholo lwami ezinjengokuya emihlanganweni lokutaditsha ngingedwa.” Uphinda athi: “Ukuthandaza kwanginceda ukuthi ngiphume esizibeni esimnyama engangikuso. Ngangikwazi ukuthi uJehova kangitshiyanga futhi lokhu kwakungiduduza kakhulu. Lanxa ukugula kwami kungazange kuhle kuphele uJehova waphendula imithandazo yami ngokunginceda ukuthi ngingakhathazeki kakhulu lokuthi ngihlaliseke.” Kwangathi singahlala sikhumbula ukuthi “uJehova uyakwazi ukubahlenga ekulingweni abantu abazinikele kuye.”—2 Phet. 2:9.

16. Kungani kumele sicele ukuthi uJehova asincedise sinqobe izilingo?

¹⁶ Cela ukuthi uJehova akuncedise unqobe izilingo. Kumele sihlale silwisa ukuthi singenzi izinto ezimbi ngoba singabantu abalesono. USathane laye usebenza nzima ukuthi asilinge. Usebenzisa indlela zokuzilibazisa ezingcolileyo ukuze aphambanise indlela esicabanga ngayo. Ukuzilibazisa okunjalo kwenza ukuthi sihlale sicabanga izinto ezingcolileyo ezingenza ukuthi sibe ngabangcolileyo phambi kukaNkulunkulu, mhlawumbe  size senze lesono esikhulu.—Mak. 7:21-23; Jak. 1:14, 15.

17. Nxa singathandazela ukuthi uJehova asincede sinqobe isilingo kuyini okuyabe sokumele sikwenze? (Khangela lomfanekiso.)

¹⁷ Nxa sifuna ukunqoba isilingo sokwenza okungalunganga kumele sicele ukuthi uJehova asincedise. Yikho loJesu waze wathi nxa sithandaza sithi: “Ungasingenisi ekulingweni kodwa usikhulule komubi.” (Mat. 6:13) UJehova uyafuna sibili ukuthi asincedise kodwa kumele simcele. Kanti njalo kumele senze lokho esiyabe sikuthandazele. Kumele sibalekele izinto ezingenza ukuthi izingqondo zethu zigcwale imicabango emibi ejayelekileyo emhlabeni lo kaSathane. (Hubo. 97:10) Ukubala lokutaditsha iBhayibhili kuzakwenza ukuthi sihlale sicabanga ngezinto ezisincedayo. Okunye okuzasinceda ukuthi sihlale sicabanga izinto eziqondileyo yikuya emihlanganweni yebandla lokutshumayela. Singenza njalo asithandabuzi ukuthi uJehova kasoze avume ukuthi silingwe ngalokho esingeke senelise ukukubekezelela.—1 Khor. 10:12, 13.

18. Kuyini okumele sikwenze?

¹⁸ Ngamunye wethu kumele ahlale ethandaza kuJehova ukuze aqhubeke ethembekile ezinsukwini lezi zokucina okunzima ukuphila kuzo. Zinike isikhathi sokuthululela uJehova okusesifubeni sakho nsuku zonke. UJehova ufuna ‘simtshele konke okusezinhliziyweni zethu.’ (Hubo. 62:8) Mdumise futhi umbonge ngakho konke akwenzela khona. Mcele ukuthi akunike isibindi sokutshumayela. Mcele ukuthi akuncedise nxa ulenhlupho lokuthi akunike amandla okunqoba izilingo. Ungavumeli loba yini kumbe loba ngubani akwenze ukuthi ungahlali uthandaza kuJehova. Kodwa uJehova uyiphendula njani imithandazo yethu? Sizaxoxa ngombuzo lo oqakathekileyo esihlokweni esilandelayo.