ISIFUNDO 21
UJehova Uyiphendula Njani Imithandazo Yethu?
“Siyakwazi ukuthi sizazithola izinto esizicelayo njengoba siyabe sizicele kuye.”—1 JOH. 5:15.
INGOMA 41 Zwana Umkhuleko Wami
ESIZAKUFUNDA a
1-2. Kuyini esingazibuza khona ngemithandazo yethu?
UYAKE uzibuze ukuthi uJehova uyayiphendula yini imithandazo yakho? Nxa wake wazibuza umbuzo lo ayisuwe wedwa. Banengi abafowethu labodadewethu asebeke bazibuza wona, ikakhulu nxa bephakathi kwelitshe lembokodo. Kungaba nzima ukuthi lathi sibone indlela uJehova ayabe ephendula ngayo imithandazo yethu ikakhulu nxa siphakathi kohlupho.
2 Asixoxeni ngokuthi kuyini okungenza sibe leqiniso lokuthi uJehova uyayiphendula imithandazo yezinceku zakhe. (1 Joh. 5:15) Sizaxoxa langemibuzo le: Kuyini okungenza sibone angathi uJehova kayiphenduli eminye imithandazo yethu? UJehova uyiphendula njani imithandazo yethu?
UJEHOVA ANGAPHENDULA NGENDLELA ESINGAYIKHANGELELANGA
3. Kungani uJehova efuna sithandaze kuye?
3 IMibhalo isenza singathandabuzi ukuthi uJehova uyasithanda kakhulu lokuthi siligugu kuye. (Hag. 2:7; 1 Joh. 4:10) Yikho esithi sithandaze kuye sicela ukuthi asincedise. (1 Phet. 5:6, 7) Uzimisele ukusincedisa ukuthi sihlale singabangane bakhe lokuthi senelise ukulwisana lenhlupho ezisehlelayo.
UJehova waphendula imithandazo kaDavida ngokumvikela ezitheni zakhe (Khangela indima 4)
4. Sikwazi njani ukuthi uJehova uyayiphendula imithandazo yezinceku zakhe? (Khangela lomfanekiso.)
4 Kulamavesi amanengi eBhayibhilini asitshela ngendlela uJehova ayephendula ngayo imithandazo yabantu bakhe. Ukhona yini omkhumbulayo? Ake sixoxe ngeNkosi uDavida. Wayehlala ehlaselwa yizitha zakhe futhi izikhathi ezinengi wayecela ukuthi uJehova amncedise. Ngokwesibonelo, wake wathandaza wathi: “Awu Jehova, zwana umthandazo wami, lalela nxa ngikuncenga ukuthi ungincede. Ngiphendula ngoba wena uthembekile futhi ulungile.” (Hubo. 143:1) UJehova wayiphendula imithandazo kaDavida ngoba wamkhulula. (1 Sam. 19:10, 18-20; 2 Sam. 5:17-25) Yikho uDavida wakhuluma engathandabuzi wathi: “UJehova useduze labantu bonke abambizayo.” Lathi asikuthandabuzi lokhu okwatshiwo nguDavida.—Hubo. 145:18.
UJehova waphendula imithandazo kaPhawuli ngokumnika amandla okuthi aqinisele (Khangela indima 5)
5. Imithandazo yezinceku zikaJehova yayihlala iphendulwa ngendlela ezaziyikhangelele yini? Nika isibonelo. (Khangela lomfanekiso.)
5 Kwezinye izikhathi uJehova angaphendula imithandazo yethu ngendlela esiyabe singayikhangelelanga. Lokhu yikho okwenzakala kumphostoli uPhawuli. Wacela ukuthi uNkulunkulu akhiphe “ameva enyameni” yakhe. UPhawuli wakhuleka kathathu etshela uNkulunkulu ngohlupho lolu. UJehova wayiphendula yini imithandazo yakhe? Wayiphendula sibili, kodwa kenzanga lokho uPhawuli ayekukhangelele. UJehova kazange alususe uhlupho lwakhe, kodwa wamnika amandla okuthi aqhubeke emkhonza ethembekile.—2 Khor. 12:7-10.
6. Kuyini okungenza kukhanye angathi eminye imithandazo yethu kayiphendulwa?
6 Lathi kwezinye izikhathi imithandazo yethu ingaphendulwa ngendlela ebesingayikhangelelanga. Kodwa uJehova uyakwazi khona kanye esikudingayo lokuthi angasincedisa njani. Phela uyenelisa ukwenza “izinto ezinkulu kakhulu ukwedlula lezo esizicelayo kumbe esizicabangayo.” (Efe. 3:20) Lokhu kutsho ukuthi uJehova angaphendula imithandazo yethu ngesikhathi esingasikhangelelanga kumbe ngendlela esingayicabangeliyo.
7. Kuyini okungenza sitshintshe izinto ebesizithandazela? Nika isibonelo.
7 Nxa singaqhubeka sizwisisa intando kaNkulunkulu singabona ukuthi sekumele sitshintshe lokho esikuthandazelayo. Ake sixoxe ngesibonelo sikaMartin Poetzinger. Wathi esanda kutshada wabotshwa wasevalelwa enkambeni yokuhlukuluzwa yamaNazi. Ekuqaliseni wathandazela ukuthi akhululwe enkambeni le ukuze ayenakekela umkakhe futhi aqhubeke ngomsebenzi wokutshumayela. Kodwa ngemva kwamaviki amabili akulalutho alubonayo olwalutshengisa ukuthi uJehova wayezakwenza ukuthi akhululwe. Ngakho umfowethu uPoetzinger watshintsha ayekuthandazela wasethandaza esithi: “Jehova, ngicela ungitshengise lokho ofuna ngikwenze.” Waqalisa ukucabanga ngobunzima abanye abafowethu ababesenkambeni le ababephakathi kwabo. Abanengi babo babekhathazeke kakhulu ngabomkabo langabantwababo. Umfowethu uPoetzinger wasethandaza wathi: “Jehova, ngiyabonga ngomsebenzi lo omutsha osungiphe wona. Ngicela ungincedise ngiqinise abafowethu futhi ngibakhuthaze.” Lakanye yiwo umsebenzi awenzayo okweminyaka eyi-9 eyalandelayo!
8. Kuyini okumele sihlale sikukhumbula nxa sithandaza?
8 Kumele sikhumbule ukuthi uJehova ulenhloso yakhe futhi uzayigcwalisa ngesikhathi sakhe asikhethileyo. Uthembisa ukuqeda du zonke inhlupho ezisithwalise amagabha avuzayo, ezinjengezingozi zemvelo, ukugula lokufa. Uzakwenza konke akuhlosileyo esebenzisa uMbuso wakhe. (Dan. 2:44; Isam. 21:3, 4) Kodwa okwakhathesi usavumela ukuthi uSathane abuse umhlaba. b (Joh. 12:31; Isam. 12:9) Aluba uJehova ubengaqeda inhlupho zabantu khathesi, bekungakhanya angani uSathane uyenelisa ukubusa kuhle. Kodwa njengoba sisalindele ukuthi uJehova agcwalise izithembiso zakhe, sekusitsho yini ukuthi kasincedisi nxa silenhlupho? Asixoxeni ngezinye izindlela uJehova asincedisa ngazo.
UJEHOVA UYIPHENDULA NJANI IMITHANDAZO YETHU?
9. UJehova angasincedisa njani ukuthi senze izinqumo ezinhle? Nika isibonelo.
9 Usinika ukuhlakanipha. UJehova usithembisa ukuthi uzasinika ukuhlakanipha ukuze senze izinqumo ezinhle. Siyakudinga ukuhlakanipha okuvela kuNkulunkulu nxa sisenza izinqumo eziqakatheke kakhulu, ezinjengokuthi sizahlala singatshadanga yini kumbe sizatshada. (Jak. 1:5) Ake sixoxe ngodadewethu ongatshadanga okuthiwa nguMaria. c Wayezikholisela ukuphayona ngesikhathi ebona omunye umfowethu. Uthi: “Saba ngabangane ngasengiqalisa ukuzwa ngimthanda umfowethu lo futhi laye wayesengithanda. Kwasekumele ngenze isinqumo yikho ngathandaza kanengi ngendaba le. Ngangifuna ukuthi uJehova angikhokhele kodwa ngangikwazi ukuthi kasoze angenzele isinqumo.” UMaria uyavuma ukuthi uJehova wamnika ukuhlakanipha okwamenza wenza isinqumo esiqondileyo. Njani? Wathola izimpendulo zemibuzo ayelayo ngesikhathi echwayisisa emabhukwini enhlanganiso njalo walalela amacebo amahle ayewaphiwa ngunina. Amacebo la amnceda ukuthi abone okwakumele akwenze. Ekucineni wenza isinqumo esihle.
UJehova usinika njani amandla okuthi siqinisele? (Khangela indima 10)
10. UFiliphi 4:13 uthi uJehova ubancedisa njani abantu bakhe? Nika isibonelo. (Khangela lomfanekiso.)
10 Usinika amandla okuthi senelise ukuqinisela. UJehova uzasinika amandla okuthi siqinisele nxa siphakathi kohlupho njengoba nje wenza njalo kumphostoli uPhawuli. (Bala uFiliphi 4:13.) Ngokwesibonelo wanceda omunye umfowethu okuthiwa nguBenjamin ukuthi aqinisele. Kusukela uBenjamin esesemncane yena labangakibo babehlala enkambeni yeziphepheli kwelinye ilizwe e-Africa. UBenjamin uthi: “Ngangihlala ngithandaza kuJehova ngimcela ukuthi anginike amandla okuthi ngenelise ukwenza izinto ezimthokozisayo. Lakanye uJehova wayiphendula imithandazo yami, wanginceda ukuthi ngingakhathazeki kakhulu. Wanginika lesibindi sokuthi ngiqhubeke ngitshumayela kanye lamabhuku anginceda ukuthi ngihlale ngingumngane wakhe.” Uqhubeka esithi: “Ukubala ngalokho okwenzakala kwabanye oFakazi lokubona indlela uJehova abancedisa ngayo ukuthi baqinisele kwangenza ngazimisela ukuqhubeka ngithembekile.”
UJehova wake wakuncedisa yini esebenzisa abafowethu labodadewethu? (Khangela indima 11 lo-12) d
11-12. UJehova ubasebenzisa njani esikhonza labo ukuze aphendule imithandazo yethu? (Khangela lomfanekiso.)
11 Usebenzisa abafowethu labodadewethu esikhonza labo. UJesu wathi esezanikela ngokuphila kwakhe wakhuleka esakhuleka kuYise. Wayecela uJehova ukuthi angavumeli ukuthi abantu bamahlulele ngokuthi uthuke uNkulunkulu. Kodwa uJehova kazange amvikele kulokho, wamncedisa ngokuthuma ingilosi ukuthi imqinise. (Luk. 22:42, 43) Lathi uJehova angasincedisa esebenzisa omunye umfowethu kumbe udadewethu ukuthi asikhuthaze. Sonke kumele sizimisele ukukhuthaza abafowethu labodadewethu ngokubatshela “ilizwi elihle.”—Zaga. 12:25.
12 Omunye udadewethu okuthiwa nguMiriam wafelwa ngumkakhe. Ngemva kwamaviki amalutshwana umkakhe etshonile uMiriam wasala eseyedwa. Wayezibona eyindlubu ewele ephokweni futhi wayehlulukelwe. Wayekhala zize zome njalo wayefisa ukuthi aluba kulomuntu angamtshela lokho akuzwayo. Uthi: “Ngathandaza kuJehova ngoba ngangingelamandla okufonela loba ngubani. Ngathi ngilokhu ngikhala ngithandaza ngezwa sengifonelwa ngumdala webandla lomkakhe ababengabangane bami.” Abangane bakhe laba bamduduza. UMiriam kathandabuzi ukuthi umfowethu lo wayethunywe nguJehova ukuthi amfonele.
UJehova angasebenzisa njani abanye ukuthi basincedise? (Khangela indima 13 lo-14)
13. Nika isibonelo esitshengisa ukuthi uJehova angasebenzisa abantu abangakhonziyo ukuze aphendule imithandazo yethu.
13 Angasebenzisa abantu abangamkhonziyo. (Zaga. 21:1) Ngezinye izikhathi uJehova angaphendula imithandazo yabantu bakhe esebenzisa abantu abangamkhonziyo. Ngokwesibonelo, wenza ukuthi iNkosi u-Athakisekisi iphe uNehemiya imvumo yokuthi aye eJerusalema ukuze ayencedisa emsebenzini wokwakha kutsha imiduli yedolobho lelo. (Neh. 2:3-6) Lalamuhla uJehova angasebenzisa abantu abangamkhonziyo ukuze basincede nxa sidinga usizo.
14. Ufundeni kulokho okwenzakala kuSoo Hing? (Khangela lomfanekiso.)
14 Udadewethu okuthiwa nguSoo Hing uthi uJehova wamncedisa esebenzisa udokotela wakhe. Indodana yakhe ihlutshwa yimikhuhlane etshiyeneyo ehlasela ingqondo. Yaba sengozini embi futhi lokhu kwenza ukuthi uSoo Hing lomkakhe batshiye imisebenzi yabo ukuze bayinakekele. Kodwa bacina bengaselamali. USoo Hing uthi kwasekumnyama emuva laphambili. Watshela uJehova konke okwakusenhliziyweni yakhe ecela ukuthi amncedise. Lakanye udokotela ababeye kuye wabancedisa bathola usizo kuhulumende kanye lendawo yokuhlala engaduliyo. Ngemva kwalokho, uSoo Hing wathi: “Ngayibona indlela uJehova ayesincedisa ngayo. Liqiniso sibili ukuthi ‘uyayilalela imithandazo.’”—Hubo. 65:2.
KUMELE SIBE LOKHOLO UKUZE SIBONE UKUTHI UJEHOVA UYIPHENDULA NJANI IMITHANDAZO YETHU
15. Kuyini okwanceda omunye udadewethu wabona ukuthi uJehova wayeyiphendula imithandazo yakhe?
15 Izikhathi ezinengi imithandazo yethu ayiphendulwa ngendlela esiyikhangeleleyo. Kodwa indlela esiphendulwa ngayo iyasinceda ukuthi sihlale siqotho kuBaba wethu osezulwini. Ngakho woba lelihlo elibukhali ukuze ubone indlela uJehova aphendula ngayo imithandazo yakho. Udadewethu okuthiwa nguYoko wake wacabanga ukuthi uJehova kayiphenduli imithandazo yakhe. Kodwa waqalisa ukubhala phansi zonke izinto ayezicela kuJehova. Ngokuya kwesikhathi wakhangela lapho ayebhale khona, wasebona ukuthi uJehova wayephendule imithandazo yakhe eminengi kanye laleyo ayesekhohlwe ngayo. Kuhle ukuthi sihlale sizinika isikhathi sokucabangisisa ngendlela uJehova aphendula ngayo imithandazo yethu.—Hubo. 66:19, 20.
16. Singatshengisa njani ukuthi silokholo sisalindele ukuthi imithandazo yethu iphendulwe? (UHebheru 11:6)
16 Sitshengisa ukuthi silokholo kuJehova ngokuthandaza kuye kodwa akupheleli lapho. Kuyabe kumele samukele lendlela aphendula ngayo imithandazo yethu. (Bala uHebheru 11:6.) UMike lomkakhe uChrissy babefuna ukuyasebenza eBhetheli. UMike wathi: “Sawafila kanengi amafomu okuyasebenza eBhetheli futhi sathandaza kuJehova kanengi simtshela ngesifiso sethu kodwa asizange sibizwe.” UMike loChrissy babengathandabuzi ukuthi uJehova uyakwazi ukuthi wayezabasenzisa njani. Babesenza konke okusemandleni abo, baqhubeka bephayona lapho okulabamemezeli abalutshwana khona futhi bencedisa ukwakha izakhiwo zenhlanganiso. Khathesi basemsebenzini wokuhambela. UMike uthi: “Kwezinye izikhathi uJehova ubengaphenduli imithandazo yethu ngendlela ebesiyikhangelele, kodwa ubeyiphendula sibili futhi ngezinye izikhathi ngendlela engcono kakhulu kulaleyo esiyabe siyikhangelele.”
17-18. Kuyini esingakuthandabuziyo? (IHubo 86:6, 7)
17 Bala iHubo 86:6, 7. Umhubi uDavida wayeleqiniso lokuthi uJehova wayeyizwa futhi eyiphendula imithandazo yakhe. Lawe ungaba leqiniso lokuthi uJehova uyayizwa futhi ayiphendule imithandazo yakho. Esixoxe ngakho esihlokweni lesi kwenza singathandabuzi ukuthi uJehova uyasinika ukuhlakanipha lamandla okuthi siqinisele. Angasincedisa esebenzisa abantu esikhonza labo kumbe abanye abantu abangamkhonziyo.
18 Siyakwazi ukuthi uJehova uyayiphendula imithandazo yethu lanxa kwezinye izikhathi eyiphendula ngendlela esingayikhangelelanga. Uzasipha khona kanye esikudingayo ngesikhathi esiyabe sikudinga ngaso. Yikho qhubeka uthandaza ulokholo lokuthi uJehova uzakunakekela khathesi lokuthi ‘uzasuthisa izifiso zakho konke okuphilayo’ emhlabeni omutsha ozayo.—Hubo. 145:16.
INGOMA 46 Siyakubonga Jehova
a UJehova uyasiqinisekisa ukuthi uzayiphendula imithandazo yethu nxa ihambelana lentando yakhe. Lanxa singaba lenhlupho, asithandabuzi ukuthi uzasincedisa ngakho konke esikudingayo ukuze siqhubeke sithembekile kuye. Sizaxoxa ngokuthi uJehova uyiphendula njani imithandazo yethu.
b Ukuze ufunde okunengi ngokuthi kungani uJehova evumela ukuthi uSathane abuse umhlaba khangela isihloko esithi: “Hlala Ucabanga Ngobukhosi BukaJehova,” ku-Nqabayokulinda kaJune 2017.
c Amanye amabizo atshintshiwe.
d OKUSEMFANEKISWENI: Umama lomntanakhe bafika endaweni yeziphepheli kwelinye ilizwe. Abafowethu labodadewethu babamukela ngazo zombili futhi bayabancedisa.
