1. Kuyini abanengi abalwisana lakho endabeni yokuhlela okokwenza?

 KUKHONA yini owake wahlela ukukwenza ukuze wenzele uJehova okunengi kodwa kwehlula ukuthi uphumelele ukukwenza? b Nxa kukhona, ayisuwe wedwa. Omunye umzalwane okuthiwa nguPhilip wayefisa ukuthi imithandazo yakhe ibe lohlonzi lokuthi athandaze kanengi, kodwa kwakunzima ukuthi athole isikhathi sokuthi athandaze. U-Erika yena wayefisa ukuthi aphangise emihlanganweni yokuya ekutshumayeleni kodwa wayehlala ephuzile. UTomáš wazama kanengi ukuthi abale iBhayibhili lonke aliqede. Uthi: “Ngangingakukholisi ukubala iBhayibhili. Ngazama kathathu ukulibala, kodwa ngangiphelela kuLevi.”

2. Kungani kungamelanga sikhalale nxa kusehlula ukwenza lokho esikuhlelileyo?

² Nxa kuyikuthi kukhona owawuhlele ukukwenza kodwa akukaphumeleli, ungacabangi ukuthi vele uyazehlulekela. Phela kudinga isikhathi ukuthi usebenze nzima ukuze uphumelele ukwenza lokho oyabe ukuhlelile lanxa kuyabe kukuncane. Khonokho ukuthi uyazama ukwenza okuhlelileyo kutshengisa ukuthi uyabuqakathekisa ubungane bakho loJehova lokuthi uyafisa ukumnika okungcono kakhulu olakho. UJehova uyakuqakathekisa kakhulu okwenzayo. Kakhangelelanga ukuthi umenzele lokho ongeke wenelise ukukwenza. (Hubo. 103:14; Mik. 6:8) Nxa uhlela ofuna ukukwenza, khetha lokho ongakwenelisa kusiya ngezimo zakho. Nxa usukukhethile ofuna ukukwenza, ungenzani ukuze uphumelele? Asixoxe ngokunye kwakhona.

3. Kuqakatheke ngani ukuba lesifiso esikhulu sokwenza lokho okuhlelileyo?

³ Kuqakatheke kakhulu ukuthi ube lesifiso esikhulu sokwenza lokho okuhlelileyo. Nxa ulesifiso esikhulu, uzasebenza nzima ukuthi ukwenze. Isifiso leso singasifanisa lomoya ofuqa isikepe ukuthi sihambe size siyefika lapho esiya khona. Nxa umoya ungaqhubeka uvunguza, isikepe siyafika lapho esiya khona. Nxa kulomoya omnengi singaphangisa kakhulu ukufika. Lathi nxa silesifiso esikhulu kuzaba lula ukuthi siphumelele ukwenza lokho esikuhlelileyo. Omunye umzalwane we-El Salvador okuthiwa nguDavid uthi: “Nxa isifiso sisikhulu, uyasebenza ngamandla. Awuvumi ukuthi kube lento ekuvimbayo ukuthi wenze lokho okuhlelileyo.” Manje ungenzani ukuze ube lesifiso esikhulu?

4. Kuyini esingakuthandazela? (UFiliphi 2:13) (Khangela lomfanekiso.)

⁴ Thandaza ukuze ube lesifiso esikhulu. UJehova angasebenzisa umoya wakhe ongcwele ukuze akwenze ube lesifiso sokwenza okuhlelileyo. (Bala uFiliphi 2:13.) Kwesinye isikhathi siyahlela esifuna ukukwenza ngoba sikwazi ukuthi yikho okumele sikwenze futhi lokho kuhle. Lanxa kunjalo singabe singelaso isifiso sokuthi sikwenze. Lokho yikho okwenzakala kudadewethu okuthiwa nguNorina ose-Uganda. Wayehlele ukuthi athole umuntu angamfundisa iBhayibhili kodwa wayengelaso isifiso esikhulu sokuthi enze njalo ngoba wayebona angani kafundisi kuhle. Kuyini okwamncedayo? Uthi: “Ngangithandaza nsuku zonke ngimncenga uJehova ukuthi angenze ngibe lesifiso esikhulu sokufundisa umuntu iBhayibhili. Ngazama ukuthi ngithuthukise indlela engifundisa ngayo ukuze engikwenzayo kuhambelane lalokho engangikuthandazela. Ngemva kwenyanga ezilutshwana ngananzelela ukuthi ngasengifuna sibili ukuqhuba isifundo seBhayibhili. Ngalowomnyaka ngaqalisa ukufunda labantu ababili iBhayibhili.”

5. Kuyini esingacabangisisa ngakho ukuze sibe lesifiso sokwenza esikuhlelileyo?

⁵ Cabangisisa ngalokho uJehova akwenzele khona. (Hubo. 143:5) Umphostoli uPhawuli wacabangisisa ngomusa omkhulu ayewenzelwe nguJehova njalo lokho kwenza wafuna ukumsebenzela nzima. (1 Khor. 15:9, 10; 1 Thim. 1:12-14) Lawe nxa ungacabangisisa ngalokho uJehova akwenzele khona, uzaba lesifiso esikhulu sokwenza lokho okuhlelileyo. (Hubo. 116:12) Omunye udadewethu ohlala eHonduras waphumelela ukuba liphayona lesikhathi sonke. Kuyini okwamncedayo? Uthi: “Ngacabangisisa ngokuthi uJehova ungithanda kangakanani. Wangiletha ebantwini bakhe. Ulendaba lami futhi uyangivikela. Ukucabangisisa ngalokho kwangenza ngamthanda kakhulu futhi ngaba lesifiso esikhulu sokumsebenzela.”

6. Kuyini okunye okungasinceda ukuthi sibe lesifiso esikhulu sokwenza esikuhlelileyo?

⁶ Cabanga ngezibusiso ozazithola nxa ungaphumelela ukwenza okuhlelileyo. Zwana ukuthi kuyini okwanceda u-Erika esike sakhuluma ngaye ukuthi enelise ukubamba isikhathi. Uthi:  “Ngananzelela ukuthi kunengi engangikukhutha nxa ngingaphuza ekutshumayeleni. Kodwa nxa ngangiphangisa ukufika, ngangithola ithuba lokubingelela abafowethu labodadewethu ngixoxe labo. Ngangithola lamacebo ayenginceda ukuthi ngithuthukise inkonzo yami futhi ngikukholise ukutshumayela.” U-Erika waphumelela ngoba wacabangisisa ngokuthi kwakumnceda ngani ukubamba isikhathi. Wena yiziphi izibusiso ongacabangisisa ngazo? Nxa uhlele ukuthuthukisa indlela obala ngayo iBhayibhili kumbe imithandazo yakho, cabangisisa ngokuthi lokho kuzakunceda njani ukuthi usondele kuJehova. (Hubo. 145:18, 19) Nxa ufisa ukuba lobunye ubuntu obunjengobukaKhristu, cabangisisa ngokuthi ubuntu lobo buzakunceda njani ukuthi uphilisane kuhle labanye. (Kol. 3:14) Kungaba kuhle ukuthi ubhale izizatho ezenza ufise ukuphumelela kulokho okuhlelileyo. Hlala uzikhangela izinto lezo ozibhalileyo. UTomáš esike sakhuluma ngaye uthi: “Nxa ngilezizatho ezinengi ezenza ngifise ukuphumelela kwengikuhlelileyo, kukalutshwana ukuthi ngikhalale.”

7. Kuyini okwanceda uJulio lomkakhe ukuthi baphumelele ukwenza lokho ababekuhlelile?

⁷ Woba labangane abazakukhuthaza. (Zaga. 13:20) UJulio lomkakhe bayasitshela ukuthi kuyini okwabancedayo ukuthi baphumelele ukuyancedisa endaweni elabamemezeli abalutshwana. UJulio uthi: “Sakhetha abangane ababesikhuthaza ukuthi senze lokho esasikuhlelile futhi sasixoxa labo ngakho. Abanengi babo basebephumelele ukwenza lokho esasifisa ukukwenza yikho babesinika amacebo ayesinceda. Abangane bethu laba babesibuza ukuthi kuhamba njani futhi babesikhuthaza ngesikhathi esasisidinga ngaso isikhuthazo.”

8. Kungenzakalani nxa singenza lokho esikuhlelileyo mhla sisizwa silesifiso kuphela? (Khangela lomfanekiso.)

⁸ Iqiniso elikhona yikuthi kwezinye izikhathi siyabe sisizwa singelasifiso sokwenza lokho esikuhlelileyo. Manje lokho sekusitsho yini ukuthi sihlale phansi sigoqe izandla? Hatshi. Nanku umzekeliso ongasinceda: Nxa kulomoya, kulula ukuthi isikepe sihambe size siyefika lapho esiya khona. Kwezinye izikhathi umoya uyabe umnengi kodwa kwezinye izikhathi uyabe umlutshwana futhi kwamanye amalanga uyabe ungekho ngitsho. Lokhu sekusitsho ukuthi isikepe siyahle simele khonapho yini? Hayi. Phela ezinye izikepe zilenjini, ezinye zilezigodo zokugwedla. Ngakho umtshayeli wesikepe angavusa injini kumbe agwedle ngezigodo lezo aqhubeke ngohambo lwakhe. Isifiso sethu sokufuna ukwenza lokho esikuhlelileyo singasifanisa lomoya. Kwezinye izikhathi singezwa sifuna sibili ukukwenza kodwa kwezinye izikhathi singezwa kusala. Ngakho nxa lokho esiyabe sikuhlelile sikwenza kuphela mhla sisizwa silesifiso, kungaba nzima ukuthi siphumelele ukukwenza. Kodwa singenza njengomtshayeli wesikepe othi nxa kungelamoya adinge ezinye izindlela ezingamnceda ukuthi ayefika lapho afuna ukuya khona, sisebenze nzima ukwenza lokho esiyabe sikuhlelile lanxa kwezinye izikhathi sisizwa kungatsho. Lanxa kwezinye izikhathi kuyabe kunzima, uzathokoza nxa  ungaphumelela ukwenza lokho oyabe ukuhlelile. Singakakhulumi ngalokho esingakwenza, ake siqale sixoxe ngombuzo ongaba khona.

9. Kuqondile yini ukuthi siyekele ukwenza lokho esiyabe sikuhlelile nxa sisizwa kungatsho? Chasisa.

⁹ UJehova ufuna simkhonze ngenhliziyo yonke sithokoza. (Hubo. 100:2; 2 Khor. 9:7) Manje lokho kutsho ukuthi siyekele yini ukwenza lokho esikuhlelileyo nxa sisizwa kungatsho? Cabanga ngalokho okwenziwa ngumphostoli uPhawuli. Wathi: “Ngiyawulaya umzimba wami ngiwenze ube yisigqili.” (1 Khor. 9:25-27, amabala angaphansi; khangela umcijo wokutaditsha ku-Nguqulo Yomhlaba Omutsha yesiNgisi kuvesi 27) Kwezinye izikhathi uPhawuli wayesizwa kungatsho ukuthi enze okulungileyo kodwa wayezibamba ngamandla ukuthi akwenze. UJehova wathokoza ngaye yini? Ye, futhi waze wambusisa ngenxa yemizamo yakhe.—2 Thim. 4:7, 8.

10. Kunceda ngani ukulwisa ukwenza lokho esikuhlelileyo lanxa kuyabe kungatsho?

¹⁰ UJehova uyathokoza nxa lathi sisenza konke okusemandleni ethu ukuze senze esikuhlelileyo lanxa kuyabe kungatsho. Okumthokozisayo yikuthi lanxa kwezinye izikhathi siyabe singakuthandi lokho esikwenzayo, uyakwazi ukuthi sikwenza ngenxa yokuthi siyamthanda. Imizamo esiyenzayo izakwenza ukuthi uJehova asibusise ngendlela abusisa ngayo uPhawuli. (Hubo. 126:5) Nxa singabona indlela uJehova asibusisa ngayo, siyaba ledlabuzane lokwenza lokho esikuhlelileyo. Udadewethu okuthiwa nguLucyna ohlala ePoland uthi: “Kwezinye izikhathi ngiyabe ngingafuni ukuya ekutshumayeleni ikakhulu nxa ngidiniwe. Kodwa nxa ngingahamba ngiyathokoza kakhulu futhi lokho ngikubona kuyisipho esihle.” Khathesi asixoxeni ngalokho esingakwenza nxa sisizwa singelasifiso sokwenza lokho esikuhlelileyo.

11. UJehova angasincedisa njani ukuthi sizibambe?

¹¹ Thandaza ucele uJehova ukuthi akuncedise ukuthi uzibambe. Umuntu ozibambayo kaphongulandela lokho azwa kusithi akwenze. Izikhathi ezinengi ibala leli litsho umuntu ozikhuzayo ukuze angenzi into embi. Ukuzibamba kuyasinceda ukuthi senze okuhle ikakhulu nxa kunzima ukuthi senze njalo kumbe nxa sisizwa kungatsho. Khumbula ukuthi ukuzibamba yisithelo somoya, yikho kuyabe kumele sicele uJehova asinike umoya wakhe ongcwele ukuze usincedise sibe ngabantu abazibambayo. (Luk. 11:13; Gal. 5:22, 23) UDavid esike sakhuluma ngaye uyasitshela ukuthi ukuthandaza kwamnceda njani. Wayefisa ukuhlala etaditsha zikhathi zonke. Uthi: “Ngangimcela uJehova ukuthi angincedise ngizibambe. Lakanye wangincedisa ngaba lohlelo lwami lokutaditsha engangilulandela zikhathi zonke.”

12. Amazwi akumTshumayeli 11:4 asinceda njani ukuthi siphumelele ukwenza lokho esikuhlelileyo?

¹² Ungameleli ukuthi zonke izinto zilunge. Emhlabeni lo akusoze kube lesikhathi lapho zonke izinto eziyabe zihamba kuhle. Singamelela ukuthi zonke izinto zitshelele, asisoze siphumelele ukwenza lokho esiyabe sikuhlelile. (Bala umTshumayeli 11:4.) Umzalwane okuthiwa nguDayniel uthi: “Vele akwenzakali ukuthi zonke izinto zitshelele. Ngakho kumele siqalise ukwenza esikuhlelileyo singameleli ukuthi izinto zonke zihambe kuhle.” Omunye umzalwane we-Uganda okuthiwa nguPaul uyasitshela ukuthi kungani kungamelanga sibalisele. Uthi: “Nxa singaqalisa ukwenza lokho esiyabe sikuhlelile lanxa kuyabe kunzima, uJehova uyabe ezasibusisa.”—Mal. 3:10.

13. Kunceda ngani ukuqala kancane kancane?

¹³ Qalisa ngezinto ezincane. Okunye okungasiqeda amandla yikuthi siyabe sibona angani lokho esifuna ukukwenza yinto enkulu kakhulu. Nxa kuyikuthi lawe yilo uhlupho olalo, zama ukwenza lokho okuhlelileyo kancane kancane. Nxa kuyikuthi ufuna ukuba lobuntu obuthile obuhle, qala ngokwenza izinto ezincane. Nxa uhlele ukubala iBhayibhili uliqede ungaqalisa  ngamavesi amalutshwana. UTomáš esike sakhuluma ngaye endimeni yokuqala, wayethwele nzima ukuthi abale iBhayibhili lonke aliqede ngomnyaka. Uthi: “Ngananzelela ukuthi ngangifuna ukwenza okwakungaphezu kwamandla ami. Ngacabanga ukuthi ngiphinde ngizame kodwa ngibale amavesi amalutshwana ngelanga futhi ngicabangisise ngawo. Lokhu kwenza ngakukholisa ukubala.” UTomáš waqalisa ukubala okwesikhathi eside ngoba wayesekukholisa ukubala iBhayibhili futhi wacina eseliqedile lonke. c

14. Kuyini okungasibuyisela emuva?

¹⁴ Okudanisayo yikuthi lanxa siyabe sizimisele ukwenza esikuhlelileyo ziba khona izinto ezingasibuyisela emuva. Ngokwesibonelo, kungaba ‘lezehlakalo ezisijuma silibele’ ezingenza sicine siswela isikhathi sokwenza lokho esikuhlelileyo. (Umtshu. 9:11) Singehlelwa yibunzima obungasiqeda amandla sisale sidanile. (Zaga. 24:10) Isono esizalwa laso singenza senze izinto ezingenza kube nzima ukuthi siphumelele ukwenza lokho esikuhlelileyo. (Rom. 7:23) Kanti njalo kwezinye izikhathi kungaba yikuthi siyabe sidiniwe nje. (Mat. 26:43) Kuyini okungasinceda ukuthi silwisane lezinto ezisibuyisela emuva?

15. Nxa kungaba lento ekubuyisela emuva kutsho ukuthi sekwalile yini? Chasisa. (IHubo 145:14)

¹⁵ Khumbula ukuthi nxa kungaba lento ekubuyisela emuva ayisikho ukuthi sekwalile. IBhayibhili liyatsho ukuthi singehlelwa yibunzima bulandelana. Kodwa liphinda lisicacisele ukuthi uJehova angasincedisa ukuthi siqhubeke ngokwenza lokho esiyabe sikuhlelile. (Bala iHubo 145:14.) Umfowethu okuthiwa nguPhilip esike sakhuluma ngaye uthi: “Ngingaze ngiwe kanengi angizitsheli ukuthi sengehlulekile. Okuqakatheke kakhulu kimi yikuthi ngivuke kangaki.” UDavid esike sakhuluma ngaye uthi: “Nxa kungaba lento engibuyisela emuva angiyiboni angathi yibunzima kodwa ngikubona kulithuba elihle lokutshengisa uJehova ukuthi ngimthanda kangakanani.” Nxa ungaqhubeka ulwisa ukwenza lokho  okuhlelileyo lanxa kulezinto ezikubuyisela emuva, uyabe utshengisa uJehova ukuthi uzimisele ukumthokozisa. Kumele ukuthi uJehova uyathokoza kakhulu nxa ekubona uqhubeka ulwisa ukwenza lokho oyabe ukuhlosile!

16. Ungafundani nxa kube lento ekuvimbele ukuthi wenze obukuhlosile?

¹⁶ Nxa kungaba lento ekubuyisela emuva funda kulokho okuyabe kwenzakele. Dinga ukuthi kubangelwe kuyini ubusuzibuza ukuthi, ‘Kukhona yini engingakutshintsha ukuze kungaphindi kwenzakale?’ (Zaga. 27:12) Kwezinye izikhathi singathwala nzima ukwenza lokho esiyabe sikuhlosile ngoba siyabe sihlele ukwenza into ephezu kwamandla ethu. Nxa lokhu kusenzakala lakuwe cabangisisa ngalokho ohlele ukukwenza ubone ukuthi uyenelisa yini ukukwenza. d UJehova kasoze akubone angathi ungumuntu ozehlulekelayo ngenxa yokuthi wehluleke ukwenza lokho obuhlele ukukwenza ngoba kuphezu kwamandla akho.—2 Khor. 8:12.

17. Kungani kumele sihlale sikhumbula lokho esiyabe siphumelele ukukwenza?

¹⁷ Hlala ukhumbula izinto osuphumelele ukuzenza. IBhayibhili lithi: “UNkulunkulu kayisuye ongalunganga ukuthi usengaze awukhohlwe umsebenzi wenu.” (Heb. 6:10) Lawe akumelanga uyikhohlwe imisebenzi yakho. Cabangisisa ngezinto osuphumelele ukuzenza, kungaba yikusondela kuJehova ube ngumngane wakhe kumbe ukutshela abanye ngaye loba ukubhabhathizwa. Njengoba waphumelela ukwenza lokho owawuhlele ukukwenza ekukhonzeni, ungaphumelela lokwenza lokho okuhlelileyo khathesi.—Flp. 3:16.

18. Kuyini okungamelanga sikukhohlwe nxa silwisa ukwenza lokho esikuhlelileyo? (Khangela lomfanekiso.)

¹⁸ UJehova angakuncedisa ukuthi uphumelele ukwenza lokho oyabe ukuhlelile. Lokho kuzakuthokozisa njengoba nje lomtshayeli wesikepe ethokoza nxa efika lapho aya khona. Kodwa khumbula ukuthi abanengi abatshayela izikepe bayalukholisa uhambo lwabo. Ngakho lawe ungakhohlwa ukubona indlela uJehova akuncedisa ngayo lakubusisa ngayo ngesikhathi usebenza nzima ukuze wenze lokho okuhlosileyo. Lokho kuzakwenza uthokoze. (2 Khor. 4:7) Nxa ungabeki izikhali phansi uzathola izibusiso ezinengi kakhulu.—Gal. 6:9.