1-2. (a) Kungani kumele abasanda kutshada bathembele kuJehova? (IHubo 37:3, 4) (b) Sizaxoxa ngani esihlokweni lesi?

USUZATSHADA yini kumbe usanda kutshada? Nxa kunjalo, akuthandabuzwa ukuthi ukhangelele ukuphila impilo emnandi lesithandwa senhliziyo yakho. Kodwa lokhu akutsho ukuthi alisoze lihlangane lenhlupho. Kulezinqumo eziqakathekileyo okuzamele lizenze. Izinqumo elizazenza lalokho elizakwenza nxa lingaba lohlupho yikho okuzakutsho ukuthi lizathokoza yini okweminyaka eminengi ezayo. Nxa lingathemba uJehova lizakwenza izinqumo ezinhle, umtshado wenu uzaqina njalo lizathokoza. Nxa lingayekela ukulandela lokho okutshiwo nguNkulunkulu lizaba lenhlupho emtshadweni wenu ezizakwenza licine lingasathokozi.—Bala iHubo 37:3, 4.

² Lanxa esihlokweni lesi sizakhuluma kakhulu ngabasanda kutshada, ubunzima esizaxoxa ngabo bungehlela bonke abatshadileyo. Sizabona ukuthi sifundani ezibonelweni zamadoda labesifazana abathembekileyo okukhulunywa ngabo eBhayibhilini. Izibonelo lezo zizasinceda sithole izifundo esingazisebenzisa empilweni lasemtshadweni. Sizabona lesingakufunda ezibonelweni zalamuhla zamaKhristu atshadileyo.

3-4. Yiziphi inhlupho abasanda kutshada abangaba lazo?

³ Abanye abantu bangakhuthaza abasanda kutshada ukuthi benze okwenziwa ngabanengi. Ngokwesibonelo, abazali lezinye izihlobo bangabatshela ukuthi baphangise  ukuba labantwana. Abangane lamalunga emuli bona bangabakhuthaza ukuthi bathenge indlu futhi bayigcwalise ngezinto ezinhle.

⁴ Nxa abatshadileyo bengananzeleli, bangenza izinqumo ezingabatshiya belezikwelede ezesabekayo. Lokhu kungenza bobabili basebenze amahora amanengi ukuze babhadale izikwelede lezo. Bangasebenza baze baswele isikhathi eseneleyo sokutaditsha iBhayibhili bebodwa, esokukhonza kwemuli lesokutshumayela. Bangalova emihlanganweni yebandla besebenza i-overtime ukuze bathole imali enengi kumbe ukuze bangaxotshwa emsebenzini. Lokhu kubangela ukuthi behluleke ukwenza okunengi ekukhonzeni uJehova.

5. Ufundani kuKlaus loMarisa?

⁵ Okwenzakala kwabanengi kutshengisa ukuthi asisoze sithokoze nxa singaqakathekisa ukuba lezinto ezinengi empilweni. UKlaus lomkakhe uMarisa bazibonela ngawabo ukuthi lokho kuliqiniso. * Sebetshadile, bobabili babesebenza ukuze bathole imali enengi lempahla enengi. Kodwa babengelayo intokozo yeqiniso. UKlaus uthi: “Sasilakho konke esasikudinga empilweni kodwa sasingazange sihlele ukuthi sizakwenzani ekukhonzeni uJehova. Kwakukunengi esasikugijimisa empilweni futhi sasingasathokozi.” Engxenye lawe usuzibonele ukuthi ukuxotshana lenotho akukwenzanga wathokoza. Nxa kunjalo, ungadani. Ukuhlola okuhle okwenziwa ngabanye kuzakunceda. Asiqaleni ngokubona ukuthi amadoda atshadileyo angafundani kulokho okwenziwa yiNkosi uJehoshafathi.

6. INkosi uJehoshafathi yakusebenzisa njani esikuthola kuZaga 3:5, 6 ngesikhathi ibutho elikhulu lifuna ukumhlasela?

⁶ Nxa uyindoda etshadileyo, ulokunengi okumele ukwenze okokuthi ubona angani ngeke wenelise ukukwenza konke? Okwenziwa yiNkosi uJehoshafathi kungakunceda. Njengoba wayeyinkosi, kwakumele anakekele isizwe sonke. Wawenza njani umsebenzi omkhulu kangaka? Wenza konke ayengakwenza ukuthi avikele isizwe sonke. Wakha izinqaba emadolobheni akoJuda njalo waqoqa ibutho elalilamasotsha edlula 1 160 000. (2 ImiLan. 17:12-19) Ngokuhamba kwesikhathi, waba phakathi kohlupho olukhulu. Ibutho elikhulu lama-Amoni labakoMowabi lamadoda ayehlala endaweni eyayilamaqaqa okwakuthiwa yiSeyiri lalifuna ukuhlasela yena lemuli yakhe kanye labantu bonke. (2 ImiLan. 20:1, 2) Manje wenzani uJehoshafathi? Wacela ukuthi uJehova amncedise njalo amnike amandla. Wenza khona kanye okutshiwo kuZaga 3:5, 6. (Bala.) Umthandazo kaJehoshafathi oku-2 ImiLando 20:5-12 wenza kucace ukuthi wayemthemba sibili  uYise osezulwini olothando. UJehova wawuphendula njani umthandazo lowo?

7. UJehova wawuphendula njani umthandazo kaJehoshafathi?

⁷ UJehova wathuma umLevi okuthiwa nguJehaziyeli ukuthi ayekhuluma loJehoshafathi. Wathi kuye: “Lunganini ezindaweni; lime ngesibindi lizabona ukukhulula kukaJehova azalenzela khona.” (2 ImiLan. 20:13-17) Leyo kwakungayisiyo ndlela ejayelekileyo yokulwa impi. Kodwa owayebatshela ukuthi benze njalo nguJehova hatshi umuntu nje. UJehoshafathi wamthemba ngokupheleleyo uJehova yikho wenza konke ayemtshele khona. Kwathi yena lamadoda ayelawo sebesiyakulwa lesitha wafaka phambili abahlabeleli ababengahlomanga hatshi amasotsha azingwazi. UJehova kazange ambambise ilitshe. Walinqoba ibutho lesitha uJehoshafathi.—2 ImiLan. 20:18-23.

8. Amadoda afundani kulokho okwenziwa nguJehoshafathi?

⁸ Madoda, kunengi elingakufunda kulokho okwenziwa nguJehoshafathi. Lilomsebenzi wokunakekela izimuli zenu yikho lisebenza nzima ukuze lizivikele njalo lizinike ezikudingayo. Nxa ungaba lenhlupho, ungacabanga ukuthi ungazilungisela zona uwedwa. Kodwa ungazithembi. Khuleka kuJehova umcela ukuthi akuncedise. Kanti njalo, thandaza ngenhliziyo yakho yonke ulomkakho. Vumela uJehova akukhokhele ngokutaditsha iBhayibhili lamabhuku esiwaphiwa yinhlanganiso yakhe langokusebenzisa lokho okufundayo. Kungenzeka abanye bangavumelani lezinqumo ezisekelwe eBhayibhilini ozenzayo. Bangaze bathi uyisiphukuphuku. Bangathi imali lenotho yikho okungenza imuli yakho iziphilele kuhle. Kodwa khumbula okwenziwa nguJehoshafathi. Wathembela kuJehova futhi lokho kwakhanya ngakwenzayo. UJehova kazange ayitshiye indoda leyo ethembekileyo futhi lawe kasoze akutshiye. (Hubo. 37:28; Heb. 13:5) Kuyini okunye okungenziwa ngabatshadileyo ukuze bathokoze?

9. Umphrofethi u-Isaya lomkakhe babengabantu abanjani?

⁹ U-Isaya lomkakhe babekuqakathekisa kakhulu ukukhonza uJehova. U-Isaya wayengumphrofethi futhi kumele ukuthi umkakhe laye wayephrofetha ngoba ubizwa ngokuthi ‘ngumphrofethikazi.’ (Isaya. 8:1-4) Akuthandabuzwa ukuthi u-Isaya lomkakhe babeqakathekisa ukukhonza uJehova ukwedlula loba yini. Abatshadileyo bangancedakala sibili nxa bangabalingisela!

10. Ukutaditsha iziphrofetho zeBhayibhili kungabanceda njani abatshadileyo ukuthi bazimisele ukwenza konke abangakwenza ekukhonzeni uJehova?

¹⁰ Abatshadileyo bangalingisela u-Isaya lomkakhe ngokwenza konke abangakwenza ekukhonzeni uJehova. Ukutaditsha iziphrofetho zeBhayibhili bendawonye lokubona indlela ezihlala zigcwaliseka ngayo kuzakwenza bamthembe sibili. * (Tit. 1:2) Bangacabangisisa ngalokho abangakwenza ukuze bancedise ekugcwaliseni ezinye iziphrofetho. Ngokwesibonelo, bangancedisa ekugcwaliseni isiphrofetho sikaJesu esimayelana lokuthi izindaba ezinhle zizatshunyayelwa  emhlabeni wonke ukuphela kungakafiki. (Mat. 24:14) Nxa abatshadileyo beqhubeka bebona ubufakazi bokuthi iziphrofetho zeBhayibhili ziyagcwaliseka, bazazimisela ukwenza konke abangakwenza ekukhonzeni uJehova.

11. UPrisila lo-Akhwila benelisa ukwenzani, njalo lokhu kwatshengisani ngabo?

¹¹ Kukhona abasanda kutshada abangakufunda kuPrisila lomkakhe u-Akhwila. Imuli le engamaJuda yayihlala edolobheni leRoma. Baba ngamaKhristu sebezwe izindaba ezinhle ezimayelana loJesu. Akuthandabuzwa ukuthi babelakho konke abakudingayo empilweni. Kodwa impilo yaphonguthi phendu ngesikhathi uMbusi uKlawudiyu ekhipha umlayo wokuthi amaJuda wonke aphume aphele eRoma. Akucabange ukuthi impilo yamtshintshela njani u-Akhwila loPrisila. Basebetshiya indawo ababeyijayele besiyahlala kwenye futhi sekumele baqalise ibhizimusi labo lokwenza amatende endaweni entsha. Kambe utshintsho lolu lwabangela ukuthi bangasakuqakathekisi ukukhonza uJehova? Impendulo siyayazi. Bathi sebesemzini wabo omutsha eKhorinte baqalisa ukuncedisa ibandla abasebekulo futhi basebenza lomphostoli uPhawuli ukuqinisa abazalwane. Ngokuhamba kwesikhathi bathuthela kwamanye amadolobho lapho okwakudingeka khona abantu bokutshumayela izindaba ezinhle. (ImiSeb. 18:18-21; Rom. 16:3-5) Babehlala belokunengi kokwenza futhi bethokoza.

12. Kungani kumele ijaha lentombi bahlele lokho abazakwenza ekukhonzeni?

¹² Abatshadileyo bangalingisela uPrisila lo-Akhwila ngokuqakathekisa izinto eziphathelane lokukhonza. Kuqakathekile ukuthi intombi lejaha baxoxe ngalokho abahlela ukukwenza empilweni bengakatshadi. Nxa bangahlela lokho abafuna ukukwenza ekukhonzeni uJehova futhi basebenze nzima ukuthi kuphumelele bazabona indlela ezitshiyeneyo azabancedisa ngazo. (UmTshu. 4:9, 12) Cabanga ngalokho okwenzakala kuRussell lo-Elizabeth. URussell uthi,  “Singakatshadi sahle saxoxa ngalokho esifuna ukukwenzela uJehova.” U-Elizabeth uthi, “Sabona kungcono ukuthi sihle sixoxe ngendaba le ukwenzela ukuthi nxa sekulezinqumo okumele sizenze sesitshadile, sibe leqiniso lokuthi kazisivimbi ukwenza lokho esihlele ukukwenza.” Ukuhlela abakwenzayo kwabanceda ukuthi bathuthele eMicronesia ukuze bayencedisa lapho okwakulabamemezeli abalutshwana.

13. Ngokwalokho okutshiwo kuHubo 28:7, sizatholani nxa singathemba uJehova?

¹³ Abatshadileyo abanengi benza njengoRussell lo-Elizabeth. Bakhethe ukungabi lezinto ezinengi empilweni ukuze babe lesikhathi esinengi sokutshumayela izindaba ezinhle lesokwenza abafundi. Nxa abatshadileyo bangahlela ukwenza okunengi ekukhonzeni uJehova futhi babambisane ukuze benze lokho abakuhlelileyo, kuzabahambela kuhle empilweni. Bazayibona indlela uJehova azabanakekela ngayo, bazamthemba kakhulu njalo bathokoze.—Bala iHubo 28:7.

14. Umphostoli uPhetro lomkakhe batshengisa njani ukuthi bayasikholwa isithembiso esikuMathewu 6:25, 31-34?

¹⁴ Kulokunye abatshadileyo abangakufunda kumphostoli uPhetro lomkakhe. Kwathi kungakadluli umnyaka uPhetro ebonane loJesu okokuqala, kwasekumele umphostoli lo enze isinqumo esiqakathekileyo. UPhetro wayelebhizimusi yokugola inhlanzi. Yikho ngesikhathi ebizwa nguJesu ukuthi abe ngumlandeli wakhe, kwakumele acabange ngokuthi uzamnakekela njani umkakhe nxa esetshiye ibhizimusi yakhe. (Luk. 5:1-11) Wakhetha ukuhamba etshumayela loJesu. Wakhetha kuhle sibili! Asithandabuzi ukuthi umkakhe wamsekela kulokho ayesekhethe ukukwenza. IBhayibhili lisitshela ukuthi ngemva kokuvuswa kukaJesu, uPhetro wayeke ahambe lomkakhe emsebenzini wokutshumayela. (1 Khor. 9:5) Akuthandabuzwa ukuthi umkaPhetro wayeyinkosikazi enhle, yikho umphostoli uPhetro wayekhululekile ukubhalela amadoda lamakhosikazi angamaKhristu iseluleko esimayelana lokuthi baphathane njani. (1 Phet. 3:1-7) Kusegcekeni ukuthi uPhetro lomkakhe babekholwa ukuthi uJehova uzasigcina isithembiso sakhe sokuthi uzabanika abakudingayo nxa bengafuna kuqala uMbuso wakhe.—Bala uMathewu 6:25, 31-34.

15. Ufundani kulokho okwenziwa nguTiago lo-Esther?

¹⁵ Nxa sekuleminyaka eminengana litshadile, lingenzani ukuze liqhubeke lilesifiso sokwenza okunengi ekukhonzeni? Okunye okungalinceda yikufunda ngokwenziwa ngabanye abatshadileyo. Ngokwesibonelo, lingabala izihloko ezithi “Bazinikela Ngokuthanda Kwabo.” Izihloko lezi zanceda uTiago lomkakhe u-Esther, abahlala eBrazil ukuthi babe lesifiso sokuyancedisa lapho okulabamemezeli abalutshwana. UTiago uthi: “Ukubala indaba ezitshengisa indlela uJehova ancedise ngazo izinceku zakhe esikhathini sethu kwenza lathi safisa ukulandela lokho uJehova athi sikwenze besesibona indlela asisekela ngayo.” Bacina bethuthele eParaguay futhi kusukela ngo-2014 bebencedisa ensimini yolimi lwesiPortuguese. U-Esther yena uthi: “Enye ivesi esiyithanda kakhulu ngu-Efesu 3:20. Sesikubone kanengi ukugcwaliseka kwamazwi  asevesini le.” UPhawuli wathembisa abase-Efesu ukuthi uJehova wayezabanika okwedlula lokho ababekucela. Isithembiso leso siliqiniso sibili!

16. Abasanda kutshada bangacela obani ukuthi babacebise nxa behlela lokho abafuna ukukwenza empilweni?

¹⁶ Abasanda kutshada bangalingisela okwenziwa ngabanye abafunda ukuthemba uJehova. Abanye balabo abangabalingisela sebeleminyaka eminengi bengamaphayona. Baceleni ukuthi balicebise nxa lihlela elifuna ukukwenza. Lokhu ngokunye elingakwenza ukuze litshengise ukuthi liyamthemba uJehova. (Zaga. 22:17, 19) Abadala labo bangancedisa abasanda kutshada ukuthi bahlele lokho abangakwenza ekukhonzeni njalo bakwenze.

17. Kwenzakalani kuKlaus loMarisa futhi sifundani kulokho?

¹⁷ Kwesinye isikhathi singabe sifisa ukwenza umsebenzi wenkonzo othile kodwa izinto zingahambi ngendlela ebesifisa ngayo. Lokhu yikho okwenzakala kuKlaus loMarisa esike sakhuluma ngabo. Bathi sebeleminyaka emithathu betshadile bathutha bayancedisa emsebenzini wokwakha egatsheni leFinland. Sebekhonale batshelwa ukuthi babengasoze bavunyelwe ukuhlala elizweni lelo okwezinyanga ezedlula eziyisithupha. Ekuqaliseni kwabadanisa lokhu. Kodwa kungakayi ngaphi bacelwa ukuthi bangene iklasi yokufundela ulimi lwesi-Arabic futhi khathesi sebekholisa ukuncedisa ensimini yolimi lolu kwelinye ilizwe. Ecabanga ngalokho okwenzakala kubo, uMarisa uthi: “Ngangisesaba ukwenza into engangingakaze ngiyenze njalo kwakunzima ukuthi ngimthembe ngenhliziyo yonke uJehova. Kodwa ngimbone ehlala esincedisa ngezindlela ebesingazikhangelelanga. Lokhu sekungenze ngamthemba kakhulu.” Okwenzakala kuKlaus loMarisa kungakunceda ungathandabuzi ukuthi uJehova uzahlala ekubusisa nxa umthemba ngenhliziyo yonke.

18. Abatshadileyo bangenzani ukuze baqhubeke bemthemba uJehova?

¹⁸ Ukutshada yisipho esivela kuJehova. (Mat. 19:5, 6) Ufuna abatshadileyo basikholise isipho lesi. (Zaga. 5:18) Lina elisanda kutshada, cabangisisani ngokuthi lenzani ngempilo yenu. Lenza konke elingakwenza yini ukuze litshengise ukuthi liyambonga sibili uJehova ngezipho alinike zona? Thandazani kuye. Taditshani iBhayibhili ukuze lithole amacebo angalinceda beselilandela amacebo la avela kuJehova. Lizathokoza futhi lisuthiseke empilweni nxa lingaqakathekisa ukukhonza uJehova ukwedlula loba yini.