1. Yiwuphi umbuzo esingazibuza wona?

UYAKE ukhathazeke yini nxa ucabanga ngezinto esezizakwenzakala, njengokubhujiswa kwenkolo yamanga, ukuhlasela kukaGogi waseMagogi kanye lempi ye-Amagedoni? Uyake uzibuze yini ukuthi uzahlala uthembekile zize zidlule izehlakalo lezi ezesabekayo? Nxa kunjalo, isihloko lesi sizakunceda sibili. Sisekelwe emazwini uJesu awatshela abafundi bakhe, wathi: “Izinhliziyo zenu kazingakhathazeki. Tshengisani ukuthi lilokholo.” (Joh. 14:1) Ukholo oluqinileyo luzasinceda sibe lesibindi kungelani lokuthi kwenzakalani esikhathini esizayo.

2. Singaluqinisa njani ukholo lwethu futhi sizaxoxa ngani esihlokweni lesi?

² Nxa singacabangisisa ngokuthi sijayele ukwenzani nxa sihlangana lezilingo ezingaxegisa ukholo lwethu sizakwazi okumele sikwenze ukuze siluqinise. Sizananzelela lapho ukholo lwethu oluxega khona besesilungisisa. Sonke isikhathi nxa sinqoba isilingo, ukholo lwethu luyaqina. Lokhu kuzasinceda ukuthi siqinisele nxa sesihlangana lezilingo esikhathini esizayo. Esihlokweni lesi, sizaxoxa ngezimo ezine abafundi bakaJesu abake baba phakathi kwazo ezenza babona ukuthi kwakumele baqinise ukholo lwabo. Sizaphinda sixoxe ngokuthi thina kuyini okungasinceda siqinisele nxa singaba sezimeni ezinjengezabo lokuthi izimo lezo zingasinceda njani ukuthi sikulungele okuzakwenzakala esikhathini esizayo.

3. Ngokwalokho okutshiwo kuMathewu 6:30, 33, uJesu wacacisani?

³ Kungokwemvelo ukuthi inhloko yemuli izwe ilomlandu wokunakekela umkayo labantwabayo ngokudla lezigqoko lokuba leqiniso lokuthi balendawo yokuhlala. Kodwa akulula  ngaso sonke isikhathi ukuthi ikwenze lokhu kulezi izikhathi ezinzima. Abanye abafowethu labodadewethu baphelelwe yimisebenzi futhi lanxa bezame bazama ukudinga eminye abazange bayithole. Abanye bona bayala ukwenza imisebenzi engavumelani lalokho okutshiwo liBhayibhili. Ezimeni zonke lezi kumele sibe lokholo lokuthi uJehova uzaba leqiniso lokuthi siyakuthola konke esikudingayo. UJesu wakucacisa lokhu eNtshumayelweni Yasentabeni. (Bala uMathewu 6:30, 33.) Nxa siqiniseka ukuthi uJehova kasoze asitshiye sizaqhubeka sifuna kuqala uMbuso, singavumeli lutho lusiphambanise. Kanti njalo nxa sibona indlela uJehova asincedisa ngayo ukuthi sithole esikudingayo sizasondela kakhulu kuye futhi ukholo lwethu luzaqina.

4-5. Kuyini okwanceda enye imuli ngesikhathi ikhathazeke ngokuthi izaphila ngani?

⁴ Asixoxeni ngenye imuli eseVenezuela eyancediswa nguJehova ngesikhathi ikhathazeke ngokuthi izaphila ngani. Imuli yakoCastro yayiphila ngokulima eplazini layo. Kodwa amanye amadoda ayehlome ngemibhobho ayithathela indawo yayo aseyixotsha. Umfowethu uMiguel Castro uthi: “Khathesi sesiphila ngokulima indawo encane esiyibolekiweyo. Nsuku zonke ekuseni ngiyakhuleka ngicela ukuthi uJehova asinike esikudingayo okwamhlalokho.” Imuli le idonsa nzima sibili kodwa ayikuthandabuzi ukuthi uBaba wethu olothando uzayinika lokho ekudingayo nsuku zonke. Yikho ihlala ingena imihlangano yebandla futhi itshumayela. Imuli le iqakathekisa ukukhonza ukwedlula loba yini futhi uJehova uyayinakekela.

⁵ Ebunzimeni bonke lobo, umfowethu uMiguel lomkakhe uYurai babone indlela uJehova abanakekele ngayo. Ngezinye izikhathi uJehova ubesebenzisa abafowethu labodadewethu ukuthi babanike okunye abakudingayo kumbe ukuthi bancedise umfowethu uCastro athole umsebenzi. Uphinde wasebenzisa iwofisi yegatsha ukuthi ibancedise ngokunye okokuziphilisa. UJehova kazange abalahle sibili. Lokho kuluqinisile ukholo lwelunga ngalinye lemuli. Ngemva kokuba indodakazi yabo endala uYoselin isikhulume ngokunye uJehova ayebenzele khona yathi: “Kuyakhuthaza ukubona indlela uJehova asincedisa ngayo. Ngumngane wami futhi angithandabuzi ukuthi uzahlala engincedisa.” Yaphinda yathi: “Ukwehlelwa zinhlupho kusincede ukuthi sibulungele ubunzima obukhulu obuzayo.”

6. Ungenzani ukuze uqinise ukholo lwakho nxa uthwele nzima ngenxa yokuthi awulamali yokuthenga izinto ozidingayo?

⁶ Uthwele nzima yini ngenxa yokuthi awulamali eyeneleyo yokuthenga izinto ozidingayo empilweni? Lanxa uphakathi kobunzima lobo ungasebenzisa isikhathi lesi ukuze uqinise ukholo lwakho. Khuleka kuJehova njalo ubale amazwi kaJesu akuMathewu 6:25-34 ubusucabangisisa ngawo. Kanti njalo cabanga ngezibonelo zabafowethu labodadewethu ezitshengisa ukuthi  uJehova uyabanakekela labo abaqhubeka bekhuthele ekukhonzeni. (1 Khor. 15:58) Ukwenza njalo kuzakunceda ukholwe sibili ukuthi uJehova uzakusiza njengoba wenza kwabanye ababelenhlupho ezinjengezakho. Uyakwazi okudingayo futhi uyenelisa ukukunika khona. Nxa ubona indlela uJehova akuncedisa ngayo ukholo lwakho luzaqina futhi uzakwenelisa ukuqinisela nxa usuhlangana lobunzima obukhulu esikhathini esizayo.—Hab. 3:17, 18.

7. Ngokwalokho okutshiwo kuMathewu 8:23-26, lokho okwenzakala kuze kube ‘lesiphepho esikhulu’ kwatshengisa njani ukuthi abafundi kwakudingeka baqinise ukholo lwabo?

⁷ Ngesikhathi uJesu labafundi bakhe besesikepeni kwaqubuka isiphepho esikhulu elwandle. Lokhu kwapha uJesu ithuba lokubatshela ukuthi kwakudingeka baqinise ukholo lwabo. (Bala uMathewu 8:23-26.) Isiphepho leso sasilamandla okokuthi amanzi ayesegcwala esikepeni. Abafundi besaba, basebevusa uJesu owayezilalele becela ukuthi abasindise. INkosi yababuza yathi: “Kungani lisesaba kangaka lina elilokholo oluncane?” Abafundi kwakumele bananzelele ukuthi uJehova uyenelisa ukuvikela uJesu kanye labo. Sifundani? Sifunda ukuthi ukuba lokholo oluqinileyo kuyasinceda ukuthi siqinisele nxa kungaba lesiphepho esikhulu kumbe sehlelwe luhlupho olunjengesiphepho esikhulu.

8-9. U-Anel wehlelwa yibuphi ubunzima obabungaxegisa ukholo lwakhe futhi kuyini okwamncedayo?

⁸ Cabanga ngalokho okwenzakala kudadewethu ongatshadanga okuthiwa ngu-Anel owePuerto Rico. Ukholo lwakhe lwaqina kakhulu ngemva kokwehlelwa yibunzima obukhulu. Ngo-2017 kwaba lesiphepho esikhulu okwakuthiwa nguMaria esabhidliza indlu yakhe futhi ngenxa yesiphepho leso waphelelwa ngumsebenzi. Uthi: “Ngalezonsuku ezinzima ngangikhathazeke kakhulu kodwa ngafunda ukuthembela kuJehova ngokuthandaza langokungavumeli ukukhathazeka kungiqede amandla.”

⁹ U-Anel uthi okunye okwamncedayo ukuthi aqinisele ngesikhathi ephakathi kohlupho yikulalela. Uthi: “Ukulalela lokho esakutshelwa yinhlanganiso kwanginceda ukuthi ngiqhubeke ngihlalisekile. UJehova wangincedisa esebenzisa abafowethu labodadewethu. Babengikhuthaza njalo benginika izinto engizidingayo.” Uqhubeka esithi: “UJehova wanginika okunengi okwedlula lokho engangikucelile futhi ukholo lwami lwaqina kakhulu.”

10. Ungenzani nxa uphakathi kobunzima obukhulu?

¹⁰ Uphakathi kobunzima yini? Mhlawumbe ubunzima lobo bubangelwe ngumonakalo wemvelo kumbe ngumkhuhlane omubi okwenza udane futhi uswele lokuthi wenzeni. Kwezinye izikhathi ungakhathazeka kodwa ungakuvumeli lokho kukwenze ungasamthembi uJehova. Thandaza kuye ngenhliziyo yonke. Qinisa ukholo lwakho ngokucabangisisa  ngezikhathi uJehova akuncedise ngazo. (Hubo. 77:11, 12) Nxa ungenza njalo, uzaqiniseka ukuthi uJehova kasoze akutshiye loba sekutheni.

11. Kungani kumele sizimisele ukulalela labo abakhokhelayo?

¹¹ Kuyini okunye okungakunceda ukuthi uqinisele nxa usebunzimeni? Njengoba u-Anel etshilo, yikulalela. Funda ukuthemba labo abasetshenziswa nguJehova loJesu ukuthi basikhokhele. Kwezinye izikhathi singabona angani lokho esikutshelwa ngabasikhokhelayo akusebenzi. Kodwa uJehova ubusisa labo abalalelayo. Izibonelo eziseLizwini lakhe lezezinceku zakhe ezithembekileyo zakhathesi ziyatshengisa ukuthi ukulalela kuyanceda sibili. (Eks. 14:1-4; 2 ImiLan. 20:17) Cabangisisa ngezibonelo lezo. Ukwenza njalo kuzakunceda ukuthi uzimisele ukulalela lokho esikutshelwa yinhlanganiso khathesi lasesikhathini esizayo. (Heb. 13:17) Lokhu kuzakwenza ungesabi ukuhlupheka okukhulu osekuseduze.—Zaga. 3:25.

12. Ngokwalokho okutshiwo kuLukha 18:1-8, ukuba lokholo kungasinceda njani ukuthi siqinisele nxa sisahlulelwa kubi?

¹² UJesu wayekwazi ukuthi ukungahlulelwa kuhle kungaluxegisa ukholo lwabafundi. Yikho walandisa umzekeliso otholakala ebhukwini likaLukha ukuze abancedise baqinisele nxa besahlulelwa kubi. Wakhuluma ngomfelokazi owayelokhu encenga umahluleli ongalunganga ukuthi ayiphathe kuhle indaba yakhe. Umfelokazi lo wayengathandabuzi ukuthi nxa angaphikelela ecela uzaluthola uncedo aludingayo. Umahluleli wacina esesilalele isikhalazo sakhe. Sifundani? UJehova wahlulela kuhle, yikho uJesu wathi: “Manje uNkulunkulu ngeke yini abe leqiniso ukuthi abakhethiweyo bakhe abakhala kuye emini lebusuku bahlulelwa kuhle?” (Bala uLukha 18:1-8.) UJesu waqhubeka wathi: “Nxa iNdodana yomuntu ifika izaluthola yini ukholo olunje emhlabeni?” Nxa sahlulelwe kubi kumele sibekezele futhi siphikelele ekuthandazeni. Lokhu kuzatshengisa ukuthi silokholo oluqinileyo njengolomfelokazi osemzekelisweni kaJesu. Nxa silokholo olunje sizaqiniseka ukuthi uJehova uzasincedisa. Kanti njalo kumele sikholwe ukuthi umthandazo uyasebenza. Kwezinye izikhathi imithandazo yethu ingaphendulwa ngendlela ebesingayikhangelelanga.

13. Umthandazo wayinceda njani enye imuli eyayiphathwe kubi?

¹³ Cabanga ngalokho okwenzakala kudadewethu okuthiwa nguVero ohlala eDemocratic Republic of the Congo. Yena lomkakhe ongayisuyeFakazi kanye lendodakazi yabo eleminyaka engu-15 kwasekumele basuke esigabeni ababehlala kuso esasesihlaselwe liqembu lamasotsha. Isisendleleni imuli le yamiswa ngamasotsha futhi athembisa ukubabulala. UVero waqalisa ukukhala kodwa indodakazi yakhe yazama ukumduduza ngokukhulekela phezulu  futhi iphindaphinda ibizo likaJehova. Yathi iqeda ukuthandaza, umkhulu wamasotsha wayibuza wathi, “Nkazana, ngubani owakufundisa ukukhuleka?” Yona yaphendula yathi, “Ngumama, esebenzisa isibonelo somthandazo okuMathewu 6:9-13.” Umkhulu wamasotsha wathi, “Nkazana, lihambe kuhle labazali bakho futhi uNkulunkulu wenu uJehova kalivikele.”

14. Kuyini okungaxegisa ukholo lwethu njalo kuyini okuzasinceda ukuthi siqinisele?

¹⁴ Indaba ezinjengalezi zisifundisa ukuthi singakukhangeleli phansi ukuthandaza. Kodwa kuthiwani nxa imithandazo yakho ingaphendulwa masinyane kumbe ngendlela emangalisayo? Lingisela umfelokazi osemzekelisweni kaJesu ngokuqhubeka uthandaza uqiniseka ukuthi uNkulunkulu kasoze akulahle lokuthi uzawuphendula sibili umthandazo wakho. Kanti njalo qhubeka umncenga ukuthi akunike umoya ongcwele. (Flp. 4:13) Khumbula ukuthi sekuseduze ukuthi uNkulunkulu akubusise kakhulu okokuthi uzabukhohlwa bonke ubunzima obake bakwehlela. Nxa ungaqhubeka uqinisela uncediswa nguJehova, ukholo lwakho luzaqina futhi uzakwenelisa ukuqinisela nxa usuhlangana lobunzima obukhulu esikhathini esizayo.—1 Phet. 1:6, 7.

15. Ngokwalokho okutshiwo kuMathewu 17:19, 20, yibuphi ubunzima abafundi bakaJesu abahlangana labo?

¹⁵ UJesu wafundisa abafundi bakhe ukuthi ukholo lwaluzabanceda ukuthi banqobe ubunzima. (Bala uMathewu 17:19, 20.) Ngelinye ilanga behluleka ukukhipha idimoni lanxa babeke bawakhipha ngezinye izikhathi. Kuyini okwenza behluleka? UJesu wabatshela ukuthi babelokholo oluncane. Wabatshela lokuthi nxa babelokholo olweneleyo babezaqinisela lanxa besebunzimeni obunjengentaba. Lathi lamuhla singahlangana lobunzima obungakhanya bubukhulu okokuthi ngeke sibunqobe.

16. Ukholo lumncede njani uGeydi ukuthi aqinisele ngemva kokubulawa komkakhe?

¹⁶ Ake sixoxe ngodadewethu okuthiwa nguGeydi ohlala eGuatemala. Umkakhe u-Edi wabulawa yizigebenga bevela emihlanganweni yebandla. Ukholo lumncede njani uGeydi ukuthi aqinisele lanxa ephakathi kobuhlungu? Uthi: “Ngiyathandaza kuJehova ngimethulela ubunzima bami futhi lokhu kwenza ngihlaliseke. Ngiyayibona indlela angisekela ngayo esebenzisa abangakithi kanye labangane bami abasebandleni. Ukuhlala ngikhuthele emsebenzini kaJehova kwenza ubuhlungu bube nganeno futhi kunginika amandla okuqinisela usuku ngalunye ngingakhathazeki kakhulu ngokwakusasa. Ubunzima obungehleleyo bungifundise ukuthi kungelani lokuthi ngihlangana labuphi ubunzima esikhathini esizayo, ngizabunqoba ngincediswa nguJehova loJesu kanye lenhlanganiso.”

17. Singenzani nxa singehlelwa yibunzima obukhulu obunjengentaba?

¹⁷ Ufelwe ngumuntu omthandayo yini?  Bala izindaba eziseBhayibhilini zalabo abavuswayo ukuze ukholwe sibili ukuthi abafileyo bazavuswa. Uzwa ubuhlungu yini ngokususwa kwelunga lemuli ebandleni? Taditsha ukuze ungathandabuzi ukuthi indlela uJehova alaya ngayo ihlala inceda kakhulu. Bona loba yiluphi uhlupho olukwehlelayo njengethuba lokuqinisa ukholo lwakho. Thululela uJehova isifuba sakho. Ungazehlukanisi labanye kodwa hlala useduze labafowenu labodadewenu. (Zaga. 18:1, NWT) Yenza izinto ezizakunceda uqinisele lanxa ukucabanga ngalokho okukwehleleyo kukwenza ukhale. (Hubo. 126:5, 6) Qhubeka ungena imihlangano yebandla, utshumayela njalo ubala iBhayibhili. Kanti njalo hlala ucabanga ngezibusiso ezimangalisayo uJehova azakunika zona esikhathini esizayo. Ukholo lwakho luzaqhubeka luqina nxa ubona indlela uJehova akuncedisa ngayo.

18. Ungenzani nxa ungananzelela ukuthi ukholo lwakho ludinga ukuqiniswa?

¹⁸ Nxa ubunzima obakwehlelayo kumbe ophakathi kwabo butshengise ukuthi ukholo lwakho ludinga ukuqiniswa, ungadani. Lesi yiso isikhathi sokuluqinisa. Lingisela abaphostoli bakaJesu abathi: “Sincedise ukuthi sibe lokholo oluqinileyo.” (Luk. 17:5) Cabangisisa ngokwenziwa ngabafowethu labodadewethu esixoxe ngabo esihlokweni lesi. Khumbula zonke izikhathi lapho uJehova akuncedisa khona njengoMiguel loYurai Castro. Khuleka ngenhliziyo yonke kuJehova njengalokho okwenziwa ngu-Anel lendodakazi kaVero, ikakhulu ngesikhathi uphakathi kohlupho olukhulu. Kanti njalo lingisela uGeydi ngokunanzelela ukuthi uJehova angakuncedisa esebenzisa abemuli kumbe abangane. Nxa ungavumela uJehova ukuthi akuncedise ulwisane lobunzima ophakathi kwabo khathesi, uzaqiniseka sibili ukuthi uzakuncedisa uqinisele kuloba yibuphi ubunzima obungakwehlela esikhathini esizayo.

19. Kuyini uJesu ayengakuthandabuzi futhi ungaqiniseka ngani?

¹⁹ UJesu watshela abafundi ukuthi ukholo lwabo lwalusilela ngaphi kodwa wayengathandabuzi ukuthi uJehova wayezabancedisa baqinisele kuloba yibuphi ubunzima ababezahlangana labo esikhathini esizayo. (Joh. 14:1; 16:33) Wayekwazi ukuthi kuzaba lexuku elikhulu elizasinda ekuhluphekeni okukhulu ngenxa yokuba lokholo oluqinileyo. (Isam. 7:9, 14) Uzabe ukhona yini phakathi kwexuku lelo? Ngomusa omkhulu kaJehova uzaba khona nxa ungenza konke ongakwenza khathesi ukuthi uqinise ukholo lwakho.—Heb. 10:39.