ISIFUNDO 45
UJehova Usincedisa Njani Ukuthi Senze Inkonzo Yethu?
“Bazakwazi ukuthi umphrofethi ubekhona phakathi kwabo.”—HEZ. 2:5.
INGOMA 67 “Tshumayela ILizwi”
ESIZAKUFUNDA a
1. Kuyini okumele sikulindele futhi kuyini esileqiniso lakho?
NXA sitshumayela kumele silindele ukuthi sizaphikiswa futhi ukuphikiswa lokhu kuzaqhubeka kusanda. (Dan. 11:44; 2 Thim. 3:12; Isam. 16:21) Kodwa sileqiniso lokuthi uJehova uzaqhubeka esincedisa ngoba ubehlala encedisa izinceku zakhe ukuthi ziphumelele emsebenzini eziwunikiweyo kungelani lokuthi unzima kangakanani. Esihlokweni lesi sizaxoxa ngokunye okwenzakalayo ngesikhathi umphrofethi uHezekheli etshumayeza amaJuda ayethunjiwe eBhabhiloni.
2. UJehova wathi babenjani abantu okwakumele batshunyayezwe nguHezekheli njalo sizaxoxa ngani esihlokweni lesi? (UHezekheli 2:3-6)
2 UHezekheli wayetshumayeza abantu abanjani? UJehova wathi babengabantu “abalenkani” “labayiziqholo” njalo “abahlamukayo.” Babelimaza njengameva njalo beyingozi njengenkume. Yikho uJehova watshela uHezekheli kanengi wathi: “Ungabesabi.” (Bala uHezekheli 2:3-6.) UHezekheli waphumelela emsebenzini wakhe wokutshumayela ngenxa yokuthi wayethunywe nguJehova. Kanti njalo uNkulunkulu wamnika umoya wakhe njalo iLizwi likaNkulunkulu laqinisa ukholo lwakhe. Izinto lezi ezintathu zamnceda njani uHezekheli ukuthi aphumelele njalo zisinceda njani thina namuhla?
UHEZEKHELI WAYETHUNYWE NGUJEHOVA
3. Yiwaphi amazwi okungenzeka aqinisa uHezekheli njalo uJehova wamqinisekisa njani ukuthi uzamncedisa?
3 UJehova watshela uHezekheli wathi: “Ngiyakuthuma.” (Hez. 2:3, 4) Akuthandabuzwa ukuthi amazwi la amqinisa sibili uHezekheli ngoba kungenzeka wakhumbula ukuthi uJehova wayekhulume amazwi ahambelana lalawa ngesikhathi ethuma abaphrofethi bakhe uMosi lo-Isaya. (Eks. 3:10; Isaya. 6:8) Kanti njalo uHezekheli wayekwazi ukuthi uJehova wayebancedisile abaphrofethi laba ababili ukuthi baphumelele ukwenza inkonzo yabo lanxa babehlangana lobunzima. Yikho ngesikhathi uJehova emtshela kabili ukuthi “ngiyakuthuma,” wayengeke athandabuze ukuthi uzamncedisa sibili. Kanti njalo uHezekheli wawabhala kanengi amazwi la athi: “Ilizwi likaJehova lafika kimi.” (Hez. 3:16) Amazwi athi “ilizwi likaJehova laphinda lafika kimi” lawo atholakala izikhathi ezinengi ebhukwini likaHezekheli. (Hez. 6:1) UHezekheli wayengathandabuzi ukuthi wayethunywe nguJehova. Njengoba uyise wayengumphristi, kungenzeka wayemfundisile lokuthi uJehova wayehlala etshela abaphrofethi bakhe ukuthi uzabancedisa. Ngokwesibonelo uJehova wayetshele u-Isaka loJakhobe loJeremiya amazwi athi: “Ngilawe.”—Gen. 26:24; 28:15; Jer. 1:8.
4. Yiwaphi amazwi aduduzayo aqinisa uHezekheli?
4 Ama-Israyeli amanengi ayezamlalela yini uHezekheli etshumayela? UJehova wathi: “Abantu bako-Israyeli abasoze bakulalele ngoba vele abafuni ukungilalela.” (Hez. 3:7) Nxa abantu babengalaleli uHezekheli kutsho ukuthi babengafuni ukulalela uJehova. Amazwi la aqinisekisa uHezekheli ukuthi lanxa abantu babengamlaleli yena wayeyabe ewenzile umsebenzi wakhe wokuphrofetha. UJehova waphinda watshela uHezekheli ukuthi nxa izahlulelo ayekhulume ngazo sezigcwaliseka abantu ‘babezakwazi ukuthi umphrofethi ubekhona phakathi kwabo.’ (Hez. 2:5; 33:33) Akuthandabuzwa ukuthi amazwi la anika uHezekheli amandla okuthi aqhubeke esenza inkonzo yakhe.
LATHI SITHUNYWE NGUJEHOVA
Abantu bangasiphikisa futhi bangalaleli nxa sibatshumayeza njengoba babesenza lakuHezekheli, kodwa siyakwazi ukuthi uJehova ulathi (Khangela indima 5 lo-6)
5. U-Isaya 44:8 uthi kuyini okwenza sibe lesibindi?
5 Lathi silesibindi ngoba siyakwazi ukuthi sithunywe nguJehova ukuthi sitshumayele. Usinike isibusiso esikhulu sokuba ‘ngofakazi’ bakhe. (Isaya. 43:10) UJehova usiqinisa esithi, “Lingatshaywa luvalo,” njengoba nje waqinisa uHezekheli esithi, “Ungesabi.” Kungani kungamelanga sesabe abantu abasiphikisayo? Akumelanga sibesabe ngoba lathi njengoHezekheli sithunywe nguJehova futhi uyasisekela.—Bala u-Isaya 44:8.
6. (a) UJehova usincedisa njani? (b) Kuyini okusikhuthazayo?
6 UJehova usithembisa ukuthi uzasincedisa. Ngokwesibonelo engakathi, “Lingofakazi bami” waqala wathi: “Lapho udabula emanzini amanengi ngizabe ngilawe, lalapho uchapha imifula ayisoze ikukhukhule. Lapho uhamba phakathi komlilo awusoze utshe, ilangabi kalisoze likuhaqaze.” (Isaya. 43:2) Kwezinye izikhathi nxa sitshumayela sihlangana lobunzima obunjengezikhukhula lenhlupho ezinjengomlilo. Kodwa uJehova uyasincedisa ukuthi siqhubeke sitshumayela. (Isaya. 41:13) Lalamuhla abantu abafuni ukulalela njengasesikhathini sikaHezekheli. Kodwa lokhu akutsho ukuthi inkonzo yethu ayiphumeleli. Kuyasikhuthaza ukwazi ukuthi uJehova uyathokoza ngathi nxa siqhubeka sitshumayela. Umphostoli uPhawuli wathi: “Umuntu ngamunye uzathola umvuzo ohambelana lomsebenzi awenzileyo.” (1 Khor. 3:8; 4:1, 2) Omunye udade oselesikhathi eside eliphayona uthi: “Kuyangithokozisa ukwazi ukuthi uJehova ubusisa umzamo esiwenzayo.”
UMOYA KANKULUNKULU—UYAMQINISA UHEZEKHELI
UHezekheli ubona inqola kaJehova futhi lokhu kwenza akholwe sibili ukuthi uJehova uzamncedisa ekutshumayeleni (Khangela indima 7)
7. UHezekheli wayesizwa njani nxa wayecabanga ngombono ayewubonile? (Khangela umfanekiso ongaphandle.)
7 UHezekheli wabona ukuthi umoya kaNkulunkulu ulamandla. Embonweni uHezekheli wabona umoya kaJehova usebenza ezidalweni zomoya ezilamandla lasemavirini amakhulu enqola kaJehova. (Hez. 1:20, 21) UHezekheli wenzani? Uthi: “Ngathi ngikubona lokho ngazilahla phansi.” Lokho akubonayo kwammangalisa okokuthi wawela phansi. (Hez. 1:28) Ngokuhamba kwesikhathi nxa uHezekheli wayecabangisisa ngombono lo omangalisayo kumele ukuthi kwakumenza abe leqiniso lokuthi umoya kaNkulunkulu wawuzamncedisa ukuthi aqhubeke ngenkonzo yakhe.
8-9. (a) Kwenzakalani kuHezekheli lapho uJehova emtshela ukuthi ‘asukume’? (b) Kuyini okunye uJehova akwenzayo ukuze aqinise uHezekheli?
8 UJehova watshela uHezekheli wathi: “Ndodana yomuntu, sukuma ume ngikhulume lawe.” Amazwi la kanye lomoya kaNkulunkulu kwanika uHezekheli amandla okuthi asukume. UHezekheli wathi: “Umoya wafika kimi wangisukumisa ngama.” (Hez. 2:1, 2) Waqhubeka encediswa ‘yisandla’ sikaNkulunkulu, okutsho umoya wakhe ongcwele ngesikhathi esenza inkonzo yakhe. (Hez. 3:22; 8:1; 33:22; 37:1; 40:1) Umoya kaNkulunkulu wamqinisa ukuthi enze umsebenzi wokutshumayeza abantu ‘abalenkani labayiziqholo.’ (Hez. 3:7) UJehova watshela uHezekheli wathi: “Lawe sengikwenze waba yisiqholo njengabo, ngenza lesiphaqa sakho saqina njengeziphaqa zabo. Isiphaqa sakho sengisenze saqina njengedayimana, saqina ukwedlula ilitshe elilukhuni. Ungabesabi futhi ungethuswa bubuso babo.” (Hez. 3:8, 9) Ngamanye amazwi kwakungani uJehova utshela uHezekheli ukuthi, ‘Ungavumeli ubuqholo babantu laba bukuqede amandla, ngizakuqinisa.’
9 UJehova wathi esekhulume loHezekheli umoya wakhe waqhubeka umncedisa enkonzweni yakhe. UHezekheli wathi: “Umoya kaJehova wawusebenza ngamandla kimi.” Kwamthatha iviki yonke uHezekheli ukuthi afunde njalo azwisise amazwi uJehova ayefuna awatshele abantu ngesibindi. (Hez. 3:14, 15) UJehova wamtshela ukuthi aye emagcekeni ‘lapho umoya owafika khona kuye.’ (Hez. 3:23, 24) UHezekheli wayesekulungele ukuqalisa inkonzo yakhe.
UMOYA ONGCWELE KANKULUNKULU—USINIKA AMANDLA
Kuyini okwanceda uHezekheli okusincedayo lathi nxa sitshumayela? (Khangela indima 10)
10. Kuyini esikudingayo ukuze siqhubeke sitshumayela futhi kungani?
10 Kuyini esikudingayo ukuze siqhubeke sitshumayela? Khumbula okwenzakala kuHezekheli. Wathi engakaqalisi ukutshumayela, uNkulunkulu wamnika amandla esebenzisa umoya wakhe. Lathi lamuhla ngeke senelise ukutshumayela nxa singancediswanga ngumoya kaNkulunkulu. Kungani sisitsho njalo? USathane ulwisana lathi ezama ukumisa umsebenzi wethu. (Isam. 12:17) Kungakhanya angathi ngeke senelise ukumelana laye kodwa siyabe sinqoba nxa sitshumayela. (Isam. 12:9-11) Phela nxa sitshumayela siyabe sitshengisa ukuthi kasivumi ukwethuselwa nguSathane. Sonke isikhathi nxa sitshumayela siyabe simnqoba uSathane. Manje njengoba sisenelisa ukutshumayela lanxa siphikiswa, singaphetha ngokuthini? Kusegcekeni ukuthi uJehova usinika amandla esebenzisa umoya wakhe lokuthi esikwenzayo kuyamthokozisa.—Mat. 5:10-12; 1 Phet. 4:14.
11. Umoya kaNkulunkulu ungasinceda njani njalo kumele senzeni ukuze siqhubeke siwuthola?
11 UJehova wenza sengathi uqinise ubuso lesiphaqa sikaHezekheli. Sifundani kulokhu? Umoya ongcwele kaNkulunkulu ungasinceda simelane laloba yibuphi ubunzima esihlangana labo ekutshumayeleni. (2 Khor. 4:7-9) Pho kumele senzeni ukuze uNkulunkulu aqhubeke esinika umoya wakhe? Kumele sihlale siwucela, singathandabuzi ukuthi uzayizwa imithandazo yethu. UJesu wathi kubafundi bakhe: ‘Qhubekani licela, qhubekani lidinga, qhubekani liqoqoda.’ Nxa singenza njalo, uJehova ‘uzasipha umoya ongcwele nxa siwucela kuye.’—Luk. 11:9, 13; Imiseb. 1:14; 2:4.
UHEZEKHELI WAQINISWA—NGAMAZWI KAJEHOVA
12. Ngokwalokho okutshiwo kuHezekheli 2:9–3:3, incwadimgoqwa yavela ngaphi njalo yayimumetheni?
12 Njengoba sesibonile, uHezekheli waqiniswa ngumoya kaNkulunkulu kodwa waphinda waqiniswa langamazwi akhe. Embonweni wabona isandla siphethe incwadimgoqwa. (Bala uHezekheli 2:9–3:3.) Yayivela ngaphi incwadimgoqwa le? Yayimumetheni? Yamqinisa njani uHezekheli? Yayivela esihlalweni sobukhosi sikaNkulunkulu. Kumele ukuthi uJehova wathuma enye yezingilosi ezine uHezekheli ayeke wazibona ukuthi imnike incwadimgoqwa le. (Hez. 1:8; 10:7, 20) Incwadimgoqwa le yayilesahlulelo uJehova ayefuna uHezekheli asitshele amaJuda ayehlamukile asethunjwa. (Hez. 2:7) Isahlulelo lesi sasibhalwe phakathi langaphandle kwencwadimgoqwa.
13. UJehova watshela uHezekheli ukuthi ayenzeni incwadimgoqwa futhi kungani yayimnandi kuye?
13 UJehova watshela umphrofethi wakhe ukuthi adle incwadimgoqwa njalo ‘agcwalise isisu sakhe ngayo.’ Lakanye uHezekheli wayidla wayiqeda. Kwakumelani lokho? UHezekheli kwakumele awazwisise kuhle amazwi okwakumele awatshele amaJuda. Kwakumele awakholwe, abesegazini sibili ukuze azimisele ukuwatshela abantu. Okumangalisayo yikuthi uHezekheli wezwa incwadimgoqwa le ‘imnandi njengoluju.’ (Hez. 3:3) Wayizwa imnandi ngoba kuye ukumela uJehova kwakuyinto emnandi futhi ethokozisayo. (Hubo. 19:8-11) Wayesiqakathekisa isibusiso uJehova ayemnike sona esokuba ngumphrofethi wakhe.
14. Kuyini okwanceda uHezekheli ukuthi akulungele ukwenza umsebenzi wakhe?
14 UJehova waphinda wathi kuHezekheli: “Ngicela ulalele njalo uwagcine enhliziyweni yakho wonke amazwi engizakutshela wona.” (Hez. 3:10) Lapha uJehova wayetshela uHezekheli ukuthi angawakhohlwa amazwi ayesencwadinimgoqwa njalo acabangisise ngawo. Lokhu kwaluqinisa ukholo lukaHezekheli. Wayezatshela abantu amazwi alesisindo. (Hez. 3:11) Njengoba wayesewazwisisa futhi ewakhumbula amazwi kaJehova, wayesekulungele ukwenza umsebenzi ayewuphiwe.—Khangela iHubo 19:14.
AMAZWI KANKULUNKULU—AYASIQINISA LATHI
15. Kuyini okumele ‘sikugcine enhliziyweni’ ukuze senelise ukuqinisela?
15 Kumele lathi siqhubeke siqiniswa ngamazwi kaNkulunkulu ukuze siqinisele ekutshumayeleni. Kumele ‘sikugcine enhliziyweni’ konke esikutshelwa nguJehova. Lamuhla uJehova ukhuluma lathi esebenzisa iLizwi lakhe iBhayibhili. Singenzani ukuze iLizwi likaNkulunkulu liqhubeke liqondisa indlela esicabanga ngayo, esizizwa ngayo lalokho esifuna ukukwenza?
16. Kumele senzeni ngeLizwi likaNkulunkulu njalo singenzani ukuze lithophele enhliziyweni zethu?
16 Nxa singabala njalo sicabangisise ngeLizwi likaNkulunkulu ukholo lwethu luzaqina njengoba nje lokudla kuyiqinisa imizimba yethu. Lokho yikho esikufunda endabeni yencwadimgoqwa. UJehova ufuna ‘sigcwalise izisu zethu’ ngeLizwi lakhe okutsho ukuthi silizwisise. Lokho singakwenza ngokukhuleka, ngokulibala lokucabangisisa ngalokho elikutshoyo. Siqala ngokukhuleka ukuze silungiselele inhliziyo zethu ukuthi zamukele imicabango kaJehova. Ngemva kwalokho siyabala indaba eseBhayibhilini besesisima ukuze sicabangisise ngesiyabe sikubalile. Kusinceda njani lokhu? Nxa siqhubeka sicabangisisa sizalizwisisa sibili iLizwi likaNkulunkulu njalo ukholo lwethu luzaqina.
17. Kungani kuqakathekile ukucabangisisa ngezinto esizibala eBhayibhilini?
17 Kungani kuqakathekile ukubala lokucabangisisa ngeLizwi likaNkulunkulu? Kusinika amandla okutshumayela ngoMbuso khathesi lokumemezela isahlulelo esilamandla okungenzeka sisimemezele esikhathini esiseduze esizayo. Kanti njalo nxa sicabangisisa ngobuntu obuhle bukaJehova siba ngabangane bakhe abaseduze. Lokhu kuzakwenza sibe lokuthula njalo sisuthiseke njengoHezekheli owezwa amazwi kaNkulunkulu emnandi loba emthokozisa.—Hubo. 119:103.
SIZIMISELE UKUQINISELA
18. Kuyini abantu abasendaweni esiyitshumayelayo abazakuvuma futhi kungani?
18 Thina asenzi umsebenzi wokuphrofetha njengoHezekheli kodwa sizimisele ukuqhubeka sitshumayela amazwi aphefumulelweyo aseLizwini likaNkulunkulu yena aze athi sekwanele. Nxa isikhathi sokwahlulela sesifikile akulamuntu lapho esitshumayela khona ozakuthi kazange axwayiswe kumbe athi uJehova wamkhohlwa. (Hez. 3:19; 18:23) Bazavuma bodwa ukuthi esasikutshumayela kwakuvela kuNkulunkulu.
19. Kuyini okuzasenza sibe lamandla okutshumayela?
19 Kuyini okuzasenza sibe lamandla okutshumayela? Yilokho okwaqinisa uHezekheli. Siqhubeka sitshumayela ngoba siyakwazi ukuthi sithunywe nguJehova, umoya kaJehova ongcwele usinika amandla njalo iLizwi lakhe liyasiqinisa. Sizimisele ukuqhubeka sitshumayela njalo siqinisela “kuze kube sekucineni” ngoba uJehova uyasincedisa.—Mat. 24:13.
INGOMA 65 Qhubekela Phambili!
a Esihlokweni lesi sizaxoxa ngezinto ezintathu ezanceda umphrofethi uHezekheli ukuthi aphumelele emsebenzini wokutshumayela ayewunikiwe. Sizaphinda sibone ukuthi uJehova wamncedisa njani umphrofethi wakhe. Lokhu kuzasenza singathandabuzi ukuthi uJehova uzasincedisa enkonzweni yethu.