ISIFUNDO 46
UJehova Usincedisa Njani Ukuthi Siqinisele Sithokoza?
“UJehova ukulindele ngesineke ukulenzela umusa, uzasukuma ukuze alitshengise isihawu.”—ISAYA. 30:18.
INGOMA 3 Sithemba Wena Jehova, Ungamandla Ethu Lenqaba Yethu
ESIZAKUFUNDA a
1-2. (a) Yiphi imibuzo esizaxoxa ngayo? (b) Kuyini okutshengisa ukuthi uJehova uyafuna sibili ukusincedisa?
UJEHOVA angasincedisa ukuthi silwisane lenhlupho esiba lazo lokuthi sithokoze ekumkhonzeni. Usincedisa njani? Thina singenzani ukuze lokho asenzela khona kusincede kakhulu? Imibuzo le izaphendulwa esihlokweni lesi kodwa singakayiphenduli sizaqala sixoxe ngombuzo lo: UJehova uyafuna yini sibili ukusincedisa?
2 Kulebala elasetshenziswa ngumphostoli uPhawuli encwadini ayibhalela amaHebheru elingasinceda sithole impendulo. Wabhala wathi: “UJehova ungumsizi wami; angisoze ngesabe. Umuntu angangenzani?” (Heb. 13:6) Amabhuku achasisa iBhayibhili athi ibala elithi ‘umsizi’ elisevesini le litsho umuntu ogijimela ukuyanceda omunye okhalela uncedo. Akumbone uJehova egijimela ukuncedisa umuntu osebunzimeni. Lokhu kutshengisa ukuthi uzimisele njalo uyafuna sibili ukusincedisa. Nxa uJehova elathi singenelisa ukuqinisela sithokoza.
3. Yiziphi indlela ezintathu uJehova asincedisa ngazo ukuthi siqinisele ngapha sithokoza?
3 Yiziphi ezinye indlela uJehova asincedisa ngazo ukuthi siqinisele sithokoza? Ukuze sithole impendulo yombuzo lo asihloleni ibhuku lika-Isaya ngoba iziphrofetho ezinengi umphrofethi lo aphefumulelwa ukuthi azibhale ziyasebenza ezincekwini zikaJehova lamuhla. Kanti njalo nxa u-Isaya ekhuluma ngoJehova, ujayele ukusebenzisa amabala azwisiseka lula. Ngokwesibonelo, asihloleni ulimi olumnandi alusebenzisa kusahluko 30. Esahlukweni leso uyasitshela indlela uJehova asincedisa ngayo ngokulalela langokuphendula imithandazo yethu, ngokusikhokhela langokusinika izibusiso khathesi lasesikhathini esizayo. Khathesi asixoxeni ngendlela lezi ezintathu uJehova asincedisa ngazo.
UJEHOVA UYAYILALELA IMITHANDAZO YETHU
4. (a) UJehova wathini ngamaJuda ayephila ngesikhathi sika-Isaya futhi kuyini avumela ukuthi kwenzakale kuwo? (b) UJehova wawathembisani amaJuda ayethembekile? (U-Isaya 30:18, 19)
4 Ekuqaliseni kwesahluko 30 ku-Isaya uJehova uthi amaJuda ‘ngamadodana ayiziqholo,’ ‘angezelela isono phezu kwesono.’ Uqhubeka esithi ‘bangabahlamuki abangafuniyo ukulalela umthetho kaJehova.’ (Isaya. 30:1, 9) Abantu laba babengalaleli uJehova yikho u-Isaya wathi uJehova wayezavumela ukuthi bathwale nzima. (Isaya. 30:5, 17; Jer. 25:8-11) Lakanye bathunjwa ngabantu beBhabhiloni. Kodwa kwakulamanye amaJuda ayethembekile njalo u-Isaya wawatshela amazwi aduduzayo. Wawatshela ukuthi uJehova wayezakuba lomusa kuwo awabuyisele elizweni lawo. (Bala u-Isaya 30:18, 19.) Lokho yikho kanye uJehova akwenzayo. Wawakhulula ekuthunjweni lanxa lokho engakwenzanga khonapho khonapho. Amazwi athi “uJehova ukulindele ngesineke ukulenzela umusa” atshengisa ukuthi abathembekileyo babezakhululwa ngemva ngesikhathi esithile. Abako-Israyeli babuyela eJerusalema ngemva kweminyaka engu-70 bethunjiwe eBhabhiloni. (Isaya. 10:21; Jer. 29:10) Ngesikhathi bethunjiwe babesebuhlungwini kodwa bathi sebebuyele kibo zehla ezentokozo.
5. Yiwaphi amazwi aduduzayo aku-Isaya 30:19?
5 Singaduduzwa ngamazwi la athi: “Uzathi ekuzwa ukhalela uncedo akwenzele umusa.” (Isaya. 30:19) U-Isaya wenza sibe leqiniso lokuthi uJehova uzalalelisisa nxa sikhala kuye njalo uzaphangisa ukuphendula imithandazo yethu yokuncenga. Uphinda athi: “Uzakuphendula esanda kukuzwa nje.” Amazwi la aduduzayo asikhumbuza ukuthi uBaba wethu uzimisele njalo uyafuna sibili ukuncedisa labo abacela uncedo kuye. Lokhu kuyasinceda ukuthi siqinisele futhi sithokoze.
6. Amazwi aku-Isaya atshengisa njani ukuthi uJehova ulalela imithandazo yomuntu ngamunye?
6 Yiwaphi amanye amazwi aduduzayo aphathelane lomthandazo esiwathola evesini le? UJehova uyayilalelisisa imithandazo yomuntu ngamunye. Kungani sisitsho njalo? Amazwi okuqala aku-Isaya isahluko 30 asebunengini ngoba uJehova ukhuluma labantu bakhe beliqembu. Kodwa akuvesi 19 asebunyeni ngenxa yokuthi lapha usekhuluma lomuntu munye ngamunye. U-Isaya uthi: ‘Awusoze ukhale loba sokutheni; uzakwenzela umusa, uzakuphendula.’ UJehova nguBaba wethu osithandayo yikho katsheli indodana kumbe indodakazi yakhe edanileyo athi, ‘Kumele uqine njengomfowenu,’ kumbe ‘Kumele uqine njengodadewenu.’ Ulendaba lomuntu ngamunye futhi uyayilalela imithandazo yomuntu ngamunye.—Hubo. 116:1; Isaya. 57:15.
Wayesitshoni u-Isaya lapho esithi: “Lingamphumuzi [uJehova]”? (Khangela indima 7)
7. U-Isaya loJesu batshengisa njani ukuthi kuqakathekile ukuphikelela emthandazweni?
7 Nxa sithandaza kuNkulunkulu wethu simtshela okusikhathazayo angaqala asinike amandla okuthi siqinisele. Lanxa ngezinye izikhathi uhlupho lwethu lungeke luphele ngesikhathi esisikhangeleleyo kumele siqhubeke sicela ukuthi uJehova asinike amandla okuqinisela. Yikho asitshela ukuthi sikwenze futhi kuhambelana lamazwi la akhulunywa ngu-Isaya athi: “Lingamphumuzi [uJehova].” (Isaya. 62:7) Kutshoni lokhu? Kumele siphikelele ekuthandazeni kuJehova kube angathi asimvumeli ukuthi aphumule. Amazwi ka-Isaya asikhumbuza umzekeliso kaJesu omayelana lomthandazo awukhuluma kuLukha 11:8-10, 13. Emavesini la uJesu usikhuthaza ukuthi ‘siphikelele’ nxa sithandaza lokuthi ‘siqhubeke sicela’ umoya ongcwele. Singacela lokuthi uJehova asincedise senze izinqumo ezinhle.
UJEHOVA UYASIKHOKHELA
8. Amazwi aku-Isaya 30:20, 21 agcwaliseka njani?
8 Bala u-Isaya 30:20, 21. Ngesikhathi iBhabhiloni ivimbezele iJerusalema okomnyaka lenyanga eziyisithupha, udubo abantu laba ababephakathi kwalo lwaselujayelekile sokungathi yisinkwa lamanzi. Kodwa kuvesi 20 lo-21, uJehova wathembisa amaJuda ukuthi wayezawakhulula nxa ayengaphenduka atshintshe indlela ayephila ngayo. U-Isaya wathi uJehova ‘unguMfundisi omkhulu.’ Wathembisa abantu ukuthi uJehova wayezabafundisa ukuthi bamkhonze ngendlela ayamukelayo. Isithembiso leso sagcwaliseka lapho amaJuda ekhululwa ekuthunjweni. Kwacaca sibili ukuthi uJehova wayenguMfundisi wabo omkhulu ngoba wabancedisa ukuthi baphinde bamkhonze ngendlela ayifunayo. Lathi sibusisiwe ngoba uJehova unguMfundisi wethu omkhulu lamuhla.
9. Yiphi eyinye indlela uJehova asikhokhela ngayo lamuhla?
9 U-Isaya uqhubeka esithi singabafundi ngendlela ezimbili. Uqalisa esithi: “Uzambona ngamehlo akho uMfundisi wakho omkhulu.” Amazwi la atshengisa ukuthi umfundisi umi phambi kwabantu abafundiswayo. Kuyisibusiso ukufundiswa nguJehova lamuhla. Usifundisa njani? Usebenzisa inhlanganiso yakhe njalo siyambonga ngakho konke asifundisa khona esebenzisa yona. Lokho asifundisa khona emihlanganweni yebandla, emihlanganweni emikhulu, emabhukwini ethu kanye laku-JW Broadcasting® langezinye nje izindlela kuyasinceda kakhulu ukuthi siqinisele futhi sithokoze lanxa sisebunzimeni.
10. Silizwa njani iLizwi ‘ngemva kwethu’?
10 U-Isaya uphinda akhulume ngendlela yesibili uJehova asifundisa ngayo. Uthi: “Ngamunye wenu uzakuzwa ilizwi ngemva kwakhe.” Amazwi la atshengisa ukuthi uJehova unjengomfundisi ohamba ngemva kwabafundi bakhe ebakhangele njalo ebatshela indlela okumele bahambe ngayo. Namuhla siyalizwa ilizwi likaNkulunkulu ngemva kwethu. Silizwa njani? Amazwi kaNkulunkulu aphefumulelweyo abhalwa kudala, emuva khonale. Yikho nxa sibala iBhayibhili kuyabe kungathi sizwa ilizwi likaNkulunkulu ngemva kwethu.—Isaya. 51:4.
11. Kuyini okuzasinceda ukuthi siqinisele ngapha sithokoza futhi kungani kumele senze njalo?
11 Kuyini esingakwenza ukuze sivumele uJehova asikhokhele esebenzisa inhlanganiso yakhe leLizwi lakhe? U-Isaya usitshela izinto ezimbili. Uqala athi: “Le yiyo indlela,” abesesithi: “Hambani ngayo.” (Isaya. 30:21) Akwenelanga ukuthi siyazi “indlela.” Kumele siphinde ‘sihambe ngayo.’ ILizwi likaNkulunkulu lalokho esikuchasiselwa yinhlanganiso yakhe kuyasinceda sikwazi ukuthi ufuna senzeni. Uphinda asifundise ukuthi singakusebenzisa njani lokho esikufundayo. Ukwenza izinto lezi ezimbili kuzasinceda ukuthi siqinisele ngapha sithokoza futhi yikho kuphela okungenza ukuthi uJehova asibusise.
UJEHOVA UYASIBUSISA
12. U-Isaya 30:23-26 uthi uJehova wayezababusisa njani abantu bakhe?
12 Bala u-Isaya 30:23-26. Isiphrofetho lesi sagcwaliseka njani kumaJuda ayesebuyele elizweni lako-Israyeli evela eBhabhiloni lapho ayethunjwe khona? UJehova wawanika izinto ezinengi zokuziphilisa wawanika lokwakuzawanceda ukuthi aqhubeke emkhonza. Ukudla kwasekuyithaphutshiye. Kodwa okuqakatheke kakhulu abanika khona yizinto ezinengi ezazizabanceda ukuthi basondele kuye ngesikhathi ukukhonza kweqiniso kubuyiselwa kancane kancane. Lokho awenzela khona ngalesosikhathi kwakusedlula khatshana loba yini ayeke wawenzela yona. Uvesi 26 utshengisa ukuthi uJehova wenza ukukhanya kwaba kukhulu, balizwisisa iLizwi lakhe. (Isaya. 60:2) Izibusiso lezi uJehova azinika abantu bakhe zabanceda ukuthi bazimisele ukuqhubeka bemkhonza bethokoza “ngenxa yokuchelesa kwenhliziyo.”—Isaya. 65:14.
13. Isiphrofetho sokukhonza kweqiniso sigcwaliseke njani namuhla?
13 Isiphrofetho esimayelana lokubuyiselwa kokukhonza kweqiniso siyasebenza yini lamuhla? Kakhulu! Njani? Kusukela ngo-1919 C.E., kwasekulabantu abanengi kakhulu abasebekhululiwe ekuthunjweni yiBhabhiloni Enkulu okutsho umbuso womhlaba wonke wenkolo yamanga. Abantu labo sebelethwe endaweni engcono kakhulu ukwedlula iLizwe Lesithembiso lako-Israyeli. Sebesepharadayisi esikulo lamuhla. (Isaya. 51:3; 66:8) Liyini lelopharadayisi?
14. Liyini ipharadayisi elikhona lamuhla njalo ngobani abakulo? (Khangela iNgcazelo Yamabala.)
14 Kusukela ngo-1919 C.E., abagcotshiweyo bebelokhu bekholisa ukuba sepharadayisi esikulo lamuhla. b ‘Abezinye izimvu’ abalethemba lokuphila emhlabeni labo bayangena kulelipharadayisi besebethola izibusiso ezinengi ezivela kuJehova.—Joh. 10:16; Isaya. 25:6; 65:13.
15. Ipharadayisi esikulo lamuhla lingaphi?
15 Ipharadayisi esikulo lamuhla lingaphi? Abantu bakaJehova batholakala emhlabeni wonke jikelele yikho ipharadayisi esikulo lalo litholakala emhlabeni wonke. Lokhu kutsho ukuthi singaba sepharadayisi leli kungelani lokuthi sihlala ngaphi nxa nje sisekela ukukhonza kweqiniso.
Ngamunye wethu angenzani ukuze ipharadayisi esikulo liqhubeke lisiba lihle? (Khangela indima 16 lo-17)
16. Kumele senzeni ukuze sihlale sibona ubuhle bepharadayisi esikulo?
16 Okunye okumele sikwenze ukuze siqhubeke sisepharadayisi leli yikuhlala siqakathekisa ibandla lamaKhristu. Singakwenza njani lokhu? Ngokukhangela okuhle kulabo abasepharadayisi leli hatshi izinto abaziphambanisayo. (Joh. 17:20, 21) Kungani kuqakatheke kakhulu lokho? Nanku umzekeliso ongasinceda. Iphakhi enhle ijayele ukuba lezihlahla ezitshiyeneyo. Labantu abasepharadayisi esikulo lamuhla banjengezihlahla lezo, abafanani. (Isaya. 44:4; 61:3) Kumele sizame ukuhlala sibona okuhle hatshi ukukhangela izinto esingazithandiyo esihlahleni ngasinye esiyabe sisibona. Ngakho akumelanga sivumele ukuthi izinto esingazithandiyo ezikithi lezikwabanye ebandleni zisiphambanise sicine singasabuboni ubuhle bebandla lamaKhristu elimanyeneyo.
17. Umuntu ngamunye angenzani ukuze kuhlale kulokuthula ebandleni?
17 Ngamunye wethu angenzani ukuze kube lokuthula ebandleni? Sonke kumele sizame ukuthi kube lokuthula. (Mat. 5:9; Rom. 12:18) Nxa sisiba ngabokuqala ukulungisa ukungazwanani ukuze sibe lokuthula labanye ebandleni siyabe sisenza ukuthi ipharadayisi lethu libe lihle kakhulu. Kumele sihlale sikhumbula ukuthi uJehova udonse umuntu ngamunye osepharadayisi esikulo ukuthi aze ekukhonzeni kweqiniso. (Joh. 6:44) Akucabange ukuthi uJehova uthokoza njani nxa esibona sisebenza nzima ukuze kuhlale kulokuthula lokumanyana phakathi kwabantu bakhe abaligugu!—Isaya. 26:3; Hag. 2:7.
18. Kuyini okumele sizimisele ukuhlala sicabangisisa ngakho njalo kungani?
18 Singenzani ukuze zonke izinto ezinhle esiziphiwa nguNkulunkulu zisincede? Kumele sicabangisise ngalokho esikubalayo eLizwini lakhe lasemabhukwini ethu. Ukubala iLizwi likaNkulunkulu lokucabangisisa ngalo kuzasinceda sibe lobuntu obunjengobukaKhristu obuzasenza ‘sithandane ngothando lobuzalwane langenhliziyo yonke’ ebandleni. (Rom. 12:10) Kanti njalo sizaqinisa ubungane bethu loJehova nxa singacabangisisa ngezibusiso esilazo khathesi. Nxa singacabangisisa ngezinto ezinhle uJehova athembisa ukusenzela zona sizahlala silethemba lokumkhonza kuze kube nini lanini. Konke lokhu kuzasinceda siqhubeke sikhonza uJehova sithokoza.
SIZIMISELE UKUQINISELA
19. (a) U-Isaya 30:18 uthi kuyini esingaba leqiniso lakho? (b) Kuyini okuzasinceda ukuthi siqinisele ngapha sithokoza?
19 UJehova “uzasukuma” asincede lapho esetshabalalisa umhlaba lo omubi. (Isaya. 30:18) Asithandabuzi ukuthi uzawususa ngesikhathi esifaneleyo umhlaba kaSathane ngenxa yokuthi ‘unguNkulunkulu owahlulela kuhle.’ (Isaya. 25:9) Siqhubeka sikulindele ngabomvu ukufika kwelanga lelo esizakhululwa ngalo. Okwakhathesi sizimisele ukuqhubeka siqakathekisa isibusiso esilaso sokuthandaza, lokubala iLizwi likaNkulunkulu lokusebenzisa esikubalayo kanye lokucabangisisa ngezibusiso esilazo. Nxa singenza njalo uJehova uzasincedisa ukuthi simkhonze siqinisela ngapha sithokoza.
INGOMA 142 Ukubambelela Ethembeni Esilalo
a Esihlokweni lesi sizaxoxa ngendlela ezintathu uJehova ancedisa ngazo izinceku zakhe ukuthi ziqinisele futhi zithokoze nxa zilenhlupho. Sizafunda ngendlela lezi ngokuhlolisisa u-Isaya isahluko 30. Esahlukweni lesi sizakhunjuzwa ukuthi kuqakathekile ukuthandaza kuJehova, ukubala iLizwi lakhe kanye lokucabangisisa ngezibusiso esilazo khathesi lesizazithola esikhathini esizayo.
b INGCAZELO YAMABALA: “Ipharadayisi esikulo lamuhla” litsho ukumanyana esilakho ekukhonzeni uJehova. Epharadayisi leli zinengi izinto uJehova asifundisa zona njalo eziliqiniso. Kanti njalo silomsebenzi omkhulu njalo othokozisayo wokutshumayela izindaba ezinhle zoMbuso kaNkulunkulu. Singabangane bakaJehova njalo sihlalisana ngokuthula labafowethu labodadewethu abasithandayo abasinceda ukuthi siqinisele ngapha sithokoza nxa sisebunzimeni. Siba sepharadayisi leli nxa sikhonza uJehova ngendlela ayamukelayo futhi nxa sisenza konke esingakwenza ukuthi simlingisele.