ISIFUNDO 47
Ungavumeli Loba Yini Ikwehlukanise LoJehova
“Ngithembele kuwe awu Jehova.”—HUBO 31:14.
INGOMA 122 Manini Liqine
ESIZAKUFUNDA a
1. Sikwazi njani ukuthi uJehova ufuna ukusondela kithi?
UJEHOVA usinxusa ukuthi sisondele kuye. (Jak. 4:8) Ufuna ukuba nguNkulunkulu wethu, nguBaba kanye loMngane wethu. Uyayiphendula imithandazo yethu njalo uyasincedisa ngezikhathi ezinzima. Kanti njalo usebenzisa inhlanganiso yakhe ukuthi asifundise futhi asivikele. Kodwa kuyini okumele sikwenze ukuze sisondele kuJehova?
2. Singasondela njani kuJehova?
2 Sisondela kuJehova ngokuthandaza kuye langokubala iLizwi lakhe futhi sicabangisise ngalo. Nxa singenza njalo sizamthanda kakhulu futhi siqakathekise lokho asenzela khona. Sizazimisela ukumlalela lokumnika udumo olumfaneleyo. (Isam. 4:11) Nxa singaqhubeka sisibamazi uJehova sizamthemba kakhulu njalo sithembe lenhlanganiso ayisebenzisayo ukuze asincedise.
3. UDeveli uzama njani ukusehlukanisa loJehova njalo kuyini okuzasinceda ukuthi singamtshiyi yena kanye lenhlanganiso yakhe? (IHubo 31:13, 14)
3 Kodwa uDeveli uzama ukusehlukanisa loJehova ikakhulu nxa sisebunzimeni. Ukwenza njani lokho? Uyazama ukwenza ukuthi sicine singasamthembi uJehova kanye lenhlanganiso yakhe. Kodwa kukhona esingakwenza ukuze simelane laye. Nxa silokholo oluqinileyo futhi simthemba sibili uJehova kasisoze simtshiye njalo kasisoze sitshiye inhlanganiso yakhe.—Bala iHubo 31:13, 14.
4. Sizaxoxa ngani esihlokweni lesi?
4 Esihlokweni lesi sizaxoxa ngezinto ezintathu ezingenza sicine singasamthembi uJehova lenhlanganiso yakhe, njalo izinto lezi zivela phandle kwebandla. Zingasehlukanisa njani loJehova njalo singenzani ukuze simelane lezilingo esiziphoselwa nguSathane?
NXA SISEBUNZIMENI
5. Ubunzima bungabangela njani ukuthi sicine singasamthembi uJehova lenhlanganiso yakhe?
5 Kungenzakala ukuthi sithwaliswe nzima yizihlobo kumbe siphelelwe ngumsebenzi. Inhlupho ezinjengalezi zingenza njani ukuthi singasayithembi inhlanganiso kaJehova futhi sicine sizehlukanisa layo? Nxa singaba phakathi kohlupho okwesikhathi eside singaphelelwa lithemba njalo sidane. Lapho-ke uSathane ungena ngenxeba njengempethu ezama ukusenza sithandabuze ukuthi uJehova uyasithanda. USathane ufuna sicabange ukuthi inhlupho zethu zibangelwa nguJehova kumbe yinhlanganiso yakhe. Lokho kwake kwenzakala kwamanye ama-Israyeli eGibhithe. Ekuqaliseni ayekholwa ukuthi uJehova nguye owayethume uMosi lo-Aroni ukuthi bawakhiphe ebugqilini. (Eks. 4:29-31) Kodwa ngokuhamba kwesikhathi uFaro wathi esewathwalise amagabha avuzayo aqalisa ukusola uMosi lo-Aroni esithi: “Selenze ukuthi uFaro lezinceku zakhe basenyanye njalo selifake inkemba esandleni sabo ukuze basibulale.” (Eks. 5:19-21) Kuyadanisa ukuthi asola izinceku zikaJehova ezazithembekile. Nxa usulesikhathi eside uphakathi kobunzima kuyini ongakwenza ukuze uhlale umthemba uJehova lenhlanganiso yakhe?
6. Sifundani kumphrofethi uHabakhukhi? (UHabakhukhi 3:17-19)
6 Thandaza kuJehova umtshele konke okusenhliziyweni yakho futhi uthembele kuye. Umphrofethi uHabakhukhi wehlelwa zinhlupho ezinengi. Kukhanya angathi wake wathandabuza ukuthi uJehova ulendaba laye. Yikho wathandaza kuJehova emtshela indlela ayezizwa ngayo. Wathi: ‘Kuzaze kube nini awu Jehova ngilokhu ngikhalela uncedo kodwa ungangizwa? Kungani ubekezelela abantu abahlukuluza abanye?’ (Hab. 1:2, 3) UJehova wawuphendula umthandazo wenceku yakhe. (Hab. 2:2, 3) UHabakhukhi waphinda wathokoza ngemva kokucabangisisa ngendlela uJehova ayesindise ngayo abantu bakhe. Wayengasathandabuzi ukuthi uJehova ulendaba laye lokuthi wayezamnceda ukuthi aqinisele kuloba yibuphi ubunzima. (Bala uHabakhukhi 3:17-19.) Thina sifundani kulokhu? Nxa usebunzimeni thandaza kuJehova umtshele okukukhathazayo ubusuthembela kuye. Ungenza njalo uJehova uzakunika amandla owadingayo ukuze uqhubeke uqinisela. Nxa ungabona ukuthi uyakuncedisa ukholo lwakho luzaqina.
7. Izihlobo zikaShirley zazama njani ukumphambanisa njalo kuyini okwenza waqhubeka elokholo kuJehova?
7 Qhubeka usenza izinto ezizakwenza uhlale useduze loJehova. Lokhu yikho okwanceda udadewethu okuthiwa nguShirley b wePapua New Guinea ngesikhathi esebunzimeni. Ngakibo kaShirley babengabayanga futhi kwezinye izikhathi babethwala nzima ukuthola ukudla okweneleyo. Esinye isihlobo sakhe sazama ukumenza ukuthi acine engasamthembi uJehova. Sathi: “Uthi umoya ongcwele uyakuncedisa? Ukuncedisa ngaphi khonapha? Lilokhu lizidubekela. Lidlalisa isikhathi nxa litshumayela.” UShirley uthi ngazibuza ukuthi: “Kambe uNkulunkulu ulendaba lathi? Ngahle ngathandaza kuJehova ngamtshela konke engangikucabanga. Angizange ngiyekele ukubala iBhayibhili lamabhuku ethu njalo ngaqhubeka ngitshumayela futhi ngisiya emihlanganweni.” Wacina enanzelela ukuthi uJehova kazange ayitshiye imuli yangakibo ngoba abazange balambe futhi babethokoza. Uthi: “Ngazibonela ukuthi uJehova wayeyiphendula imithandazo yami.” (1 Thim. 6:6-8) Lawe nxa ungaqhubeka usenza izinto ezikusondeza kuJehova awusoze uvumele ubunzima kumbe ukuthandabuza kukwehlukanisa laye.
NXA ABAFOWETHU ABAKHOKHELAYO BEPHATHWA KUBI
8. Kuyini okungehlela abafowethu abakhokhelayo enhlanganisweni kaJehova?
8 Izitha zethu zingakhuluma amanga ngabafowethu abakhokhelayo enhlanganisweni kaJehova zisebenzisa abezindaba le-inthanethi. (Hubo. 31:13) Abanye abafowethu sebeke betheswa amacala njalo babotshwa. Lokhu kwake kwenzakala lakumaKhristu akuqala lapho umphostoli uPhawuli emangalelwa ngamanga futhi ebotshwa. AmaKhristu la enzani?
9. Amanye amaKhristu enzani umphostoli uPhawuli esebotshiwe?
9 Amanye amaKhristu amlahlela iganga umphostoli uPhawuli ngesikhathi ebotshiwe eRoma. (2 Thim. 1:8, 15) Kambe ukuthi babeyangiswa yikuthi abantu basebebona uPhawuli eyisigangi? (2 Thim. 2:8, 9) Kumbe babesesaba ukuthi labo bangahlukuluzwa? Asazi ukuthi kuyini okwabangela ukuthi benze njalo kodwa kumele ukuthi kwamzwisa ubuhlungu obukhulu uPhawuli. Wayedlule ebunzimeni obukhulu waze wafaka impilo yakhe engozini ngenxa yabo. (Imiseb. 20:18-21; 2 Khor. 1:8) Kasingabi njengalabo abalahla uPhawuli ngesikhathi esebunzimeni. Kuyini okufanele sikukhumbule nxa abafowethu abakhokhelayo behlukuluzwa?
10. Kuyini okumele sihlale sikukhumbula nxa abazalwane abakhokhelayo behlukuluzwa?
10 Hlala ukhumbula ukuthi kungani sihlukuluzwa lokuthi ngubani okubangelayo. U-2 Thimothi 3:12 uthi: “Bonke abazimisele ukuphila bezinikele kuNkulunkulu futhi bemanyene loKhristu uJesu labo bazahlukuluzwa.” Yikho akumelanga simangale nxa sibona uSathane ehlasela kakhulu abazalwane abakhokhelayo. Uyabe esenzela ukuthi bangabi qotho kuJehova, thina besesisesaba.—1 Phet. 5:8.
U-Onesiforu waba lesibindi sokuncedisa uPhawuli ngesikhathi ebotshiwe. Lalamuhla abafowethu labodadewethu bayabasekela abazalwane babo ababotshiweyo (Khangela indima 11 lo-12)
11. Sifundani ku-Onesiforu? (U-2 Thimothi 1:16-18)
11 Qhubeka usekela abazalwane abakhokhelayo njalo ungabatshiyi. (Bala u-2 Thimothi 1:16-18.) U-Onesiforu yena kazange enze njengamanye amaKhristu ngesikhathi uPhawuli ebotshiwe. ‘Kazange abelenhloni zokuthi [uPhawuli] wayesejele ebotshwe ngamaketane.’ Kodwa wamdinga waze wamthola wasezama ukumncedisa ngalokho ayekudinga. Ngesikhathi esenza lokho u-Onesiforu wayefaka impilo yakhe engozini. Sifundani kuye? Akumelanga sesabe abantu besesiyekela ukusekela abafowethu abayabe behlukuluzwa. Kodwa kumele sibavikele senze konke esingakwenza ukuze sibancede. (Zaga. 17:17) Kuqakathekile ukuthi sibathande futhi sibasekele.
12. Sifundani kubafowethu labodadewethu beRussia?
12 Kuyini okwenziwa ngabafowethu labodadewethu eRussia nxa abazalwane babo bangabotshwa? Abanengi bayabuya ukuzobasekela nxa besemthethwandaba. Sifundani kulokho? Akumelanga sesabe nxa abazalwane abakhokhelayo beqanjelwa amanga, bebotshwa kumbe behlukuluzwa. Kodwa kumele sibathandazele, sincedise imuli zabo njalo sidinge ezinye indlela esingabasekela ngazo.—Imiseb. 12:5; 2 Khor. 1:10, 11.
NXA SICHOTHOZWA
13. Ukuchothozwa kungabangela njani ukuthi sicine singasamthembi uJehova lenhlanganiso yakhe?
13 Izihlobo ezingakhonziyo labantu esisebenza labo kumbe esifunda labo esikolo bangasichothoza ngenxa yokuthi siyatshumayela kumbe silandela imithetho kaJehova. (1 Phet. 4:4) Bangathi: “Wena ngiyakuzwisisa sibili kodwa itshetshi yakho ilemithetho enzima futhi iyabhowa.” Abanye bangasisola ngendlela esiphatha ngayo abantu abasusiweyo besithi: “Lina lilomoya omubi.” Konke lokhu kungenza sicine sizibuza ukuthi imithetho kaJehova iqondile yini. Singacina sizibuza sisithi: ‘UJehova ukhangelele ukuthi ngenze okungaphezu kwamandla ami yini? Inhlanganiso yakhe iyacindezela yini?’ Nxa uzibuza imibuzo enjengale kuyini okungakunceda ukuthi uhlale useduze loJehova lenhlanganiso yakhe?
UJobe kazange awakholwe amanga alabo ababezithi ngabangane bakhe. Wazimisela ukuhlala eqotho kuJehova( Khangela indima 14)
14. Kumele senzeni nxa abanye besichothoza ngokulandela imithetho kaJehova? (IHubo 119:50-52)
14 Zimisele ukuqhubeka ulandela imithetho kaJehova. UJobe waqhubeka esenza lokho uJehova ayesithi kuqondile lanxa wayechothozwa. Omunye owayezenza umngane kaJobe wazama ukumenza acabange ukuthi uNkulunkulu kalandaba lokuthi uyayilandela yini imithetho yakhe. (Jobe. 4:17, 18; 22:3) Kodwa uJobe kazange awakholwe amanga la. Wayekwazi ukuthi imithetho kaJehova iqondile futhi wayezimisele ukuyilandela. Kazange avumele abanye baphambanise ubuqotho bakhe. (Jobe. 27:5, 6) Sifundani kulokhu? Lanxa sichothozwa akumelanga sithandabuze ukuthi imithetho kaJehova iqondile. Cabanga ngalokho okwenzakale empilweni yakho. Awukubonanga kanengi yini ukuthi imithetho kaJehova iqondile lokuthi iyakunceda? Zimisele ukusekela inhlanganiso elandela imithetho le. Nxa ungenza njalo akulalutho oluzakwehlukanisa loJehova.—Bala iHubo 119:50-52.
15. Kungani uBrizit wachothozwa?
15 Ake sixoxe ngokwenzakala komunye udadewethu ohlala e-India okuthiwa nguBrizit. Izihlobo zakhe zamchothoza ngenxa yokuba nguFakazi. Wathi esanda kubhabhathizwa ngo-1997 umkakhe owayengakhonzi waphelelwa ngumsebenzi. Yikho umkakhe wathi basuke lamadodakazi abo bayehlala labazali bakhe kwelinye idolobho. UBrizit wayesazokubona okukhulu. Kwakuzamele adinge umsebenzi ukuze ondle imuli yakhe njengoba umkakhe wayengasebenzi. Kanti njalo ibandla ayengangena lalo lalikhatshana ngamakhilomitha angaba ngu-350. Izihlobo zomkakhe zamthwalisa nzima ngenxa yalokho ayekukholwa njalo zamhlupha okokuthi kwasekumele bathuthe futhi. Bathi besalibele umkakhe wabetshona. Ngokuhamba kwesikhathi enye indodakazi yakhe yabulawa yi-cancer ileminyaka engu-12 kuphela. Okwaba buhlungu kakhulu yikuthi izihlobo zikaBrizit zasola yena ngakho konke okwakusenzakala. Zazisithi aluba wayengasiFakazi kaJehova wayengasoze abephakathi kwenhlupho zonke lezi. Lanxa kunjalo wayelokhu emthemba uJehova njalo kazange ayitshiye inhlanganiso yakhe.
16. Yiziphi izibusiso ezatholwa nguBrizit ngenxa yokuhlala eseduze loJehova lenhlanganiso yakhe?
16 Njengoba uBrizit wayehlala khatshana lebandla ayengangena lalo umbonisi wesiqinti wamkhuthaza ukuthi atshumayele lapho ayehlala khona futhi enzele imihlangano emzini wakhe. Ekuqaliseni wayebona angani lokho kwakungaphezu kwamandla akhe, kodwa wacina ekwenzile lokho ayekutsheliwe. Watshumayeza abanye, wangena imihlangano emzini wakhe njalo wayesenza ukukhonza kwemuli lamadodakazi akhe zikhathi zonke. Kwaphetha ngani? UBrizit wafunda iBhayibhili labantu abanengi futhi abanengi bakhona babhabhathizwa. Ngo-2005 waba liphayona lesikhathi sonke. Wabusiswa ngenxa yokuthi wamthemba uJehova futhi wanamathela enhlanganisweni yakhe. Sikhuluma nje amadodakazi akhe aqhubeka emkhonza uJehova njalo sekulamabandla amabili lapho uBrizit ahlala khona. UBrizit kathandabuzi ukuthi uJehova wamnika amandla okubekezelela inhlupho zakhe lokuthi wamncedisa ukuthi aqinisele ngesikhathi abangakibo bemchothoza.
HLALA UQOTHO KUJEHOVA LASENHLANGANISWENI YAKHE
17. Kuyini okumele sizimisele ukukwenza?
17 USathane ufuna sicabange ukuthi uJehova kasoze asincedise nxa singaba phakathi kwenhlupho, lokuthi nxa siqhubeka sisekela inhlanganiso kaJehova sizathwala nzima kakhulu. Ufuna sesabe nxa abazalwane abakhokhelayo benyundelwa, behlukuluzwa kumbe bebotshwa. Usebenzisa abantu ukuthi basichothoze ukuze sicine singasayithembi imithetho kaJehova kanye lenhlanganiso yakhe. Kodwa siwazi mhlophe amacebo akhe njalo asivumi ukuthi asiqile. (2 Khor. 2:11) Zimisele ukuhlala uqotho kuJehova lasenhlanganisweni yakhe, uzimisele lokungalaleli amanga kaSathane. Khumbula ukuthi uJehova kasoze akutshiye loba sekutheni. (Hubo. 28:7) Yikho ungavumeli loba yini ikwehlukanisa laye!—Rom. 8:35-39.
18. Sizaxoxa ngani esihlokweni esilandelayo?
18 Esihlokweni lesi sixoxe ngenhlupho ezingavela phandle kwebandla. Kodwa okunye okwenzakala ebandleni kungabangela ukuthi sicine singasamthembi uJehova lenhlanganiso yakhe. Kuyini okuzasinceda ukuze lokho kungenzakali? Sizaxoxa ngakho esihlokweni esilandelayo.
INGOMA 118 “Yandisa Ukholo Lwethu”
a Kumele sihlale simthemba uJehova lenhlanganiso yakhe ukuze senelise ukuqinisela kulezinsuku zokucina. UDeveli usiphosela izilingo efuna sicine singasamthembi uJehova. Esihlokweni lesi sizaxoxa ngezinto ezintathu uDeveli azisebenzisayo lokuthi singenzani ukuze zingasiqedi amandla.
b Amanye amabizo atshintshiwe.