1-2. Kuyini okungenza sibone angani uJehova kayiphenduli imithandazo yethu?

 “THOKOZA kakhulu ngenxa kaJehova, yena uzakupha lokho okufisayo.” (Hubo. 37:4) La ngamazwi anika ithemba! Kodwa kumele sikhangelele ukuthi uJehova ahle asiphe konke esikucelayo yini? Kungani kumele sicabangisise ngombuzo lo? Cabanga ngezinto lezi ezingenzakala. Udade ongatshadanga uyathandaza ecela ukuthi angene iSikolo Sabavangeli BoMbuso kodwa kudlula iminyaka eminengi elokhu engakabizwa. Omunye umzalwane osakhulayo ukhuleka kuJehova ecela ukuthi amsilise emkhuhlaneni omubi alawo ukuze enelise ukwenza eminye imisebenzi ebandleni kodwa uqhubeka egula. Abazali abangamaKhristu bayathandaza becela ukuthi umntanabo angatshiyi ukukhonza kodwa yena ukhetha ukutshiya ukukhonza uJehova.

² Kungenzakala ukuthi kukhona lawe owakucela kuJehova kodwa awukakutholi. Lokhu kungenza ucabange ukuthi uJehova uphendula imithandazo yabanye kodwa eyakho kayiphenduli. Kumbe ungazitshela ukuthi mhlawumbe kulento oyiphambanisileyo. Omunye udadewethu okuthiwa nguJanice b laye wayesecabanga njalo. Yena lomkakhe bathandaza becela ukuthi bayesebenza eBhetheli. Uthi: “Ngangizitshela ukuthi ngesikhatshana nje siyabe sesibiziwe eBhetheli.” Kwadlula izinyanga kwadlula leminyaka kulokhu kuthe nya. UJanice uthi: “Ngadana futhi ngangizibuza ukuthi ngimoneleni uJehova. Phela ngangithandaza ngicela ukuthi angitshengise indlela. Pho kungani engawuphendulanga umthandazo wami?”

3. Sizaxoxa ngani esihlokweni lesi?

 ³ Ngezinye izikhathi singazibuza ukuthi uJehova uyayilalela yini imithandazo yethu. Amanye amadoda akudala ayelokholo ayeke azibuze lokhu. (Jobe. 30:20; Hubo. 22:2; Hab. 1:2) Kuyini okungakunceda ukuthi ungathandabuzi ukuthi uJehova uzayiphendula imithandazo yakho? (Hubo. 65:2) Asiqaleni sixoxe ngemicijo elandelayo ukuze siphendule umbuzo lo: (1) Kuyini esingakhangelela ukuthi uJehova asenzele khona? (2) UJehova ukhangelele ukuthi senzeni? (3) Kungani kungadingeka ukuthi sitshintshe ezinye izinto esizithandazelayo?

4. Kuyini uJehova asithembisa khona kuJeremiya 29:12?

⁴ UJehova uthembisa ukuthi uzalalela imithandazo yethu. (Bala uJeremiya 29:12.) UNkulunkulu wethu uyasithanda ngoba simkhonza sithembekile, yikho ngeke ayekele ukulalela imithandazo yethu. (Hubo. 10:17; 37:28) Lanxa kunjalo, lokho akutsho ukuthi uzasinika konke esikucelayo. Ezinye izinto esizicelayo kungadingeka silinde kuze kufike umhlaba omutsha ukuze sizithole.

5. Kuyini uJehova akukhangelayo nxa elalela imithandazo yethu? Chasisa.

⁵ UJehova uyakhangela ukuthi izicelo zethu zihambelana njani lenhloso yakhe. (Isaya. 55:8, 9) Okunye akuhlosileyo yikuthi emhlabeni kugcwale amadoda labesifazana abamanyeneyo labathokozayo futhi bonke bebuswa nguye. Kodwa uSathane uthi abantu bangathokoza kakhulu nxa bengazibusa. (Gen. 3:1-5) Ngakho uJehova uvumele ukuthi abantu bazibuse ukuze kukhanye ukuthi uSathane uDeveli ulamanga. Kodwa inhlupho ezinengi esilazo namuhla zibangelwa yikuthi abantu bayazibusa. (Umtshu. 8:9) Siyakwazi ukuthi uJehova kasoze ahle aziqede zonke inhlupho zethu khathesi. Nxa angaziqeda khathesi, abanye abantu abangakholwayo kuNkulunkulu bangabona angani abantu bayenelisa ukuzibusa lokuthi bangenelisa ukuqeda inhlupho zabo.

6. Kungani kumele singathandabuzi ukuthi uJehova uzahlala esenza izinto eziqondileyo futhi ezitshengisa ukuthi uyasithanda?

⁶ Abantu bangacela into eyodwa kodwa uJehova aphendule ngendlela ezitshiyeneyo. Ngokwesibonelo, iNkosi uHezekhiya yathi isibangwa lezibi yacela ukuthi uJehova ayisilise. Lakanye uJehova wayisilisa. (2 Amakho. 20:1-6) Kodwa umphostoli uPhawuli wathi ethandaza kuJehova emncenga ukuthi amkhiphe “ameva enyameni,” okungenzeka ukuthi kwakungumkhuhlane owawumhlupha, uJehova kazange alukhiphe uhlupho lolo. (2 Khor. 12:7-9) Esinye isibonelo ngumphostoli uJakhobe loPhetro. INkosi uHerodi yayifuna ukubabulala bobabili. Ibandla lamthandazela uPhetro futhi kufanele ukuthi loJakhobe lamthandazela. Lanxa kunjalo, uJakhobe wabulawa kodwa uPhetro yena wasindiswa ngendlela eyisimangaliso. (Imiseb. 12:1-11) Singazibuza ukuthi, ‘Kungani uJehova wasindisa uPhetro kodwa wangamsindisi uJakhobe?’ IBhayibhili kalisitsheli. c Kodwa esingakuthandabuziyo yikuthi uJehova “kakwenzi okungalunganga.” (Dute. 32:4) Okunye esikwaziyo yikuthi uJehova wayebathanda bobabili uPhetro loJakhobe. (Isam. 21:14) Ngezinye izikhathi uJehova kaphenduli imithandazo yethu ngendlela esifuna ngayo. Asiyisoli indlela uJehova akhetha ukuphendula ngayo imithandazo yethu ngoba siyathemba ukuthi indlela azaphendula ngayo iqondile njalo itshengisa ukuthi uyasithanda.—Jobe. 33:13.

7. Kuyini okumele sizame ukuthi singakwenzi njalo kungani?

⁷ Kumele sizame ukungaqathanisi indlela uJehova aphendula ngayo imithandazo yethu  lendlela aphendula ngayo eyabanye. Ngokwesibonelo, singacela uJehova ukuthi asincedise size simtshele lokuthi sifisa asincedise njani. Ngokuhamba kwesikhathi sibone isicelo sethu singaphendulwanga. Kodwa besesisizwa ukuthi kulomunye umuntu ocele into efanana laleyo esiyicelileyo futhi kukhanye angani yena uJehova umphendulile. Lokhu kwake kwenzakala komunye udadewethu okuthiwa ngu-Anna. Wathandazela ukuthi umkakhe okwakuthiwa nguMatthew owayele-cancer asile. Ngesikhathi esifanayo, kwakulabodadewethu ababili abasebekhulile ababele-cancer. U-Anna wathandaza ngenhliziyo yonke ethandazela umkakhe kanye labodadewethu laba. Odadewethu basila kodwa uMatthew wafa. U-Anna waqalisa ezibuza ukuthi odadewethu laba babesiliswe nguJehova yini. Nxa kunjalo kungani engazange aphendule imithandazo yakhe yokuthi umkakhe laye asile. Iqiniso yikuthi asikwazi ukuthi kuyini okwenza odadewethu laba basila. Esikwaziyo yikuthi esikhathini esizayo uJehova uzakuqeda konke ukuhlupheka kwethu njalo ukulindele ngabomvu ukuvusa abangane bakhe abafileyo.—Jobe. 14:15.

8. (a) U-Isaya 43:2 uthi uJehova usincedisa njani? (b) Ukuthandaza kungasinceda njani nxa siphakathi kwezinhlupho? (Khangela ividiyo ethi, Umthandazo Usinceda Sibekezele.)

⁸ UJehova uzahlala esincedisa. UJehova nguBaba wethu osithandayo futhi kafuni ukusibona sisizwa ubuhlungu. (Isaya. 63:9) Lanxa kunjalo akasivikeli kubo bonke ubunzima obungasehlela. Ubunzima lobo singabufanisa lemifula lamalangabi. (Bala u-Isaya 43:2.) UJehova usithembisa ukuthi uzasincedisa ‘sidabule’ kumbe sidlule ebunzimeni. Kasoze avumele ukuthi ubunzima obusehlelayo busenze sicine sisehluleka ukumkhonza. Kanti njalo uJehova uyasinika umoya wakhe ongcwele osinceda ukuthi siqinisele. (Luk. 11:13; Flp. 4:13) Ngakho asithandabuzi ukuthi uzasinika konke esikudingayo ukuze senelise ukuqinisela njalo sihlale sithembekile kuye. d

9. Amazwi akuJakhobe 1:6, 7, atshengisa njani ukuthi kumele sithembe ukuthi uJehova uzasincedisa?

⁹ UJehova ukhangelele ukuthi simthembe. (Heb. 11:6) Kwezinye izikhathi inhlupho zethu zingakhanya zingaphezu kwamandla ethu. Zingasenza sithandabuze ukuthi uJehova angasincedisa. Kodwa iBhayibhili lisiqinisekisa ukuthi ngamandla kaNkulunkulu ‘singakhwela umduli.’ (Hubo. 18:29) Kulokuthi sizitshele ukuthi uNkulunkulu kasoze ayiphendule imithandazo yethu, kumele sithandaze silokholo njalo sithemba ukuthi uzayizwa futhi ayiphendule.—Bala uJakhobe 1:6, 7.

10. Singatshengisa njani ukuthi izenzo zethu zihambelana lalokho esikuthandazeleyo? Nika isibonelo.

¹⁰ UJehova ukhangelele ukuthi senze izinto ezihambelana lalokho esikuthandazeleyo. Ngokwesibonelo, umzalwane angathandaza kuJehova ecela ukuthi avunyelwe ukungayi emsebenzini ukuze ayengena umhlangano wesabelo. UJehova angawuphendula njani umthandazo wakhe? Anganika umzalwane lo isibindi ukuze enelise ukuyacela kumqhatshi wakhe. Kodwa lokho akutsho ukuthi nxa umzalwane esekhulekile usengazihlalela, kuyabe kumele amlande umqhatshi wakhe ayecela. Kungadingeka lokuthi acele kanengi. Okunye angakwenza yikucela ukuthi omunye asebenza laye ambambele. Nxa kungaba nzima angacela ukuthi umqhatshi angamholisi imali yamalanga ayabe engasebenzanga ngawo.

11. Kungani kumele sihlale sithandaza ngezinto ezisihluphayo?

¹¹ UJehova ukhangelele ukuthi sihlale sithandaza simtshela okusihluphayo. (1 Thes. 5:17) Amazwi kaJesu atshengisa ukuthi ezinye izicelo zethu azisoze zihle zilungiswe khonapho khonapho.  (Luk. 11:9) Ngakho ungakhalali! Qhubeka uthandaza ngenhliziyo yonke. (Luk. 18:1-7) Nxa singaqhubeka sithandaza ngendaba ethile siyabe sitshengisa uJehova ukuthi lokho esikucelayo kuqakathekile kakhulu kithi. Kanti njalo siyabe sitshengisa ukuthi siyakholwa ukuthi uyenelisa ukusincedisa.

12. (a) Yiwuphi umbuzo okumele sizibuze wona mayelana lalokho esikuthandazelayo njalo kungani? (b) Singatshengisa njani ukuthi siyamhlonipha uJehova nxa sithandaza? (Khangela ibhokisi elithi “ Engikuthandazelayo Kuyatshengisa Yini Ukuthi Ngiyamhlonipha UJehova?”)

¹² Nxa singasakutholanga ebesikuthandazela singazibuza imibuzo emithathu. Owokuqala ngothi, ‘Ngithandazela into eyiyo yini?’ Izikhathi ezinengi siyabe sizitshela ukuthi siyakwazi okuzasinceda. Kodwa kwezinye izikhathi esikuthandazelayo kungabe kungayisikho okuzasinceda. Phela nxa sithandazela uhlupho oluthile, uJehova angabe elendlela engcono yokululungisa lolohlupho ukwedlula leyo thina ebesiyithandazele. Kanti njalo kwezinye izikhathi esikuthandazelayo kungabe kungahambelani lentando kaNkulunkulu. (1 Joh. 5:14) Ngokwesibonelo, cabanga ngabazali esike saxoxa ngabo abakhuleka kuJehova becela ukuthi umntanabo angatshiyi ukukhonza. Leso kuzwakala kuyisicelo esiqondileyo sibili, kodwa uJehova akasibambi ngamandla ukuthi simkhonze. Ufuna ukuthi sonke, okugoqela labantwabethu, sizikhethele ukumkhonza. (Dute. 10:12, 13; 30:19, 20) Yikho abazali laba babengathandaza becela ukuthi uJehova abancedise bafundise umntanabo ngendlela ezamthinta inhliziyo imenze amthande uJehova futhi abe ngumngane wakhe.—Zaga. 22:6; Efe. 6:4.

13. UHebheru 4:16 uthi uJehova uzasincedisa nini? Chasisa.

¹³ Umbuzo wesibili ngothi, ‘Lesi yiso yini  isikhathi sokuthi uJehova aphendule umthandazo wami?’ Singabona angani uJehova kumele aphangise ukuphendula imithandazo yethu. Kodwa iqiniso yikuthi uJehova nguye osaziyo isikhathi esingcono sokusiphendula. (Bala uHebheru 4:16.) Nxa singayekela ukukuthola masinyane lokho ebesikuthandazele, singacabanga ukuthi uJehova kafuni ukusiphendula. Kodwa kungenzakala ukuthi yena uyabe ebona ukuthi ayisiso isikhathi esihle sokusiphendula. Ngokwesibonelo, cabanga ngomzalwane osakhulayo esike saxoxa ngaye owathandaza ecela ukuthi asile emkhuhlaneni wakhe. Aluba uJehova wamelapha ngendlela eyisimangaliso, uSathane wayengamsola esithi umzalwane lo uqhubeke ekhonza uJehova ngoba esilisiwe. (Jobe. 1:9-11; 2:4) UJehova usesibekile isikhathi lapho azaqeda khona yonke imikhuhlane. (Isaya. 33:24; Isam. 21:3, 4) Nxa lesosikhathi singakafiki, akumelanga sikhangelele ukwelatshwa ngendlela eyisimangaliso. Ngakho umzalwane lo angathandaza kuJehova emcela ukuthi amnike amandla kanye lokuthula ukuze enelise ukubekezelela ubunzima bakhe njalo aqhubeke ekhonza uNkulunkulu ethembekile.—Hubo. 29:11.

14. Sifundani kulokho okwenzakala kuJanice?

¹⁴ Usamkhumbula yini uJanice owathandazela ukuyasebenza eBhetheli? Kwadlula iminyaka emihlanu elokhu engazwisisi ukuthi uJehova uwuphendule njani umthandazo wakhe. Uthi: “UJehova wasebenzisa isikhathi leso ukuthi angifundise futhi angenze ngibe ngumKhristu ongcono. Kwakumele ngifunde ukumthemba kakhulu. Lendlela engangitaditsha ngayo kwakumele ngiyithuthukise njalo kwakumele ngifunde ukuba ngumuntu othokozayo kungelani lokuthi izimo zami zinjani.” Ngemva kwesikhathi uJanice lomkakhe baba ngabahambeli. UJanice uqhubeka esithi: “Khathesi senginanzelele ukuthi uJehova wayiphendula imithandazo yami lanxa wayiphendula ngendlela engangingayikhangelelanga.  Kwangithatha isikhathi ukunanzelela ubuhle bempendulo yakhe, kodwa ngiyambonga kakhulu ngoba wangiphatha ngomusa langothando.”

15. Kungani kungaba kuhle ukuthi sithandazele lokunye? (Khangela lemifanekiso.)

¹⁵ Umbuzo wesithathu ngothi, ‘Kumele ngithandazele lokunye yini?’ Lanxa kukuhle ukutshela uJehova khona kanye esikufunayo, kungcono ukuthi ngezinye izikhathi simtshele isifiso sethu besesitshiyela kuye ukuthi aphendule ngendlela ayibona ingcono. Cabanga ngodadewethu ongatshadanga obethandazela ukuya eSikolo Sabavangeli BoMbuso. Ufisa ukuthi angavela esikolo ayencedisa lapho okulabamemezeli abalutshwana khona. Ngesikhathi esathandazela ukuya esikolo leso, okunye angakwenza yikucela uJehova ukuthi amncedise abone ezinye indlela angangezelela ngazo inkonzo yakhe. (Imiseb. 16:9, 10) Ngemva kokuthandaza usengabuza umbonisi wesiqinti ukuthi akula yini ibandla eliseduze angayalincedisa. Okunye angakwenza yikubhalela iwofisi yegatsha ebuza ukuthi kungaphi lapho okufuneka khona abamemezeli boMbuso angayancedisa khona. e

16. Kuyini esingaqiniseka ngakho?

¹⁶ Njengoba sesibonile, singaqiniseka ukuthi uJehova uzaphendula imithandazo yethu ngendlela eqondileyo njalo etshengisa ukuthi uyasithanda. (Hubo. 4:3; Isaya. 30:18) Lanxa kwezinye izikhathi singatholi impendulo esiyabe sizikhangelele, uJehova kasoze ayekele ukuyiphendula imithandazo yethu. Uyasithanda kakhulu njalo kasoze asilahle. (Hubo. 9:10) Ngakho qhubeka ‘uthembela kuye zikhathi zonke’ umtshele konke okusenhliziyweni yakho.—Hubo. 62:8.