1. Umphostoli uPhawuli wayezibona njani izinceku ezikhonzayo?

 INCEKU ezikhonzayo zenza imisebenzi eqakatheke kakhulu emabandleni. Umphostoli uPhawuli wayewaqakathekisa kakhulu amadoda la athembekileyo. Ngokwesibonelo, wathi ebhalela amaKhristu aseFiliphi incwadi, wabingelela izinceku ezikhonzayo ndawonye labadala.—Flp. 1:1.

2. ULuis uthini ngokuba yinceku ekhonzayo?

² Abafowethu abanengi ababhabhathiziweyo kubayabathokozisa ukuba zinceku ezikhonzayo kungelani lokuthi ngabasakhulayo kumbe ngasebebadala. Ngokwesibonelo, umfowethu okuthiwa nguDevan waba yinceku ekhonzayo eleminyaka engu-18. ULuis yena wabekwa eseleminyaka edlula engu-50. Abanengi bangavumelana lamazwi la akhulunywa nguLuis. Wathi: “Ngikubona kuyisibusiso ukuba yinceku ekhonzayo, ikakhulu nxa ngicabanga ngendlela abantu abasebandleni abangithanda ngayo langokuthi lami ngingatshengisa njani ukuthi ngiyabathanda.”

3. Yiphi imibuzo ezaphendulwa esihlokweni lesi?

³ Nxa ungumfowethu obhabhathiziweyo futhi ungakabi yinceku ekhonzayo, ungazama yini ukulalamela umsebenzi lo? Esihlokweni lesi sizaphendula imibuzo le: Kuyini okungenza ufune ukuba yinceku ekhonzayo? IBhayibhili lithi kumele wenzeni ukuze ufanele ukuba yinceku ekhonzayo? Kodwa kasiqaleni sixoxe ngokuthi inceku ezikhonzayo zenza yiphi imisebenzi.

YIPHI IMISEBENZI EYENZIWA ZINCEKU EZIKHONZAYO?

4. Yiphi imisebenzi eyenziwa zinceku ezikhonzayo? (Khangela lomfanekiso.)

⁴ Inceku ezikhonzayo ngabafowethu ababhabhathiziweyo ababekwa nguJehova esebenzisa umoya ongcwele ukuze bancedise  abadala ngemisebenzi etshiyeneyo ebandleni. Ezinye inceku ezikhonzayo ziphiwa umsebenzi wokukhangela ukuthi abamemezeli balensimu eyeneleyo yini yokutshumayela lokuthi balawo yini amabhuku okusebenzisa ekutshumayeleni. Ezinye ziyancedisa emsebenzini wokuklina lokulungisiswa kwamaWolu oMbuso. Kanti njalo ezinye ziba ngabalindi eWolu yoMbuso futhi ezinye zilungisa amamayikhi zidlale lamavidiyo emihlanganweni yebandla. Imisebenzi eminengi eyenziwa zinceku ezikhonzayo kayisiyo yokufundisa. Lanxa kunjalo, izinceku ezikhonzayo ziyamthanda uJehova futhi zilandela izimiso zakhe eziseBhayibhilini. Kanti njalo kazibathontisi abafowabo labodadewabo ezikhonza labo. (Mat. 22:​37-39) Umfowethu obhabhathiziweyo angenzani ukuze alalamele ukuba yinceku ekhonzayo?

5. Kumele wenzeni nxa ufuna ukuba yinceku ekhonzayo?

⁵ IBhayibhili liyasitshela ukuthi umfowethu obhabhathiziweyo kumele enzeni nxa efuna ukuba yinceku ekhonzayo. (1 Thim. 3:​8-10, 12, 13) Nxa ufuna ukuba yinceku ekhonzayo, ungataditsha okusemavesini la ubususebenza nzima ukuthi ukwenze. Kodwa kumele uqale uzibuze ukuthi kungani ufuna ukuba yinceku ekhonzayo.

KUYINI OKUNGENZA UFUNE UKUBA YINCEKU EKHONZAYO?

6. Kuyini okuzakwenza ufise ukuba yinceku ekhonzayo? (UMathewu 20:28; khangela lomfanekiso.)

⁶ Cabanga ngalokho okwenziwa nguJesu Khristu njengoba kunguye esifuna ukumlingisela. Wayemthanda uYise futhi wayebathanda labantu. Lokho yikho okwakusenza ukuthi asebenze nzima futhi enze lemisebenzi eyayikhangelelwa phansi. (Bala uMathewu 20:28; Joh. 13:​5, 14, 15) Lawe uJehova uzakubusisa njalo uzakuncedisa ukuthi ufanele ukuba yinceku ekhonzayo nxa umthanda futhi ubathanda abantu.—1 Khor. 16:14; 1 Phet. 5:5.

7. Kungani kumele umzalwane ofuna ukuba yinceku ekhonzayo axwaye ukuziphakamisa?

⁷ Emhlabeni lo, abantu bajayele ukubabuka abantu abaziphakamisayo. Kodwa abantu bakaJehova bona kabanjalo. Umzalwane obathandayo abantu njengoJesu kazenzi umaqhuzu phakathi kwabanye futhi uyabe engafuni abanye bambone angathi yena uqakatheke kakhulu. Nxa umuntu oziphakamisayo engabekwa ebandleni, angayala ukwenza imisebenzi ekhangelelwa phansi futhi angehluleka ukuncedisa izimvu zikaJehova eziligugu. Angabona angani  imisebenzi le imehlisa isithunzi. (Joh. 10:12) UJehova kambusisi umuntu owenza izinto esenzela ukubukwa kumbe ukuthi abantu bambone eqakatheke kakhulu.—1 Khor. 10:​24, 33; 13:​4, 5.

8. UJesu wabatshelani abaphostoli bakhe?

⁸ Kwezinye izikhathi abafundi bakaJesu babefuna ukuphiwa eminye imisebenzi yenkonzo kodwa belenhloso ezingayisizo. Ngelinye ilanga abaphostoli bakhe ababili, uJakhobe loJohane, bacela ukuthi abanike izikhundla eMbusweni ezazizakwenza bakhanye sebeqakatheke kakhulu. Kodwa uJesu wabakhuza wasebachasisela bonke abaphostoli bakhe abangu-12 wathi: “Loba ngubani ofuna ukuba mkhulu phakathi kwenu kumele abe yinceku yenu, njalo loba ngubani ofuna ukuba ngowokuqala phakathi kwenu kufanele abe yisigqili sabo bonke.” (Mak. 10:​35-37, 43, 44) Abafowethu abalalamela imisebenzi yenkonzo belenhloso yokunceda abanye balusizo kakhulu ebandleni.—1 Thes. 2:8.

KUYINI OKUNGAKUNCEDA UKUTHI UBE LESIFISO SOKULALAMELA UKUBA YINCEKU EKHONZAYO?

9. Kuyini okungakunceda ukuthi ube lesifiso sokulalamela ukuba yinceku ekhonzayo?

⁹ Akuthandabuzwa ukuthi uyamthanda uJehova lokuthi uyafuna ukunceda abanye. Lanxa kunjalo, ungezwa kungatsho ukuthi ube yinceku ekhonzayo ngenxa yokuthi uyabe ungazimiselanga ukuthi wenze imisebenzi eyenziwa yizo. Pho kuyini okungenza ucine usufisa ukuba yinceku ekhonzayo. Okungakunceda yikucabanga ngentokozo ongaba layo nxa ungenza imisebenzi enceda abafowenu labodadewenu. UJesu wathi: “Ukupha kuyathokozisa kakhulu ukwedlula ukwamukela.” (Imiseb. 20:35) UJesu kazange akukhulume kuphela lokhu kodwa wakwenza. Kwakumthokozisa ukuncedisa abanye. Lawe kungakuthokozisa kakhulu.

10. UJesu watshengisa njani ukuthi kwakumthokozisa ukunceda abanye? (UMakho 6:​31-34)

¹⁰ Ake sixoxe ngokunye okwenziwa nguJesu okutshengisa ukuthi kwakumthokozisa ukunceda abanye. (Bala uMakho 6:​31-34.) Ngelinye ilanga uJesu labaphostoli bakhe bathi sebediniwe basuka baya endaweni engelabantu ukuze baphumule. Kodwa ixuku labantu labanqamekela labaqalela ukufika ngoba lalifuna ukufundiswa nguJesu. Kwakulula ukuthi uJesu ayale ukubafundisa abantu laba ngoba yena labafundi bakhe ‘babeswele lesikhathi sokuphumula badle.’ Okunye uJesu ayengakwenza yikubafundisa izinto ezimbili ezintathu nje abesesithi bahambe. Kodwa ngenxa yokuthi wayebathanda, ‘waqalisa ukubafundisa izinto ezinengi.’ Wabafundisa kwaze kwaba ‘semini yantambama.’ (Mak. 6:35) Okwenza wabafundisa yikuthi ‘wayebazwela usizi’ abantu. Wayefuna ukubafundisa ngoba wayebathanda. Ukunceda abanye kwenza uJesu wathokoza kakhulu.

11. UJesu wabenzelani ababebuye ukuzomlalela? (Khangela lomfanekiso.)

¹¹ UJesu wayesithi nxa efundisa abantu akhangele lalokho ababengabe bekufuna abesebanceda ngakho. Wenza isimangaliso sokuthi kube lokudla okunengi wasesithi abafundi bakhe bakunike abantu. (Mak. 6:41) Lokhu wayekwenzela ukubafundisa ukuthi labo bakuthande ukunceda abanye. Wayefuna bakwazi ukuthi ukwenza imisebenzi yokunceda abanye lakho kuqakathekile. Lakhathesi izinceku ezikhonzayo zenza imisebenzi enjalo. Akucabange ukuthi abaphostoli bathokoza njani bencedisa uJesu ukunika abantu ukudla. Wonke umuntu ‘wadla wasutha.’ (Mak. 6:42) Lokhu kwakungasikho kokuqala lokokucina ukuthi aqakathekise okufunwa ngabanye. Okwempilo yakhe yonke esemhlabeni wayencedisa abanye abantu. (Mat. 4:23; 8:16) Kwakumthokozisa kakhulu ukufundisa abantu lokubanceda.  Yikho lawe uzathokoza kakhulu nxa ungazimisela ukusebenzela abanye futhi ulalamele ukuba yinceku ekhonzayo.

12. Kungani kungamelanga sicabange ukuthi ngeke sibe luncedo ebandleni?

¹² Nxa ubona angathi wena awulakho onganceda ngakho abanye ungakhathazeki. Akuthandabuzwa ukuthi ulakho okuhle ongakwenzela abanye ebandleni. Okunye ongakwenza yikubala amazwi abhalwa ngumphostoli uPhawuli aku-1 Khorinte 12:​12-30 njalo ucele uJehova akuncede ubone ukuthi ungakwenza njani okusemazwini la. Amazwi kaPhawuli aveza ukuthi wena uqakathekile njengazo zonke izinceku zikaJehova lokuthi ulakho ongakwenza okuzanceda ibandla. Nxa kuyikuthi khathesi kukhona okunye okukubambayo ukuthi ube yinceku ekhonzayo, ungalahli ithemba kodwa yenza konke okusemandleni akho emsebenzini kaJehova njalo uncedise labafowenu. Qiniseka ukuthi abadala bazakunika imisebenzi ehambelana lalokho owenelisa ukukwenza.—Rom. 12:​4-8.

13. Kuyini okunganceda umzalwane abone ukuthi akunzima ukuba yinceku ekhonzayo?

¹³ Nanku okunye ongacabanga ngakho okungakunceda ulalamele ukuba yinceku ekhonzayo. Izinto ezinengi ezifunekayo okukhulunywa ngazo eBhayibhilini okumele zenziwe ngumuntu nxa efuna ukuba yinceku ekhonzayo yizo futhi okumele zenziwe yiwo wonke amaKhristu. Phela wonke umKhristu kumele aqhubeke esondela kuJehova, abe ngumuntu ophanayo njalo aphile ngendlela ethokozisa uJehova. Yikho kungenzakala ukuthi lawe usukwenzile okunye kwakhona okufunakalayo ukuze ube yinceku ekhonzayo. Manje yiziphi izinto okumele zenziwe ngumzalwane ofuna ukuba yinceku ekhonzayo?

OKUMELE UKWENZE NXA UFUNA UKUBA YINCEKU EKHONZAYO

14. Kutshoni ukuthi inceku ekhonzayo akumelanga ‘ithathe izinto lula’? (U-1 Thimothi 3:​8-10, 12)

¹⁴ Khathesi asixoxeni ngokungenziwa ngumzalwane ofuna ukuba yinceku ekhonzayo okubhalwe ku-1 Thimothi 3:​8-10, 12. (Bala.) Inceku ekhonzayo akumelanga ‘ithathe izinto lula.’ Lokhu akutsho ukuthi akusamelanga idlale kumbe ihleke labanye. (Umtshu. 3:​1, 4) Kutsho ukuthi kumele ibe lesithunzi njalo yenze izinto ezizakwenza ihlonitshwe ngabantu. Kumele ikukhuthalele ukwenza yonke imisebenzi eyiphiwayo. Nxa uyenza yonke imisebenzi oyiphiwayo futhi uyiqeda, abafowenu labodadewenu ebandleni bazakuthemba futhi bakuhloniphe.

15. Kutshoni ukuthi inceku ekhonzayo akumelanga ‘ibe lobuqili kwekukhulumayo’ lokuthi ‘ingabi yisihwaba esithanda ukuthola inzuzo ngokungathembeki’?

 ¹⁵ Inceku ezikhonzayo akumelanga ‘zibe lobuqili kwezikukhulumayo.’ Lokhu kutsho ukuthi kumele ube qotho, uthembeke futhi wenze khona kanye oyabe ukukhulumile futhi ungaqili abanye. (Zaga. 3:32) Nxa kuthiwa inceku ekhonzayo ‘ingabi yisihwaba esithanda ukuthola inzuzo ngokungathembeki’ kutsho ukuthi akumelanga ibe liqili nxa isenza ibhizimusi futhi akumelanga izisebenzisele iminikelo evela kubafowethu labodadewethu. Akumelanga usebenzise ubudlelwano olabo labafowenu labodadewenu ukuthi wenze imali.

16. (a) Kutshoni ukuthi inceku ekhonzayo akumelanga ‘inathe kakhulu iwayini’? (b) Kutshoni ukuba ‘lomzwangedwa ohlanzekileyo’?

¹⁶ IBhayibhili lithi inceku ekhonzayo akumelanga ‘inathe kakhulu iwayini.’ Lokhu kutsho ukuthi akumelanga ibubhudle utshwala kumbe icine isisaziwa njengesidakwa. Liphinda lithi kumele ibe ‘lomzwangedwa ohlanzekileyo.’ Lokhu kutsho ukuthi kumele ilandele imithetho kaJehova kukho konke ekwenzayo. Lanxa lokho kungatsho ukuthi umzalwane oyinceku ekhonzayo kasaphambanisi kumenza ahlaliseke ngoba uyabe elobudlelwano obuhle loJehova.

17. Umzalwane angenzani ngesikhathi ‘ehlolwa ukuthi ufanele yini’? (U-1 Thimothi 3:10; khangela lomfanekiso.)

¹⁷ Umuntu engakabekwa ukuthi abe yinceku ekhonzayo kumele aqale ‘ahlolwe ukuthi ufanele yini.’ Lokhu kutsho ukuthi kumele abeseyenza kuhle yonke imisebenzi ayiphiwayo. Ngakho nxa abadala bangakupha umsebenzi ungazenzeli okufunayo kodwa landela konke abakutshela khona, ulandele leziqondiso esiziphiwa yinhlanganiso. Woba leqiniso lokuthi uyazwisisa ukuthi kumele uwenze njani umsebenzi abakunike wona njalo ubekwazi lokuthi kumele uwuqede nini. Nxa ungayenza kuhle yonke imisebenzi oyiphiwayo, abanye ebandleni bazananzelela ukuthi uyathuthuka sibili. Abadala kumele bakhangelisise babone ukuthi yibaphi abazalwane asebebhabhathiziwe abangabaqeqetsha. (Bala u-1 Thimothi 3:10.) Ebandleni lenu bakhona yini abazalwane asebebhabhathiziwe abaleminyaka engu-10 kusiya ku-14 loba engaphansi? Bayataditsha yini? Bayaphendula yini emihlanganweni yebandla? Bayatshumayela yini? Nxa bekwenza lokhu banikeni imisebenzi ebalingeneyo futhi abenelisa ukuyenza. Kuzalinceda libone ukuthi ‘bafanele yini’ ukuphiwa eminye imisebenzi njalo kuzakwenza ukuthi nxa sebekhulakhulile, sebeleminyaka  engu-17 kusiya ku-19 bafanele ukuba zinceku ezikhonzayo.

18. Umuntu ‘ongelalutho asolwa ngalo’ ngonjani?

¹⁸ Nxa kuthiwa ‘akulalutho osolwa ngalo’ kutsho ukuthi akulamuntu okumangalela ngokuthi kulento embi oyenzileyo. Kodwa kwezinye izikhathi amaKhristu angaqanjelwa amanga kuthiwe enze okubi. UJesu laye wake waqanjelwa amanga njalo watsho ukuthi abafundi bakhe labo babezakwetheswa amacala abangawenzanga. (Joh. 15:20) Kodwa nxa wena ungaba msulwa kukho konke okwenzayo njengoJesu abanye ebandleni bazakuhlonipha.—Mat. 11:19.

19. Kutshoni ukuthi inceku ekhonzayo kumele “ibe yindoda elenkosikazi eyodwa”?

¹⁹ Inceku ekhonzayo kumele “ibe yindoda elenkosikazi eyodwa.” Nxa umzalwane ofuna ukuba yinceku ekhonzayo etshadile kumele alandele umthetho owabekwa nguJehova ekuqaliseni, abe lenkosikazi eyodwa. (Mat. 19:​3-9) Indoda engumKhristu akumelanga ifebe. (Heb. 13:4) Lokhu kugoqela lokuthi abe qotho kumkakhe, angaqali ukuzidlisa satshanyana kwabanye abesifazana.—Jobe. 31:1.

20. Indoda efuna ukuba yinceku ekhonzayo ingenzani ukuze ‘iyikhokhele kuhle’ imuli yayo?

²⁰ Kumele ‘ikhokhele kuhle abantwabayo lomuzi wayo.’ Nxa uyinhloko yemuli kumele ube leqiniso lokuthi uyayenza yonke imisebenzi iBhayibhili elithi kumele uyenze emulini yakho. Khokhela ekukhonzeni kwemuli zikhathi zonke. Woba lezikhathi zokutshumayela lenkosikazi yakho labantwabakho. Ncedisa abantwabakho ukuthi labo bamthande uJehova. (Efe. 6:4) Indoda ekhokhela kuhle imuli yayo iyabe itshengisa ukuthi lebandla ingalikhokhela kuhle.—Khangela lo-1 Thimothi 3:5.

21. Kuyini okumele ukwenze nxa ungakabi yinceku ekhonzayo?

²¹ Nxa ungumzalwane njalo ungakabi yinceku ekhonzayo siyakucela ukuthi ucabangisise njalo uthandaze ngalokho okukhulunywe ngakho esihlokweni lesi. Bala ngalokho okufunekayo ukuze umuntu abe yinceku ekhonzayo ubususebenza nzima ukuze ukwenze. Mthande kakhulu uJehova kanye labafowenu labodadewenu. Lokhu kuzakwenza ukuthi ube lesifiso sokunceda abanye futhi kuzakuthokozisa kakhulu. (1 Phet. 4:​8, 10) Kwangathi uJehova angakubusisa njengoba usebenza nzima ukuthi ube yinceku ekhonzayo.—Flp. 2:13.