UYAKUKHOLISA yini ukuhlala utaditsha iBhayibhili kumbe kukuthwalisa nzima? Abanengi bethu kuyake kusithwalise nzima. Kodwa cabanga ngezinye izinto esihlala sizenza njengokugeza. Ukugeza kuthatha isikhathi kodwa nxa sesigezile sijayele ukuzizwa sesibethwa ngumoya. Lokubala iBhayibhili kusenza sizizwe ngcono njengomuntu oqeda kugeza. (Efe. 5:26) Nanzi ezinye izinto ezingasinceda ukuthi sikukhuthalele ukubala iBhayibhili:

• Hlela ukuthi uzabala nini. Ukubala iBhayibhili ‘kuqakatheke kakhulu’ njalo umKhristu ngamunye kumele akwenze lokho. (Flp. 1:10) Okunye okungakunceda yikubhala phansi uhlelo lwakho lokubala ubusulunamathisela emdulini loba kwenye indawo lapho ongalubona khona lula. Kanti njalo ungafaka i-alamu efonini ukuze ikukhumbuze isikhathi okumele utaditshe ngaso.

• Ungenzi okungaphezu kwamandla akho. Kuyini okulula kuwe? Yikubala okwesikhathi eside yini kumbe yikubala okwesikhathi esincane? Wena uyazazela ukuthi yikuphi okungcono kuwe, yikho hlela izinto ezihambelana lalokho owenelisa ukukwenza. Nxa isikhathi sakho sokutaditsha singafika uzwe usudonda, zama ukutaditsha mhlawumbe okwemizuzu engu-10 kuphela kulokuthi uyekele. Lokho kuyabe kungcono kulokungataditshi ngoba ungafunda okunengi ngesikhathi leso. Kanti njalo nxa ungavele uqalise ungezwa sekusithi uqhubeke.—Flp. 2:13.

• Khetha kuseselesikhathi lokho ozakubala. Nxa ungakuhleli kuseselesikhathi lokho ofuna ukukutaditsha, ungabe ‘ungasisebenzisi kuhle isikhathi sakho.’ (Efe. 5:16) Okungcono yikuthi uhlale ubhalile lokho ofuna ukukutaditsha. Nxa kungaba lento ozibuza yona wohle uyibhale phansi. Sonke isikhathi nxa uqeda ukutaditsha ungabhala phansi ezinye izinto ongafuna ukuzibala ngesikhathi esizayo.

• Ungazikhami. Kusiya ngokuthi ukhethe ukutaditsha okwesikhathi esinganani kumbe ukuthi ukhethe ziphi izihloko ozazitaditsha, nxa kungasavumi tshintsha ungazikhami. Okuqakathekileyo yikuthi uhlale utaditsha hatshi ukuthi utaditsha nini, okwesikhathi esinganani kumbe ukuthi utaditshani.

Ukuhlala sitaditsha kuyasinceda kakhulu. Kuyasinceda ukuthi sisondele kuJehova, senze izinqumo ezinhle futhi kuyasiqinisa.—Josh. 1:8.