1-2. Ngobani abangasiphatha kubi? Chasisa.

 NGELINYE ilanga uJesu wathi efundisa wakhuluma ngomfelokazi owayelokhu ecela umahluleli ukuthi alungise udaba lwakhe ngoba kwakulomuntu owayemphathe kubi. Kumele ukuthi abafundi bakaJesu bawuzwisisa kuhle umzekeliso lo ngoba ngalesosikhathi abantukazana babephathwa kubi. (Luk. 18:​1-5) Lathi kulula kuthi siwuzwisise ngoba siyake siphathwe kubi.

² Emhlabeni kugcwele ubandlululo. Abanye abantu bakhangelela abanye phansi futhi bayabacindezela, yikho kasimangali nxa siphathwa kubi. (Umtshu. 5:8) Kodwa nxa singaphathwa kubi ngumfowethu kumbe udadewethu esikhonza laye singadana kakhulu. Phela abafowethu labodadewethu abafanani labantu abangamkhonziyo uJehova. Bona bangasiphatha kubi ngenxa yokuthi balesono. Ngakho nxa sisenelisa ukubekezelela abantu abangamkhonziyo uJehova, kutsho ukuthi kumele sizame ngamandla wonke ukubekezelela abafowethu labodadewethu nxa besiphatha kubi. Singafunda okunengi kulokho okwenziwa nguJesu ngesikhathi ephathwa kubi. UJehova uzwa njani nxa abafowethu labodadewethu kumbe abanye abantu nje bangasiphatha kubi? Kuyamkhathaza yini?

3. Sikwazi njani ukuthi uJehova kafuni ukuthi siphathwe kubi?

³ UJehova ufuna siphathwe kuhle njalo uyananzelela nxa abanye besiphatha kubi. IBhayibhili lithi: “UJehova uthanda ukwahlulela okuhle.” (Hubo. 37:28) UJesu wasiqinisekisa ukuthi uJehova ‘uzabahlulela kuhle’ abantu abaphathwa kubi futhi lokho uzakwenza ngesikhathi esifaneleyo. (Luk.  18:​7, 8) Sekuseduze ukuthi apholise amanxeba ethu njalo asuse bonke abantu abaphatha kubi abanye.—Hubo. 72:​1, 2.

4. UJehova usincedisa njani nxa siphathwa kubi?

⁴ Khathesi silindele ukuthi uJehova alethe ukulunga. Kodwa kasitshiyi sinjalo, usinika amacebo angasinceda nxa siphathwa kubi. (2 Phet. 3:13) Ngokwesibonelo, uyasifundisa lokho okumele sikwenze nxa siphathwa kubi ukuze singacini sesisenza ukuthi izinto zibe zimbi kakhulu. Wenza ukuthi eBhayibhilini kubhalwe ukuthi iNdodana yakhe uJesu yenzani ngesikhathi iphathwa kubi. Usinike leMibhalo esitshela lokho esingakwenza nxa kulomuntu osiphatha kubi.

NANZELELA UNGENZI INTO OZACINA USUZISOLA NGAYO

5. Kuyini okungamelanga sikwenze?

⁵ Nxa singaphathwa kubi siyezwa ubuhlungu futhi sikhathazeke kakhulu. (Umtshu. 7:7) Lezinye izinceku zikaJehova njengoJobe loHabakhukhi zazike ziphathwe kubi futhi lokho kwakuzizwisa ubuhlungu kakhulu. (Jobe. 6:​2, 3; Hab. 1:​1-3) Nxa uphathwa kubi, woba leqiniso lokuthi awenzi into ongacina usuzisola ngayo.

6. Okwenziwa ngu-Abhisalomu kusifundisani? (Khangela lomfanekiso.)

⁶ Nxa omunye umuntu angasiphatha kubi, singabona kungcono ukuthi siphindisele futhi silungise indaba ngendlela esibona ngayo. Kodwa lokho kungangezelela inhlupho phezu kwezinye inhlupho. Ake sixoxe ngalokho okwenziwa ngu-Abhisalomu indodana yeNkosi uDavida. Wazonda wabila ngesikhathi esizwa ukuthi umfowabo u-Amnoni ubambe udadewabo uThamari iganyavu. UMthetho kaMosi wawusithi umuntu owenze icala elifanana lelika-Amnoni kwakumele abulawe. (Levi. 20:17) U-Abhisalomu kwakumele azonde sibili, kodwa kayisuye okwakumele ayilungise indaba le.—2 Sam. 13:​20-23, 28, 29.

7. Umlobi weHubo 73 wezwa njani ebona ababi bephumelela?

⁷ Nxa umuntu engasiphambanisa besesibona izinto ziqhubeka zimhambela kuhle, singazibuza ukuthi kuyanceda yini ukwenza okulungileyo. Eyinye inceku kaJehova yayibona angathi abantu abenza okubi bayazikholisela, kodwa abenza okulungileyo bathwele nzima. Yathi: “Banjalo abantu abenza okubi, abahlala bethola izinto lula.” (Hubo. 73:12) Kwakuyikhathaza kakhulu okwakusenziwa ngabantu ababi  yaze yacina izibuza ukuthi kunceda ngani ukukhonza uJehova. Yathi: “Ngathi ngizama ukukuzwisisa konke lokhu, kwangihlupha kakhulu.” (Hubo. 73:​14, 16) Lokhu kwaphosa kwamphambanisa sibili umhubi lo ngoba wathi: “Mina kwasala kancane ukuthi ngiphambuke, ngaphosa ngatshelela.” (Hubo. 73:2) Okwenzakala kuye kuhambelana lalokho okwake kwenzakala komunye umfowethu okuthiwa ngu-Alberto.

8. U-Alberto wenzani aze aphathwe kubi?

⁸ U-Alberto wake wacatshangelwa ukuthi utshontshe iminikelo yebandla. Yikho wehliswa ukuba ngumdala futhi labanye ebandleni ababeyizwile indaba le babengasamhloniphi. Wathi: “Lokhu kwangiphatha kubi kakhulu futhi ngazonda.” Okwenzakalayo kwaphambanisa ubungane bakhe loJehova, yikho wahlala iminyaka emihlanu engakhonzi. Okwenzakala ku-Alberto kutshengisa ukuthi ukwehluleka ukuzibamba nxa singaphathwa kubi kungaba yingozi kakhulu.

LINGISELA UJESU NXA UPHATHWA KUBI

9. Abantu babemphatha njani uJesu? (Khangela lomfanekiso.)

⁹ Okwenziwa nguJesu kuyasifundisa lokho esingakwenza nxa singaphathwa kubi. Abanye abantu lezihlobo zakhe babeke bamphathe  kubi. Izihlobo zakhe zathi usephambene. Abakhokheli benkolo bathi usebenza lamadimoni. Amasotsha eRoma wona amchothoza, amtshaya futhi acina embulele. (Mak. 3:​21, 22; 14:55; 15:​16-20, 35-37) UJesu kazange aphindisele lanxa waphathwa kubi kangaka. Akwenzayo kusifundisani?

10. UJesu wenzani ngesikhathi ephathwa kubi? (U-1 Phetro 2:​21-23)

¹⁰ Bala u-1 Phetro 2:​21-23. a UJesu wayekwazi lokho okwakumele akwenze nxa ephathwa kubi. Yikho lathi kungasinceda kakhulu ukumlingisela. Wayesazi isikhathi sokuthula lesikhathi sokukhuluma. (Mat. 26:​62-64) Kwezinye izikhathi wayengaphenduli nxa eqanjelwa amanga. (Mat. 11:19) Nxa ephendula wayengabathethisi ababemphatha kubi futhi wayengabethuseli. UJesu wayesenelisa ukuzibamba ngenxa yokuthi ‘wayethembele kulowo owahlulela ngendlela elungileyo.’ Wayehlalisekile ngoba wayekwazi ukuthi uJehova wayekubona konke okwakusenziwa ngabantu ababemphatha kubi. Wayengathandabuzi ukuthi uJehova wayezalungisa izinto ngesikhathi esifaneleyo.

11. Singenzani ukuze singacini sesikhuluma kubi? (Khangela lemifanekiso.)

¹¹ Singalingisela uJesu ngokunanzelela lokho esikukhulumayo nxa singaphathwa kubi. Okunye kuyabe kukuncane okokuthi singakuyekela kudlule. Kwezinye izikhathi kungadingeka ukuthi sikhulume ukuze sivikele umuntu oyabe ephathwa kubi kumbe sichasisele abanye lokho esikukholwayo. (Imiseb. 6:​1, 2) Okunye esingakwenza yikuzithulela ukuze singacini sesikhuluma izinto ezingenza kube kubi kakhulu. (Umtshu. 3:7; Jak. 1: 19, 20) Kodwa nxa singakhetha ukukhuluma, kumele sikhulume kuhle futhi sibahloniphe esiyabe sikhuluma labo.—1 Phet. 3:15. b

12. Singatshengisa njani ukuthi sithembele “kulowo owahlulela ngendlela elungileyo”?

¹² Enye indlela esingalingisela ngayo uJesu yikuthembela “kulowo owahlulela ngendlela elungileyo.” Nxa abanye bangasicabangela okubi kumbe basiphathe kubi siyathemba ukuthi uJehova uyabe ekwazi okuyikho. Lokho kuyasinceda ukuthi sibekezele nxa siphathwa kubi ngoba siyabe sikwazi ukuthi uJehova nguye ozalungisa izinto. Ukutshiyela indaba kuJehova kuzasinceda ukuthi singahlali sizondile lokuthi singabambi izikhwili. Phela nxa singenza njalo singacina singasathokozi, senze izinto esingazisola ngazo futhi siphambanise ubungane bethu loJehova.—Hubo. 37:8.

13. Kuyini okungasinceda sibekezele nxa siphathwa kubi?

¹³ Kuliqiniso ukuthi ngeke senelise ukwenza okufanana xathu lalokho okwakusenziwa nguJesu. Kwezinye izikhathi esikwenzayo kumbe esikukhulumayo kungenza sisale sizisola. (Jak. 3:2) Indlela abanye abayabe besiphathe kubi ngayo ingenza sihlale sidanile kumbe sisizwa ubuhlungu okwempilo yethu yonke. Nxa lokho kwake kwenzakala kuwe qiniseka ukuthi uJehova uyabazi ubuhlungu ophakathi kwabo. Kanti njalo uJesu uyayizwisisa indlela ozizwa ngayo ngoba laye wake waphathwa kubi. (Heb. 4:​15, 16) Ngaphandle kwesibonelo sikaJesu, uJehova uphinda asinike amanye amacebo amayelana lalokho esingakwenza nxa singaphathwa kubi. Ake sixoxe ngamavesi amabili angasinceda asebhukwini labaseRoma.

“NIKANI ULAKA LUKANKULUNKULU ITHUBA”

14. Singenzani ukuze ‘sinike ulaka lukaJehova ithuba’? (URoma 12:19)

¹⁴ Bala uRoma 12:19. Umphostoli uPhawuli wakhuthaza amaKhristu ukuthi ‘anike ulaka lukaNkulunkulu ithuba.’ Nxa singaphathwa kubi, sinika ulaka lukaJehova ithuba ngokumvumela ukuthi alungise izinto ngesikhathi sakhe langendlela yakhe. Omunye umfowethu okuthiwa nguJohn owake waphathwa kubi wathi: “Ngangizama ngamandla ukuthi ngizibambe ukuze ngingavuki ngolaka ngicine ngisenza into embi. URoma 12:19 wanginceda ukuthi ngilindele uJehova.”

15. Kungani kungcono ukuthi silindele uJehova ukuthi alungise uhlupho esiyabe silalo?

¹⁵ Ukulindela uJehova ukuthi kube nguye olungisa indaba kuyanceda. Nxa singazama ukuzilungisela uhlupho lwethu singadala ezinye inhlupho futhi sikhathazeke kakhulu. Kodwa nxa singalindela uJehova akwenzakali konke lokhu. UJehova uthi uzasincedisa. Kuyabe kungani uthi kithi, ‘Ungakhathazeki, ngikhona mina ngizalungisa izinto.’ Kuba lula ukuthi sihlaliseke njalo siqiniseke ukuthi uJehova uzayilungisa ngendlela engcono kakhulu indaba nxa siwakholwa amazwi akhe athi: “Yimi engizabuyisela.” Lokho yikho okwanceda uJohn esike sakhuluma ngaye. Wathi: “Nxa ngingalindela uJehova, uyabe ezalungisa indaba ngendlela engcono kakhulu ukwedlula lokho mina ebengingakwenza.”

“QHUBEKANI LINQOBA OKUBI NGOKUHLE”

16-17. Ukuthandaza kungasinceda njani ukuthi ‘siqhubeke sinqoba okubi ngokuhle’? (URoma 12:21)

¹⁶ Bala uRoma 12:21. UPhawuli wakhuthaza amaKhristu ukuthi ‘aqhubeke enqoba okubi ngokuhle.’ Entshumayelweni yakhe yasentabeni uJesu wathi: “Qhubekani lithanda  izitha zenu futhi lithandazela abalihlukuluzayo.” (Mat. 5:44) Lokho yikho kanye akwenzayo. Kufanele ukuthi sewake wacabanga ngobuhlungu uJesu abuzwayo ngesikhathi amasotsha angamaRoma embethela. UJesu waphathwa kubi kakhulu futhi wenziwa isihluku. Ngeke sibuzwisise kuhle ubuhlungu abuzwayo.

¹⁷ Lanxa uJesu waphathwa kubi, wanqoba okubi ngokuhle. Kazange awathethise amasotsha ayemhlukuluza kodwa wathandaza wathi: “Baba, bathethelele ngoba abakwazi abakwenzayo.” (Luk. 23:34) Ukuthandazela abantu abasiphatha kubi kungasinceda ukuthi singabi silokhu sibabambele izikhwili lokuthi singahlali sibazondele. Kanti njalo kungasinceda ukuthi sitshintshe lendlela esibabona ngayo.

18. Ukuthandaza kwamnceda njani u-Alberto kanye loJohn?

¹⁸ Ukuthandaza kwanceda abafowethu ababili esike sakhuluma ngabo esihlokweni lesi. U-Alberto uthi: “Ngabathandazela abafowethu abangiphatha kubi. Ngamcela kanengi uJehova ukuthi angincedise ukuthi ngikhohlwe ngokwakwenzakele.” Okuthokozisayo yikuthi khathesi u-Alberto usemkhonza kuhle uJehova. UJohn uthi: “Ngamthandazela kanengi umzalwane owayengizwise ubuhlungu. Lokhu kwanginceda ukuthi ngingamcabangeli okubi lokuthi ngingabi ngilokhu ngimzondele. Kwanginceda lokuthi ngihlaliseke.”

19. Kuyini okumele siqhubeke sikwenza? (U-1 Phetro 3:​8, 9)

¹⁹ Inqe nje sisaphila emhlabeni lo obuswa nguSathane sizaqhubeka siphathwa kubi. Lanxa kungaze kwenzakaleni, kasingayekeli ukuqhubeka sithandaza sicela ukuthi uJehova asincedise. Kanti njalo kasilingiseleni lokho okwenziwa nguJesu ngesikhathi ephathwa kubi futhi sisebenzise izimiso eziseBhayibhilini. Singenza njalo uJehova uzasibusisa.—Bala u-1 Phetro 3:​8, 9.