Ivesi le ithi: “Uma ubona abayanga esiqintini becindezelwa, bencitshwa ukwahlulelwa okuhle kanye lamalungelo, ungamangaliswa yilezozinto; ngoba phela induna nganye ikhangelwe ngomunye ongaphezu kwayo, kuthi ngaphezu kwabo bonke kube labanye njalo abangaphezulu.”—UmTshu. 5:8.

Kungakhanya angani ivesi le ikhuluma ngeziphathamandla zikahulumende. Kodwa nxa singacabangisisa ngayo sizabona ukuthi isitshela okuthile ngoJehova okumele kusiduduze futhi kusikhuthaze.

UmTshumayeli 5:8 ukhuluma ngombusi ocindezela abayanga futhi ongabahluleli kuhle. Umbusi lo kumele akhumbule ukuthi ukhona olesikhundla esiphezulu kulesakhe ongabe emkhangele. Kanti njalo bangabe bekhona abanye abalezikhundla eziphezulu kulezabo. Okudanisayo yikuthi bonke ababusi laba bangabe bengamaqili futhi abantu bayahlupheka ngenxa yalokho.

Lanxa kungakhanya angani izinto azithembisi ngenxa yobuqili bababusi lendlela abaphatha ngayo abantu, kuyaduduza ukwazi ukuthi uJehova ‘ukhangele’ ngitsho lalabo abalezikhundla eziphezulu kulezabanye. Singamcela asincedise futhi simtshele okusikhathazayo. (Hubo. 55:22; Flp. 4:6, 7) Siyakwazi ukuthi “amehlo kaJehova athungatha umhlaba wonke ukuze aqinise labo abanhliziyo zabo zizimisele kuye.”—2 ImiLan. 16:9.

Yikho umTshumayeli 5:8 usikhumbuza ukuthi emibusweni yabantu kuhlala kulomunye olesikhundla esiphezulu kulesomunye. Kodwa okuqakatheke kakhulu yikuthi usikhumbuza ukuthi uJehova nguye olesikhundla esiphezulu kulabo bonke. Ubeke iNdodana yakhe uJesu Khristu ukuthi ibe yiNkosi yoMbuso. USomandla, onguye okhangele bonke abantu lakho konke okwenzakalayo wahlulela kuhle futhi leNdodana yakhe layo injalo.