1-2. UmTshumayeli 11:6 ungena njani endabeni yokutshumayela izindaba ezinhle zoMbuso?

KWAMANYE amazwe abantu abanengi bayalalela nxa sibatshela izindaba ezinhle zoMbuso ngoba yizo kanye abayabe befuna ukuzizwa. Kodwa kwamanye abantu abalandaba loNkulunkulu langalokho okutshiwo liBhayibhili. Lapho ohlala khona ke? Kungelani lokuthi bayalalela kumbe kabalaleli uJehova ukhangelele ukuthi siqhubeke sitshumayela aze athi sekwanele.

² UJehova uselibekile ilanga lapho umsebenzi wokutshumayela ozakuma khona, ngemva kwalokho ‘kuzafika ukuphela.’ (Mat. 24:14, 36) Kodwa khathesi singatshengisa njani ukuthi siyawalalela amazwi athi “ungaphumuzi isandla sakho”? *—Bala umTshumayeli 11:6, TBS. *

3. Sizaxoxa ngani esihlokweni lesi?

³ Esihlokweni esidlulileyo sixoxe ngezinto ezine okumele sizenze ukuze siphumelele emsebenzini ‘wokugola abantu.’ (Mat. 4:19) Kulesi sizaxoxa ngezinto ezintathu esingazenza ukuze sizimisele ukuqhubeka sitshumayela kungelani lobunzima obusehlelayo. Sizaxoxa ngokuthi kungani kumele sihlale siqakathekisa umsebenzi wokutshumayela ukwedlula loba yini, ukuthi kungani kumele sibekezele lokuthi kungani kumele sihlale silokholo oluqinileyo.

4. Kungani kumele sihlale siqakathekisa umsebenzi uJehova asinike wona?

⁴ UJesu watshela abafundi bakhe ngezinto ezazizakwenzakala ngezinsuku zokucina ezazingabangela ukuthi bacine bengasawuqakathekisi kakhulu umsebenzi wokutshumayela. Yikho wabatshela ukuthi ‘bahlale belindile.’ (Mat. 24:42) Ngensuku zikaNowa kulezinto ezinengi ezazibangela abantu ukuthi bangalaleli isixwayiso sakhe. Izinto lezo zingasiphambanisa lathi. (Mat. 24:37-39; 2 Phet. 2:5) Ngakho sifuna ukuhlala siqakathekisa umsebenzi uJehova asinike wona ukwedlula loba yini.

5. ImiSebenzi 1:6-8 ithi umsebenzi wokutshumayela uzakwenziwa kuze kuyefika ngaphi?

⁵ Kumele siwuqakathekise kakhulu umsebenzi wokutshumayela izindaba ezinhle zoMbuso. UJesu wathi abalandeli bakhe babezaqhubeka betshumayela langemva kokufa kwakhe njalo babezatshumayela ezindaweni ezinengi, okwesikhathi eside futhi bafundise abantu abanengi ukwedlula yena. (Joh. 14:12) Esefile, abanye abafundi bakhe babuyela emsebenzini wabo wokugola inhlanzi. Wathi esevusiwe, wenza isimanga sokuthi bagole inhlanzi ezinengi. Ngemva kwalokho wagcizelela ukuthi umsebenzi wokutshumayela lowokwenza abafundi uqakatheke ukwedlula loba yiwuphi umsebenzi. (Joh. 21:15-17) Wathi esezakuya ezulwini, watshela abafundi bakhe ukuthi umsebenzi wokutshumayela ayewuqalisile wawungasoze uphelele ko-Israyeli kodwa wawuzafika lasemaphethelweni womhlaba. (Bala imiSebenzi 1:6-8.) Ngemva kweminyaka eminengi uJesu watshengisa umphostoli uJohane lokho okwakuzakwenzakala ‘ngosuku lweNkosi.’ * Esinye isimanga esabonwa nguJohane embonweni lo ngesengilosi ‘eyayilezindaba ezinhle zaphakade’ okwakumele zimenyezelwe “kuzo zonke izizwe, lezizwana, lezindimi kanye labantu.” (Isam. 1:10; 14:6)  Kusegcekeni ukuthi intando kaJehova yikuthi simemezele izindaba ezinhle emhlabeni wonke aze athi sekwanele.

6. Singenzani ukuze siqakathekise umsebenzi wokutshumayela ukwedlula loba yini?

⁶ Okuzasinceda ukuthi siqakathekise umsebenzi wokutshumayela ukwedlula loba yini yikucabanga ngakho konke uJehova asenzele khona ukuze asincedise. Ngokwesibonelo, usinike izinto ezinengi ezisiqinisa ukholo kungaba ngamabhuku aphrintiweyo kumbe atholakala kwezempucuko, okulalelwayo, amavidiyo lenhlelo ze-JW Broadcasting. IWebhusayithi yethu i-jw.org ilezinto ezitholakala ngezindimi ezedlula 1 000. (Mat. 24:45-47) Abantu emhlabeni lo ababambananga ngenxa yokuthi basekela amaqembu atshiyeneyo ezombusazwe, balamasonto atshiyeneyo futhi abanye banothile ikanti abanye bangabayanga. Kodwa izinceku zikaNkulunkulu ezedlula 8 miliyoni ezisemhlabeni wonke zimanyene. Ngokwesibonelo, ngoLwesihlanu mhlaka 19 April 2019 oFakazi bakaJehova emhlabeni wonke babemanyene ngesikhathi bebukele ingxoxo yombhalo wosuku walelolanga. Ngalobobusuku abantu abangu-20 919 041 babuthana ukuze bananze iSikhumbuzo sokufa kukaJesu. Ukucabanga ngesibusiso esilaso sokubona izinto ezinje zisenzakala lokuhlanganela kuzo kwenza sizimisele ukuhlala siqakathekisa umsebenzi wokutshumayela ngoMbuso ukwedlula loba yini.

7. Isibonelo sikaJesu sisinceda njani ukuthi siqakathekise umsebenzi wokutshumayela ukwedlula loba yini?

⁷ Okunye okuzasinceda ukuthi sihlale siqakathekisa umsebenzi wokutshumayela ukwedlula loba yini yikulingisela isibonelo sikaJesu. Kazange avumele lutho ukuthi lumphambanise ekutshumayeleni. (Joh. 18:37) Kazange athatheke ngesikhathi uSathane efuna ukumnika “yonke imibuso yomhlaba kanye lenkazimulo yayo” langesikhathi abanye befuna ukumenza inkosi. (Mat. 4:8, 9; Joh. 6:15) Kazange axotshane lenotho futhi kazange esabe ngesikhathi ephikiswa. (Luk. 9:58; Joh. 8:59) Umphostoli uPhawuli wasikhuthaza ukuthi silingisele isibonelo sikaJesu ukuze ‘singadinwa njalo singalahli ithemba.’ (Heb. 12:3) Nxa singenza njalo sizakwenelisa ukuhlala siqakathekisa umsebenzi wokutshumayela ukwedlula loba yini kungelani lokuthi kuyini okusehlelayo.

8. Kuyini ukubekezela njalo kungani kuqakatheke kakhulu ukuthi sibekezele khathesi?

⁸ Ukubekezela yikuba lesineke ulindele ukuthi izinto zitshintshe. Kumele sibekezele kungelani lokuthi silindele ukuphela kwento embi kumbe ukufika kwento osekulesikhathi eside siyilindele. Umphrofethi uHabakhukhi wayelindele ngabomvu ukuthi udlakela luphele koJuda. (Hab. 1:2) Abafundi bakaJesu babekhangelele ukuthi uMbuso kaNkulunkulu “wawuzahle ufike ngalesosikhathi” ukuzobakhulula kumaRoma ayebacindezela. (Luk. 19:11) Sililindele ilanga lapho uMbuso kaNkulunkulu ozasusa khona bonke ububi futhi ulethe umhlaba omutsha olokulunga. (2 Phet. 3:13) Kodwa kumele sibekezele silinde isikhathi uJehova akhethe ukukwenza ngaso lokhu. Asixoxeni ngezinye indlela uJehova asifundisa ngazo ukuthi sibekezele.

9. Yiziphi izibonelo ezitshengisa ukuthi uJehova uyabekezela?

⁹ UJehova uyisibonelo esihle kulazo zonke sokubekezela. Wanika uNowa isikhathi esaneleyo sokwakha umkhumbi lesokuthi axwayise abantu ngoZamcolo. (2 Phet. 2:5; 1 Phet. 3:20) Walalela lapho u-Abrahama elokhu embuza ngesinqumo sakhe sokubhubhisa abantu ababi ababehlala eSodoma leGomora. (Gen. 18:20-33) Okweminyaka  eminengi uJehova wasibekezelela kakhulu isizwe sako-Israyeli esingathembekanga. (Neh. 9:30, 31) Lamuhla siyabona ukuthi uJehova uyabekezela ngoba unika bonke abantu afuna babe ngabangane bakhe isikhathi sokuthi “baphenduke.” (2 Phet. 3:9; Joh. 6:44; 1 Tim. 2:3, 4) Isibonelo sikaJehova siyasinceda ukuthi lathi sibekezele nxa sitshumayela futhi sifundisa. UJehova uphinda asifundise ukubekezela esebenzisa umzekeliso oseLizwini lakhe.

10. Umzekeliso womlimi okukhulunywa ngawo kuJakhobe 5:7, 8 usifundisani?

¹⁰ Bala uJakhobe 5:7, 8. Umzekeliso womlimi uyasinceda ukuthi sibekezele. Liqiniso sibili ukuthi ezinye izilimo ziyaphangisa ukukhula kodwa ezinengi ikakhulu lezo ezithelayo ziyaphuza ukuvuthwa. Ngesikhathi sako-Israyeli kwakuthatha izinyanga ezingaba yisithupha ukuthi izilimo zivuthwe. Umlimi wayehlanyela sekune izulu lokuqala phakathi kuka-October aze ayevuna ngemva kokuna kwezulu lokucina phakathi kuka-April. (Mak. 4:28) Siyabe sihlakaniphile nxa silingisela indlela umlimi abekezela ngayo. Kodwa lokho akulula ngezinye izikhathi.

11. Ukubekezela kuzasinceda njani ekutshumayeleni?

¹¹ Izikhathi ezinengi abantu abalesono bafuna ukubona impumela yemisebenzi yabo masinyane. Kodwa nxa sifuna izilimo zethu zikhule futhi zithele kumele sihlale sizinakekela. Lokhu sikwenza ngokugebha silungise indawo esizahlanyela kuyo, sihlanyele, sikhiphe ukhula besesithelela. Ukwenza abafundi lakho kudinga ukuthi sisebenze nzima. Kuthatha isikhathi ukuthi sincedise esifunda labo iBhayibhili ukuthi bafunde ukungabandlululi lokuthi babe lothando. Ukubekezela kuzasinceda ukuthi singadani nxa abantu bengasilaleli. Lanxa abanye belalela futhi bezimisele ukwenza lokho okutshiwo liBhayibhili kumele sibekezele ngoba ngeke sibabambe ngamandla ukuthi babe lokholo. Phela labafundi bakaJesu  kwezinye izikhathi babephuza ukuzwisisa izinto ayezifundisa. (Joh. 14:9) Kasihlaleni sikhumbula ukuthi lanxa singahlanyela futhi sithelele nguNkulunkulu okhulisayo.—1 Khor. 3:6.

12. Singatshengisa njani ukuthi siyabekezela nxa sitshumayeza abangakithi abangayisiboFakazi?

¹² Kungaba nzima ukuthi sibekezele nxa sitshumayeza abangakithi abangayisiboFakazi. Kodwa isimiso esikumTshumayeli 3:7 singasinceda. Sithi: ‘Kulesikhathi sokuthula lesikhathi sokukhuluma.’ Indlela esiziphatha ngayo ingenza abangakithi bafune ukusilalela nxa sibatshumayeza. Lanxa kunjalo kumele sihlale sikulungele ukubatshela ngoJehova. (1 Phet. 3:1, 2) Kufanele sikhuthale emsebenzini wokutshumayela lowokufundisa abantu kodwa kumele sibabekezelele bonke okugoqela labangakithi.

13-14. Ngobani abanye ababekezelayo esingabalingisela?

¹³ Okwenziwa ngabantu abathembekileyo okukhulunywa ngabo eBhayibhilini lalabo abaphila ngezinsuku zalamuhla kungasinceda ukuthi sibekezele. Lanxa uHabakhukhi walindela isikhathi lapho ububi obuzaphela khona watshengisa ukuthi uyabekezela lapho esithi: “Ngizaqhubeka ngimile esilindweni sami.” (Hab. 2:1, NWT) Umphostoli uPhawuli wathi wayefuna sibili ‘ukuqeda’ inkonzo yakhe kodwa wabekezela waqhubeka ‘efakaza ngokugcweleyo izindaba ezinhle.’—ImiSeb. 20:24.

¹⁴ Ake sixoxe ngomfowethu lomkakhe abaqeda iSikolo SeGiliyadi basebehanjiswa elizweni elilaboFakazi abalutshwana futhi elilabantu abanengi abangasimaKhristu. Balutshwana abantu ababefuna ukufunda iBhayibhili kodwa abanye ababengene labo isikolo ababehanjiswe kwamanye amazwe babebatshela ngabantu abanengi ababefunda labo iBhayibhili ababethuthuka. Kodwa imuli le yaqhubeka itshumayela lanxa abantu abanengi endaweni ababekuyo babengalaleli. Bathi sebetshumayele okweminyaka eyisitshiyagalombili bathokoza lapho omunye ababefunda laye iBhayibhili ebhabhathizwa. Okwenziwa nguHabakhukhi loPhawuli lalabo esiqeda kukhuluma ngabo kusifundisani? Baqhubeka betshiseka njalo abazange baphumuze izandla zabo futhi uJehova wababusisa ngenxa yokubekezela kwabo. Kwangathi ‘singalingisela labo abathola ilifa lezithembiso ngokuba lokholo langokubekezela.’—Heb. 6:10-12.

15. Ukholo lusinceda njani ukuthi sizimisele ukutshumayela?

¹⁵ Siyawukholwa umlayezo esiwutshumayelayo, yikho sifuna ukuwutshela abantu abanengi. Siyazikholwa izithembiso eziseLizwini likaNkulunkulu. (Hubo. 119:42; Isaya. 40:8) Sizibonile iziphrofetho zeBhayibhili zigcwaliseka. Kanti njalo sibonile abantu betshintsha impilo zabo sebeqalise ukusebenzisa lokho okufundiswa liBhayibhili. Konke lokhu kwenza siqiniseke ukuthi izindaba ezinhle zoMbuso kumele zitshunyayelwe ebantwini bonke.

16. Ngokwalokho okutshiwo kuHubo 46:1-3, ukuba lokholo kuJehova kusinceda njani ukuthi sizimisele ukutshumayela? Ukuba lokholo kuJesu kusinceda njani?

¹⁶ Silokholo futhi kuJehova onguye ositshela umlayezo okumele siwutshumayele njalo silokholo kuJesu, obekwe nguNkulunkulu ukuthi abe yiNkosi yoMbuso wakhe. (Joh. 14:1) UJehova uzahlala eyisiphephelo sethu lamandla ethu kungelani lokuthi kuyini okusehlelayo. (Bala iHubo 46:1-3.) Kanti njalo siyakholwa ukuthi uJesu usebenzisa amandla awaphiwe nguJehova ukuthi aqondise umsebenzi wokutshumayela esezulwini.—Mat. 28:18-20.

17. Nika isibonelo esitshengisa ukuthi kungani kuqakathekile ukuthi siqhubeke sitshumayela.

 ¹⁷ Ukuba lokholo kwenza singathandabuzi ukuthi uJehova uzayibusisa inkonzo yethu futhi ngezinye izikhathi lokho angakwenza ngendlela esingazikhangelelanga. (UmTshu. 11:6, TBS) Ngokwesibonelo, nsuku zonke kulabantu abanengi kakhulu abadlula ematafuleni ethu amabhuku lasezinqoleni zethu. Indlela le yokutshumayela iyaphumelela yini? Ye. INkonzo Yethu YoMbuso kaNovember 2014 yakhuluma ngomunye umfundi weyunivesithi owayefuna ukubhala indaba mayelana laboFakazi bakaJehova. Wadinga iWolu yoMbuso wayiswela kodwa wasebona itafula yethu yamabhuku eyunivesithi njalo wakuthola ayekudinga ukuze abhale indaba yakhe. Ngokuhamba kwesikhathi wabhabhathizwa futhi khathesi useliphayona lesikhathi sonke. Okwenzakala kumfundi lo kuyasikhuthaza ukuthi siqhubeke sitshumayela ngoba kutshengisa ukuthi kulabantu abalokhu befuna ukuzwa izindaba ezinhle zoMbuso.

18. Kungani singathandabuzi ukuthi umsebenzi wokutshumayela ngoMbuso uzaphela ngesikhathi uJehova asibekileyo?

¹⁸ Kasithandabuzi ukuthi umsebenzi wokutshumayela ngoMbuso uzaphela ngesikhathi uJehova asibekileyo. Cabanga ngalokho okwenzakala ngesikhathi sikaNowa. UJehova watshengisa ukuthi uhlala esenza izinto ngesikhathi esifaneleyo. Wakhetha ukuthi uZamcolo uzafika nini kusasele iminyaka engaba ngu-120. Ngemva kweminyaka eminengi watshela uNowa ukuthi akhe umkhumbi. UNowa wasebenza nzima okweminyaka engaba ngu-40 kumbe engu-50 uZamcolo engakaqalisi. Waqhubeka exwayisa abantu lanxa babengamlaleli kwaze kwaba yisikhathi uJehova esithi angenise izinyamazana emkhunjini. Ngemva kwalokho uJehova wavala umnyango ngaso kanye isikhathi ayesikhethile.—Gen. 6:3; 7:1, 2, 16.

19. Kuyini okuzakwenzakala nxa singaphumuzi isandla sethu?

¹⁹ Sekuseduze ukuthi uJehova asitshele ukuthi umsebenzi wokutshumayela ngoMbuso usuphelile. Ngemva kwalokho uzabhubhisa umhlaba kaSathane abe eseletha umhlaba omutsha olokulunga. Kuze kube yilesosikhathi asiqhubekeni silingisela uNowa, uHabakhukhi labanye abangazange baphumuze izandla zabo. Kwangathi singahlala siqakathekisa umsebenzi wokutshumayela ukwedlula loba yini, sibekezela futhi silokholo oluqinileyo kuJehova lasezithembisweni zakhe.