1. Sizwa njani nxa umuntu esimthandayo angasuswa ebandleni?

UKHONA yini umuntu omthandayo owasuswayo ebandleni? Lokhu kuzwisa ubuhlungu sibili! Udadewethu okuthiwa nguHilda uthi: “Ngangingacabangi ukuthi ngizake ngizwe ubuhlungu obedlula lobo engabuzwayo sengifelwe ngumkami sesileminyaka engu-41 sitshadile. * Kodwa ngabuzwa indodana yami isitshiye ukukhonza njalo isitshiye umkayo labantwabayo.”

2-3. Ngokwalokho okutshiwo kuHubo 78:40, 41, uJehova uzwa njani nxa izinceku zakhe zimtshiya?

² Cabanga ngobuhlungu uJehova abuzwayo ngesikhathi ezinye izingilosi ezazingamalunga emuli yakhe zimhlamukela. (Jud. 6) Kumele ukuthi wezwa ubuhlungu langesikhathi abantu bakhe ayebathanda, ama-Israyeli bemhlamukela kanengi. (Bala iHubo 78:40, 41.) Qiniseka ukuthi uBaba wethu osezulwini osithandayo uyezwa ubuhlungu lalapho umuntu omthandayo emtshiya. Uyaluzwisisa usizi ophakathi kwalo. Ulozwelo yikho uzakukhuthaza njalo akusekele.

³ Esihlokweni lesi sizaxoxa ngalokho esingakwenza ukuze uJehova asincede nxa umuntu esimthandayo etshiya ukumkhonza. Sizaphinda sixoxe ngokuthi singabancedisa njani abanye ebandleni abalelunga lemuli elisusiweyo. Kodwa asiqaleni ngokuxoxa ngokumele sikuxwaye.

4. Abazali abanengi bezwa njani nxa umntanabo angatshiya uJehova?

⁴ Nxa umntwana etshiya uJehova, kujayelekile ukuthi abazali bazibuze ukuthi kukhona yini okunye akade bengakwenza  ukuze bancedise umntanabo aqhubeke ekhonza uJehova. Ngemva kokususwa kwendodana yakhe, umfowethu okuthiwa nguLuke wathi: “Ngangizisola njalo ngangilala ngisethuka ngenxa yamaphupho engangisiba lawo. Ngezinye izikhathi ngangikhala futhi ngizizwe ngidabukile.” Udadewethu okuthiwa ngu-Elizabeth laye olendodana eyasuswayo wathi: “Ngazibuza ukuthi kukhona yini engangikuphambanisile ngesikhathi ngikhulisa umntanami. Ngangibona angani angenzanga konke okusemandleni ami ukuthi ngifundise indodana yami ukuthi ithande uJehova.”

5. Ngubani okumele asolwe nxa umuntu angatshiya uJehova?

⁵ Kumele sikhumbule ukuthi uJehova unike ngamunye wethu inkululeko yokuzikhethela lokho azakwenza. Lokhu kutsho ukuthi siyazikhethela ukuthi sizamlalela yini loba hatshi. Abanye abantwana bakhuliswa ngabazali ababengasosibonelo esihle. Lanxa kunjalo, bakhetha ukukhonza uJehova lokuqhubeka bethembekile kuye. Abanye bakhuliswa ngabazali ababesebenza nzima bebafundisa ukuthi bathande uJehova kodwa bathe sebekhulile bamtshiya. Ngakho ngamunye wethu kumele azikhethele ukuthi uzamkhonza yini uJehova. (Josh. 24:15) Yikho nxa usizwa ubuhlungu ngokususwa komntanakho, ungacabangi ukuthi lokhu kubangelwe nguwe.

6. Umntwana angezwa njani nxa umzali angatshiya uJehova?

⁶ Ngezinye izikhathi umzali uyatshiya uJehova aphinde adele lemuli yakhe. (Hubo. 27:10) Lokhu kungabalimaza kakhulu abantwana akade bemhlonipha umzali wabo njalo befuna ukumlingisela. U-Esther oloyise owasuswayo uthi: “Ngasengihlala ngikhala ngoba ngananzelela ukuthi ubaba wayengasakuqakathekisi ukukhonza njalo wayesezimisele ukutshiya uJehova. Ngiyamthanda ubaba, yikho wathi esesusiwe ngasengihlala ngikhathazeka ngokuthi unjani futhi ngisethuka.”

7. UJehova uzwa njani ngomntwana olomzali osusiweyo?

⁷ Nxa ungumntwana olomzali osusiweyo, ubuhlungu obuzwayo siyabuzwa lathi. Qiniseka lokuthi uJehova ubazi kuhle ubuhlungu obuzwayo. Uyakuthanda njalo kuyamthokozisa ukuthi uqhubeka umkhonza uthembekile. Lathi abafowenu labodadewenu siyathokoza ngawe. Khumbula lokuthi ayisuwe obangele ukuthi umzali wakho atshiye uJehova. Njengoba sesike satsho, uJehova unike ngamunye wethu inkululeko yokuzikhethela ukuthi uyafuna yini ukumkhonza loba hatshi. Kanti njalo umuntu ngamunye ozinikeleyo futhi wabhabhathizwa kumele ‘azithwalele umthwalo wakhe.’—Gal. 6:5.

8. Amalunga emuli athembekileyo angenzani ngesikhathi elindele ukuthi lowo osusiweyo abuyele kuJehova? (Khangela lebhokisi elithi “ Buyela KuJehova.”)

⁸ Nxa umuntu omthandayo angatshiya uJehova uyabe ulethemba lokuthi ngelinye ilanga uzabuyela kuye. Ungenzani usalindele ukuthi enze njalo? Yenza konke ongakwenza ukuze uhlale uqinile ekukhonzeni. Ungenza njalo uzaba yisibonelo esihle kwabanye emulini futhi ungamnceda lowo osusiweyo. Kanti njalo uzathola amandla okuqinisela esimeni okuso. Ake sixoxe ngokunye ongakwenza ukuze uhlale uqinile ekukhonzeni.

9. Ungenzani ukuze uJehova akuqinise? (Khangela lebhokisi elithi “ IMibhalo Engakududuza Nxa Umuntu Omthandayo Angatshiya UJehova.”)

⁹ Hlala usenza izinto eziphathelane lokukhonza. Kuqakathekile ukuthi uqinise ukholo lwakho lolwabanye emulini. Ungakwenza njani lokhu? Bala iLizwi likaNkulunkulu nsuku zonke, ucabangisise ngokubalayo njalo uhlale ungena imihlangano yebandla. Lezi zindlela uJehova akuqinisa ngazo. UJoanna oloyise lodadewabo abatshiya ukukhonza uJehova uthi: “Ngizwa ngihlaliseka nxa ngingabala ngabantu okukhulunywa ngabo eBhayibhilini abanjengo-Abhigeli, u-Esta, uJobe, uJosefa loJesu. Abakwenzayo kuyangikhuthaza, kwenza ngicabange izinto ezinhle njalo ubuhlungu bube nganeno. Ingoma ze-Broadcasting lazo ziyanginceda sibili.”

10. IHubo 32:6-8 lithi kuyini okungasinceda nxa sidanile?

¹⁰ Tshela uJehova konke okukukhathazayo. Ungayekeli ukuthandaza nxa udanile. Hlala ucela uNkulunkulu wethu osithandayo ukuthi akuncedise ubone isimo okuso ngendlela yena asibona ngayo lokuthi ‘akutshengise futhi akufundise indlela okufanele uhambe ngayo.’ (Bala iHubo 32:6-8.) Akulula ukutshela uJehova yona kanye indlela ozizwa ngayo. Kodwa ubazi kuhle ubuhlungu obuzwayo. Uyakuthanda kakhulu njalo ukukhuthaza ukuthi umthululele isifuba.—Eks. 34:6; Hubo. 62:7, 8.

11. Ngokwalokho okutshiwo kuHebheru 12:11, kungani kumele siyithembe indlela uJehova alaya ngayo? (Khangela lebhokisi elithi “ Ukususa Yindlela Elothando UJehova Alaya Ngayo.”)

¹¹ Sekela isinqumo esenziwe ngabadala. Ukususwa komuntu ebandleni yindlela elothando uJehova ayisebenzisayo ukuthi alaye umuntu owonileyo, enceda yena labanye bonke  ebandleni. (Bala uHebheru 12:11.) Abanye ebandleni bangathi abadala baphambanisile ngokususa othile. Kodwa khumbula ukuthi izikhathi ezinengi abantu labo bayabe bengafuni ukukhuluma izinto ezimbi ezenziwe ngulowo osesusiwe. Iqiniso yikuthi asiyazi yonke indaba. Yikho themba ukuthi abadala abaphatha indaba yomuntu owasuswayo benza konke okusemandleni abo ukuthi balandele lokho okutshiwo liBhayibhili njalo bahlulela ngendlela kaJehova.—2 ImiLan. 19:6.

12. Ukusekela indlela uJehova alaya ngayo kubancede njani abanye?

¹² Nxa singasekela isinqumo esenziwe ngabadala sokususa umuntu esimthandayo, singamnceda ukuthi abuyele kuJehova. UElizabeth esike sakhuluma ngaye uthi: “Kwakunzima kakhulu ukuthi singasabi lobudlelwano lendodana yethu esikhulile. Kodwa yathi isibuyele kuJehova yathi kwakuqondile sibili ukuthi isuswe. Ngokuhamba kwesikhathi yathi yayifunde izifundo ezinengi ezinhle. Ngafunda ukuthi indlela uJehova asilaya ngayo ihlala iqondile.” UMark umka-Elizabeth yena uthi: “Ngokuhamba kwesikhathi indodana yethu yangitshela ukuthi okunye okwenza yafuna ukubuyela kuJehova yikuthi asizange sibe lobudlelwano layo ngesikhathi isusiwe. Ngiyathokoza kakhulu ngokuthi uJehova wasincedisa ukuthi simlalele.”

13. Kuyini okungakunceda nxa usizwa ubuhlungu?

¹³ Xoxa labangane abazwisisa indlela ozizwa ngayo. Zinike isikhathi sokuba labafowethu labodadewethu abangakunceda ukuthi ungalahli ithemba. (Zaga. 12:25; 17:17) UJoanna esike sakhuluma ngaye uthi: “Ngezwa angani ngitshiywe ngedwa. Kodwa ukuxoxa labangane engibathembayo kwanginceda kakhulu.” Kodwa ungenzani nxa abanye ebandleni bekhuluma izinto ezengezelela ubuhlungu obuzwayo?

14. Kungani kumele ‘siqhubeke sibekezelelana futhi sithethelelana ngenhliziyo yonke’?

¹⁴ Babekezelele abafowenu labodadewenu. Asingeke silindele ukuthi wonke umuntu akhulume izinto ezisikhuthazayo. (Jak. 3:2) Sonke silesono yikho ungamangali nxa abanye beswela ukuthi bathini kumbe bekhuluma izinto ezikuzwisa ubuhlungu bengahlosanga. Khumbula amazwi omphostoli uPhawuli athi: “Qhubekani libekezelelana futhi lithethelelana ngenhliziyo yonke lanxa umuntu engabe elesizatho sokusola omunye.” (Kol. 3:13) Omunye udade olendodana eyake yasuswa uthi: “UJehova ungincede ukuthi ngithethelele abazalwane abazama ukungikhuthaza kodwa bacine bengizwise ubuhlungu.” Ibandla lingawancedisa njani amalunga emuli athembekileyo?

15. Singawancedisa njani amalunga emuli yalowo osanda kususwa?

¹⁵ Woba lomusa kumalunga emuli athembekileyo. Udadewethu okuthiwa nguMiriam uthi wayekhathazeka ngokuya emihlanganweni yebandla ngemva kokususwa komfowabo. Uthi: “Ngangisesaba ukuthi abantu  bazakuthini. Kodwa kwakulabafowethu labodadewethu abanengi ababedaniswe yilokho okwakwenzakele futhi abazange bakhulume kubi ngomfowethu. Banginceda ukuthi ngingazizwa ngilahliwe.” Omunye udade uthi: “Ngemva kokususwa kwendodana yethu, abangane bethu babuya ukuzosiduduza. Abanye bavuma ukuthi babeswele ukuthi bathini. Abanye bakhala lami futhi abanye bangibhalela incwadi. Abakwenzayo kwanginceda kakhulu!”

16. Abanye ebandleni bangenzani ukuze bahlale bencedisa imuli yalowo osusiweyo?

¹⁶ Qhubekani lincedisa amalunga emuli athembekileyo. Khathesi badinga ukuthi libatshengise ukuthi liyabathanda njalo libakhuthaze ukwedlula ngezinye izikhathi. (Heb. 10:24, 25) Kwesinye isikhathi, amalunga emuli alabo abasusiweyo ananzelela ukuthi abanye ebandleni sebebaphatha angani labo basusiwe. Asifuni ukuthi lokhu kwenzakale. Kumele sibancome futhi sibakhuthaze abantwana abalabazali abatshiya ukukhonza uJehova. UMaria olomkakhe owasuswayo njalo owatshiya imuli yakhe uthi: “Abanye abangane bami babesivakatshela, basiphekele ukudla njalo bangincedisa ukuthi ngifundise abantwana iBhayibhili. Babebuzwa ubuhlungu engangibuzwa futhi bekhala lami. Babengivikela nxa abantu bekhuluma izinto ezingamanga ngami. Bangikhuthaza sibili!”—Rom. 12:13, 15.

17. Abadala bangenzani ukuze baduduze labo abadanileyo?

¹⁷ Badala, sebenzisani wonke amathuba eliwatholayo ukuthi liqinise amalunga emuli athembekileyo. Lilomsebenzi oqakathekileyo wokududuza elikhonza labo abalabathandekayo babo abatshiya uJehova. (1 Thes. 5:14) Bakhuthazeni imihlangano yebandla ingakaqalisi lalapho isiphelile. Bavakatsheleni futhi likhuleke labo. Hambani labo ekutshumayeleni kumbe libacele ngezinye izikhathi ukuthi babe lani ekukhonzeni kwenu kwemuli. Abadala kumele babelendaba lalabo abadanileyo, babazwele njalo babathande.—1 Thes. 2:7, 8.

18. Ngokwalokho okutshiwo ku-2 Phetro 3:9, uNkulunkulu ufisa ukuthi labo abatshiye ukumkhonza benzeni?

¹⁸ UJehova “kafisi ukuthi loba ngubani abhujiswe kodwa ufisa ukuthi abantu bonke baphenduke.” (Bala u-2 Phetro 3:9.) Lanxa umuntu angenza isono esikhulu uyabe elokhu eligugu kuNkulunkulu. Khumbula ukuthi uJehova wathenga ngamunye wethu ngentengo ephezulu, impilo yeNdodana yakhe eligugu. Yikho ebazwela labo abamtshiyileyo futhi ezama ukubancedisa ukuthi babuyele kuye. Ulethemba lokuthi bazakwenza njalo njengoba sibona emzekelisweni kaJesu wendodana yolahleko. (Luk. 15:11-32) Abanengi ababesusiwe bacina bebuyela kuBaba wethu osezulwini osithandayo njalo ibandla labemukela ngazo zombili. U-Elizabeth esike sakhuluma ngaye wathokoza lapho indodana yakhe ibuyiselwa ebandleni. Ecabanga ngesikhathi indodana yakhe isusiwe uthi, “Ngiyababonga kakhulu labo abasikhuthaza ukuthi singalahli ithemba.”

19. Kungani kumele siqhubeke sithemba uJehova?

¹⁹ Singamthemba zikhathi zonke uJehova. Kasoze asitshele ukuthi senze izinto ezingasilimaza. UnguBaba ophanayo njalo olozwelo, obathandayo kakhulu bonke abamthandayo futhi abamkhonzayo. Qiniseka ukuthi uJehova kasoze akutshiye nxa usebuhlungwini. (Heb. 13:5, 6) UMark esike sakhuluma ngaye uthi: “UJehova kazange ake asitshiye. Uzahlala esincedisa nxa sisebunzimeni.” Uzaqhubeka ekunika “amandla amakhulu futhi angajayelekanga.” (2 Khor. 4:7) Ungenelisa sibili ukuqhubeka uthembekile njalo ulethemba lanxa umuntu omthandayo angatshiya uJehova.