1. Ngokwalokho okutshiwo kuMalakhi 3:16, yiliphi ibhuku uJehova abelokhu elibhala futhi libhalweni?

 UJEHOVA useleminyaka eminengi ebhala ibhuku eliqakathekileyo. Ibhuku leli lilamabizo abantu ababethembekile kusukela kufakazi wokuqala u-Abela. * (Luk. 11:50, 51) UJehova ubelokhu ebhala amabizo ebhukwini leli futhi lamuhla selilezigidi zamabizo. IBhayibhili libiza ibhuku leli ngokuthi ‘libhuku lokukhumbula,’ ‘libhuku lokuphila’ kumbe ‘yincwadimgoqwa yokuphila.’ Esihlokweni lesi sizalibiza ngokuthi ‘libhuku lokuphila.’—Bala uMalakhi 3:16; Isam. 3:5; 17:8.

2. Ngobani ababhalwe ebhukwini lokuphila futhi singenzani ukuze amabizo ethu abhalwe ebhukwini lelo?

² Ibhuku leli eliqakathekileyo lilamabizo abo bonke abamhloniphayo uJehova labaliqakathekisayo ibizo lakhe. Abantu laba balethemba lokuthola ukuphila okuphakade. Nxa lathi singaba ngabangane bakaJehova futhi sikholwe emhlatshelweni weNdodana yakhe uJesu Khristu, amabizo ethu azabhalwa ebhukwini lelo. (Joh. 3:16, 36) Kungelani lokuthi silethemba lokuphila ezulwini loba emhlabeni sonke sifuna amabizo ethu atholakale ebhukwini lokuphila.

3-4. (a) Nxa ibizo lakho libhaliwe ebhukwini lokuphila khathesi sokusitsho ukuthi uzakuthola yini ukuphila okungapheliyo? Chasisa. (b) Sizaxoxa ngani esihlokweni lesi lakwesilandelayo?

³ Lokhu kutsho ukuthi bonke abantu abalamabizo abhalwe ebhukwini lokuphila bazakuthola ukuphila okungapheliyo yini? Impendulo siyayithola emazwini uJehova  awatshela uMosi aku-Eksodusi 32:33. Wathi: “Loba ngubani owenze isono kimi ngizamcitsha ebhukwini lami.” Yikho amabizo asebhukwini lokuphila kungenzeka ukuthi acitshwe. Kufanana lokuthi uJehova ubebhale amabizo la ngepenseli. (Isam. 3:5, amabala angaphansi) Kumele sisebenze nzima ukuze amabizo ethu angacitshwa ebhukwini leli kuze kube angathi abhalwe ngepheni.

⁴ Lokhu kwenza sizibuze eminye imibuzo. Ngokwesibonelo, iBhayibhili lithini ngalabo abalamabizo abhalwe ebhukwini lokuphila lalabo abangabhalwanga kulo? Labo abalamabizo azaqhubeka esebhukwini lokuphila bazakuthola nini ukuphila okungapheliyo? Kuthiwani ngalabo abafa bengazange bathole ithuba lokufunda ngoJehova? Kungenzakala yini ukuthi amabizo abo abhalwe ebhukwini lokuphila? Imibuzo le izaphendulwa esihlokweni lesi lakwesilandelayo.

NGOBANI ABALAMABIZO ABHALWE EBHUKWINI LOKUPHILA?

5-6. (a) Ngokwalokho okutshiwo kuFiliphi 4:3, ngobani abanye abalamabizo abhalwe ebhukwini lokuphila? (b) Amabizo abo azabhalwa nini ebhukwini lokuphila ngendlela yokuthi awasoze acitshwe?

⁵ Ngobani abalamabizo abhalwe ebhukwini leli? Ukuze siphendule umbuzo lo sizaxoxa ngamaqembu amahlanu. Abanye babo babhaliwe ebhukwini lokuphila ikanti abanye ababhalwanga.

⁶ Iqembu lokuqala libunjwa yilabo abakhethwe ukuthi bayebusa loJesu ezulwini. Amabizo abo abhaliwe yini ebhukwini lokuphila? Ye. Umphostoli UPhawuli wathi ebhalela labo ayesebenza labo eFiliphi wathi amabizo abagcotshiweyo abakhethwe ukuthi bayebusa loJesu ezulwini  asebhaliwe ebhukwini lokuphila. (Bala uFiliphi 4:3.) Kodwa kumele baqhubeke bethembekile ukuze amabizo abo angacitshwa ebhukwini leli. Bazathi sebefakwe uphawu okokucina amabizo abo azabe esebhalwe ngendlela yokuthi awasoze acitshwe ebhukwini leli. Lokhu kuzakwenzakala bengakafi loba sekuzaqalisa ukuhlupheka okukhulu.—Isam. 7:3.

7. Ngokwalokho okutshiwo kuSambulo 7:16, 17 amabizo exuku elikhulu azabhalwa nini ngendlela yokuthi angasacitshwa ebhukwini lokuphila?

⁷ Iqembu lesibili lixuku elikhulu elibunjwa ngabezinye izimvu. Amabizo abo abhaliwe yini ebhukwini lokuphila? Ye. Amabizo abo azaqhubeka ekhona yini ebhukwini lokuphila nxa bengasinda e-Amagedoni? Ye. (Isam. 7:14) UJesu wathi abantu laba abanjengezimvu bazakuya “ekuphileni okungapheliyo.” (Mat. 25:46) Kodwa abasoze bahle bakuthole ukuphila okungapheliyo. Amabizo abo azaqhubeka esebhukwini lokuphila kodwa kuzabe kungathi alokhu ebhalwe ngepenseli. Nxa uJesu esebusa okweminyaka eyinkulungwane, ‘uzabelusa abakhokhele abase emithonjeni yamanzi okuphila.’ Amabizo alabo abazavuma ukuqondiswa nguJesu futhi batholakale bethembekile kuNkulunkulu ekupheleni kweminyaka eyinkulungwane awasoze acitshwe kuze kube nini lanini ebhukwini lokuphila.—Bala iSambulo 7:16, 17.

8. Ngobani abangabhalwanga ebhukwini lokuphila futhi kuzakwenzakalani kubo?

⁸ Iqembu lesithathu ngelabantu abafaniswa lembuzi abazabhujiswa empini ye-Amagedoni. Amabizo abo awabhalwanga ebhukwini lokuphila. UJesu wathi abantu labo “bazakuya ekubhujisweni kwaphakade.” (Mat. 25:46) UPhawuli laye wabhala wathi abantu labo “bazakwahlulelwa bajeziswe ngokubhujiswa phakade.” (2 Thes. 1:9; 2 Phet. 2:9) Abantu abonela umoya ongcwele ngabomo labo abasoze bakuthole ukuphila okungapheliyo kodwa bazabhujiswa bangaphindi babekhona. Lokhu kutsho ukuthi abasoze bavuswe. (Mat. 12:32; Mak. 3:28, 29; Heb. 6:4-6) Khathesi asixoxeni ngamaqembu amabili abantu abazavuswa baphile emhlabeni.

ABAZAVUSWA

9. Ngokwalokho okutshiwo kumiSebenzi 24:15, yiwaphi amaqembu amabili abantu abazavuswa ukuthi baphile emhlabeni futhi yiwuphi umehluko okhona phakathi kwamaqembu la?

⁹ IBhayibhili likhuluma ngamaqembu amabili alabo abazavuswa belethemba lokuphila kuze kube nini lanini emhlabeni. Amaqembu la ‘ngabalungileyo labangalunganga.’ (Bala imiSebenzi 24:15.) “Abalungileyo” yilabo abaqhubeka bethembekile kuJehova ngesikhathi besaphila. ‘Abangalunganga’ bona yilabo abangazange bamkhonze uJehova. Abanengi babo babephila ngendlela engamthokozisiyo. Kambe sesingathi amabizo abantu laba abasemaqenjini la womabili abhaliwe ebhukwini lokuphila ngenxa yokuthi bazavuswa? Asiqaleni sihlolisise iqembu ngalinye ukuze siphendule umbuzo lo.

10. Kungani “abalungileyo” bezavuswa futhi abanye babo bazaphiwa wuphi umsebenzi? (Khangela isihloko esithi “Imibuzo Ebuzwa Ngabafundi” esikumagazini le esikhuluma ngabantu abazavuswa baphile emhlabeni.)

¹⁰ Iqembu lesine ‘ngabalungileyo.’ Amabizo abo abhalwa ebhukwini lokuphila bengakafi. Manje acitshwa yini sebefile? Hatshi. Phela uJehova ulokhu esabakhumbula.  UJehova “unguNkulunkulu wabaphilayo hatshi owabafileyo ngoba kuye bonke bayaphila.” (Luk. 20:38) Lokhu kutsho ukuthi abalungileyo bazathi bevuswa amabizo abo azabe elokhu ekhona ebhukwini lokuphila lanxa nje ayabe angathi abhalwe ngepenseli. (Luk. 14:14) Kufanele ukuthi abanye balabo abazavuswa bazakuba ‘yiziphathamandla emhlabeni wonke.’—Hubo. 45:16.

11. ‘Abangalunganga’ kumele bafundisweni ukuze amabizo abo abhalwe ebhukwini lokuphila?

¹¹ Iqembu lokucina ‘ngelabangalunganga.’ Mhlawumbe abantu laba abazange baphile ngendlela ethokozisa uNkulunkulu besaphila ngoba babengayazi imithetho yakhe. Yikho ababhalwanga ebhukwini lokuphila. Kodwa uNkulunkulu uzabavusa ukuze bathole ithuba lokumkhonza njalo amabizo abo abhalwe ebhukwini lelo. Abantu laba ‘abangalunganga’ bazadinga ukuncediswa sibili. Phela kungenzakala ukuthi abanye babo babesenza izinto ezimbi futhi ezenyanyekayo. Yikho kuzamele bafundiswe imithetho kaJehova ukuze bayilandele. UMbuso kaNkulunkulu uzakwenza uhlelo olumangalisayo lokufundisa abantu laba abazavuswa.

12. (a) Ngobani abazafundisa abangalunganga? (b) Kuzakwenzakalani kulabo abangafuni ukutshintsha?

¹² Manje ngobani abazafundisa abangalunganga? Ngabexuku elikhulu kanye labalungileyo abayabe sebevusiwe. Abangalunganga kuzamele baqale babe ngabangane bakaJehova futhi bazinikele kuye ukuze amabizo abo abhalwe ebhukwini lokuphila. UJesu Khristu lalabo abazakwahlulela laye bazabe bebakhangele abantu laba ukuze babone ukuthi bayatshintsha yini. (Isam. 20:4) Loba ngubani ongafuni ukutshintsha uzabhujiswa lanxa eleminyaka engu-100. (Isaya. 65:20) UJehova loJesu bayenelisa ukubona okusezinhliziyweni zabantu futhi bazakuba leqiniso lokuthi  akulamuntu ophambanisa abanye emhlabeni omutsha.—Isaya. 11:9; 60:18; 65:25; Joh. 2:25.

UKUVUKELA UKUPHILA LOKUVUKELA UKWAHLULELWA

13-14. (a) Besiwazwisisa njani amazwi kaJesu akuJohane 5:29? (b) Kuyini okumele sikunanzelele ngamazwi la?

¹³ UJesu laye wakhuluma ngalabo ababezavuswa baphile emhlabeni. Ngokwesibonelo wathi: “Isikhathi siyeza lapho bonke abasemathuneni abazalizwa khona ilizwi layo baphume, abenze izinto ezinhle bavukele ukuphila, kuthi labo abenze izinto ezimbi bavukele ukwahlulelwa.” (Joh. 5:28, 29) Wayesitshoni lapha uJesu?

¹⁴ Kuqala sasikholwa ukuthi uJesu wayekhuluma ngezinto ezazizakwenziwa ngabantu sebevusiwe, okutsho ukuthi abanye babezavuswa benze izinto ezinhle abanye bavuswe benze izinto ezimbi. Kodwa nanzelela ukuthi uJesu katsho ukuthi labo abaphuma emathuneni bazakwenza izinto ezinhle kumbe bazakwenza izinto ezimbi. Lapha usebenzisa inkathi edlulileyo. Ukhuluma ngalabo “abenze izinto ezinhle” lalabo “abenze izinto ezimbi.” Lokhu kutshengisa ukuthi izinto lezi bazenza bengakafi. Lokhu kulengqondo sibili. Phela akulamuntu ozavunyelwa ukuthi enze izinto ezimbi emhlabeni omutsha. Abangalunganga babesenza izinto ezimbi bengakafi. Manje atshoni amazwi kaJesu amayelana ‘lokuvukela ukuphila lokuvukela ukwahlulelwa’?

15. Ngobani ‘abazavukela ukuphila’ futhi kungani bezavuswa?

¹⁵ Abalungileyo ababesenza okuhle bengakafi ‘bazavukela ukuphila’ ngoba amabizo abo ayabe evele ebhaliwe ebhukwini lokuphila. Lokhu kutsho ukuthi ukuvuswa kwalabo ‘ababesenza izinto ezinhle’ okukhulunywa ngakho kuJohane 5:29 kuyafanana lokuvuswa ‘kwabalungileyo’ okukhulunywa ngakho kumiSebenzi 24:15. Indlela esesizwisisa ngayo ivesi le iyavumelana lalokho okukhulunywa kuRoma 6:7, ukuthi: “Lowo osefile usekhululiwe esonweni sakhe.” Yikho nxa abalungileyo besifa uJehova uyacitsha izono zabo kodwa kakukhohlwa okuhle ababekwenza. Lokhu yikho okwenza amabizo abo aqhubeke esebhukwini lokuphila. (Heb. 6:10) Lanxa kunjalo kuzamele baqhubeke bethembekile ukuze amabizo abo ahlale esebhukwini lokuphila.

16. Kutshoni ‘ukuvukela ukwahlulelwa’?

¹⁶ Kuthiwani ngalabo ababesenza izinto ezimbi bengakafi? Lanxa izono zabo zacitshwa ngesikhathi besifa abazange bamkhonze uJehova ngesikhathi besaphila. Amabizo abo awabhalwanga ebhukwini lokuphila. Yikho ukuvuswa kwalabo ‘ababesenza izinto ezimbi’ kuyafanana lokuvuswa ‘kwabangalunganga’ okukhulunywa ngakho kumiSebenzi 24:15. Laba yibo ‘abazavukela ukwahlulelwa.’ * Amazwi athi bazakwahlulelwa atsho ukuthi bazahlolwa ukuze kubonakale ukuthi bayatshintsha yini. (Luk. 22:30) Kuzathatha isikhathi ukuthi kukhanye ukuthi abantu laba bafanele yini ukubhalwa ebhukwini lokuphila. Bazabhalwa ebhukwini lelo nxa bengatshintsha  indlela ababephila ngayo kudala futhi bazinikele kuJehova.

17-18. Kuyini okuzamele kwenziwe yilabo abazavukela ukuphila emhlabeni futhi yiziphi ‘izenzo’ okukhulunywa ngazo kuSambulo 20:12, 13?

¹⁷ Abazavuswa kuzamele balalele imithetho ezabe isezincwadinimgoqwa ezintsha ezizavulwa phakathi kweminyaka eyinkulungwane kungelani lokuthi babelungile kumbe babengalunganga bengakafi. Umphostoli uJohane uyasilandisela lokho akubona embonweni, uthi: “Ngabona abafileyo, abakhulu labancane bemi phambi kwesihlalo sobukhosi kwasekuvulwa izincwadimgoqwa. Kodwa kwavulwa lenye incwadimgoqwa, incwadimgoqwa yokuphila. Abafileyo bahlulelwa ngezinto ezazibhalwe ezincwadinimgoqwa kusiya ngezenzo zabo.”—Isam. 20:12, 13.

¹⁸ Yiziphi “izenzo” abavusiweyo abazakwahlulelwa ngazo? Bazakwahlulelwa ngenxa yalokho ababekwenza bengakafi yini? Hatshi! Phela izono zabo zahle zesulwa besifa yikho lapha akukhulunywa ngalokho ababekwenza bengakafi. Kodwa kungabe kukhulunywa ngezinto abazazenza ngesikhathi sebefundisiwe emhlabeni omutsha. Lamadoda ayethembekile anjengoNowa, uSamuyeli, uDavida kanye loDanyeli azafundiswa ngoJesu Khristu futhi kuzamele atshengise ukuthi alokholo emhlatshelweni wakhe. Nxa amadoda la ayethembekile kuzamele afunde ngoJesu, pho kuthiwani ngabangalunganga?

19. Kuzakwenzakalani kulabo abangasoze batshintshe?

¹⁹ Kuzakwenzakalani ebantwini abangasoze batshintshe? ISambulo 20:15 sithi: “Loba ngubani ongatholakalanga ebhaliwe ebhukwini lokuphila waphoselwa echibini lomlilo.” Abantu labo bazabhujiswa bangaphindi babekhona. Yikho kumele usebenze nzima ukuze ibizo lakho libhalwe ebhukwini lokuphila futhi lingacitshwa!

20. Yiwuphi umsebenzi omkhulu ozakwenziwa ngesikhathi uJesu esebusa okweminyaka eyinkulungwane? (Khangela umfanekiso ongaphandle.)

²⁰ Kuzabe kumnandi sibili ngesikhathi uKhristu esebusa okweminyaka eyinkulungwane. Abantu abanengi kakhulu bazafundiswa ngoJehova ngesikhathi leso. Kanti njalo kuzakuba yisikhathi sokuhlola indlela abalungileyo labangalunganga abaziphatha ngayo. (Isaya. 26:9; Imiseb. 17:31) Umsebenzi wokufundisa abantu laba uzakwenziwa njani? Isihloko esilandelayo sizasinceda sizwisise njalo siqakathekise umsebenzi lo omangalisayo.