ISIFUNDO 40
‘Ukuncedisa Abanengi Ukuthi Babe Ngabalungileyo’
“Abancedisa abanengi ukuthi babe ngabalungileyo bazakhanya njengezinkanyezi kuze kube nini lanini.”—DAN. 12:3.
INGOMA 151 Uzabiza
ESIZAKUFUNDA *
1. Yikuphi okuhle okuzakwenzakala uJesu esebusa okweminyaka eyinkulungwane?
KUZABE kumnandi sibili nxa sesibona abafileyo bevuswa ngesikhathi sokubusa kukaKhristu kweminyaka eyinkulungwane. Bonke abafelwa yizihlobo labangane bakulindele ngabomvu ukubabona. UJehova laye uyafisa ukubabona. (Jobe. 14:15) Akucabange ukuthi abantu bazathokoza njani sebehlangana lezihlobo labangane babo sebevusiwe! Njengoba sifundile esihlokweni esidlulileyo “abalungileyo” ababhalwe ebhukwini lokuphila ‘bazavukela ukuphila.’ (Imiseb. 24:15; Joh. 5:29) Mhlawumbe inengi lezihlobo zethu labangane bethu lizakuba phakathi kwalabo abazavuswa ngemva nje kwe-Amagedoni. * Kanti njalo ‘abangalunganga’ okugoqela labo abangazange bathole ithuba lokumazi uJehova kumbe elokumkhonza bengakafi ‘bazavukela ukwahlulelwa.’
2-3. (a) Yiwuphi umsebenzi omkhulu okukhulunywa ngawo ku-Isaya 11:9, 10? (b) Sizaxoxa ngani esihlokweni lesi?
2 Bonke abantu abazavuswa kuzamele bafundiswe. (Isaya. 26:9; 61:11) Lokhu kutsho ukuthi kuzakuba lomsebenzi omkhulu kakhulu wokubafundisa. (Bala u-Isaya 11:9, 10.) Umsebenzi lo uqakathekile ngoba abangalunganga abazavuswa kuzamele bafunde ngoJesu Khristu, ngoMbuso kaNkulunkulu, ngenhlawulo, ngokuqakatheka kwebizo likaNkulunkulu lokuthi kungani kunguye yedwa olelungelo lokubusa. Labalungileyo labo kuzamele bafundiswe ngalokho uJehova abelokhu ekufundisa abantu bakhe mayelana lenhloso yakhe ngomhlaba. Abanye ababethembekile bafa iBhayibhili lingakaqedwa ukubhalwa. Yikho abangalunganga labalungileyo bazabe belokunengi okumele bakufunde.
3 Esihlokweni lesi sizaxoxa ngemibuzo elandelayo: Uzakwenziwa njani umsebenzi omkhulu wokufundisa? Kuzakwenzakalani kulabo abazalalela nxa befundiswa? Kuzakwenzakalani ebantwini abangasoze balalele? Kuqakathekile ukuthi sithole izimpendulo zemibuzo le. Sizahlola ezinye iziphrofetho ezimangalisayo ezisebhukwini likaDanyeli leleSambulo ezizasinceda sizwisise kuhle ukuthi kuzakwenzakalani nxa abafileyo sebevuswa. Ake siqale sixoxe ngokunye okuzakwenzakala okukhulunywa ngakho kuDanyeli 12:1, 2.
“ABALELEYO EMHLABATHINI BAZAVUKA”
4-5. UDanyeli 12:1 uthi kuzakwenzakalani ngesikhathi sokuphela?
4 Bala uDanyeli 12:1. Ibhuku likaDanyeli likhuluma ngezinto ezizakwenzakala ngesikhathi sokuphela. Ngokwesibonelo uDanyeli 12:1 ukhuluma ngokuthi uMikhayeli okutsho uJesu Khristu ‘uyabamela abantu [bakaNkulunkulu].’ Isiphrofetho lesi saqalisa ukugcwaliseka ngo-1914 ngesikhathi uJesu ebekwa ukuthi abe yiNkosi yoMbuso kaNkulunkulu.
5 UDanyeli watshelwa lokuthi uJesu ‘wayezasukuma ngesikhathi sokuhlupheka esingakaze sibe khona selokhu kwadabuka izizwe kuze kube yilesosikhathi.’ Lesi yiso isikhathi ‘sokuhlupheka okukhulu’ okukhulunywa ngaso kuMathewu 24:21. Nxa isikhathi lesi sokuhlupheka sesiphela, ngesikhathi se-Amagedoni, uJesu uzasukuma alwele abantu bakaNkulunkulu. Ibhuku leSambulo lithi abantu labo ‘balixuku elikhulu eliphuma ekuhluphekeni okukhulu.’—Isam. 7:9, 14.
6. Kuzakwenzakalani nxa ixuku elikhulu selisinde ekuhluphekeni okukhulu? Chasisa. (Khangela isihloko esikumagazini le esithi “Imibuzo Ebuzwa Ngabafundi” esikhuluma ngokuvuswa kwabafileyo.)
6 Bala uDanyeli 12:2. Kuzakwenzakalani nxa ixuku elikhulu selisinde ekuhluphekeni okukhulu? Isiphrofetho lesi asitsho ukuvuswa kwalabo abazakuyaphila ezulwini kumbe ukuvuselelwa komsebenzi wokutshumayela owaphosa wamiswa ngabaphikisi ngo-1918 njengalokho esasikukholwa. * Sikhuluma ngokuvuswa kwabafileyo okuzakwenzakala emhlabeni omutsha. Kungani sesisizwisisa ngale indlela? Ibala elithi “emhlabathini” lisetshenzisiwe lakuJobe 17:16 futhi litsho ingcwaba. Njengoba ibala elithi “emhlabathini” lisitsho ingcwaba, kumele ukuthi uDanyeli 12:2 ukhuluma ngokuvuswa kwabafileyo okuzakwenzakala ngemva kwempi ye-Amagedoni, insuku zokucina seziphelile.
7. (a) Kutshoni ukuthi abanye bazavuswa bathole “ukuphila okungapheliyo”? (b) Kungani sisithi lokhu yikuvuswa “okungcono kakhulu”?
7 Manje uDanyeli 12:2 utshoni nxa esithi abanye bazavuka bathole “ukuphila okungapheliyo”? Utsho ukuthi phakathi kweminyaka eyinkulungwane labo abazavuswa bamazi futhi baqhubeke besiba mazi njalo bamlalele uJehova loJesu bazathola ukuphila okungapheliyo. Kabasoze baphinde bafe futhi. (Joh. 17:3) Ukuvuswa lokhu kuzabe ‘kungcono kakhulu’ kulalokho okwenzakala kudala. (Heb. 11:35) Kungani sisitsho njalo? Ngoba labo abavuswa ngalesosikhathi baphinda bafa futhi.
8. Ngabanjani abazavuka “basolwe futhi bathole ihlazo elingapheliyo”?
8 Kodwa ayisibo bonke abazavuswa abazavuma ukufunda ngoJehova. Isiphrofetho sikaDanyeli sithi abanye bazavuka “basolwe futhi bathole ihlazo elingapheliyo.” Amabizo abo awasoze abhalwe ebhukwini lokuphila futhi abasoze bakuthole ukuphila okungapheliyo ngoba bayabe bengafuni ukutshintsha. Bazathola “ihlazo elingapheliyo” okutsho ukuthi bazabhujiswa. Yikho uDanyeli 12:2 ukhuluma ngalokho okuzakwenzakala kulabo abazavuswa kusiya ngalokho abazakhetha ukukwenza sebevusiwe. * (Isam. 20:12) Abanye bazathola ukuphila okungapheliyo kodwa abanye bazabhujiswa.
‘UKUNCEDISA ABANENGI UKUTHI BABE NGABALUNGILEYO’
9-10. Kuyini okunye okuzakwenzakala ngemva kokuhlupheka okukhulu njalo ngobani ‘abazakhazimula kakhulu njengokukhanya kwesibhakabhaka’?
9 Bala uDanyeli 12:3. Kuyini okunye okuzakwenzakala ngemva ‘kwesikhathi sokuhlupheka’? UDanyeli 12:3 uyasitshela okunye okuzakwenzakala ngemva kwesikhathi leso.
10 Ngobani ‘abazakhazimula kakhulu njengokukhanya kwesibhakabhaka’? Amazwi kaJesu akuMathewu 13:43 ayasinceda sibone ukuthi ngobani labo. Athi: “Ngalesosikhathi abalungileyo bazakhazimula njengelanga eMbusweni kaYise.” Lapha uJesu wayekhuluma “ngamadodana oMbuso” okutsho abafowabo abagcotshiweyo abazabusa laye ezulwini. (Mat. 13:38) Yikho kumele ukuthi uDanyeli 12:3 ukhuluma ngabagcotshiweyo kanye lalokho abazakwenza ngesikhathi sokubusa kukaKhristu kweminyaka eyinkulungwane.
Phakathi kweminyaka eyinkulungwane abagcotshiweyo bazasebenza loJesu Khristu beqondisa umsebenzi wokufundisa ozabe usenziwa emhlabeni (Khangela indima 11)
11-12. Yiwuphi umsebenzi ozabe usenziwa ngabangu-144 000 phakathi kweminyaka eyinkulungwane?
11 Abagcotshiweyo bazabancedisa njani “abanengi ukuthi babe ngabalungileyo”? Phakathi kweminyaka eyinkulungwane bazasebenza loJesu Khristu beqondisa umsebenzi wokufundisa ozabe usenziwa emhlabeni. Abangu-144 000 bazakuba ngamakhosi baphinde babe ngabaphristi. (Isam. 1:6; 5:10; 20:6) Yikho bazancedisa ‘ukwelapha izizwe’ kuze kufike isikhathi lapho abantu sebengaselasono. (Isam. 22:1, 2; Hez. 47:12) Abagcotshiweyo bazakholisa sibili ukwenza umsebenzi lo!
12 “Abanengi” abazancediswa ukuthi babe ngabalungileyo yilabo abazavuswa lalabo abazasinda e-Amagedoni kanye labantwana abazazalwa emhlabeni omutsha. Ekupheleni kweminyaka eyinkulungwane bonke abazabe bephila emhlabeni bazabe bengaselasono. Manje amabizo abo azabhalwa nini ebhukwini lokuphila ngendlela yokuthi awacitsheki, kube angathi abhalwe ngepheni?
UKULINGWA KOKUCINA
13-14. Kuyini okuzamele kwenziwe ngabantu abayabe bengaselasono ukuze bathole ukuphila okungapheliyo?
13 Ukuthi umuntu kalasono akutsho ukuthi uzathola ukuphila okungapheliyo. Phela u-Adamu lo-Eva labo babengelasono. Kodwa kwakumele balalele uJehova uNkulunkulu ukuze bathole ukuphila okungapheliyo. Okudanisayo yikuthi abazange bamlalele.—Rom. 5:12.
14 Ekupheleni kweminyaka eyinkulungwane bonke abantu emhlabeni bazabe bengaselasono. Kodwa yibo bonke yini abazaqhubeka besekela ubukhosi bukaJehova kumbe bakhona abazakwenza njengo-Adamu lo-Eva abangazange bamlalele lanxa babengelasono? Kuzakhanya njani ukuthi bafuna ukubuswa nguJehova?
15-16. (a) Abantu bonke bazalithola nini ithuba lokutshengisa ukuthi bathembekile kuJehova? (b) Kuzakwenzakalani kulabo abangasoze bavume ukubuswa nguJehova lakulabo abazahlala bethembekile?
15 USathane uzabotshwa okweminyaka eyinkulungwane futhi ngalesosikhathi kasoze enelise ukudukisa abantu. Kodwa ekupheleni kweminyaka leyo uzakhululwa abesezama ukubadukisa. Ngalesosikhathi bonke abantu emhlabeni bazathola ithuba lokutshengisa ukuthi bayalihlonipha yini ibizo likaNkulunkulu lokuthi bayabusekela yini ubukhosi bakhe. (Isam. 20:7-10) Abazakwenza ngesikhathi belingwa nguSathane yikho okuzatsho ukuthi amabizo abo ayabhalwa yini ebhukwini lokuphila angasacitshwa.
16 IBhayibhili lisitshela ukuthi kulabanye abangasoze bavume ukubuswa nguJehova njengo-Adamu lo-Eva. Kuzakwenzakalani kibo? USambulo 20:15 uthi: “Loba ngubani ongatholakalanga ebhaliwe ebhukwini lokuphila waphoselwa echibini lomlilo.” Bonke abangafuni ukubuswa nguNkulunkulu bazatshabalaliswa bangaphindi babekhona. Kodwa abanengi abayabe bengaselasono bazaqhubeka bethembekile ekulingweni kokucina futhi amabizo abo azabhalwa ebhukwini lokuphila angacitshwa.
OKUZAKWENZAKALA ‘NGESIKHATHI SOKUCINA’
17. Ingilosi yathi kuyini okwakuzakwenzakala esikhathini esiphila kuso? (UDanyeli 12:4, 8-10)
17 Kuyathokozisa ukucabanga ngokuzakwenzakala esikhathini esizayo. Kodwa ingilosi yaphinda yatshela uDanyeli okunye okwakuzakwenzakala esikhathini sethu, ‘isikhathi sokucina.’ (Bala uDanyeli 12:4, 8-10; 2 Thim. 3:1-5) Yathi kuye: “Ulwazi lweqiniso luzakuba lunengi.” Lokhu kutsho ukuthi abantu bakaNkulunkulu yibo ababezawazwisisa kuhle amazwi asesiphrofethweni sikaDanyeli. Ingilosi yaphinda yathi “abaxhwalileyo bazakwenza okubi futhi kakho loyedwa omubi ozazwisisa.”
18. Kuzakwenzakalani ebantwini abenza okubi?
18 Lamuhla abantu abenza okubi bazenzela umathanda. (Mal. 3:14, 15) Kodwa sekuseduze ukuthi uJesu ahlulele abantu laba abafaniswa lembuzi abehlukanise labantu abenza okuhle abafaniswa lezimvu. (Mat. 25:31-33) Ababi abasoze basinde ngesikhathi sokuhlupheka okukhulu futhi abasoze bavuswe ukuthi baphile emhlabeni omutsha. Amabizo abo ayabe engekho ‘ebhukwini lokukhumbula’ okukhulunywa ngalo kuMalakhi 3:16.
19. Kuyini okumele sikwenze futhi kungani kumele senze njalo? (UMalakhi 3:16-18)
19 Lesi yiso isikhathi sokutshengisa ukuthi asikho eqenjini labantu abenza okubi. (Bala uMalakhi 3:16-18.) Khathesi uJehova uqoqa abantu abathandayo abayimpahla yakhe eligugu. Sonke siyafisa sibili ukuba phakathi kwabo.
Sizathokoza kakhulu sesibona uDanyeli lesibathandayo kanye labanye abanengi ‘besukuma’ ukuze bathole isabelo sabo emhlabeni omutsha! (Khangela indima 20)
20. UDanyeli wathenjiswani esezakufa njalo kungani ukulindele ukugcwaliseka kwalesosithembiso?
20 Zinengi iziphrofetho ezigcwalisekayo esikhathini sethu. Kodwa kunengi okusazokwenzakala. Sekuseduze ukuthi abantu ababi babhujiswe. Ngemva kwalokho kuzagcwaliseka amazwi uJehova awatshela uDanyeli athi: “Ekucineni kwezinsuku uzasukuma uthole isabelo sakho.” (Dan. 12:13) Uyafisa yini ukumbona uDanyeli labantu obathandayo ‘besukuma’ futhi? Nxa ufisa ukuba khona ngalesosikhathi, zama ngamandla akho wonke ukuhlala uthembekile kuJehova. Ungenza njalo ibizo lakho lizahlala libhaliwe ebhukwini lokuphila.
INGOMA 80 “Nambithani Libone Ukuthi UJehova Ulungile”
^ Isihloko lesi silungisisa indlela esasizwisisa ngayo umsebenzi omkhulu wokufundisa okukhulunywa ngawo kuDanyeli 12:2, 3. Sizahlola ukuthi uzakwenziwa nini lokuthi ngobani abazahlanganiswa kuwo. Sizaphinda sibone ukuthi umsebenzi lo wokufundisa uzabanceda njani labo abasemhlabeni ukuthi balungele ukulingwa kokucina ekupheleni kweminyaka eyinkulungwane yokubusa kukaKhristu.
^ Mhlawumbe kuzaqala kuvuswe labo abafa bethembekile ngezinsuku zokucina besekulandela abafa ngemva kwabo kutshova kusiya emuva khonale. Nxa kungaba njalo isizukulwane ngesizukulwane sizakuba lethuba lokuhlangabeza abantu esibaziyo. Kungelani ukuthi abantu bazavuswa njani, iBhayibhili lisitshela ukuthi abazavuselwa ukuphila ezulwini bazavuswa umuntu ngamunye “ngethuba lakhe elifaneleyo.” Yikho singathi lalabo abazavuselwa ukuphila emhlabeni bazavuswa ngendlela ehlelekileyo.—1 Khor. 14:33; 15:23.
^ Lokhu kulungisisa indlela esasizwisisa ngayo isiphrofetho esichasiswa ebhukwini lesiZulu elithi Sinake Isiprofetho SikaDaniyeli! isahluko 17, laku-Nqabayokulinda yesiZulu kaJuly 1 1987, amakhasi 21-25.
^ ImiSebenzi 24:15 yona nxa ikhuluma ‘ngabalungileyo labangalunganga’ iyabe isitsho okwakusenziwa ngabantu labo bengakafi. UJohane 5:29 laye nxa ekhuluma ‘ngababesenza izinto ezinhle kanye lalabo ababesenza izinto ezimbi’ utsho izinto ezazisenziwa ngabavusiweyo bengakafi.
