Zwana ukuthi iBhayibhili liyiphendula njani imibuzo le.

ImiSebenzi 24:15 isitshela ukuthi “abafileyo bazavuswa, abalungileyo labangalunganga.” Abalungileyo yilabo ababelalela uNkulunkulu bengakafi yikho amabizo abo abhalwa ebhukwini lokuphila. (Mal. 3:16) Abangalunganga bagoqela labo abafa bengazange bathole ithuba lokufunda ngoJehova yikho amabizo abo awabhalwanga ebhukwini lokuphila.

UJohane 5:28, 29 ukhuluma ngamaqembu amabili aqanjwe kumiSebenzi 24:15. UJesu wathi labo ‘ababesenza izinto ezinhle bazavukela ukuphila kuthi labo ababesenza izinto ezimbi bavukele ukwahlulelwa.’ Abalungileyo ababesenza izinto ezinhle bengakafi bazavuselwa ukuthi baphile emhlabeni ngenxa yokuthi amabizo abo ayabe ekhona ebhukwini lokuphila. Kodwa abangalunganga babesenza izinto ezimbi bengakafi yikho bazavuselwa ukwahlulelwa. Amabizo abo awakabhalwa ebhukwini lokuphila njalo kuzakuba lesikhathi sokuthi bahlulelwe kumbe bahlolwe. Ngalesosikhathi bazafundiswa ngoJehova njalo bathole ithuba lokuthi amabizo abo abhalwe ebhukwini lokuphila.

USambulo 20:12, 13 uchasisa ukuthi bonke abazavuswa kuzamele balalele ‘izinto ezibhalwe ezincwadinimgoqwa’ okutsho imithetho emitsha ezabe isikhona emhlabeni omutsha. Labo abangasoze bayilalele bazabhujiswa.—Isaya. 65:20.

UDanyeli 12:2 usitshela ukuthi labo abaleleyo ekufeni bazavuka “bathole ukuphila okungapheliyo kodwa abanye bazavuka basolwe futhi bathole ihlazo elingapheliyo.” Ivesi le ikhuluma ngesiphetho salabo abayabe bevusiwe. Ithi bazathola “ukuphila okungapheliyo” kumbe “ihlazo elingapheliyo.” Yikho ekupheleni kweminyaka eyinkulungwane abanye bazathola ukuphila okungapheliyo kuthi abanye babhujiswe bangaphindi babekhona.—Isam. 20:15; 21:3, 4.

Amaqembu la amabili azavuswa angaqathaniswa labantu abafuna ukuthuthela kwelinye ilizwe. Abalungileyo singabafanisa labantu abanikwa iviza loba amaphepha abanika imvumo lenkululeko yokuthi bayesebenza kumbe bahlale kwelinye ilizwe okwesikhathi eside futhi bathole amalungelo amanengi. Abangalunganga bona singabafanisa labantu abanikwe iviza loba amaphepha abanika imvumo yokuthi bahlale okwesikhatshana kumbe bavakatshe elizweni elithile. Abantu laba bangavunyelwa ukuthi bahlale kulelolizwe nxa bangenza konke okufunwa yiziphathamandla zalelolizwe. Yikho-ke abangalunganga labo kuzamele balandele imithetho kaJehova njalo babe ngabalungileyo ukuze baqhubeke bephila ePharadayisi. Kungelani lokuthi umuntu uphiwe iviza yokuhlala isikhathi eside okungakanani angacina esexotshiwe kumbe esehlala khona ngokusemthethweni kusiya ngokuthi uziphatha njani. Kuzakuba njalo lakulabo abazavuswa. Okuzakwenza bathole ukuphila okungapheliyo yindlela abazaziphatha ngayo emhlabeni omutsha. Yikho ukuthi umuntu uzaphila phakade emhlabeni omutsha kuzakuya ngokuziphatha kwakhe lokuthi uthembekile yini.

UJehova nguNkulunkulu olomusa futhi ulungile njalo wahlulela kuhle. (Dute. 32:4; Hubo. 33:5) Uzatshengisa ukuthi ulothando ngokuvusa abantu abalungileyo labangalunganga. Lanxa kunjalo uzabe ekhangelele ukuthi bonke abantu balandele imithetho yakhe emayelana lokulungileyo lokungalunganga. Abazavunyelwa ukuthi baphile phakade emhlabeni omutsha yilabo abazaqhubeka bemthanda njalo belandela imithetho yakhe.