1-2. Kuyini okwenza abantu bakaNkulunkulu bathokoze? (UJakhobe 1:​22-25)

 UJEHOVA leNdodana yakhe bafuna sithokoze. Umlobi weHubo 119:2 wathi: “Bayathokoza abalalela izikhumbuzo zakhe, abamdinga ngenhliziyo yonke.” UJesu laye wathi: “Abathokozayo yilabo abalizwayo ilizwi likaNkulunkulu balilandele!”—Luk. 11:28.

² Abantu bakaJehova bayathokoza. Kuyini okwenza bathokoze? Kunengi kakhulu kodwa okunye okuqakathekileyo yikuthi bahlala bebala iLizwi likaNkulunkulu futhi bezama ngamandla wonke ukwenza lokho elikutshoyo.—Bala uJakhobe 1:​22-25.

3. Kusinceda ngani ukwenza lokho esikubala eLizwini likaNkulunkulu?

³ Zinengi izindlela esincedakala ngazo nxa ‘singenza lokho ilizwi’ likaNkulunkulu “elikutshoyo.” Ngokwesibonelo, siyabe sithokozisa uJehova futhi lokho kwenza lathi sithokoze. (Umtshu. 12:13) Nxa singenza lokho esikubala eLizwini likaNkulunkulu eliphefumulelweyo, kuzaba lula ukuthi siphathe abanye kuhle emulini lokuthi sizwanane lalabo esikhonza labo. Engxenye lawe usuke wakubona lokho. Kanti njalo nxa sisenza lokho okutshiwo liLizwi likaNkulunkulu siyabe sixwaya inhlupho ezehlela labo abangafuni ukulalela imithetho kaJehova. INkosi uDavida yathi isikhulume ngezahlulelo zikaJehova lezimiso zakhe lemithetho yakhe yaphetha ngokuthi: ‘Oyigcinayo uzathola umvuzo omkhulu.’ (Hubo. 19:​7-11) Lathi siyakubona ukuthi kuliqiniso lokho.

4. Kuyini okungenza kube nzima ukuthi senze lokho okutshiwo liLizwi likaNkulunkulu?

⁴ Iqiniso yikuthi kwezinye izikhathi kunzima ukuthi sibale iLizwi likaNkulunkulu lokuthi senze elikutshoyo. Lanxa kukunengi okumele sikwenze, kumele sizinike isikhathi sokubala iLizwi likaNkulunkulu lokulitaditsha ukuze sizwisise lokho uJehova afuna sikwenze. Yikho sizaxoxa ngokuthi kuyini okungasinceda ukuthi sibale iLizwi likaNkulunkulu nsuku zonke. Sizabona lokuthi kuyini okungasinceda ukuthi sicabangisise ngalokho esikubalayo besesibona  lokuthi singakwenza njani lokho esiyabe sikufundile.

ZINIKE ISIKHATHI SOKUBALA ILIZWI LIKANKULUNKULU

5. Yiphi imisebenzi okumele siyenze engathatha isikhathi sethu esinengi?

⁵ Abantu bakaJehova balemisebenzi eminengi okumele bayenze nsuku zonke. Kulemisebenzi eminengi okukhulunywa ngayo eBhayibhilini okumele amaKhristu azinike isikhathi sokuyenza. Ngokwesibonelo, abanengi bayasebenza ukuze bazinakekele futhi bondle lezimuli zabo. (1 Thim. 5:8) Amanye amaKhristu agcina izihlobo zawo ezigulayo kumbe esezigugile. Kanti njalo sonke silezinto okumele sizenze ukuze sibe lempilakahle futhi lokhu kungasithathela isikhathi esinengi kakhulu. Kuphinda kube lemisebenzi yebandla okuyabe kumele siyenze. Omunye umsebenzi omkhulu esilawo ngowokutshumayela njalo kumele sikhuthale emsebenzini lo. Siyabona ukuthi kunengi kakhulu okumele sikwenze. Manje singasithola njani isikhathi sokubala iBhayibhili nsuku zonke lokucabangisisa ngalokho esikubalayo kanye lokwenza esikubalileyo?

6. Ungenzani ukuze wenelise ukubala iBhayibhili nsuku zonke? (Khangela lomfanekiso.)

⁶ Ukubala iBhayibhili ‘kuqakatheke kakhulu,’ yikho kumele sizinike isikhathi sokulibala. (Flp. 1:10) Isahluko sokuqala sebhuku lamaHubo sithi umuntu othokozayo ‘ngobala umthetho kaNkulunkulu ngelizwi eliphansi ubusuku lemini.’ (Hubo. 1:​1, 2) Lokhu kutsho ukuthi kumele sizinike isikhathi sokubala iBhayibhili. Manje yisiphi isikhathi esingcono esingalibala ngaso? Kuya ngomuntu ngoba izimo zethu ziyatshiyana. Okuqakathekileyo yikuthi ukhethe isikhathi ozenelisa ngaso ukubala iBhayibhili nsuku zonke. Umfowethu okuthiwa nguVictor uthi: “Lanxa ukuvuka kungihlupha, ngakhetha ukuthi ngibale iBhayibhili ekuseni ngoba yikho okuyabe kungelazinto ezinengi ezingangiphambanisa. Ekuseni kulula ukuthi ngifake ingqondo yami kulokho engikubalayo ngoba kuyabe kungakabi lezinto ezinengi engizicabangayo.” Abanye babona kungcono ukuthi babale ekuseni njengoVictor. Kodwa okuqakathekileyo yikuthi  umuntu ngamunye azibuze umbuzo lo, ‘Yisiphi isikhathi esingcono kimi engingabala ngaso iBhayibhili?’

CABANGISISA NGALOKHO OKUBALAYO

7-8. Kuyini okungenza sisale singabambanga lutho nxa sibala iBhayibhili? Nika umzekeliso.

⁷ Kwezinye izikhathi singabala izinto ezinengi kakhulu kodwa sisale sibambe okulutshwana nje kuphela. Lokho kuyake kwenzakale kuwe yini? Kuyake kwenzakale kithi sonke. Kuyadanisa ukuthi kuyenzakala lanxa sibala iBhayibhili. Mhlawumbe silohlelo lokubala izahluko zeBhayibhili ezinengana nsuku zonke. Kuhle lokho ngoba vele sonke kumele sihlele izinto eziphathelane lokukhonza esingazenza besesizama ukuthi sizenze. (1 Khor. 9:26) Nxa sifuna ukuthi iLizwi likaNkulunkulu lisincede akumelanga sibale sigijima kodwa kukhona okunye okuyabe kumele sikwenze.

⁸ Nanku umzekeliso ongasinceda: Izihlahla lotshani kufuna amanzi ukuze kukhule kuhle. Kodwa nxa izulu lingana kakhulu, umhlabathi ucina usutota. Nxa seline laba linengi kakhulu liyabe lingasabuncedi utshani lezihlahla. Izulu elincedayo ngelina lisima, umhlabathi ube lesikhathi sokumunya amanzi ukuze utshani lezihlahla kuthole amanzi alingeneyo, kukhule kuhle. Lathi akumelanga sibale iBhayibhili sigijima kodwa kumele sizinike isikhathi sokucabangisisa ngalokho esikubalayo ukuze kungene kuthophele enhliziyweni, sikukhumbule isikhathi eside njalo sikwenze.—Jak. 1:24.

9. Kumele senzeni nxa sijayele ukubala iBhayibhili sigijima?

⁹ Wena ulibala njani iBhayibhili? Engxenye kwezinye izikhathi ulibala ujahile. Manje kumele wenzeni? Ungajahi, libale kancane kancane ucabangisise ngalokho okubalayo. Kumbe nxa ungaqeda ukubala uzinike isikhathi sokuthi ucabange ngakho konke obukubala. Lokho esikhuluma ngakho akunzima. Kodwa nxa wena ubona angani kunzima, kuthathe angani sitsho ukuthi nxa ungaqeda ukubala uzinike isikhathi sokudinga ukuthi ufundeni. Ungangezelela isikhathi sakho sokutaditsha ukuze ube lesikhathi sokucabangisisa nxa ungaqeda ukubala. Okunye ongakwenza yikubala amavesi amalutshwana, esinye isikhathi ubususisebenzisa ucabangisisa ngalokho okubalileyo. UVictor okuke kwakhulunywa  ngaye uthi: “Ngijayele ukubala amavesi amalutshwana kumbe isahluko esisodwa nje kuphela. Ukubala iBhayibhili ekuseni kunginceda ukuthi ngitshone ngicabangisisa ngalokho engiyabe ngikubalile.” Kungelani lokuthi ukhetha ukulibala njani iBhayibhili, okuqakathekileyo yikuthi uzinike isikhathi sokucabangisisa ngalokho okubalayo ukuze uthole okunengi.—Hubo. 119:97; khangela ibhokisi elithi “ Imibuzo Engakunceda Ukuthi Ucabangisise.”

10. Nika isibonelo sokuthi ungakusebenzisa njani lokho oyabe ukubala. (U-1 Thesalonika 5:​17, 18)

¹⁰ Kungelani lokuthi ulibala nini iBhayibhili lokuthi ulibala isikhathi eside kangakanani kumele ube leqiniso lokuthi uyakwenza lokho okubalayo. Ngesikhathi ulibala ungazibuza ukuthi, ‘Lokhu engikubalayo ngingakwenza njani khathesi kumbe esikhathini esizayo?’ Nansi isibonelo: Ake sithi ubala u-1 Thesalonika 5:​17, 18. (Bala.) Ngemva kokubala amavesi la ungama ubusucabangisisa ngokuthi ukhuleka kangaki lokuthi imithandazo yakho injani. Ungacabanga lezinye izinto ongafuna ukumbonga ngazo uJehova. Mhlawumbe ungakhetha izinto ezintathu ayabe ekwenzele zona mhlalokho ubusumbonga ngazo. Ukuzinika imizuzu emilutshwana nje ucabangisise kuzakunceda ukuthi ulizwisise iLizwi likaNkulunkulu futhi uzimisele ukwenza elikutshoyo. Nxa ungazama ukukwenza lokho nsuku zonke, uzathola okunengi kakhulu eLizwini likaNkulunkulu. Uzabe ususenelisa ukwenza lokho elikutshoyo. Manje ungenzani nxa ungananzelela ukuthi kulezinto ezinengi okumele uzilungisise?

HLELA ONGENELISA UKUKWENZA

11. Kuyini okungakudanisa ekubaleni iBhayibhili? Nika isibonelo.

¹¹ Nxa ungathi ubala iBhayibhili ubusubona ukuthi zinengi izinto okumele uzilungisise, ungadana. Ake sithi uthe ubala iBhayibhili lamuhla wathola amavesi akhuluma ngokuthi singabandlululi. (Jak. 2:​1-8) Uthe usuqedile ukulibala wabona ukuthi kumele utshintshe indlela ophatha ngayo abanye wasuzimisela ukutshintsha. Kuhle lokho! Ngelanga elilandelayo ubusubala amavesi akhuluma ngokuthi kuqakathekile ukuthi sinanzelele indlela esikhuluma ngayo. (Jak. 3:​1-12) Uthi usucabangisisa ubone ukuthi kwezinye izikhathi uyake ukhulume izinto eziphatha kubi abanye. Ngakho uyazimisela ukuthi uzame ukukhuluma izinto ezinceda abanye lezibakhuthazayo. Ngelanga lesithathu uthi ubala iBhayibhili uhlangane lamavesi akhuluma ngokuthi singabi ngabangane babantu abangamkhonziyo uJehova. (Jak. 4:​4-12) Lokhu kwenza ubone ukuthi kumele unanzelele nxa ukhetha okubukelayo, okulalelayo lokubalayo. Kusiyafika ilanga lesine ungabona angani izinto lezi sezizinengi kakhulu okokuthi kungakwehlula ukuthi uzenze zonke.

12. Kungani kungamelanga uphele amandla nxa ungananzelela ukuthi kulezinto ezinengi okumele uzilungisise? (Khangela lamabala angaphansi.)

 ¹² Nxa ungananzelela ukuthi kulezinto ezinengi okumele uzilungisise ungapheli amandla. Phela nxa unanzelela ukuthi kulalapho okumele ulungisise khona kutsho ukuthi uthobekile futhi uyafuna ukwenza okuhle. Nxa umuntu othobekileyo ebala iBhayibhili, uyadinga lapho angalungisisa khona. a Khumbula ukuthi “ubuntu obutsha” asibi labo ngelanga elilodwa nje kuphela kodwa kumele siqhubeke sisebenza nzima ukuze sibe labo. (Kol. 3:10; khangela lomcijo wokutaditsha wevesi le othi “is being made new” ku-Nguqulo Yomhlaba Omutsha yesiNgisi okuthiwa yi-Study Bible.) Kuyini okuzakunceda ukuthi uqhubeke usenza lokho okutshiwo liLizwi likaNkulunkulu?

13. Kuyini okungakunceda nxa uhlela ofuna ukukwenza? (Khangela lomfanekiso.)

¹³ Kulokuthi uhle uzame ukwenza konke oyabe ukufundile ngasikhathi sinye, khetha okukodwa kumbe okubili ongaqala ngakho. (Zaga. 11:2) Nanku okungakunceda: Bhala phansi zonke izinto okumele uzilungisise ubusukhetha okukodwa kumbe okubili ongaqala ngakho. Ngemva kwalokho hlela ukwenza okunye esikhathini esizayo. Manje nxa ukhetha ongaqalisa ngakho, kumele ukhethe okunjani?

14. Kuyini ongaqalisa ngakho?

¹⁴ Ungakhetha ukuqala ngokwenza okulula kuwe kumbe lokho obona angathi usilela kukho kakhulu. Nxa usukukhethile ofuna ukuqala ngakho ungachwayisisa emabhukwini ethu usebenzisa iBhuku Lokuchwayisisa LaboFakazi BakaJehova kumbe iWatch Tower Publications Index. Thandaza ucele ukuthi uJehova akunike “isifiso lamandla okwenza okumthokozisayo.” (Flp. 2:13) Ngemva kwalokho usungazama ukwenza lokho  okufundileyo. Nxa ungaphumelela ukwenza oyabe ukukhethe kuqala, uzaba lamandla okuthi wenze lokunye okulandelayo. Kanti njalo nxa ungaphumelela ukuthi ulungisise lapho okumele ulungisise khona kuzakuba lula ukuthi wenze lokunye okumele ukwenze. Ngokwesibonelo, nxa ungenelisa ukulingisela uKhristu kokuthile kungaba lula ukuthi umlingisele lakokunye.

VUMELA ILIZWI LIKANKULUNKULU ‘LISEBENZE KUWE’

15. Abantu bakaJehova batshiyene njani labanye ababala iBhayibhili? (U-1 Thesalonika 2:13)

¹⁵ Abanye abantu sebalibala kanengi sibili iBhayibhili. Kodwa bayakukholwa yini okufundiswa yilo? Bayalivumela yini ukuthi litshintshe indlela abaphila ngayo? Hatshi, abantu abanengi abakulandeli okutshiwo liBhayibhili. Abakwenzayo kutshiyene khatshana lokwenziwa ngabantu bakaNkulunkulu. Senza njengamaKhristu akuqala amukela iBhayibhili “njengelizwi likaNkulunkulu.” Kanti njalo senza konke okusemandleni ethu ukuthi lokho esikubala eLizwini likaNkulunkulu kusebenze kithi.—Bala u-1 Thesalonika 2:13.

16. Kuyini okungasinceda ukuthi senze okutshiwo liLizwi likaNkulunkulu?

¹⁶ Kwezinye izikhathi kunzima ukubala iLizwi likaNkulunkulu lokusebenzisa elikutshoyo. Kungaba nzima lokuthola isikhathi sokulibala. Kwesinye isikhathi singalibala sigijima siswele isikhathi sokucabangisisa ngesikubalayo. Okunye okungenza kube nzima yikunanzelela ukuthi kunengi okumele sikulungisise. Kungelani lokuthi yibuphi ubunzima olabo, uJehova angakuncedisa ukuthi ubunqobe. Kwangathi singavuma ukuncediswa nguJehova ukuze sikwenze okutshiwo liLizwi lakhe, singabi ngabalizwayo besesikhohlwa. Asithandabuzi ukuthi nxa singahlala silibala iLizwi likaNkulunkulu futhi sisenza lokho elikutshoyo sizathokoza kakhulu.—Jak. 1:25.