Ngazalwa ngo-1934 futhi abazali bami bathutha eSwitzerland bayahlala eCanada, edolobheni elilamamayini amanengi okuthiwa yiTimmins elise-Ontario. Kwakungabo-1939 umama eqalisa ukubala imagazini okuthiwa yi-Nqabayokulinda kanye lokungena imihlangano yaboFakazi bakaJehova. Wayesithatha sonke abantwana ahambe lathi futhi kungakayi ngaphi waba nguFakazi kaJehova.

Ubaba wayengafuni ukuthi umama abe nguFakazi, kodwa umama wayelithanda iqiniso futhi wayezimisele ukunamathela kulo. Langeminyaka yabo-1940 ngesikhathi umsebenzi waboFakazi bakaJehova ungavunyelwa eCanada, umama kazange atshiye ukukhonza. Wayemhlonipha ubaba futhi emphatha kuhle lanxa yena ngezinye izikhathi wayemtshela amazwi amzwisa ubuhlungu. Okwakusenziwa ngumama kwasinceda thina abantwana ukuthi lathi silamukele iqiniso. Ngokuhamba kwesikhathi ubaba watshintsha waseqalisa ukusiphatha kuhle futhi lokhu kwasithokozisa kakhulu.

Ngo-1950 ngangena umhlangano owawulesihloko esithi Ukwanda KoMbuso (Theocracy’s Increase) edolobheni leNew York. Umhlangano lo wangikhuthaza ukuthi ngifise ukwenzela uJehova okunengi. Ngahlangana labafowethu labodadewethu ababevela endaweni ezitshiyeneyo futhi ngazizwela ngezami ababefunde eSikolo seGiliyadi bekhuluma izinto ezinhle ezazisenzakala. Lokhu kwenza ngazimisela ukungena enkonzweni yesikhathi sonke. Ngathi ngifika nje ngekhaya ngahle ngafaka isicelo sokuba liphayona lesikhathi sonke. Iwofisi yegatsha yeCanada yangiphendula ingitshela ukuthi ngiqale ngibhabhathizwe. Ngakho ngabhabhathizwa ngo-October 1, 1950. Ngemva kwenyanga eyodwa nje ngaba liphayona lesikhathi sonke njalo kwathiwa  ngiyephayona eKapuskasing. Idolobho lelo lalikhatshana kakhulu lalapho esasihlala khona.

Ngo-1951 iwofisi yegatsha yacela oFakazi abazi isiFrench ukuthi nxa kuvuma bathuthele esabelweni seQuebec lapho okukhulunywa khona isiFrench. Indawo leyo yayilabamemezeli abalutshwana. Ngakhula ngikhuluma isiFrench lesiNgisi, yikho ngavuma ukuya khona kwasekuthiwa ngiye eRouyn. Akulamuntu engangimazi endaweni leyo. Engangilakho yikheli yalapho okwakumele ngiye khona njengoba sengike ngatsho, kodwa konke kwahamba kuhle. Mina loMarcel saba ngabangane. Ngakukholisa ukuphayona eQuebec okweminyaka emine njalo ngokuhamba kwesikhathi ngaba liphayona eliqakathekileyo.

Ngathi ngilokhu ngiseQuebec ngamukela incwadi eyangithokozisa kakhulu. Nganginxuswa eklasini yesi-26 yeSikolo seGiliyadi esasisenzelwa eSouth Lansing, eNew York. Ngagrajuwetha mhlaka 12 February ngo-1956 futhi kwathiwa ngiye elizweni osekuthiwa yiGhana b khathesi eliseWest Africa. Kodwa ngingakayi khona kwakumele ngiqale ngibuyele eCanada okwamaviki amalutshwana ngiyelungisa amaphepha.

Ngacina ngihlale inyanga ezingu-7 eToronto ngoba amaphepha aphuza ukulunga. Ngalesosikhathi ngangihlala lemuli yakoCripps njalo ngajayelana lendodakazi yabo uSheila sacina sesithandana. Ngathi sengifuna ukumcela ukuthi sitshade, iviza yami yaphuma. Mina loSheila sathandaza ngendaba le sasesikhetha ukuthi ngihambe eGhana. Savumelana ukuthi sizabe sibhalelana izincwadi lokuthi sizabona ukuthi ithuba lokuthi sitshade lizavuleka nini. Lokhu kwakungalula sibili, kodwa ngokuhamba kwesikhathi sananzelela ukuthi esakwenzayo kwakuqondile.

Ngaqeda inyanga yonke ngisemangweni ngilubangise e-Accra, eGhana. Ngagada isitimela, ngagada lesikepe kanye lendizamtshina. Ngathi ngifika khona ngaphiwa umsebenzi wokuba ngumbonisi wesigaba. Ngangibhoda ilizwe lonke leGhana leTogoland (esibizwa ngokuthi yiTogo) kanye le-Ivory Coast  (khathesi sekuthiwa yiCôte d’Ivoire). Izikhathi ezinengi ngangihamba ngedwa ngemota engangiyiphiwe egatsheni, i-jeep. Ngangikholisa kakhulu.

Ngempelaviki ngayinye ngangisiba lezinkulumo emihlanganweni yesiqinti. Kwakungela amaWolu eMihlangano Emikhulu. Abazalwane babemisa izigodo besebefulela ngengatsha zezihlahla zelala ukuze abantu bangatshiswa lilanga. Njengoba kwakungelamafriji, izifuyo zesitshebo zazibulawa ngelanga ezazizadliwa ngalo.

Kwakuke kwenzakale izinto ezichazayo emihlanganweni leyo. Komunye umhlangano uHerb Jennings c laye owayelimishinari wathi esenza inkulumo, okuliguqa kwenkomo kwafohla kwabuya lapho esasibuthene khona, kwadlula kugijima phakathi laphakathi kweplathifomu lalapho okwakuhlezi khona abantu. Umfowethu uHerb wama ukukhuluma futhi okuliguqa lokho lakho kwakhanya kungasakwazi lokuthi kuqonde ngaphi. Abazalwane abane babuya bakubamba bakuthwala, baphuma lakho futhi abantu baqakeza.

Phakathi kweviki ngangihamba ezigabeni eziseduze ngitshengisa abantu ifilimu ethi The New World Society in Action. Ngangilengisa ilembu elimhlophe ezigodweni kumbe ezihlahleni ezimbili besengibukelisa abantu khonapho. Abantu babeyithanda kakhulu ifilimu le futhi abanengi babo kwakungokokuqala ukuthi babukele ifilimu. Babesithi bangabona abantu bebhabhathizwa kufilimu baqakeze kakhulu. Ifilimu le yenza abantu bananzelela ukuthi oFakazi bakaJehova bayinhlanganiso esemhlabeni wonke futhi emanyeneyo.

Ngemva kweminyaka engaba mibili ngise-Africa, ngahamba ngayangena umhlangano wezizwe edolobheni leNew York ngo-1958. Ngathokoza kakhulu ukubonana loSheila. Yena wayevela eQuebec lapho ayeliphayona eliqakathekileyo khona. Sasihlala sibhalelana izincwadi, kodwa njengoba khathesi sasesibonene ngamcela ukuthi sitshade, wasevuma. Ngabhalela umfowethu uKnorr d incwadi ngicela ukuthi nxa kuvuma uSheila angene iSikolo seGiliyadi abesebuya e-Africa. Umfowethu uKnorr wavuma futhi uSheila wabuya eGhana. Satshadela e-Accra, mhlaka 3 October, ngo-1959. Sakubona ukuthi uJehova wasibusisa ngenxa yokuthi saqakathekisa umsebenzi wakhe ukwedlula loba yini.

Ngo-1961 sacelwa ukuthi siye elizweni leCameroon. Njengoba kwakuvulwa iwofisi yegatsha entsha  eCameroon, ngangilomsebenzi omnengi kakhulu. Kwakulokunengi okwakumele ngikufunde njengoba ngangiphiwe umsebenzi wokukhangela konke okwakusenziwa egatsheni leli. Ngo-1965 sathola ukuthi uSheila wayezithwele. Kwakunzima ukukwamukela ukuthi sasesizakuba ngabazali. Kodwa sathi sesikwamukele njalo sesilungiselela ukubuyela eCanada, kwenzakala into eyasidanisayo.

USheila waswela. Udokotela wasitshela ukuthi umntanethu wayengumfana. Into le yenzakala eminyakeni edlula engu-50 eyadlulayo kodwa asizange siyikhohlwe. Lanxa sezwa ubuhlungu obukhulu, saqhubeka sisemsebenzini wethu esasiwuthanda.

ECameroon abafowethu babehlala behlukuluzwa ngoba babengangeni kwezombusazwe. Isimo sasisiba nzima kakhulu nxa kulokhetho lokuvotela umongameli. Mhlaka 13 May, ngo-1970 kwenzakala into esasingafisi ukuthi yenzakale, umsebenzi waboFakazi bakaJehova wavalwa elizweni. Uhulumende wasithathela iwofisi yethu yegatsha eyayinhle. Sasilenyanga ezinhlanu nje kuphela siqalise ukusebenzela kuyo. Iviki ingakapheli, amamishinari wonke axotshwa elizweni, kugoqela mina loSheila. Kwakunzima ukwehlukana labafowethu labodadewethu ngoba sasibathanda njalo sasizibuza ukuthi izinto zizasala zibahambela njani.

Inyanga eziyisithupha ezalandelayo saziqeda sisewofisini yegatsha yeFrance. Ngaqhubeka ngisenza konke okusemandleni ami ukuze ngincedise abafowethu eCameroon. Ngomnyaka lowo ngoDecember kwathiwa siye egatsheni leNigeria. Igatsha leli yilo elaselikhangela umsebenzi eCameroon. Abafowethu labodadewethu beNigeria basamukela kuhle futhi sakukholisa ukukhonza siselizweni lelo okweminyaka ethile.

Ngo-1973 sazithola sekumele senze isinqumo esinzima. USheila wayesehlala egula. Sathi siseNew York silande omunye umhlangano waqalisa ukukhala, wasesithi kimi: “Angisakwanisi! Angiselamandla futhi izikhathi ezinengi ngihlezi ngigula.” Sasesiqede iminyaka edlula engu-14 sisonke eWest Africa. Ngangizigqaja ngaye ngoba wayesebenza ngenhliziyo yonke. Loba kunjalo kwasekumele senze utshintsho. Saxoxa ngendaba le futhi sathandaza ngayo kakhulu, sasesicina sikhetha ukuthi sibuyele eCanada, lapho ayengelatshwa ngcono khona. Kwasizwisa ubuhlungu kakhulu ukuma umsebenzi wokuba ngamamishinari lokuphuma enkonzweni yesikhathi sonke.

Sathi sesifikile eCanada, ngathola umsebenzi komunye umngane wami esasilesikhathi eside sisazana. Wayethengisa izimota kwelinye idolobho elisenyakatho yeToronto. Sathola indawo lapho esasingarenta khona, sathenga impahla zendlini ezasezike zasebenza, sasesiqalisa impilo entsha singazange sidale izikwelede. Sakhetha ukuthi singabi lezinto ezinengi, silethemba lokuthi ngelinye ilanga sizabuyela enkonzweni yesikhathi sonke. Kwasimangalisa ukuthi asithathanga isikhathi eside ukuthi sibuyele enkonzweni yesikhathi sonke.

Ngazinikela ukuthi ngeMigqibelo ngibe ngisiyancedisa lapho okwakusakhiwa khona iWolu yeMihlangano Emikhulu eNorval, e-Ontario. Ngokuhamba kwesikhathi ngacelwa ukuthi ngibe ngumbonisi okhangela iWolu yeMihlangano Emikhulu. USheila wayelokhu esiba ngcono njalo sabona ukuthi  wayengenelisa ukwenza umsebenzi lo esasesiwuphiwe. Ngakho ngoJune ngo-1974 sathutha sayahlala eWolu yeMihlangano Emikhulu. Kwasithokozisa kakhulu ukubuyela futhi enkonzweni yesikhathi sonke.

Ngemva kweminyaka emibili saphiwa umsebenzi wokuhambela amabandla, sawamukela umsebenzi lo njengoba uSheila wayelokhu esiba ngcono. Isiqinti esasisihambela sasisesabelweni seCanada okuthiwa yiManitoba njalo endaweni leyo kuyaqanda kakhulu. Sakukholisa kakhulu ukuba labafowethu labodadewethu endaweni leyo ngoba babesithanda. Esakufundayo yikuthi okuqakathekileyo yikuqhubeka sikhonza uJehova kungelani lokuthi singaphi.

Ngo-1978 sacelwa ukuthi sitshiye umsebenzi wokuhambela, siyesebenzela eBhetheli yeCanada. Singakabi lesikhathi eside siseBetheli, ngafunda isifundo esiqakathekileyo kodwa ngasifunda kabuhlungu. Emhlanganweni oqakathekileyo owawuseMontreal ngaphiwa inkulumo eyayithatha ihora lengxenye njalo kwakumele ngiyenze ngesiFrench. Abantu abazange bayikholise inkulumo yami. Kwakunzima ukuthi bayilalele isikhathi sonke leso, yikho omunye umfowethu okuHlangothi Lwenkonzo wangilanda wangeluleka. Kwakumele ukuthi ngabe ngakunanzelela ngalesosikhathi ukuthi angisiyo ngcitshi yokwenza izinkulumo. Kodwa angizange ngikwamukele kuhle okwakhulunywa ngumzalwane lowo. Ubuntu bami lobakhe babungahambelani futhi ngezwa angani ungisolile nje kuphela engazange angincome ngokuhle engangingabe ngikwenzile. Iphutha engalenzayo yikusola umzalwane lo lendlela ayengeluleke ngayo.

Ngemva kwamalanga amalutshwana, omunye umfowethu olilunga leKhomithi Yegatsha wakhuluma lami ngendaba le. Ngavuma ukuthi ngangingasamukelanga kuhle iseluleko futhi ngaxolisa. Ngasuka ngayaxolisa kumzalwane owayengelulekile futhi laye wangixolela. Ngafunda ukuthi kuqakathekile ukuzithoba futhi lokhu angisoze ngafa ngakukhohlwa. (Zaga. 16:18) Sengathandaza kanengi kuJehova ngendaba le futhi ngizimisele ukuvuma nxa ngiselulekwa.

Sengileminyaka edlula engu-40 ngihlala eBhetheli yeCanada. Kusukela ngo-1985 bengilesibusiso sokuba lilunga leKhomithi Yegatsha. NgoFebruary 2021, umkami engangimthanda kakhulu uSheila wasitshiya. Ngiyamkhumbula kakhulu futhi khathesi lami angisaphilanga. Ukusebenzela uJehova kwenza ngingakhathazeki ngezinto ezinengi njalo ngihlala ngithokoza okokuthi ‘anginanzeleli ukuhamba kwensuku.’ (Umtshu. 5:20) Lanxa impilo yami ibigcwele inhlupho, zinengi izinto ezenzakeleyo ebezisenza ngihlale ngithokoza. Ukuqakathekisa uJehova ukwedlula zonke izinto kanye leminyaka engu-70 engiyiqede ngisenkonzweni yesikhathi sonke kungilethele intokozo enkulu. Engikuthandazelayo yikuthi abafowethu labodadewethu abasakhulayo labo baqakathekise ukukhonza uJehova ukwedlula loba yini. Angithandabuzi ukuthi nxa bangenza njalo, uJehova uzababusisa futhi bazayikholisa kakhulu impilo.