1-2. Indlela uJehova asidala ngayo isinceda njani?

 ABANTU bathokoziswa kakhulu yikupha ukwedlula ukwamukela ngoba yiyo indlela uJehova asidala ngayo. (Imiseb. 20:35) Lokhu sekusitsho yini ukuthi asithokozi ngitsho nxa umuntu esinika isipho? Hatshi. Siyathaba sibili nxa umuntu angasinika isipho kodwa okusithokozisa kakhulu yikupha ukwedlula ukwamukela. Indlela le uJehova asidala ngayo iyasinceda. Isinceda njani?

² Indlela le uJehova asidala ngayo yenza senelise ukungezelela intokozo yethu. Nxa sifuna ukuthokoza kakhulu kumele sidinge indlela ezitshiyeneyo esingancedisa ngazo abanye. Sidalwe ngendlela emangalisayo sibili.—Hubo. 139:14.

3. Kungani iBhayibhili lisithi uJehova ‘nguNkulunkulu othokozayo’?

³ IMibhalo yenza singathandabuzi ukuthi ukupha kwenza sithokoze. Yikho iBhayibhili lisithi uJehova ‘nguNkulunkulu othokozayo.’ (1 Thim. 1:11) Nguye owaba ngowokuqala ukwenzela abanye okuhle futhi akulamuntu opha njengaye. Umphostoli uPhawuli wathi: “Siyaphila, siyahamba futhi sikhona” ngenxa yakhe. (Imiseb. 17:28) “Zonke izipho ezinhle lazo zonke izipho ezipheleleyo” zivela kuJehova.—Jak. 1:17.

4. Kuyini okuzasinceda ukuthi sithokoze kakhulu?

⁴ Sonke siyayifuna intokozo esiyithola nxa sincedisa abanye kumbe sibanika izipho. Nxa singalingisela uJehova uNkulunkulu ophanayo sizathokoza. (Efe. 5:1) Esihlokweni lesi sizabona ukuthi singenzani nxa kuyikuthi abanye abasibongi ngalokho esibenzela khona. Esizakufunda kuzasinceda ukuthi sithokoze kakhulu futhi sihlale singabaphanayo.

WOBA NGOPHANAYO NJENGOJEHOVA

5. Yiziphi izinto uJehova asinika zona?

⁵ UJehova utshengisa njani ukuthi unguNkulunkulu ophanayo?  Nanzi ezinye izibonelo: Esokuqala, uJehova uyasinika esikudingayo ukuze siphile. Lanxa singeke sikuthole konke okumnandi lokuhle esingabe sikufuna, siyambonga uJehova ngoba uyasinika ukudla lezigqoko lendawo yokuhlala. (Hubo. 4:8; Mat. 6:​31-33; 1 Thim. 6:​6-8) Kambe uJehova usipha zonke izinto lezi ngenxa nje yokuthi kumele asinike zona? Hatshi akunjalo. Manje kungani esenzela konke lokhu?

6. Sifundani kuMathewu 6:​25, 26?

⁶ UJehova usinika esikudingayo ukuze siphile ngoba uyasithanda. Ake sixoxe ngalokho okwatshiwo nguJesu kuMathewu 6:​25, 26. (Bala.) UJesu wasebenzisa umzekeliso wezinto ezidaliweyo. Wathi ekhuluma ngenyoni wathi: “Kazihlanyeli, kazivuni futhi kazibutheleli ukudla eziphaleni.” Nanzelela ukuthi waqhubeka wathini. Wathi: “UYihlo osezulwini uyazinika ukudla.” Ngemva kwalokho wabuza wathi: “Kanti lina aliqakathekanga kakhulu kulazo yini?” Sifundani kulokho? Izinceku zikaJehova ezithembekileyo ziligugu kakhulu kuye ukwedlula izinyamazana. Nxa uJehova enakekela izinyamazana asithandabuzi ukuthi lathi uzasinakekela. UJehova wenza njengoBaba olendaba lemuli yakhe. Uyasinakekela ngenxa yokuthi uyasithanda.—Hubo. 145:16; Mat. 6:32.

7. Yiphi enye indlela esingalingisela ngayo uJehova? (Khangela lomfanekiso.)

⁷ Singalingisela uJehova ngokuncedisa abanye ngezinto ezitshiyeneyo ngenxa yokuthi siyabathanda. Ngokwesibonelo nxa kulomfowethu kumbe udadewethu oswela ukudla kumbe okokugqoka, kungaba kuhle ukuthi umncede. Nxa ungenza njalo, uJehova uyabe esesebenzise wena ukuthi amncede. Abantu bakaJehova baziwa ngokuncedisa abanye nxa kube lomonakalo. Ngesikhathi somkhuhlane weCOVID-19, abafowethu labodadewethu babencedisana ngokudla lezigqoko langezinye izinto. Abanengi babenikela ngemali ukuze umsebenzi womhlaba wonke uqhubekele phambili. Lokho kwenza kwaba lula ukuthi abafowethu labodadewethu abasemazweni atshiyeneyo bancediswe. Bakwenza sibili okutshiwo kuHebheru 13:16 othi: “Lingakhohlwa ukwenza okuhle lokunika abanye lokho elilakho ngoba imihlatshelo enjalo iyamthokozisa kakhulu uNkulunkulu.”

8. Amandla esiwaphiwa nguJehova asinceda njani? (UFiliphi 2:13)

⁸ Esesibili, uJehova usinika amandla. UJehova ulamandla amakhulu kakhulu kodwa kuyamthokozisa ukuwapha izinceku zakhe  ezithembekileyo. (Bala uFiliphi 2:13.) Sewake wathandaza yini ucela amandla okunqoba isilingo kumbe awokuthi uqinisele ebunzimeni? Mhlawumbe wake wathandaza ucela amandla okuthi wenelise ukwenza lokho okumele ukwenze ngalolosuku. Nxa wakubona ukuthi uJehova wawuphendula umthandazo wakho ungavumelana lomphostoli uPhawuli owabhala wathi: “Ngilamandla okwenza zonke izinto ngenxa yalowo ongipha amandla.”—Flp. 4:13.

9. Singawasebenzisa njani amandla ethu? (Khangela lomfanekiso.)

⁹ Thina kasilamandla amakhulu njengoJehova futhi kasenelisi ukunika abanye amandla. Kodwa singasebenzisa amandla ethu ukuze sibancedise. Ngokwesibonelo nxa ebandleni lethu kulabagugileyo kumbe abagulayo, singabancedisa ngokubenzela imisebenzi yangekhaya kumbe ukuyabathengela izinto abangabe bezifuna. Nxa izimo zethu zivuma singancedisa ngokuyaklina eWolu yoMbuso langokulungisa lokho okuyabe kudinga ukulungiswa. Nxa sisebenzisa amandla ethu ngendlela lezi, siyabe sibenzela okuhle abafowethu labodadewethu.

10. Singawasebenzisa njani amazwi ethu ukuze sincede abanye?

¹⁰ Okunye okungamelanga sikukhohlwe yikuthi esikukhulumayo kungabakhuthaza abanye. Ukhona yini umuntu omcabangayo ongancedakala nxa ungamncoma ngalokho akwenzayo? Ngubani omcabangayo obona angani ufuna ukududuzwa? Nxa bekhona, nanku okunye ongakwenza ukuze ubakhuthaze: Ungabavakatshela kumbe ubafonele loba ubathumezele ikhadi kumbe imeseji. Akudingeki ukuthi ube ligabazi lokukhuluma. Amazwi amalutshwana asuka enhliziyweni ongawatshela umfowethu kumbe udadewethu angamnceda ukuthi aqhubeke ethembekile kumbe ukuthi azwe ngcono.—Zaga. 12:25; Efe. 4:29.

11. UJakhobe 1:5 uthi uJehova wenzani ngokuhlakanipha kwakhe?

¹¹ Esesithathu, uJehova usinika ukuhlakanipha. Umfundi uJakhobe wabhala wathi: “Nxa ekhona phakathi kwenu ongelakho ukuhlakanipha kaqhubeke ekucela kuNkulunkulu ngoba yena ubapha ngesihle bonke futhi engadingi sici.” (Jak. 1:5; amabala angaphansi.) Amazwi la atshengisa ukuthi uJehova kancitshani lokuhlakanipha kwakhe. Uyabapha ukuhlakanipha kwakhe ngesihle bonke abakucelayo. Nanzelela ukuthi nxa uJehova enika abantu ukuhlakanipha ubanika “engelansolo” kumbe “engadingi sici.” Nxa sicela ukuthi asikhokhele kasenzi izithutha kodwa usikhuthaza ukuthi sicele ukuhlakanipha kuye.—Zaga. 2:​1-6.

12. Yiwaphi amathuba esilawo awokwabelana labanye ukuhlakanipha kwethu?

¹² Lathi kumele silingisele uJehova ngokupha abanye ukuhlakanipha. Singakwenza njani lokho? (Hubo. 32:8) Abantu bakaJehova balamathuba  amanengi okwabelana labanye lokho abakufundayo. Ngokwesibonelo, sihlala sifundisa abasanda kuba ngabamemezeli ukuthi bangatshumayela njani. Abadala bayafundisa izinceku ezikhonzayo labafowethu ababhabhathiziweyo ukuthi bayenze kuhle imisebenzi abayiphiwayo ebandleni. Labo abazingcitshi emsebenzini wokwakha lokulungisa izakhiwo zenhlanganiso bayancedisa ekufundiseni labo abayabe besanda kufika ukuthi labo babe zingcitshi ekwenzeni umsebenzi lo.

13. Nxa sifundisa abanye singamlingisela njani uJehova?

¹³ Nxa kulabantu obafundisa ukwenza umsebenzi othile, lingisela uJehova. Khumbula ukuthi uJehova kancitshani lokuhlakanipha kwakhe. Lathi kumele sinike abanye ulwazi kanye lokuhlakanipha, singagodli lutho. Asiyekeli ukunika abanye lonke ulwazi esilalo sisesaba ukuthi bazacina bephiwa umsebenzi esiwenzayo. Nxa kuyikuthi sazifundela sodwa ukwenza umsebenzi othile, akumelanga sizitshele ukuthi asisoze sifundise muntu ngoba sazifundela. Akulamuntu kaJehova okumele abe lomcabango onjalo. Ngakho labo esibafundisayo sifuna ukubanika lonke ulwazi size sibanike “ngitsho lokuphila kwethu.” (1 Thes. 2:8) Sithemba ukuthi labo ‘bazafanela sibili ukufundisa abanye.’ (2 Thim. 2:​1, 2) Nxa sonke singaba ngabantu abaphanayo, sabele abanye ukuhlakanipha kwethu sizathokoza futhi labo bazathokoza.

SINGENZANI NXA SIBONA ANGANI ABANYE ABASIBONGI?

14. Abafowethu labodadewethu bajayele ukwenzani nxa singabenzela okuthile?

¹⁴ Abafowethu labodadewethu bajayele ukubonga nxa kulento enhle esibenzele yona kumbe sibaphe isipho. Bangasithumela umlayezo bebonga kumbe basibonge langezinye izindlela. (Kol. 3:15) Nxa umuntu angasibonga siyathokoza kakhulu.

15. Kuyini okumele sikukhumbule nxa abanye bengasibongi ngalokho esiyabe sibenzele khona?

¹⁵ Kwezinye izikhathi abanye abantu abasibongi ngalokho esiyabe sibenzele khona. Singanika abantu isikhathi sethu kumbe sisebenzise amandla ethu lezinye izinto esingabe silazo ukuthi sibancedise. Kodwa kwezinye izikhathi singasala singakwazi ukuthi bakuthandile yini esibenzele khona. Nxa lokho kungenzakala, kuyini okungasinceda ukuthi singadani? Khumbula amazwi asembhalweni okhokhela isihloko lesi, imiSebenzi 20:35. Okwenza sithokoze nxa sisipha ayisikho ukuthi abantu bayasibonga kumbe hatshi. Singahlala sithokoza nxa sisipha abanye lanxa kungakhanya angathi abasibongi. Ake sibone ukuthi kuyini okungasinceda ukuthi senze njalo.

16. Kuyini okumele sihlale sikukhumbula nxa sincedisa abanye?

¹⁶ Hlala ukhumbula ukuthi nxa usipha abanye uyabe ulingisela uJehova. UJehova unika abantu izinto ezinhle kungelani lokuthi bayambonga kumbe kabambongi. (Mat. 5:​43-48) UJehova usithembisa ukuthi nxa lathi singapha abanye ‘singakhangelelanga ukuthola lutho, umvuzo wethu uzakuba mkhulu.’ (Luk. 6:35) Ngakho ungadani nxa ungenzela omunye umuntu into ethile abeseyekela ukubonga. Kungelani lokuthi abantu bayasibonga kumbe kabasibongi, uJehova kasoze ayekele ukusinika umvuzo ngoba siyabe senzele abanye okuhle futhi singabantu ‘abapha bethokoza.’—Zaga. 19:17; 2 Khor. 9:7.

17. Kuyini okungasinceda ukuthi sihlale sisenzela abanye okuhle? (ULukha 14:​12-14)

¹⁷ Okunye okungasinceda ukuthi silingisele uJehova nxa sisipha abanye yikwenza lokho okubhalwe kuLukha 14:​12-14. (Bala.) Akukubi ukunxusa umuntu kumbe ukumenzela into enhle nxa sikwazi ukuthi laye uyenelisa ukusenzela lokho esimenzele khona.  Lanxa kunjalo, kumele senzeni nxa singananzelela ukuthi izikhathi ezinengi nxa sisipha abanye siyabe sikhangelele ukuthi lathi basiphe? Okungasinceda yikuzama ukwenza lokho uJesu akukhulumayo. Singanxusa umuntu esikwaziyo ukuthi ngeke asenzele lokho esimenzele khona. Lokho kuzasenza sithokoze ngoba siyabe silingisela uJehova. Ukuhlala sicabanga ngalokhu kuzasinceda ukuthi siqhubeke sithokoza lanxa abanye bengayekela ukusibonga ngalokho esiyabe sibenzele khona.

18. Kuyini okungasinceda ukuthi singaboni angathi abanye kababongi?

¹⁸ Ungacabangeli abanye okubi. (1 Khor. 13:7) Nxa umuntu angayekela ukusibonga ngokuhle esiyabe simenzele khona singazibuza ukuthi, ‘Uzimisele ukungabongi yini kumbe ukhohliwe nje?’ Mhlawumbe kukhona okuyabe kwenze umuntu lo wangasibongi ngendlela esiyabe siyikhangelele. Abanye bengabe bekuqakathekisa kakhulu esibenzele khona kodwa kube nzima ukuthi basitshele. Abanye bangabe belenhloni zokuncediswa ikakhulu nxa kudala kwakuyibo ababencedisa abanye. Nxa sibathanda abanye sizacabanga ukuthi kukhona okungabe kwenze bangabongi besesiqhubeka sithokoziswa yikubancedisa.—Efe. 4:2.

19-20. Kungani kuqakathekile ukuthi sibekezele nxa singenzela abanye okuhle? (Khangela lomfanekiso.)

¹⁹ Bekezela. INkosi uSolomoni yathi ibhala ngendaba yokupha yathi: “Phosela isinkwa sakho emanzini ngoba uzaphinda usithole ngemva kwamalanga amanengi.” (Umtshu. 11:1) Amazwi la atshengisa ukuthi abanye bangasibonga ngalokho esiyabe sibenzele khona ngemva kwesikhathi eside kumbe “ngemva kwamalanga amanengi.” Ake sixoxe ngokunye okwake kwenzakala okutshengisa lokho.

²⁰ Eminyakeni eminengi eyadlulayo, enye inkosikazi yombonisi wesiqinti yabhalela omunye udadewethu owayesanda kubhabhathizwa incwadi imkhuthaza ukuthi ahlale ethembekile. Ngemva kweminyaka engaba ngu-8 udadewethu lo wayiphendula incwadi le wathi: “Ngithe ngikubhalele ngikutshele ukuthi ungincede kakhulu eminyakeni yonke le lanxa ungakwazi.” Waqhubeka wathi: “[Amazwi akho] angikhuthaza okuzwayo, kodwa okwangithinta kakhulu  ngumbhalo owangifakela wona futhi angizange ngike ngiwukhohlwe.” a Wathi esechasise obunye ubunzima ayeke wahlangana labo wabhala wathi: ‘Kwezinye izikhathi ngangisizwa kusithi ngikhalale yonke into, ngibeke izikhali phansi ngitshiye ukukhonza uJehova. Kodwa ngangisithi ngingakhumbula umbhalo owangifakela wona ngizwe ngithola amandla ngizitshele ukuthi angisoze ngimtshiye uJehova.’ Waqhubeka wathi: “Eminyakeni yonke le engu-8 into ebinginceda kakhulu yincwadi yakho.” Ubona angani yezwa njani inkosikazi yombonisi wesiqinti ngesikhathi isamukela incwadi le ngemva kwesikhathi eside? Kufanele ukuthi yathokoza kakhulu. Lathi umuntu esiyabe simenzele okuhle angasibonga ngemva kwesikhathi eside kakhulu.

21. Kungani uzimisele ukuqhubeka usenzela abanye okuhle njengoJehova?

²¹ Esihlokweni lesi sibonile ukuthi uJehova wasidala ngendlela emangalisayo ngoba lanxa kusithokozisa ukwamukela, okusithokozisa kakhulu yikupha abanye. Siyathokoza kakhulu nxa sincedisa labo esikhonza labo futhi nxa bangasibonga siyathaba. Kodwa kungelani lokuthi umuntu usibongile kumbe kasibonganga, okusithokozisayo yikuthi senze okuqondileyo. Ungakhohlwa ukuthi kungelani lokuthi abanye ubenzeleni, “uJehova uyenelisa ukukunika okunengi kakhulu.” (2 Imilan. 25:9) UJehova uzakunika okunengi kakhulu ukwedlula lokho wena oyabe ukunike abanye. Kambe ikhona yini intokozo enkulu engedlula ukubhadalwa nguJehova? Ngakho kasizimiseleni ukuqhubeka silingisela uBaba wethu osezulwini ophanayo.