1. Kuyini uJesu asezakwenza?

 SIKULINDELE ngabomvu ukubona iziphrofetho ezitshiyeneyo zigcwaliseka. Sekuseduze ukuthi uJesu ahlulele wonke umuntu osemhlabeni. UJesu watshela abafundi bakhe ukuthi lokhu kungakenzakali, kwakuzakuba ‘lesibonakaliso’ sokuba khona kwakhe “lesesiphetho somumo lo wezinto.” (Mat. 24:3) Isibonakaliso lesi kukhulunywa ngaso kuMathewu 24 lo-25 lakuMakho 13 loLukha 21.

2. Sizaxoxa ngani esihlokweni lesi njalo kuzasinceda ngani ukuxoxa ngakho?

² UJesu wakhuluma umzekeliso wezimvu lembuzi, lowentombi ezihlakaniphileyo leziyizithutha kanye lowamathalenta. Imizekeliso le imumethe izixwayiso ezisinceda sizwisise ukuthi uJesu uzasahlulela ekhangela lokho esikwenzayo. Esihlokweni lesi sizaxoxa ngayo sibone ukuthi isifundisani. Sizaqala ngokuxoxa ngomzekeliso wezimvu lembuzi.

UMZEKELISO WEZIMVU LEMBUZI

3. UJesu uzabahlulela nini abantu?

³ Emzekelisweni wezimvu lembuzi, uJesu wacacisa ukuthi uzakwahlulela abantu kusiya ngokuthi bazilalela yini izindaba ezinhle lokuthi babewasekela yini amaKhristu agcotshiweyo. (Mat. 25:​31-46) Ngesikhathi ‘sokuhlupheka okukhulu’ i-Amagedoni isizaqalisa, uJesu uzakwahlulela abantu. (Mat. 24:21) Ngalesosikhathi uzakwenza lokho okujayele ukwenziwa ngumelusi nxa esehlukanisa izimvu lembuzi. UJesu uzakwehlukanisa abantu abasekela abalandeli bakhe abagcotshiweyo lalabo abangabasekeliyo.

4. U-Isaya 11:​3, 4 utshengisa njani ukuthi uJesu uzabahlulela kuhle abantu? (Khangela lomfanekiso.)

 ⁴ UJehova nguye obeke uJesu ukuthi abe nguMahluleli njalo isiphrofetho esiseBhayibhilini siveza ukuthi uzabahlulela kuhle abantu. (Bala u-Isaya 11:​3, 4.) Ukhangela indlela abantu abaziphatha ngayo labacabanga ngayo, lalokho abakukhulumayo, kugoqela lendlela abaphatha ngayo abafowabo abagcotshiweyo. (Mat. 12:​36, 37; 25:40) UJesu uzabe ebazi labo ababesekela abafowabo abagcotshiweyo bebancedisa emsebenzini wabo. a Enye indlela eqakathekileyo abanjengezimvu abasekela ngayo amaKhristu agcotshiweyo yikutshumayela. Nxa bangaqhubeka besekela abafowabo bakaKhristu bazakwahlulelwa kuthiwe ‘balungile’ njalo bazathola ‘ukuphila okungapheliyo’ emhlabeni. (Mat. 25:46; Isam. 7:​16, 17) Lo ngumvuzo omuhle kakhulu ozatholwa yilabo abaqhubeka beqotho. Amabizo alabo abazaqhubeka bethembekile ngesikhathi sokuhlupheka okukhulu lasemhlabeni omutsha, awasoze akhitshwe “ebhukwini lokuphila.”—Isam. 20:15.

5. Sifundani emzekelisweni wezimvu lembuzi futhi ngobani abanye ongabanceda?

⁵ Tshengisa ukuthi uqotho lokuthi uthembekile. Umzekeliso kaJesu owezimvu lembuzi usebenza kakhulu kulabo abalethemba lokuphila kuze kube nini lanini emhlabeni. Batshengisa ukuthi balokholo ngokusekela abafowabo bakaJesu emsebenzini wokutshumayela, langokubambisana lenceku ethembekileyo lehlakaniphileyo ebekwe nguJesu ukuthi ikhokhele. (Mat. 24:45) Lalabo abalethemba lokuyaphila ezulwini kumele balalele isixwayiso esisemzekelisweni lo. Ngenxa yani? Ngenxa yokuthi uJesu uyahlola indlela abaziphatha ngayo, labakukhulumayo lalokho abakucabangayo. Yikho kuqakathekile ukuthi bathembeke. UJesu wakhuluma leminye imizekeliso emibili exwayisa abagcotshiweyo. Imizekeliso le itholakala kuMathewu 25. Khathesi kasixoxeni ngomzekeliso wentombi ezihlakaniphileyo leziyizithutha.

UMZEKELISO WENTOMBI EZIHLAKANIPHILEYO LEZIYIZITHUTHA

6. Intombi ezihlakaniphileyo zatshengisa njani ukuthi zihlakaniphile? (UMathewu 25:​6-10)

⁶ UJesu wakhuluma umzekeliso wentombi ezilitshumi ezaphuma zisiyahlangabeza umyeni. (Mat. 25:​1-4) Zonke zazifuna ukuhamba laye edilini lomtshado wakhe. UJesu wathi ezinhlanu ‘zazihlakaniphile,’ ezinye ezinhlanu ‘ziyizithutha.’ Ezihlakaniphileyo zazilungiselele. Zabuya lezibane ukuze zikhanyise nxa sekumnyama njalo zazithwele lamanye amafutha ukuze ziqhubeke zikhanyisile nxa umyeni wayengaphuza abuye ebusuku. (Bala uMathewu 25:​6-10.) Yikho-ke umyeni wathi efika, intombi ezihlakaniphileyo zangena laye edilini lomtshado wakhe. Ngendlela efananayo, nxa amaKhristu agcotshiweyo angahlala ethembekile futhi ephapheme uKhristu aze afike, azavunyelwa ukungena loMyeni uJesu eMbusweni wakhe ezulwini. b (Isam. 7:​1-3) Kodwa kwahamba njani ngentombi eziyizithutha?

7. Kwenzakalani ngentombi ezinhlanu eziyizithutha futhi lokho kwabangelwa yini?

⁷ Intombi ezinhlanu eziyizithutha kazizange zenze njengentombi ezihlakaniphileyo. Zazingalungiselelanga ngesikhathi umyeni efika. Izibane zazo zasezizacitsha futhi zazingela amanye amafutha. Zathi zisizwa ukuthi  umyeni useseduze zaphuma zayathenga amafutha. Umyeni wathi efika, zazilokhu zingakaphenduki. Ngakho “intombi ezazizilungiselele zangena laye edilini lomtshado, umnyango wasuvalwa.” (Mat. 25:10) Intombi eziyizithutha zathi seziphendukile sezifuna ukungena edilini lomtshado, umyeni wathi kuzo: “Angilazi.” (Mat. 25:​11, 12) Intombi eziyizithutha zazingalungiselelanga ukulindela umyeni okwesikhathi eside. Abagcotshiweyo bafundani emzekelisweni lo?

8-9. Abagcotshiweyo bafundani emzekelisweni wezintombi? (Khangela lomfanekiso.)

⁸ Hlala uphapheme njalo ulungiselele. Emzekelisweni lo ayisikho ukuthi uJesu wayesithi kulamaqembu amabili abagcotshiweyo, iqembu elizahlala liphapheme njalo lilindile kuze kube sekupheleni komumo lo wezinto, leqembu elizakwehluleka ukuhlala lilindile njalo liphapheme. Kodwa wayechasisa okuzakwenzakala kwabagcotshiweyo nxa bengehluleka ukuhlala belindile futhi bethembekile kuze kube sekucineni. Nxa bangenza njalo, kabasoze bawuthole umvuzo wabo. (Joh. 14:​3, 4) Le akusindaba yokudlala ngayo sibili! Wonke umuntu kumele asilalele isixwayiso esisithola emzekelisweni wentombi ezilitshumi kungelani lokuthi ulethemba lokuphila emhlabeni kumbe ezulwini. Sonke kumele sihlale silungiselele, siphapheme futhi sizimisele ukuqinisela kuze kube sekucineni.—Mat. 24:13.

⁹ Umzekeliso wentombi ezilitshumi ugcizelela ukuthi kuqakathekile ukuthi sihlale siphapheme njalo silungiselele. UJesu wathi eqeda umzekeliso lo wasekhuluma umzekeliso wamathalenta osikhuthaza ukuthi sikhuthale.

UMZEKELISO WAMATHALENTA

10. Izinceku ezimbili zatshengisa njani ukuthi zithembekile? (UMathewu 25:​19-23)

¹⁰ Emzekelisweni wamathalenta uJesu wakhuluma ngenceku ezimbili ezazithembekile enkosini yazo, leyodwa eyayingathembekanga. (Mat. 25:​14-18) Inkosi yazo yathi ingakayi elizweni elikhatshana, yazinika amathalenta futhi le kwakuyinkalakatha yemali.  Izinceku ezimbili zatshengisa ukuthi zithembekile ngokusebenza nzima ukuze zenzele inkosi yazo imali enengi. Izinceku lezi zazikhuthele futhi zayisebenzisa kuhle imali yenkosi. Inkosi yathi isiphenduka yathola imali yayo isiphindwe kabili. Yazincoma izinceku lezi yasisithi ‘kazithokoze layo.’ (Bala uMathewu 25:​19-23.) Inceku yesithathu yona ke? Yenzani ngemali eyayiyiphiwe yinkosi yayo?

11. Kwenzakalani encekwini ‘eyayilivilavoxo’ futhi kungani kwaba njalo?

¹¹ Inceku yesithathu yaphiwa ithalenta elilodwa, kodwa ‘yayilivilavoxo.’ Inkosi yayo yayikhangelele ukuthi isale isenza imali ngethalenta leli kodwa yona yaligqibela. Inkosi yathi isibuyile yafica inceku le ingelalutho ngaphandle kwethalenta elilodwa nje eyayilitshiyelwe. Yayidelela sibili ngoba kayizange ixolise ukuthi yehlulekile ukwenzela inkosi yayo imali enengi kodwa yayitshela ukuthi ‘iyindoda ehluphayo.’ Inkosi kayizange ikuthande okwakwenziwe yinceku le yikho yayithathela ithalenta yayixotsha endlini yayo.—Mat. 25:​24, 26-30.

12. Izinceku ezimbili ezithembekileyo zimela bani?

¹² Inceku ezimbili ezithembekileyo zimela amaKhristu agcotshiweyo athembekileyo. INkosi yawo uJesu iwanxusa ukuthi ‘athokoze layo’ njalo athola umvuzo wawo wokuyaphila ezulwini. Umvuzo lo awuthola ngokuvuswa okubizwa ngokuthi yikuvuswa kwabafileyo kwakuqala. (Mat. 25:​21, 23; Isam. 20:5b) Kodwa lokho inceku eyayilivilavoxo eyakwenzayo kuyisixwayiso kumaKhristu agcotshiweyo. Njani?

13-14. Abagcotshiweyo bafundani emzekelisweni wamathalenta? (Khangela lomfanekiso.)

¹³ Tshengisa ukuthi ukhuthele. Emzekelisweni wamathalenta lasemzekelisweni wentombi ezilitshumi, uJesu wayengatsho ukuthi abagcotshiweyo bazakuba ngamavila. Wayechasisa lokho okwakungenzakala nxa babengahlalela izandla. Babengacina besehluleka ukwenza ukuthi ‘ukubizwa kwabo lokukhethwa kwabo kuqiniseke’ futhi babengasoze bavunyelwe ukungena eMbusweni wamazulu.—2 Phet. 1:10.

¹⁴ Imizekeliso le emibili, owamathalenta  lowentombi ezilitshumi, yenza kucace ukuthi amaKhristu agcotshiweyo kumele ahlale elungiselele futhi ephapheme. Itshengisa lokuthi kumele akhuthale, asebenze nzima. Kungabe kulokunye yini uJesu akukhulumayo ukuze axwayise amaKhristu agcotshiweyo? Ye, kukhona. Amazwi kaJesu akuMathewu 24:​40, 41 amumethe esinye isixwayiso esiya kwabagcotshiweyo.

NGOBANI ‘ABAZATHATHWA’?

15-16. UMathewu 24:​40, 41 utshengisa njani ukuthi abagcotshiweyo kumele bahlale bephapheme?

¹⁵ UJesu wathi engakakhulumi ngemizekeliso le emithathu, wakhuluma ngokwahlulelwa kokucina kwabagcotshiweyo okuzatshengisa ukuthi uJehova uyabamukela yini loba hatshi. Wakhuluma ngamadoda amabili azabe esebenza ensimini labesifazana ababili abazabe bechola elitsheni. Amadoda la ayekhanya esenza umsebenzi ofananayo, labesifazana labo bekhanya besenza owabo ofananayo. Kodwa uJesu wathi: “Omunye uzathathwa, omunye atshiywe.” (Bala uMathewu 24:​40, 41.) Ngemva kwalokho wakhuthaza abalandeli bakhe wathi: “Hlalani lilindile ngoba alikwazi ukuthi iNkosi yenu izakuza ngaliphi ilanga.” (Mat. 24:42) Wakhuluma amazwi ahambelana lalawa ngemva kokulandisa umzekeliso wentombi ezilitshumi. (Mat. 25:13) Wayesitsho into eyodwa yini ngamazwi la? Kukhanya njalo. Wonke amaKhristu agcotshwe nguJehova sibili futhi lathembekileyo yiwo kuphela ‘azathathwa’ amukelwe nguJesu eMbusweni wezulu.—Joh. 14:3.

¹⁶ Hlala uphapheme. Abagcotshiweyo abehluleka ukuhlala bephapheme kabasoze baqoqwe ‘labakhethiweyo.’ (Mat. 24:31) Bonke abantu bakaNkulunkulu, kungelani lokuthi balaliphi ithemba kumele balalele isixwayiso sikaJesu, bahlale bephapheme futhi baqhubeke bethembekile.

17. Kungani kungamelanga sikhathazeke nxa kulabanye uJehova akhetha ukubagcoba khathesi?

¹⁷ Siyayithemba indlela uJehova ahlulela ngayo ngoba simazi kuhle. Asikhathazeki nxa kusiba labanye abathembekileyo abagcotshwa nguJehova khathesi. c Komunye umzekeliso uJesu wakhuluma ngezisebenzi ezaqhatshwa sekungaba lihora lesi-11 ukuthi zizosebenza ensimini yamagilebisi. (Mat. 20:​1-16) Labo abaqhatshwa ntambama baphiwa umholo olingana lowalabo ababeqhatshwe ekuseni. Yikho nxa abagcotshiweyo bangatholakala bethembekile bazaphiwa umvuzo wabo wokuyabusa ezulwini kungelani lokuthi bagcotshwe nini.

LALELA IZIXWAYISO

18-19. Kuyini esikufunde emizekelisweni esixoxe ngayo?

¹⁸ Sixoxe ngani? Umzekeliso wezimvu lembuzi utshengisa ukuthi labo abalethemba lokuphila phakade emhlabeni kumele bahlale bethembekile futhi beqotho kuJehova khathesi lasekuhluphekeni okukhulu. Ngalesosikhathi uJesu uzathi esahlulela abantu akhethe abathembekileyo, besebethola ‘ukuphila okungapheliyo.’—Mat. 25:46.

¹⁹ Sixoxe langemizekeliso emibili exwayisa amaKhristu agcotshiweyo. Emzekelisweni kaJesu wentombi ezilitshumi, ezinhlanu yizo ezatshengisa ukuthi zazihlakaniphile. Zazilungiselele futhi zilindele umyeni kungelani lokuthi wayezafika sikhathi bani. Kodwa eziyizithutha zazingalungiselelanga, yikho umyeni engazange azivumele ukuthi zingene laye edilini lomtshado. Ngakho lathi kumele sihlale sizimisele ukulinda uJesu  aze aqede umumo lo wezinto kungelani lokuthi uzakwenza nini lokho. Emzekelisweni wamathalenta sixoxe ngezinceku ezimbili ezithembekileyo ezazikhuthele. Zayisebenzela nzima inkosi yazo njalo yathokoza ngezazikwenzile. Kodwa inceku eyayilivila yaxotshwa. Lokho kusifundisani? Kumele sihlale sikhuthele emsebenzini kaJehova kuze kube sekucineni. Siphethe ngokuxoxa ngokuthi amaKhristu agcotshiweyo kumele ahlale ephapheme ukuze ‘athathwe’ nguJesu ayebusa lawo ezulwini. AmaKhristu la agcotshiweyo akulindele ngabomvu ‘ukuqoqelwa’ kuJesu ezulwini. Ngemva kwempi ye-Amagedoni azakuba ngumakoti kaKhristu emtshadweni weMvana.—2 Thes. 2:1; Isam. 19:9.

20. UJehova uzabenzelani labo abalalelayo nxa bexwayiswa?

²⁰ Sekuseduze sibili ukuthi uJesu ahlulele wonke umuntu. Kodwa thina akumelanga sesabe. Nxa singaqhubeka sithembekile, uBaba wethu osezulwini osithandayo uzasipha “amandla amakhulu futhi angajayelekanga” ukuze ‘senelise ukuma phambi kweNdodana yomuntu.’ (2 Khor. 4:7; Luk. 21:36) Kungelani lokuthi silethemba lokuphila emhlabeni kuze kube nini lanini kumbe elokuya ezulwini, uJehova uzathokoza kakhulu nxa singalalela izixwayiso ezisemizekelisweni kaJesu. Amabizo ethu ‘azatholakala ebhaliwe ebhukwini’ lokuphila ngenxa yokuthi uJehova ulomusa omkhulu.—Dan. 12:1; Isam. 3:5.