Akumelanga sicabange ukuthi abafundi abangu-70 basebemtshiyile uJesu kumbe ukuthi wayengasabemukeli ngenxa nje yokuthi babengekho esungula iSidlo SeNkosi Sakusihlwa. UJesu wayefuna ukwenza iSidlo sakuqala labaphostoli bakhe kuphela.

UJesu wayebemukela bonke abafundi bakhe, abaphostoli abangu-12 kanye labanye abangu-70. Phakathi kwabafundi bakhe abanengi uJesu wakhetha abangu-12, wasebabiza ngokuthi ngabaphostoli. (Luk. 6:​12-16) UJesu wayeseGalile ngesikhathi ‘ebiza abaliTshumi Lambili’ njalo “wabathuma ukuthi bayetshumayela ngoMbuso kaNkulunkulu basilise labagulayo.” (Luk. 9:​1-6) Ngokuhamba kwesikhathi, wathi eseJudiya ‘wakhetha abanye abangu-70, wasebathuma ngababili.’ (Luk. 9:51; 10:1) Lokhu kutshengisa ukuthi uJesu wayelabafundi ababetshumayela endaweni ezitshiyeneyo.

AmaJuda ayengabafundi bakaJesu ayeqhubeka esenza iPhasika minyaka yonke, mhlawumbe lezimuli zawo. (Eks. 12:​6-11, 17-20) UJesu esezakufa waya eJerusalema labaphostoli bakhe. Kodwa kazange abize bonke abafundi bakhe ababeseJudiya, leGalile, lasePheriya ukuze benze iPhasika bendawonye. Kuyacaca ukuthi uJesu wayefuna ukwenza iSidlo elabaphostoli bakhe kuphela. Wabatshela wathi: “Bengifisa kakhulu ukulidla lani iPhasika leli ngingakahlupheki.”—Luk. 22:15.

UJesu wayelesizathu esihle sokukwenza lokhu. Wayesezakufa ukuze abe ‘yiMvana kaNkulunkulu esusa isono somhlaba.’ (Joh. 1:29) Lokhu kwakuzakwenzakala eJerusalema njengoba kwasekulesikhathi eside abantu benikela khona imihlatshelo eya kuNkulunkulu. Imvana eyayihlatshwa ngama-Israyeli ngePhasika yayiwakhumbuza ukuthi uJehova wayewakhulule eGibhithe. Kodwa ukufa kukaJesu khona kwakuzakwenza okukhulu kakhulu kulalokho. Kwakuzakhulula bonke abantu esonweni lasekufeni. (1 Khor. 5:​7, 8) Okwenziwa nguJesu kwakuzakwenza ukuthi abaliTshumi Lambili babe yisisekelo sebandla lamaKhristu. (Efe. 2:​20-22) Lokhu kuyahambelana lalokho okutholakala ebhukwini leSambulo. Lithi iJerusalema, idolobho elingcwele, ‘lilamatshe ayisisekelo alitshumi lambili’ abhalwe ‘amabizo alitshumi lambili abaphostoli bemvana abalitshumi lambili.’ (Isam. 21:​10-14) Kuyakhanya ukuthi abaphostoli laba abathembekileyo babezakuba lomsebenzi omkhulu ekugcwaliseni inhloso kaNkulunkulu. Lokhu kwenza sizwisise ukuthi yindaba uJesu wakhetha ukuba labo ngePhasika lakhe lokucina langesikhathi esungula iSidlo SeNkosi Sakusihlwa.

Abafundi bakaJesu abangu-70 kanye labanye babengekho eSidlweni lesi. Lanxa kunjalo, sasizanceda bonke abafundi ababezaqhubeka bethembekile. Bonke ababezakuba ngamaKhristu agcotshiweyo babezangena esivumelwaneni sombuso, leso uJesu atshela abaphostoli bakhe ngaso ngalobobusuku.—Luk. 22:​29, 30.