SINGAKUNQOBA NJANI UKUZONDANA?
2 | Ungaphindiseli
Okufundiswa LiBhayibhili:
“Lowo oliphatha kubi lingambuyiseli ngokubi. . . . Nxa kungenzeka futhi kusemandleni enu, hlalani ngokuthula labantu bonke. Lingaziphindiseleli, . . . ngoba kubhaliwe ukuthi: ‘“Ukuphindisela ngokwami; ngizabuyisela mina,” kutsho uJehova.’”—KWABASEROMA 12:17-19.
Ivesi Le Itshoni?
Sijayele ukuzonda nxa umuntu angasiphambanisa, lanxa kunjalo uNkulunkulu kafuni siphindisele. Ufuna sibekezele ngoba usithembisa ukuthi sekuseduze ukuthi aqede konke ukuphathwa kubi.—IHubo 37:7, 10.
Ivesi Le Ingakunceda Njani?
Ukuphindisela kwenza inzondano iqhubeke ikhula. Yikho nxa kulomuntu okucaphulileyo ungaphindiseli. Zibambe futhi wenze ukuthi kube lokuthula. Kwezinye izikhathi kungabangcono ukuthi ukhohlwe ngalokho okwenzakeleyo. (IZaga 19:11) Kodwa kwezinye izikhathi ungakhetha ukuyidlulisela phambili indaba. Ngokwesibonelo kulokunye okungadingeka ukuthi uyekubika emapholiseni loba utshele ezinye iziphathamandla.
Ukuphindisela akuncedi ngalutho
Kodwa ungenzani nxa kungelandlela engcono yokulungisa indaba, kumbe nxa sewenze konke okusemandleni akho ukuthi uzame ukuyilungisa? Lanxa kunjalo ungaphindiseli ngoba lokho kungenza izinto zibe zimbi ngamandla. Nxa ungayekela ukuphindisela uyabe wenze ukuthi ukuzondana kungaqhubekeli phambili. Ungaba leqiniso lokuthi uNkulunkulu uzayilungisa kuhle indaba. IBhayibhili lithi: “Themba kuye, yena uzakwenzela lokhu.”—IHubo 37:3-5.
Nanku Okunye
IBHAYIBHILI LIYAMNTSHINTSHA UMUNTU
Ngangifuna Ukuqeda Ubandlululo
URafika wajoyina iqembu elalifuna ukuqeda ukungaphathwa kuhle kwabantu. Kodwa wafunda eBhayibhilini ukuthi nguMbuso kaNkulunkulu kuphela ongaqeda ubandlululo njalo ulethe ukuthula.
IBHAYIBHILI LIYAMNTSHINTSHA UMUNTU
Uthando Oluqotho Luzayinqoba Nini Inzondo?
Kunzima ukutshiyana lobandlululo. Bukela ividiyo le ukuze ubone ukuthi omunye umJuda lomPhalestina benelisa njani ukunqoba umkhuba lo.
