IBhayibhili Yilo Elingasitshela Okuqondileyo Lokungaqondanga
Ukwenza izinqumo silandela lokho esikucabangayo lokusebenzisa amacebo esiwaphiwa ngabanye ayisikho kodwa okungasinceda ukuthi senze izinqumo ezinhle. IBhayibhili liyasitshela ukuthi kuyini okwenza amacebo abantu ewodwa angaphumeleli. Liphinda lisitshele lendlela engasinceda ukuthi senze izinqumo ezinhle okuyizo ezizakwenza ukuthi sithokoze futhi sisuthiseke empilweni.
KUMELE SIQONDISWE NGUNKULUNKULU
Esebenzisa iBhayibhili, uJehova a uNkulunkulu uyasitshela ukuthi abantu ngeke baziqondise kodwa kumele baqondiswe nguye. (UJeremiya 10:23) Yikho esiqondisa esebenzisa iBhayibhili. UJehova uyabathanda kakhulu abantu futhi kafuni ukuthi benze izinqumo ezizabazwisa ubuhlungu kumbe zibathwalise nzima. (UDutheronomi 5:29; 1 UJohane 4:8) Phela yena unguMdali wethu futhi wazi konke njalo uhlakaniphile, yikho amacebo asinika wona ahlala esinceda. (IHubo 100:3; 104:24) Lanxa kunjalo, uNkulunkulu kabambi muntu ngamandla ukuthi alandele lokho amtshela khona.
UJehova wanika abantu bokuqala u-Adamu lo-Eva konke ababekudinga ukuze bathokoze. (UGenesisi 1:28, 29; 2:8, 15) Waphinda wabanika lemithetho elula ayekhangelele ukuthi bayilalele. Kodwa kazange ababambe ngamandla ukuthi bamlalele, wabanika inkululeko yokuzikhethela ukuthi bazamlalela yini loba hatshi. (UGenesisi 2:9, 16, 17) Kuyadanisa ukuthi u-Adamu lo-Eva abazange bamlalele uNkulunkulu kodwa bazenzela okwabo. (UGenesisi 3:6) Ukungalaleli kwabo kwaphetha ngani? Abantu bayathokoza yini nxa bezenzela lokho abacabanga ukuthi kuqondile? Hatshi. Kusukela kudaladala kuyazikhanyela ukuthi ukungalandeli lokho esikutshelwa nguNkulunkulu akusoze kusenze sithokoze kumbe sibe lokuthula.—UmTshumayeli 8:9.
IBhayibhili lilamacebo angasinceda ukuthi sikhethe kuhle kungelani lokuthi sihlala ngaphi lokuthi sikhuliswe njani. (2 KuThimothi 3:16, 17; khangela ibhokisi elithi “ Ibhuku Labantu Bonke.”) Ake sihlole amanye amacebo aseBhayibhilini.
Thola okunengi ngokuthi kungani kuthiwa iBhayibhili ‘lilizwi likaNkulunkulu.’—1 KwabaseThesalonika 2:13. Bukela ividiyo ethi Ngubani UMlobi WeBhayibhili? etholakala ku-jw.org.
IBHAYIBHILI LISITSHELA LOKHO UNKULUNKULU AKUFUNAYO KITHI
IBhayibhili lisitshela ngendlela uNkulunkulu abesebenzelana ngayo labantu kusukela kudala. Esikuthola kulo kusinceda sizwisise ukuthi kuyini uNkulunkulu akubona kuqondile lokungaqondanga, okusincedayo lalokho okungasilimaza. (IHubo 19:7, 11) Esikufunda eBhayibhilini akuphelelwa yisikhathi ngoba lokhe kusinceda lalamuhla ukuthi senze izinqumo ezinhle.
Ngokwesibonelo zwana icebo elitholakala kuZaga 13:20: “Ohamba labahlakaniphileyo uzahlakanipha, kodwa ozwanana lezithutha uzangena emanyaleni.” Amazwi la lokhe esebenza lalamuhla njengoba nje ayesebenza lakudala. IBhayibhili lilamacebo amanengi asincedayo sibili futhi angaphelelwa yisikhathi.—Khangela ibhokisi elithi “ Amacebo AseBhayibhilini Awaphelelwa Yisikhathi.”
Kodwa engxenye uyazibuza ukuthi kuyini okungenza ungathandabuzi ukuthi okukhulunywa liBhayibhili kungakunceda sibili. Esihlokweni esilandelayo sizahlola okwenzakala kwabanye.
a UJehova libizo likaNkulunkulu.—IHubo 83:18.
