Ekuqaliseni sikhulume ngendaba kaCroesus owanqotshwa yinkosi yasePhesiya ngemva kokukhohliswa ngumphrofethi weDelphi. Kodwa iBhayibhili lona likhuluma ngesiphrofetho esimayelana lenkosi yasePhesiya esagcwaliseka njengoba sinjalo.

Kusasele iminyaka engaba ngu-200 ukuthi inkosi le izalwe, umphrofethi ongumHebheru u-Isaya wamqamba ngebizo uKhurosi waze wachaza ngitsho lendlela ayezanqoba ngayo idolobho elikhulu laseBhabhiloni.

U-Isaya 44:24, 27, 28: “Nanku akutshoyo uJehova, . . . athi enzikini yamanzi, ‘Tshana, ngizakomisa izifula zakho.’ Athi ngoKhurosi, ‘Ungumalusi wami, uzafeza konke engikufunayo; uzakuthi ngeJerusalema, “Kalakhiwe futhi,” ngethempeli athi, “Izisekelo zalo kazakhiwe.”’”

Umlobi wezembali ongumGrikhi uHerodotus wathi ibutho likaKhurosi laphambula amanzi oMfula uYufrathe ayegelezela edolobheni laseBhabhiloni. Icebo likaKhurosi lenza amabutho akhe achapha umfula elubangise edolobheni. Ngemva kokunqoba idolobho leli, uKhurosi wakhulula amaJuda ayethunjiwe eBhabhiloni njalo wawavumela ukuthi ayekwakha kutsha iJerusalema eyayibhidlizwe eminyakeni engu-70 eyadlulayo.

U-Isaya 45:1: “Nanku akutshoyo uJehova kogcotshiweyo wakhe, uKhurosi, engibamba isandla sakhe sokudla ukuba nginqobe izizwe eziphambi kwakhe, ngithathele amakhosi izihlangu zawo, ngivule iminyango phambi kwakhe ukuze amasango angavaleki.”

AmaPhesiya angena ngamasango amakhulu edolobho ayetshiywe engavalwanga. Aluba amaBhabhiloni ayekwazi lokho uKhurosi ayekuhlosile ayezavala wonke amasango ayekhangele emfuleni. Kodwa ayisikho okwenzakalayo, idolobho lalingavikelekanga.

Lesi yisiphrofetho esisodwa phakathi kwezinengi eziseBhayibhilini ezagcwaliseka njengoba zinjalo. a Iziphrofetho eziseBhayibhilini azifanani lalokho okukhulunywa ngabantu okuvela kubonkulunkulu babo bamanga kodwa zona zivela kulowo othi: “Mina ngenza isiphetho sazakale kusukela ekuqaleni; lokuzakwenzakala kusukela ezikhathini zasendulo.”​—U-Isaya 46:10.

 UNkulunkulu weqiniso oyedwa olebizo elithi Jehova nguye ongakwenza lokhu. Ibizo lakhe litsho ukuthi “Wenza Ukuthi Kube Khona.” Lokhu kutsho ukuthi uyakwazi konke njalo uyenelisa ukuqondisa okuzakwenzakala ukuze afeze intando yakhe. Lokhu kwenza singathandabuzi ukuthi konke akuthembisayo kuzagcwaliseka.

Uyafuna ukwazi yini ukuthi iziphrofetho zeBhayibhili zithini ngalezinsuku esiphila kuzo? Eminyakeni engaba ngu-2 000 eyadlulayo iBhayibhili lakhuluma ukuthi kwakuzakuba “lezikhathi ezinzima” “ezinsukwini zokucina.” Kanti zinsuku zokucina kwani? Ayisizo zokucina komhlaba kumbe okwabantu kodwa ngezokucina kobubi, ukucindezelwa kanye lokuhlupheka osekuthwalise abantu amagabha avuzayo okweminyaka leminyaka. Ake sihlole iziphrofetho ezimbalwa ezitshengisa ukuthi ‘sisezinsukwini zokucina.’

U-2 Thimothi 3:1-5: “Ezinsukwini zokucina . . . , abantu bazakuba ngabazithandayo, labathanda imali, labazikhukhumezayo, labazigqajayo, labathukayo, labangalaleli abazali babo, labangabongiyo, labangcolileyo, abangelathando, labangathetheleliyo, labahlebayo, labangazikhuziyo, labalesihluku, labangakuthandiyo okuhle, labalamacebo amabi, labacaphuka ngeze, labaziphakamisayo, labathanda injabulo kulokuthanda uNkulunkulu.”

Banjani abantu lezinsuku? Uyake ukunanzelele yini ukuthi sekulabantu abazithandayo, abathanda imali njalo abazigqajayo? Kufanele ukuthi uyananzelela lokuthi abantu balezinsuku bafuna kulandelwe intando yabo futhi abafuni kuvumelana labanye. Kanti njalo abantwana abasalaleli abazali futhi abantu bathanda injabulo kulokuthanda uNkulunkulu. Izinto ziqhubeka zisiba zimbi insuku ngensuku.

UMathewu 24:6, 7: “Lizakuzwa ngezimpi lamahungahunga ezimpi. . . . Isizwe sizahlasela isizwe, lombuso uhlasele umbuso.”

Kucatshangelwa ukuthi inani labantu abafayo kusukela ngo-1914 ngenxa yezimpi kanye lezingxabano zombusazwe lidlula 100 miliyoni. Inani leli liyedlula inani labantu emazweni amanengi. Akucabange izinyembezi, ukuhlulukelwa kanye lokuhlupheka okubangelwa yikufa kwabantu abanengi kangaka. Izizwe zilibonile yini iphutha lazo zaseziqeda izimpi?

UMathewu 24:7: “Kuzakuba lendlala.”

Inhlanganiso okuthiwa yi-World Food Programme yathi: “Lanxa sisenelisa ukuthola ukudla okungenela abantu bonke emhlabeni, abangu-815 miliyoni​—okutsho umuntu oyedwa kwabangu-9, balala bedle ingqweqwe zomlomo. Kanti njalo umuntu oyedwa kwabathathu ulomkhuhlane obangelwa yikuswela ukudla okwakha umzimba.” Kucatshangelwa ukuthi ngomnyaka kufa abantwana abangaba yi-3 miliyoni ngenxa yendlala.

ULukha 21:11: “Kuzakuba kunengi ukuzamazama komhlaba okukhulu.”

Ngomnyaka kuba lokuzamazama okungaba yi-50 000. Okungaba ngu-100 kutshiya kubhidlize izakhiwo njalo phose ngomnyaka owodwa kuba lokuzamazama okukhulu kakhulu. Kucatshangelwa ukuthi ngo-1975 kusiya ku-2000 ukuzamazama komhlaba kwabulala abantu abangu-471 000.

UMathewu 24:14: “Lelivangeli loMbuso lizatshunyayelwa kuwo wonke umhlaba njengobufakazi kuzo zonke izizwe, besekufika ukucina.”

OFakazi bakaJehova abedlula 8 miliyoni bayatshumayela njalo bayafakaza izindaba ezinhle zoMbuso kaNkulunkulu emhlabeni wonke emazweni angaba ngu-240. Batshumayela izindaba ezinhle emadolobheni, emaphandleni, ezindaweni ezikhatshana, emaguswini kanye lasezintabeni. Isiphrofetho sithi “ukucina” kuzafika nxa uNkulunkulu esesuthiseka ngokuthi umsebenzi usufeziwe. Kuzabe kusitshoni lokhu? Kuzabe kusitsho ukuphela kwemibuso yabantu lokuqalisa kokubusa koMbuso kaNkulunkulu. Yiziphi izithembiso ezizagcwaliseka ngaphansi koMbuso kaNkulunkulu? Qhubeka ubala uzazibonela.