Kungani Sifuna Ukuthi UMbuso KaNkulunkulu Uze?
Ngesikhathi abantu bokuqala bedalwa, uMdali wethu okuthiwa nguJehova nguye owayebusa. Wayebusa ngendlela elothando. Wenzela abantu ikhaya elihle okwakuthiwa yisivande se-Edeni. Wabanika lokudla okunengi. Waphinda wanika abantu umsebenzi omuhle kakhulu. (UGenesisi 1:28, 29; 2:8, 15) Abantu babezahlala ngokuthula aluba bavuma ukuthi uNkulunkulu aqhubeke ebabusa.
U-Adamu lo-Eva bala ukubuswa nguNkulunkulu
IBhayibhili liveza ukuthi ingilosi eyahlamukayo eyacina isibizwa ngokuthi nguSathane uDeveli yathi uNkulunkulu kenelisi ukubusa abantu. Yathi abantu babezathokoza nxa babengazibusa. Kuyadanisa ukuthi u-Adamu lo-Eva balalela okwakukhulunywe nguSathane bahlamukela uNkulunkulu.—UGenesisi 3:1-6; ISambulo 12:9.
Ukuhlamuka kuka-Adamu lo-Eva kwenza balahlekelwa likhaya labo elaliyiPharadayisi kanye lethemba lokuphila phakade bengaguli. (UGenesisi 3:17-19) Labantwana ababezakuba labo babezaguga futhi bafe. IBhayibhili lithi ngenxa yokuthi u-Adamu wona, ‘isono sangena emhlabeni, lokufa kwangena ngesono.’ (KwabaseRoma 5:12) Isono saphinda senza ukuthi ‘umuntu abuse umuntu kube yikulimala kwakhe.’ (UmTshumayeli 8:9, NWT) Ngamanye amazwi, nxa abantu bezibusa kuba lenhlupho ezinengi.
ABANTU BAQALISA UKUZIBUSA
UNimrodi wahlamukela uJehova
Umbusi wokuqala emhlabeni okukhulunywa ngaye eBhayibhilini nguNimrodi. Wala ukubuswa nguJehova. Kusukela ngesikhathi sikaNimrodi, abantu abalezikhundla bebesebenzisa kubi amandla abo. Eminyakeni engaba ngu-3 000 eyadlulayo, iNkosi uSolomoni yathi: “Ngabona izinyembezi zabacindezelwayo babengelabaduduzi; amandla ayekulaba abacindezelayo.”—UmTshumayeli 4:1.
Lokhe kunjalo lalamuhla. Ngo-2009, elinye ibhuku le-United Nations lathi ukubusa kubi “ngokunye okubangela isihluku esenzakala emhlabeni lamuhla.”
SEKUYISIKHATHI SOKULUNGISA IZINTO
Kumele umhlaba ubuswe nguhulumende ongcono kakhulu. UMdali wethu usithembisa uhulumende onjalo.
Labantu ababusa ngcono kakhulu behlulekile ukulungisa inhlupho zabantu
UNkulunkulu ubeke uMbuso ozakhipha bonke ababusi bomhlaba wona ‘ubususima laphakade.’ (UDanyeli 2:44) Lo yiwo uMbuso obulokhu uthandazelwa ngabantu abanengi. (UMathewu 6:9, 10) Kodwa uNkulunkulu ayisuye ozakuba yiNkosi yoMbuso lo. Ukhethe umuntu owake waphila emhlabeni ukuthi abe yiNkosi yoMbuso lo. Ngubani lowomuntu?
Nanku Okunye
IMIBUZO YEBHAYIBHILI IYAPHENDULWA
Ukuthula Emhlabeni—Kuzakubakhona Njani?
Bala isihloko lesi uzwe ukuthi uNkulunkulu uthembisa ukuthi uzakuletha njani ukuthula emhlabeni esebenzisa uMbuso wakhe.
IMIBUZO YEBHAYIBHILI IYAPHENDULWA
UMbuso KaNkulunkulu Yinto Esenhliziyweni Yakho Yini?
Kutshoni ukuthi “uMbuso kaNkulunkulu uphakathi kwenu”?
